पुणे -सत्ताधाऱ्यांच्या बगलबच्यांचे बिल्डर अग्रवालशी आर्थिक व्यवहार असल्याचा आरोप करत पुण्यासारखे शांत आणि रम्य शहर यांच्या काळात पब संस्कृती ,ड्रग्ज संस्कृती आणि वाढत्या गुन्हेगारीने बदनाम होत असल्याचा आरोप राष्ट्रवादी शरदचंद्र पवार गटाचे शहर अध्यक्ष प्रशांत जगताप यांनी येथे केला . प्रशांत जगताप यांच्या नेतृत्वाखाली अशा अनेक बाबींचा निषेध करण्यासाठी “गृहमंत्री जागे व्हा, तिघाडी सरकार जागे व्हा” अशा घोषणा देत राष्ट्रवादी काँग्रेस पार्टी शरदचंद्र पवार पक्षाच्या वतीने आंदोलन करण्यात आले . आणि पुणे जिल्हाधिकारी यांना निवेदन देण्यात आले.
यावेळी जगताप म्हणाले,’ शहरात नुकत्याच झालेल्या “हिट अँड रन” प्रकरणामुळे आणि हे प्रकरण हाताळत असताना झालेल्या अक्षम्य चुकांमुळे पुणे शहराची संपूर्ण देशात नाचक्की झाली आहे.कधीकाळी महाराष्ट्राची सांस्कृतिक राजधानी, विद्येचे माहेरघर, हिट अँड रन सिटी अशी ओळख असलेले आपले पुणे शहर आता ड्रगचे माहेरघर, हिंसेची राजधानी म्हणून कुप्रसिद्ध होत आहे.
कायदा व सुव्यवस्थेची झालेली दुरवस्था, पोलिस प्रशासनात अवास्तव राजकीय हस्तक्षेप यामुळे परिस्थिती अधिकाधिक गंभीर होत चालली आहे.याविरोधात पुणेकरांच्या भावना व्यक्त करण्यासाठी राष्ट्रवादी काँग्रेस पार्टी शरदचंद्र पवार पक्षाच्या वतीने हेआंदोलन करण्यात आले.
यावेळी कोयता गँगची दहशत, शहरात नेहमीच घडणाऱ्या गोळीबाराच्या घटना, अमली पदार्थांचा सुळसुळाट, अनधिकृत पब आणि बारवर असलेला प्रशासनाचा वरदहस्त अशा अनेक बाबींचा तीव्र निषेध करण्यात आला.
या आंदोलन प्रसंगी शहराध्यक्ष प्रशांत जगताप, रवींद्र माळवदकर, शेखर धावडे, नितिन रोकडे, नीता गलांडे, वंदना मोडक, सारिका पारेख, फहीम शेख, आसिफ़ शेख, रोहन पायगुड़े, मदन कोठुळे, विक्रम जाधव, अजिंक्य पालकर, पायल चव्हाण, तनया साळुंखे, निलेश वरे आदी कार्यकर्ते मोठ्या संखेने उपस्थित होते.