पुणे : देशभरात गाजत असलेल्या ‘नीट’ परीक्षा घोटाळ्याचे पडसाद सोमवारी झालेल्या महापालिकेच्या सर्वसाधारण सभेत उमटले. सरस्वतीच्या मंदिरातच भ्रष्टाचाराचा चिखल साचल्याचा आरोप करत काँग्रेस आणि राष्ट्रवादी काँग्रेस (शरद पवार पक्ष) यांनी भाजपवर जोरदार हल्लाबोल केला. गोंधळामुळे सभागृहातील वातावरण काही काळ तंग झाले होते.
नीट पेपरफुटी प्रकरणी पुण्यातील मॉडर्न कॉलेजच्या प्राध्यापिका मनीषा मांढरे यांना अटक झाल्यानंतर हा मुद्दा अधिकच तापला. या प्रकरणात केंद्रीय अन्वेषण विभागाने (सीबीआय) कारवाई केली असून, मांढरे या ज्या मॉडर्न कॉलेजमध्ये कार्यरत आहेत, त्या कॉलेजच्या प्राचार्या निवेदिता एकबोटे या भाजपच्या नगरसेविका आणि शिक्षण समितीच्या सदस्या आहेत. त्यामुळे सभागृह सुरू होताच काँग्रेसच्या नगरसेवकांनी आक्रमक भूमिका घेत घोषणाबाजी सुरू केली.
“सरस्वतीच्या मंदिरात कळेना चोर कुठले, साव कुठले; लक्ष्मीच्या दर्शनानेच परीक्षेचे पेपर फुटले,” अशा घोषणा देत शिक्षण मंत्र्यांच्या राजीनाम्याची तसेच मॉडर्न कॉलेजची मान्यता रद्द करण्याची मागणी करण्यात आली. विरोधकांनी प्राचार्या एकबोटे यांच्या राजीनाम्याचीही मागणी लावून धरत त्यांच्या समोरच ठिय्या आंदोलन केले. त्यामुळे सभागृहात मोठा गोंधळ निर्माण झाला.
या गोंधळाला भाजपच्या नगरसेवकांनीही जोरदार प्रत्युत्तर दिले. भाजपचे नगरसेवक पुनीत जोशी यांनी “सर्वाधिक खोटे डॉक्टर काँग्रेसच्या काळात तयार झाले,” असा आरोप करत विरोधकांवर निशाणा साधला. तर स्वरदा बापट यांनी सभागृहाचा वेळ वाया जात असल्याचे सांगत कामकाज सुरळीत चालू देण्याची मागणी केली.
दरम्यान, काँग्रेसने या विषयावर सभागृहात सविस्तर चर्चा व्हावी, अशी सूचना मांडली. मात्र, ती फेटाळण्यात आल्याने मतदान घेण्याचा आग्रह धरला गेला. अखेरीस झालेल्या मतदानात सत्ताधाऱ्यांच्या बहुमतामुळे ही मागणी नामंजूर करण्यात आली.
सोमवारी झालेल्या या सर्वसाधारण सभेत ‘नीट’ घोटाळ्यावरून महाविकास आघाडीतील काँग्रेस आणि राष्ट्रवादी काँग्रेस (शरद पवार पक्ष) एकत्र आल्याचे चित्र दिसले. विद्यार्थ्यांच्या भवितव्याशी खेळ करणाऱ्यांवर कठोर कारवाई करावी, अशी मागणी करत विरोधकांनी सभागृहात जोरदार घोषणाबाजी केली. या गोंधळामुळे काही काळ कामकाज विस्कळीत झाले.
