पुणे : पुणे महापालिकेच्या मुख्य इमारतीच्या नूतनीकरण आणि सुशोभीकरणासाठी तब्बल १.४४ कोटी रुपयांचे काम हाती घेण्यात आले आहे. या खर्चाला पश्चात मान्यता मिळविण्यासाठी प्रस्ताव स्थायी समितीपुढे ठेवण्यात आला होता, त्यानुसार मान्यात दिली असल्याचे समितीचे अध्यक्ष श्रीनाथ भिमाले यांनी सांगितले.
मुख्य इमारतीचे प्रवेशद्वार, एंट्रन्स लॉबी, सुरक्षा कक्ष, सीसीटीव्ही कक्ष, स्वागत कक्ष, अंतर्गत सजावट, फर्निचर, रंगकाम आणि फरशी बदलण्याची कामे करण्यात येणार आहेत. महापालिका आयुक्तांनी मुख्य इमारतीचा दर्शनी भाग महापालिकेच्या लौकिकास साजेसा करण्याच्या सूचना दिल्यानंतर या कामांची प्रक्रिया सुरू करण्यात आली.
भवन विभागाच्या म्हणण्यानुसार, हे काम विशेष आणि विस्तृत स्वरूपाचे असल्याने नियमित देखभाल-दुरुस्तीच्या निविदांमधून ते करणे शक्य नव्हते. तसेच नव्याने निविदा प्रक्रिया राबविल्यास मोठा कालावधी लागला असता. त्यामुळे कामाची तातडी लक्षात घेऊन प्रक्रिया वेगाने राबविण्यात आल्याचे प्रशासनाचे म्हणणे आहे.
या कामाची मूळ अंदाजित किंमत १ कोटी २९ लाख ५१ हजार रुपये (जीएसटी वगळून) इतकी आहे. त्यावर जीएसटी आणि अन्य खर्च धरून एकूण खर्च १ कोटी ४४ लाख ६१ हजार १७३ रुपयांपर्यंत जाणार आहे.
महापालिकेच्या २०२६-२७ च्या अंदाजपत्रकात मुख्य इमारत आणि पार्किंग व्यवस्थेच्या सुधारणा कामांसाठी ६.८० कोटी रुपयांची तरतूद उपलब्ध असल्याचे प्रशासनाने स्पष्ट केले आहे. या निधीतून संबंधित खर्च भागविला जाणार आहे.
