मुंबईत पुलाचे बेकायदा उद्घाटन केल्याप्रकरणी गुन्हा; जीवितास धोका होईल असे कृत्य केल्याचा ठपका
शिवसेना उद्धव ठाकरे गटाचे युवानेते आमदार आदित्य ठाकरे यांनी लोवर परळ येथील डिलाई रोड ब्रिज लेनचे उद्घाटन केल्याप्रकरणी त्यांच्यावर मुंबई महापालिकेने गुन्हा दाखल केला आहे. आदित्य ठाकरे, सुनील शिंदे आणि सचिन अहिर,मुंबईच्या माजी महापौर किशोरी पेडणेकर यांच्यासह १५ ते २० जणांवर गुन्हा दाखल करण्यात आला आहे. ही तक्रार मुंबई महापालिकेने दाखल केली आहे. एन. एम. जोशी पोलिस स्टेशन येथे मुंबई महापालिकेच्या रस्ते डिपार्टमेंटकडून ही तक्रार दाखल करण्यात आली आहे. रात्री उशिरा आदित्य ठाकरेंच्या विरोधात हा गुन्हा दाखल करण्यात आला आहे.वास्तविक या पूलाचे काम पूर्ण झालेले नसताना लेनचे उद्घाटन करण्यात आले असल्याचा आरोप मनपाच्या वतीने करण्यात आला आहे. काही दिवसानंतर ही लेन सुरु करण्याचे पालिकेचे नियोजन होते. त्याआधीच आदित्य ठाकरे यांच्याकडून लेनचे उद्धाटन करण्यात आले आणि वाहतूक सुरु करण्यात आली. त्यामुळे वाहन चालकांच्या जीवितास धोका निर्माण झाला असल्याचा दावा देखील मनपाने तक्रारीत केला आहे.
या प्रकरणात आदित्य ठाकरेंकडून डिलाई ब्रिज रोडच्या दुसऱ्या लेनचे गुरुवारी उद्घाटन करण्यात आले होते. या प्रकरणात बेकायदेशीर आणि सरकारी कामात अडथळा आणल्याप्रकरणी मुंबई महापालिकेने तक्रार दाखल केली आहे. यामध्ये शुक्रवारी रात्री त्यांच्याविरोधात गुन्हा दाखल करण्यात आला. आदित्य ठाकरे यांच्या व्यतिरीक्त सुनील शिंदे आणि सचिन अहिर यांच्या विरोधातही हा गुन्हा दाखल करण्यात आला आहे.
दिनांक 16 रोजी रात्री 9.30 वाजता सुमारास वरळी विधानसभा मतदारसंघाचे आमदार आदित्य ठाकरे यांनी विधानपरिषद आमदार सुनील शिंदे, विधानपरिषद आमदार सचिन अहिर, माजी महापौर किशोरी पेडणेकर, माजी महापौर स्नेहल आंबेकर यांच्यासह 15 ते 20 अनोळखी कार्यकर्त्यांच्या बेकायदेशीर जमाव जमूऊन त्यांनी महानगरपालिका आयुक्त बृहन्मुंबई यांचे पूर्वपरवानगी शिवाय काम अपूर्ण असलेल्या लोअर परेल ब्रिजच्या सुरुवातीला एसीक भवन समोर लावलेले बॅरिगेट काढून ब्रिजवर अतिक्रमण करून ते त्यांचे सहकारी व कार्यकर्ते समवेत ब्रिजचे मध्यापर्यंत पायी चालत जाऊन त्यांनी वाहतुकीस तयार नसलेला दक्षिण वाहिनी पूल हा वाहतुकीस अनधिकृत रीत्या खुला केल्याने ब्रिजवरून वाहतूक सुरू झाली त्यावरून काही वाहन जाऊन वाहन चालकांच्या जीवितास धोका निर्माण होईल असे कृत्य केले म्हणून माझी त्यांच्याविरुद्ध कायदेशीर तक्रार आहे. ही तक्रार पुरुषोत्तम प्रल्हाद इंगळे यांनी दाखल केली आहे.