पुणे, : पिंपरी विभागात नुकत्याच झालेल्या महावितरणच्या मोहिमेत सांगवी, ताथवडे, चिंचवड, दापोडी, हिंजवडी आदी परिसरात तब्बल 30 लाख 50 हजार रुपयांची वीजचोरी उघडकीस आली असून दुसर्‍या मोहिमेत पिंपरी गावातील विविध ठिकाणचे 672 अवैध वीजजोड पोलीस बंदोबस्तात तोडण्यात आले आहे.
दरम्यान, अवैध वीजजोड तोडल्यानंतर अधिकृत वीजजोडणी घेण्यासाठी नागरिकांनी तयारी दर्शविल्याने महावितरणकडून नवीन वीजजोडणी देण्याची प्रक्रिया सुरु करण्यात येत आहे.
पिंपरी विभागात सांगवी, ताथवडे, चिंचवड, काळेवाडी, दापोडी, हिंजवडी, वाल्हेकरवाडी या विविध परिसरात विभागस्तरावरून वीजमीटर तपासणीची विशेष मोहिम घेण्यात आली व वीजवापर संशयास्पद असणार्‍या 170 वीजमीटरची तपासणी करण्यात आली. यात सुमारे 30 लाख 50 हजार रुपयांच्या विजेची 35 ठिकाणी चोरी तर 3 ठिकाणी अनधिकृत वापर उघडकीस आला.
यासोबतच खराळवाडी उपविभागातील पिंपरी गावामध्ये भाटनगर, आंबेडकरनगर लिंक रोड, भीमनगर, पिंपरी भाजीमंडई, सुभाषनगर, आंबेडकर कॉलनी, निराधारनगर आदी परिसरात पोलीस बंदोबस्तात वीजचोरीविरोधी मोहिम राबविण्यात आली. यात 672 ठिकाणी थेट वीजचोरी सुरु असलेले अवैध वीजजोड तोडण्यात आले तर तीन ठिकाणी वीजमीटर असतानाही वीजचोरी सुरु असल्याचे दिसून आले. पोलीस विभागाच्या सहकार्याने झालेल्या या कारवाईत सुमारे 900 ते 1000 नागरिकांनी अधिकृत नवीन वीजजोडणी घेण्याची तयारी दर्शविली आहे. महावितरणकडून या नागरिकांना नियमानुसार नवीन वीजजोडणी देण्याची प्रक्रिया सुरु करण्यात येत असून आवश्यक कागदपत्र व अर्ज आदीबाबत माहिती देण्यात आली आहे.
पिंपरी विभागातील या दोन्ही मोहिमेत मुख्य अभियंता श्री. रामराव मुंडे, अधीक्षक अभियंता श्री. महेंद्ग दिवाकर, कार्यकारी अभियंता श्री. धनंजय औंढेकर सहभागी झाले होते. तसेच अतिरिक्त कार्यकारी अभियंता सर्वश्री रवींद्ग खडक्कर, धवल सावंत, सतीश सरोदे, मंगेश साळुंके आदींसह सुमारे 95 अभियंते, अधिकारी, कर्मचारी सहभागी झाले होते.
