राष्ट्रवादी काँग्रेसचे नेते नवाब मलिक यांना शुक्रवारी जामीन मिळाला. सर्वोच्च न्यायालयाने प्रकृतीच्या कारणास्तव त्यांना 2 महिन्यांसाठी हा दिलासा दिला.
नवाब मलिक गत फेब्रुवारी 2022 पासून तुरुंगात होते. त्यांनी मुंबई उच्च न्यायालयात जामिनासाठी याचिका दाखल केली होती. पण हाय कोर्टाने त्यांची याचिका धुडकावून लावली होती. त्याविरोधात त्यांनी सुप्रीम कोर्टात धाव घेतली होती. त्यावर शुक्रवारी सुनावणी झाली. या सुनावणीत अंमलबजावणी संचालनालयाने (ईडी) त्यांच्या जामिनावर कोणतीही हरकत घेतली नाही. त्यामुळे न्यायमूर्ती अनिरुद्ध बोस व न्यायमूर्ती बेला एम त्रिवेदी यांच्या द्विसदस्यीय खंडपीठाने त्यांना जामीन मंजूर केला.
मलिक यांची एक किडनी निकामी
नवाब मलिक यांची एक किडनी निकामी झाली आहे. सध्या ते एकाच किडनीवर आहेत. त्यांच्यावर उपचार सुरु आहेत. नवाब मलिक हे सध्या कुर्ला येथील क्रिटी केअर रूग्णालयामध्ये दाखल आहेत. मात्र किडनी ट्रान्सप्लांटसाठी त्यांना अन्य मोठ्या रूग्णालयात उपचार घ्यायचे आहेत, अशी माहिती त्यांनी कोर्टाला दिली होती.
नवाब मलिकांना अटक का झाली होती?
नवाब मलिक यांना मनी लाँड्रिंग प्रकरणात अटक झाली होती. मुंबईतील कुर्ला येथील भूखंड आर्थिक गैरव्यवहार प्रकरणात त्यांच्यावर गंभीर आरोप झाले होते. या प्रकरणी अटक करण्यात आलेल्या इक्बाल कासकरच्या चौकशीत नवाब मलिक यांचे नाव समोर आले होते. 23 फेब्रुवारी 2022 रोजी त्यांना अटक करण्यात आली होती. तेव्हापासून ते तुरुंगात होते. ईडीने या प्रकरणी अनेक ठिकाणी छापेमारी केली होती.
मलिक यांच्यावर हसिना पारकर यांच्याकडून जमीन खरेदी केल्याचा आरोप
नवाब मलिकांनी अंडरवर्ल्ड डॉन दाऊद इब्राहिमची बहीण हसिना पारकर हिच्याकडून कुर्ल्यातील गोवा कंपाऊंडची 3 एकर जमीन खरेदी केल्याचा आरोप आहे. यासाठी त्यांनी केवळ 55 लाख रुपये दिले होते, ज्याची सध्याची किंमत सुमारे 300 कोटी आहे.
