आम आदमी पक्षाच्या पाठपुराव्याला यश
पुणे:दाट लोकसंख्येच्या सिंहगड रोड ,धायरी गाव परिसरात मध्यरात्री पासुन पहाटे पर्यंत दारु पिऊन धुडगूस घालणाऱ्या तरुणांच्या टोळक्यांचा बंदोबस्त करण्यासाठी पोलिस रस्त्यावर उतरले आहेत.
आम आदमी पक्षाचे शहर अध्यक्ष धनंजय बेनकर यांनी या गंभीर समस्येकडे लक्ष वेधले होते तसेच खासदार सुप्रिया सुळे यांनी याबाबत पोलीस प्रशासनाला तातडीने उपाययोजना करण्याच्या सूचना दिल्या होत्या.
आम आदमी पक्षाच्या पाठपुराव्याला यश मिळाले आहे.मुख्य धायरी गाव रस्त्यावरील आबासाहेब नगर कॉलनी, बेनकर नगर , उंबऱ्या गणपती चौक, धायरी-नऱ्हे रोड आदी परिसरात नांदेड सिटी पोलीस ठाण्याचे पोलीस अधिकारी व सशस्त्र पोलीस जवान रात्रीची गस्त घालत आहेत.
आम आदमी पक्षाचे शहर अध्यक्ष धनंजय बेनकर म्हणाले, गेल्या अनेक दिवसांपासून आबासाहेब नगर, बेनकरवस्ती, सिंहगड रोड परिसरात
सराईत गुन्हेगारांसह तरुणांच्या टोळ्या भर रस्त्यावर मद्यपान करून तसेच अंमली पदार्थांचे सेवन करून रात्रभर जवळजवळ पहाटे तीन साडेतीन वाजेपर्यंत धिंगाणा घालत आहेत.महिलांची छेडछाड करुन आरडाओरडा करत आहेत. त्यामुळे महिला, मुली , प्रवाशांसह स्थानिक रहिवासी त्रस्त झाले आहेत. या परिसरात दहशतीचे वातावरण आहे.खासदार सुप्रिया सुळे यांनी पोलीस आयुक्त तसेच नांदेड सिटी पोलीसांकडे याबाबत तक्रार केली होती.तसेच आम आदमी पक्षाच्या वतीने निवेदने दिली होती.याची दखल घेत नांदेड सिटी पोलीसांनी रात्री पासुन पहाटे पर्यंत या परिसरात दर दीड तासाला गस्त सुरू केली आहे.त्यामुळे या परिसरातील उनाड तरुणांच्या टोळ्या गायब झाल्या आहेत. त्याबद्दल आबासाहेब नगर कॉलनी परिसरातील नागरिकांनी खासदार सुप्रिया सुळे , पोलीस आयुक्त अमितेशकुमार ,नांदेड सिटी पोलीस स्टेशनचे वरिष्ठ पोलीस निरीक्षक अतुल बोस यांना धन्यवाद दिले आहेत.
धायरी गावात इतर सुद्धा ठिकाणी कुठे असा त्रास होत असेल तर नागरिकांनी पोलिसांकडे तसेच आम आदमी पक्षाकडे तक्रार करावी. त्यांची नावे नाव गुप्त ठेवण्यात येतील असे आवाहन आम आदमी पक्षाचे शहर अध्यक्ष धनंजय बेनकर यांनी केले आहे.
