ड्रग्सच्या प्रकरणात थेट पोलिसाचा सहभाग असल्याने पिंपरी- चिंचवड पोलिसात एकच खळबळ उडाली आहे. आरोपी शंकर झा याला न्यायालयाने सात दिवसांची पोलिस कोठडी सुनावली आहे. तर विकास शेळके या पीएसआय विरोधात सांगवी पोलिस ठाण्यात गुन्हा दाखल करून अटक करण्यात आली आहे.
पुणे- पिंपरी- चिंचवड शहरातील रक्षक चौकात दोन कोटींचं मेफेड्रॉन अमली पदार्थ सांगवी पोलिसांनी गस्ती दरम्यान पकडले होते. याप्रकरणी सांगवी पोलिस ठाण्यात शंकर झा ( वय -२२, मु.रा.बिहार) याच् आरोपीच्या विरोधात गुन्हा दाखल करण्यात आला होता. मात्र, आता या गंभीर गुन्ह्यात निगडी पोलिस ठाण्यात कार्यरत असणाऱ्या विकास शेळके या पोलिस उपनिरीक्षकाचं नाव समोर आल असून त्याला सांगवी पोलिसांनी बेड्या ठोकल्या आहेत. याप्रकरणी अंमली पदार्थ विरोधी पथक आणि सांगवी पोलिसांनी सखोल चौकशी आणि तपास करत आणखी ४३ किलो एमडी ड्रग्स जप्त केले आहे. या कारवाईत एकूण ४५ किलो एमडी ड्रग्स जप्त करण्यात आलं. या ड्रग्स ची किंमत तब्बल ४५ कोटी इतकी आहे. या घटने प्रकरणी सांगवी पोलिस ठाण्यात पोलिस कर्मचारी विजय मोरे यांनी फिर्याद दिली होती.
पोलिसांनी दिलेल्या माहितीनुसार, सांगवी पोलिस ठाण्याच्या हद्दीतील रक्षक चौक या ठिकाणी एपीआय नारायण पवार यांचे पथक गस्त घालत असताना आरोपी शंकर झा याच्या ताब्यातून दोन कोटी दोन लाख रुपयांच २ किलो ३८ ग्रॅम मेफेड्रॉन ड्रग्स जप्त करण्यात आलं होतं. या प्रकरणी शंकर झा याला अटक करण्यात आली. या गंभीर घटनेची दखल घेऊन पोलिसांनी तपासाची चक्रे फिरवली. तपासात पोलिस उपनिरीक्षक विकास शेळके याचे नाव पुढे आलं असून ड्रग्स च्या या गंभीर गुन्ह्यात त्याचा सहभाग आढळला आहे.