पुणे-रुग्णालयात उपचाराकरिता दाखल असलेल्या ८६ वर्षीय रुग्णाच्या अक्समात मृत्यूनंतर नातेवाईकांना याप्रकारास रुग्णालय जबाबदार असल्याचा आराेप करत रुग्णालयाची तोडफोड करुन रुग्णालयातील कर्मचाऱ्यांना धक्काबुक्की केल्याची घटना भारती हाॅस्पिटलमध्ये घडली. याप्रकरणी रुग्णालयाचे डाॅक्टरांनी आराेपी विराेधात पाेलिसांकडे तक्रार दाखल केल्यानंतर, भारती विद्यापीठ पोलिसांनी तीन महिलांसह एकूण सहा नातेवाईकांविरुद्ध गुन्हा दाखल केला.दरम्यान भारती हॉस्पिटल बाबत रुग्णांच्या आणि त्यांच्या नातेवाईकांच्या तक्रारी वाढत असल्याचे दिसते आहे मात्र कायद्याने वैद्यकीय क्षेत्राला दिलेले संरक्षण आणि हतबल अवस्थेत असलेले रुग्ण अथवा नातलग भारती हॉस्पिटल मधील हम करे सो वृत्तीपुढे हताश होताना दिसत आहेत .असेही यावेळी येथे अनेकांनी नमूद केले.
दरम्यान रुग्णालयाची तोडफोड करुन रुग्णालयातील कर्मचाऱ्यांना धक्काबुक्की केल्याप्रकरणी डाॅ. अंकिता अर्पित ग्रोवर (वय- ३६) यांनी भारती विद्यापीठ पोलिस ठाण्यात आराेपी विराेधात फिर्याद दिली आहे. त्यांनी दिलेल्या तक्रारीनुसार, महाराष्ट्र वैद्यकीय संस्था अधिनियम, तसेच रुग्णालयातील कर्मचाऱ्यांना धक्काबुक्की केल्याप्रकरणी गु्न्हा दाखल करण्यात आला आहे. पोलिसांनी दिलेल्या माहितीनुसार, पुणे-सातारा रस्त्यावरील भारती हाॅस्पिटल रुग्णालयात तेजराज जैन (वय ८६) यांना उपचारासाठी दाखल करण्यात आले हाेते. परंतु उपचारादरम्यान अचानक त्यांचा मृत्यू झाला.
रुग्णालयाच्या बेजबाबदारपणामुळे जैन यांचा मृत्यू झाल्याचा आरोप करत त्यास रुग्णालय प्रशासनच जबाबदार असल्याचे सांगत मयताच्या नातेवाईकांनी रुग्णालयातील बाह्यरुग्ण विभागाच्या परिसरात आरडाओरड करत गोंधळ घालण्यास सुरुवात केली. त्यांना रुग्णलायातील सुरक्षारक्षक आणि कर्मचाऱ्यांनी समजावून सांगण्याचा प्रयत्न केला.परंतु नातेवाईकांनी रुग्णालयाचे सुरक्षारक्षक तृप्ती लोखंडे, श्रीदेवी डोईफोडे, निर्मला लष्कर, तसेच रुग्णलायातील कर्मचारी सुनील दाते, अतुल शिंदे, चैतन्य दधस, प्रशांत ओव्हाळ यांना दमबाजी करत शिवीगाळ करुन धक्काबुक्की केली.असा आरोप ठेवण्यात आला आहे.
रुग्णालयात आरडाओरडा करुन त्यांनी लाकडी स्टुल रुग्णलयातील इलेक्ट्रीक पॅनेल रुमच्या केबीनच्या काचेवर जाेरात फेकून मारत ताेडफाेड केली व शांततेचा भंग करुन दहशत निर्माण केली. या घटनेची माहिती मिळताच स्वारगेट विभागाचे सहायक पोलिस आयुक्त राहुल आवारे, वरिष्ठ पोलिस निरीक्षक दशरथ पाटील यांनी घटनास्थळी भेट दिली. सहायक पोलिस निरीक्षक स्नेहल थोरात याबाबत पुढील तपास करत आहेत.
