पुणे- आळंदी पोलिसांनी चऱ्होली खुर्द परिसरात कारवाई करत १०५ लिटर गावठी हातभट्टीची दारू जप्त केली असून एका महिलेविरुद्ध महाराष्ट्र दारूबंदी अधिनियमांतर्गत गुन्हा दाखल केला आहे.
पोलिसांनी दिलेल्या माहितीनुसार, आळंदी पोलीस ठाण्यात गुन्हा क्रमांक १९३/२०२६ महाराष्ट्र दारूबंदी अधिनियम कलम ६५ (ई) अन्वये नोंद करण्यात आला आहे. ही कारवाई ३० मे २०२६ रोजी सकाळी सुमारे ७.२० वाजण्याच्या सुमारास मौजे चऱ्होली खुर्द, ता. खेड, जि. पुणे येथील ज्ञानसागर मंगल कार्यालयाच्या पाठीमागील मोकळ्या जागेत करण्यात आली.
या प्रकरणी पोलीस शिपाई रामदास शेवराव दहिफळे (बकल क्रमांक २०१२), नेमणूक आळंदी पोलीस ठाणे, यांनी फिर्याद दिली आहे.
पोलिसांनी निर्मला संभा रजपत (वय ५८, रा. वडगाव रोड, ज्ञानसागर मंगल कार्यालयामागे, चऱ्होली खुर्द, ता. खेड, जि. पुणे) यांना ताब्यात घेतले. त्यांच्या ताब्यातून सुमारे ९ हजार २५० रुपये किमतीची १०५ लिटर गावठी हातभट्टीची तयार दारू तीन कॅनमध्ये आढळून आली. बेकायदेशीररीत्या दारू साठवून ठेवल्याप्रकरणी त्यांच्याविरुद्ध गुन्हा दाखल करण्यात आला आहे.या प्रकरणाचा पुढील तपास पोलीस उपनिरीक्षक दूधमल पोडवा यांच्या मार्गदर्शनाखाली सुरू आहे.
सिग्मा चौकात ५० लिटर गावठी दारू जप्तदाखल
महाळुंगे परिसरातील सिग्मा चौक येथे बेकायदेशीरपणे गावठी हातभट्टीची दारू विक्री करणाऱ्या व्यक्तीवर दक्षिण महाळुंगे एमआयडीसी पोलिसांनी कारवाई करत महाराष्ट्र दारूबंदी कायद्यान्वये गुन्हा दाखल केला आहे. मात्र पोलिसांची चाहूल लागताच संबंधित आरोपी घटनास्थळावरून फरार झाल्याने त्याचा शोध सुरू करण्यात आला आहे.
दक्षिण महाळुंगे एमआयडीसी पोलीस ठाण्यात गुन्हा क्रमांक ४५५/२०२६ महाराष्ट्र दारूबंदी कायदा कलम ६५ (ई) अन्वये नोंदविण्यात आला आहे. ही कारवाई शुक्रवारी (दि. ३० मे) सायंकाळी सुमारे ५.२० वाजण्याच्या सुमारास सिग्मा चौक, महाळुंगे येथे करण्यात आली.
या प्रकरणी पोलीस शिपाई रविकिरण सूर्यकांत जगताप यांनी फिर्याद दिली असून दुरेश रमेश राठोड (वय ३३, रा. सिग्मा चौक, महाळुंगे) याच्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी स्वतःच्या आर्थिक फायद्यासाठी बेकायदेशीररीत्या गावठी हातभट्टीची दारू विक्री करत होता. त्याच्याकडे सुमारे ५० लिटर गावठी दारू आढळून आली असून तिची किंमत अंदाजे पाच हजार रुपये असल्याचे सांगण्यात आले. पोलिसांनी कारवाईसाठी धाड टाकताच आरोपीने घटनास्थळावरून पलायन केले.
दरम्यान, परिसरात अवैध दारू विक्री व हातभट्टी व्यवसायाविरोधात पोलिसांनी मोहीम तीव्र केली असून फरार आरोपीचा शोध घेण्यासाठी पथके कार्यरत करण्यात आली आहेत. या प्रकरणाचा पुढील तपास दक्षिण महाळुंगे एमआयडीसी पोलीस ठाण्याचे अधिकारी करीत आहेत.
