31 संघांचा सहभाग : हैद्राबाद येथील संघही सादर करणार मराठी एकांकिका
पुणे : युवा सेना आयोजित हिंदुहृयदसम्राट शिवसेनाप्रमुख बाळासाहेब ठाकरे करंडक खुल्या राज्यस्तरीय एकांकिका स्पर्धेला गुरुवारी (दि. 26) सुरुवात होत आहे. स्पर्धेचे यंदाचे दुसरे वर्ष असून विजेत्या संघास 51 हजार रुपये, करंडक आणि मेडल देण्यात येणार आहे. स्पर्धेत 31 संघांनी सहभाग नोंदविला असून हैद्राबाद येथील संघही मराठी एकांकिका सादर करणार आहे.
युवा सेनेतर्फे दि. 26, दि. 27 आणि दि. 28 या कालावधीत बालगंधर्व रंगमंदिरात स्पर्धेचे आयोजन करण्यात आले आहे, अशी माहिती युवा सेनेचे महाराष्ट्र कार्यकारिणी सदस्य आणि स्पर्धेचे संयोजक कौस्तुभ कुलकर्णी यांनी निवेदनाद्वारे कळविली आहे. कुणाल शहा, अजय सूर्यवंशी हे स्पर्धेचे सहसंयोजक आहेत. स्पर्धेतील द्वितीय क्रमांकास 31 हजार रुपये, सन्मानचिन्ह तर तृतीय क्रमांकास 21 हजार रुपये आणि सन्मानचिन्ह देण्यात येणार आहे. उत्कृष्ट लेखन, दिग्दर्शन, अभिनय, संगीत, रंगभूषा, वेशभूषा, नेपथ्य, प्रकाशयोजनेसाठी पारितोषिके दिली जाणार आहेत.
निलम शिर्के-सामंत यांच्या मार्गदर्शनाखाली आयोजित स्पर्धेचा उद्घाटन समारंभ दि. 26 रोजी सकाळी 9 वाजता बालगंधर्व रंगमंदिर येथे होणार आहे. स्पर्धेचे उद्घाटन ज्येष्ठ अभिनेते माधव अभ्यंकर, सुनील गोडबोले यांच्या हस्ते होणार असून युवा सेनेचे महाराष्ट्र सचिव किरण साळी, युवा सेनेचे पश्चिम महाराष्ट्र सचिव विश्वजित बारणे, शिवसेना पुणे शहर प्रमुख प्रमोदनाना भानगिरे यांची प्रमुख उपस्थिती असणार आहे. स्पर्धा सर्वांसाठी खुली आहे. स्पर्धेला प्रवेशमूल्य नाही.
उद्घाटन समारंभानंतर दि. 26 आणि दि. 27 रोजी सकाळी 10 ते रात्री 9 या वेळात तर दि. 28 रोजी सकाळी 8 ते सायंकाळी 4 या वेळात एकांकिकांचे सादरीकरण होणार आहे.
श्रीराम रानडे यांना जीवनगौरव पुरस्कार
स्पर्धेचा पारितोषिक वितरण समारंभ शनिवार, दि. 28 सप्टेंबर रोजी सायंकाळी 5 वाजता बालगंधर्व रंगमंदिरात आयोजित करण्यात आला आहे. नाट्य क्षेत्रात समर्पित कार्य करणारे राधिका देशपांडे, ऋतुजा देशमुख, राहुल रानडे व प्रदिप वैद्य या कलाकारांचा या वेळी विशेष पुरस्कार देऊन गौरव केला जाणार आहे तर ज्येष्ठ कलाकार श्रीराम रानडे यांना जीवनगौरव पुरस्कार सन्मानपूर्वक प्रदान करण्यात येणार आहे.
