पूंछ-जम्मू-काश्मीरच्या पूंछमध्ये गुरुवारी दुपारी ३:४५ वाजता दबा धरून बसलेल्या अतिरेक्यांनी सैन्य तुकडीवर हल्ला केला. यात ५ जवान शहीद झाले. दोन जखमी आहेत. अधिकाऱ्यांनुसार, अतिरेक्यांनी दोन शहीद जवानांच्या मृतदेहांची विटंबना केली. अतिरेक्यांसोबतच्या मोहिमेसाठी दोन वाहनांतून जवान जात होते. याचदरम्यान अतिरेक्यांनी सुरनकोट भागातील डेरा की गली व बुफलियाज यादरम्यान वळणावर हल्ला केला. हल्ल्याची जबाबदारी लष्कर-ए-तोयबाशी संबंधित संघटना अँटी फॅसिस्ट फ्रंटने घेतली आहे. संरक्षण प्रवक्ते ले. कर्नल सुनील बरतवाल म्हणाले, हल्ल्यानंतर सुरक्षा दलांनी शोधमोहीम सुरू केली आहे. रात्री उशिरापर्यंत अतिरेक्यांना घेरण्याचे प्रयत्न सुरू होते. जम्मू-काश्मीरचे माजी डीजीपी एस. पी. वैद्य म्हणाले, हा पाकिस्तानकडून केलेला सुनियोजित हल्ला वाटतो.
तुकडीने अचानक झालेल्या हल्ल्याला प्रत्युत्तरही दिले..लष्करी सूत्रांनुसार, डेरा की गली भागात बुधवारी रात्रीपासून संयुक्त शोधमोहीम सुरू होती. याचदरम्यान तेथे चकमक सुरू झाली. त्यानंतर राष्ट्रीय रायफल्सची एक तुकडी मदतीसाठी रवाना झाली. या पथकात जिप्सी व एक ट्रक होता. मार्गात एका वळणावर दबा धरून बसलेल्या अतिरेक्यांनी त्यांच्यावर हल्ला केला. अचानक सुरू झालेल्या अंधाधुंद गोळीबारात ७ जवानांना गोळ्या लागल्या. इतर जवानांनी प्रत्युत्तरात गोळीबार केला. काही वेळापर्यंत समोरासमोरची लढाईही झाली. सैनिकांना चांगल्या पोझिशनसाठी पांगावे लागले. याचदरम्यान शहीद झालेल्या दोन सैनिकांच्या मृतदेहांची अतिरेक्यांनी विटंबना केली.