मुंबई : मलबार हिल विधानसभा मतदारसंघाचे आमदार आणि या मतदारसंघाचे येत्या विधानसभा निवडणुकीसाठी महायुतीचे अधिकृत उमेदवार मंगल प्रभात लोढा यांच्याद्वारे आज ‘प्रोफेशनल मीट’ या कार्यक्रमाचे आयोजन करण्यात आले होते. भारतीय जनता पक्षाचे राष्ट्रीय अध्यक्ष जे पी नड्डा यांच्या प्रमुख उपस्थितीत चर्चगेट येथील गरवारे क्लबमध्ये सदर कार्यक्रम संपन्न झाला.
व्यावसायिक, वकील, डॉक्टर, एमबीए, इंजिनीयर, सीए अश्या विविध पेशातील तसेच निरनिराळ्या क्षेत्रात कार्य करणाऱ्या आणि आपल्या देशाच्या प्रगतीसाठी योगदान देणाऱ्या नागरिकांची भेट घेणे, त्यांच्या योगदानाचा सन्मान करणे हे या कार्यक्रमाचे उद्दिष्ट होते.
या कार्यक्रमात बोलताना भाजपाचे राष्ट्रीय अध्यक्ष आणि केंद्रीय मंत्री जे पी नड्डा यांनी पंतप्रधान नरेंद्र मोदींच्या नेतृत्वावर विश्वास ठेवण्याचे आणि महाराष्ट्रात भाजपाला मतदान करण्याचे आवाहन केले.
यावेळी बोलताना ते म्हणाले, “आज देशाच्या प्रत्येक नागरिकाला सक्षम बनवण्यासाठी मोदी सरकार काम करत आहे, आणि या योजनांचा प्रत्यक्ष फायदा लाखो कुटुंबांना होत आहे. पूर्वी विभाजनाचे, जातीपातीचे राजकारण होते. आज विकासाचे राजकारण आहे. संपूर्ण जगातील बलाढ्य देशांच्या अर्थव्यवस्था डळमळीत झालेल्या असताना आज भारताची अर्थव्यवस्था स्थिर आणि सक्षम आहे व याची दाखल जगाने घेतली आहे.
पंतप्रधान नरेंद्र मोदींच्या निर्णयामुळे दारिद्र्यरेषेखाली असलेल्या लोकांचा टक्का १% पेक्षा कमी झाला आहे. प्रधानमंत्री गरीब कल्याण अन्न योजना आणि आयुष्मान भारत यांसारख्या महत्त्वाच्या योजनांमुळे २५ कोटी लोकांना गरिबीच्या रेषेखालील जीवनातून बाहेर काढण्यात यश आले आहे. ६ कोटी ५३ लाख लोकांना अन्नसहाय्य मिळालं असून, ५५ कोटी लोकांना आयुष्मान भारत योजनेतून आरोग्य विम्याचा लाभ मिळाला आहे. प्रधानमंत्री आवास योजनेच्या माध्यमातून आज ४ कोटी घरांचे निर्माण कार्य झाले आहे. यात महाराष्ट्रात २८ लाख घरे तयार झाली आहेत. आज देशभरात ११ कोटी शौचालयांची निर्मिती झाली, घरामध्ये गॅस आले, गावागावात इंटरनेट मिळाले आणि देश प्रगतीच्या वाटेवर धावू लागला. आज आपल्या देशाच्या प्रगतीला अधिक वेग द्यायचा असेल, आपल्या महाराष्ट्राला अधिक सक्षम करायचे असेल, तर पंतप्रधान नरेंद्र मोदी यांच्या नेतृत्वाला आणि भाजपाला मतदान करणं अनिवार्य आहे!”
मलबार हिल मतदारसंघातील भाजपाचे अधिकृत उमेदवार लोढा यांच्याबद्दल बोलताना जे पी नड्डा म्हणाले, “आज कोणत्याही मतदारसंघातून ६ वेळा निवडून येणे हे काही सोपे काम नाही. मंगलजींचा विजय हे त्यांना जनतेने दिलेल्या आशीर्वादाचे आणि विश्वासाचे प्रतीक आहे. कौशल्य विकासासाठी, मुंबईच्या विकासासाठी, मलबार हिलच्या प्रगतीसाठी त्यांनी केलेले कार्य अतिशय उल्लेखनीय आहे. येत्या विधानसभा निवडणुकीत पुन्हा एकद आपण त्यांच्यावर विश्वास दाखवावा ही विनंती करतो!” यावेळी लोढा यांनी जे पी नड्डा यांचे आभार व्यक्त केले, तसेच उपस्थित नागरिकांचे देखील आभार व्यक्त केले.
