युरोप |
युरोप सध्या विक्रमी उष्णतेच्या तडाख्यात सापडला असून स्वित्झर्लंड, फ्रान्स, जर्मनी, ब्रिटन, पोलंड, डेन्मार्कसह अनेक देशांमध्ये तापमानाने सर्व विक्रम मोडले आहेत. गेल्या सात दिवसांत उष्णतेच्या लाटेमुळे १३०० हून अधिक जणांचा मृत्यू झाला असून रस्ते वितळणे, रेल्वेचे रुळ उखडणे, जंगलांना आग लागणे आणि जलाशयांमध्ये बुडून मृत्यू होण्याच्या घटनांमध्ये मोठी वाढ झाली आहे.
फ्रान्समध्ये १९४७ नंतर प्रथमच तापमान ४४.३ अंश सेल्सिअसवर पोहोचले. पोलंडमध्ये १०५ वर्षांचा, तर ब्रिटन आणि डेन्मार्कमध्येही दशकांतील उष्णतेचे विक्रम मोडले गेले. जर्मनीत ४१.७ अंश तापमानाची नोंद झाली असून अनेक रेल्वे सेवा विस्कळीत झाल्या आहेत.
तज्ज्ञांच्या मते, युरोपची घरे आणि पायाभूत सुविधा थंड हवामान लक्षात घेऊन उभारण्यात आल्या आहेत. त्यामुळे तीव्र उष्णतेचा फटका अधिक बसत आहे. केवळ सुमारे २० टक्के घरांमध्ये वातानुकूलित यंत्रणा (एसी) असून, वृद्धांची संख्या जास्त असल्याने मृत्यूचे प्रमाणही वाढले आहे.
हवामान तज्ज्ञांनी या परिस्थितीमागे ‘ओमेगा ब्लॉक’, ‘हीट डोम’ आणि वाढते ग्लोबल वॉर्मिंग ही तीन प्रमुख कारणे असल्याचे स्पष्ट केले आहे. आफ्रिकेकडून येणारे गरम, कोरडे वारे युरोपमध्ये अडकल्याने उष्णतेची लाट अधिक तीव्र झाली आहे.
सध्या काही भागांना थोडासा दिलासा मिळण्याची शक्यता असली, तरी जुलैच्या दुसऱ्या आठवड्यात आणखी एका ‘हीट डोम’चा धोका हवामान तज्ज्ञांनी व्यक्त केला आहे. त्यामुळे पश्चिम आणि मध्य युरोपमध्ये पुन्हा भीषण उष्णतेची लाट येण्याची शक्यता वर्तविण्यात आली आहे.
