आंबेगाव परिसरातून राजस्थानातील आरोपीला अटक; कार, मोबाईलसह ४०.३४ लाखांचा मुद्देमाल जप्त
पुणे | प्रतिनिधी
पुणे शहर गुन्हे शाखेच्या अंमली पदार्थ विरोधी पथक-२ ने मोठी कारवाई करत १ किलो ७९० ग्रॅम अफू जप्त केली असून या कारवाईत ४० लाख ३४ हजार २०० रुपयांचा मुद्देमाल हस्तगत करण्यात आला आहे. या प्रकरणी राजस्थानातील एका आरोपीला अटक करण्यात आली असून त्याच्याविरुद्ध आंबेगाव पोलिस ठाण्यात एनडीपीएस कायद्यान्वये गुन्हा दाखल करण्यात आला आहे.
दि. २६ जून रोजी सहायक पोलीस निरीक्षक नितीनकुमार नाईक व अंमली पदार्थ विरोधी पथक-२ चे अधिकारी शहरात पेट्रोलिंग करत असताना सचाईमाता मंदिर, दुगड शाळेजवळ, आंबेगाव-कात्रज परिसरात एका व्यक्तीकडे अफू असल्याची गोपनीय माहिती मिळाली. त्यानुसार सापळा रचून कारवाई करण्यात आली.
या कारवाईत देवेंद्रसिंह प्रेमसिंह शक्तावत (मूळ रा. भातसोडा गाव, जि. चितोडगड, राजस्थान) याच्या ताब्यातून ३५ लाख ८० हजार रुपयांची १ किलो ७९० ग्रॅम अफू, ५० हजार रुपयांचा मोबाईल फोन, ४ लाख रुपयांची ह्युंदाई कंपनीची चारचाकी आणि ४ हजार २०० रुपये रोख, असा एकूण ४० लाख ३४ हजार २०० रुपयांचा मुद्देमाल जप्त करण्यात आला.
या प्रकरणी आंबेगाव पोलिस ठाणे गुन्हा रजिस्टर क्रमांक २८९/२०२६ अन्वये एनडीपीएस कायद्याच्या कलम ८(क) व १७(ब) अंतर्गत गुन्हा दाखल करण्यात आला असून आरोपीला अटक करण्यात आली आहे.
ही कारवाई पोलीस आयुक्त अमितेश कुमार, सहपोलीस आयुक्त संजय दराडे, अपर पोलीस आयुक्त (गुन्हे) तेजस्वी सातपुते, पोलीस उपायुक्त (गुन्हे) गौहर हसन आणि सहायक पोलीस आयुक्त शंकर खटके यांच्या मार्गदर्शनाखाली करण्यात आली. कारवाईत पोलीस निरीक्षक जीवन माने, सहायक पोलीस निरीक्षक नितीनकुमार नाईक, अफरोज पठाण तसेच अंमली पदार्थ विरोधी पथक-२ मधील अधिकारी व कर्मचाऱ्यांनी सहभाग घेतला.
