सोलापूर : वंचित बहुजन आघाडीचे सोलापूर लोकसभेचे उमेदवार राहुल गायकवाड यांनी उमेदवारी मागे घेण्याच्या अखेरच्या दिवशी अचानक संविधान वाचवण्याचे कारण सांगत निवडणूक मैदानातून माघार घेतली, आणि ते गायब झाले. यानंतर ते थेट राहुल गांधी यांच्या सोलापुरच्या सभेत व्यासपीठावर अवतरले. या पाठीमागे काँग्रेस नेते सुशीलकुमार शिंदे यांची मोठी खेळी असल्याचे बोलले जात आहे. गायकवाड यांनी माघार घेतल्याने काँग्रेस उमेदवार प्रणिती शिंदे यांचा मार्ग सोपा झाला आहे.
बुधवारी दुपारी सोलापूर शहरातील मरीआई चौकात मोठ्या मैदानावर राहुल गांधी यांची महाविकास आघाडीच्या उमेदवार प्रणिती शिंदे यांच्यासाठी प्रचारसभा झाली. यावेळी व्यासपीठावर महाविकास आघाडीचे नेते उपस्थित होते. यामध्ये उमेदवारी मागे घेऊन वंचितला ऐनवेळी दगा देणारे उमेदवार राहुल गायकवाड देखील व्यासपीठावर होते.
राहुल गायकवाड यांनी उमेदवारी मागे घेताना एक व्हिडिओ संदेश प्रसारित केला, यात म्हटले होते की,
संविधान वाचवण्यासाठी मी उमेदवारी अर्ज मागे घेत आहे. यानंतर राहुल गायकवाड अचानकपणे गायब झाले,
ते थेट महाविकास आघाडीच्या मंचावर आले.
या राजकारणाच्या पाठीमागे सुशीलकुमार शिंदे यांची मोठी खेळी असल्याचे बोलले जात आहे.
ही खेळी यशस्वी झाल्याने त्यांची मुलगी प्रणिती शिंदे यांच्यासमोरील मोठा अडथळा दूर झाला आहे. वंचितकडून सोलापूर लोकसभा मतदार संघात उमेदवारी अर्ज दाखल करणारे राहुल गायकवाड यांनी २२ एप्रिल रोजी शेवटच्या दिवशी उमेदवारी अर्ज मागे घेत वंचितला मोठा दगा फटका दिला. गायकवाड यांनी माघार घेतल्याने आता प्रणिती यांची लढत थेट भाजपा उमेदवार राम सातपुते यांच्याशी होणार आहे.