मुंबई भाजपा अध्यक्ष आमदार ॲड.आशिष शेलार यांच्या हस्ते शुभारंभ
मुंबई, दि. २ एप्रिल
लोकसभा निवडणुकीसाठी मुंबईकरांच्या अपेक्षा, सूचनासह भाजपाचे संकल्प पत्र तयार करण्यात येणार असून आजपासून भाजपातर्फे गुगल फॉर्ममध्ये या सूचना घेण्यात येणार असून आज मुंबई भाजपा अध्यक्ष आमदार ॲड.आशिष शेलार यांच्या हस्ते या योजनेचा शुभारंभ करण्यात आला.
पंतप्रधान नरेंद्र मोदी यांच्या विकसित भारत संकल्पनेतील मुंबईच्या लोकसभेचा जाहीरनामा तयार करताना मुंबईकरांच्या थेट सूचना भाजपाकडून गोळा करण्यात येत आहेत. त्यासाठी रेल्वे स्टेशन, भाजपा कार्यालये व ठिकठिकाणी सूचना पेटया ठेवण्यात आल्या आहेत. या माध्यमातून १५ हजार पेक्षा जास्त सुचना गोळा झाल्या आहेत. यामध्ये अधिकाधिक मुंबईकरांना आपल्या सूचना देता याव्यात, मुंबईबाबतच्या नवनविन कल्पना मांडता याव्यात म्हणून गुगल फॉर्मवर ही मोहिम राबविली जाणार आहे. भाजपाचे ९ हजार बुथ प्रमुख आपल्या मोबाईलवरुन हा गुगल फॉर्म मुंबईकरांपर्यंत पोहचवणार आहेत.
आज या योजनेच्या शुभारंभ प्रसंगी आमदार अमित साटम, कालिदास कोळंबकर, तमिल सेलवन, प्रसाद लाड आणि भाजपा पदाधिकारी उपस्थित होते.
दरम्यान या वेळी बोलताना आमदार ॲड.आशिष शेलार म्हणाले की, मी मुंबई भाजपाचा अध्यक्ष या नात्याने 1 कोटी 40 लाख मुंबईकरांना आवाहन करतो की, पंतप्रधान नरेंद्र मोदी यांच्या विकसित भारत संकल्प यात्रेत सहभागी व्हा. आपल्या मुंबईबाबतच्या नव्या कल्पना, संकल्पना, सूचना आपण मांडा. आपण मांडलेल्या या सूचना आम्हा सगळ्यांना पुढील काळामध्ये सेवक म्हणून काम करताना प्रेरणादायी, नवी ऊर्जा देणाऱ्या ठरतील. असे सांगून त्यांनी गूगल फॉर्मवर जास्तीत जास्त सूचना मांडाव्यात असे आवाहन त्यांनी केले.
