पुणे: पुणे शहरातील महत्त्वपूर्ण जलस्रोत असलेल्या पाषाण तलावातील वाढत्या प्रदूषणाच्या पार्श्वभूमीवर महापौर मंजुषा नागपुरे यांनी यांनी आज तलाव परिसराची प्रत्यक्ष पाहणी करून प्रशासनाला तातडीने अंमलबजावणी करत ठोस व परिणामकारक उपाययोजना राबविण्याचे कडक निर्देश दिले.
या पाहणीदरम्यान तलावातील पाण्याची गुणवत्ता, वाढता दूषितपणा तसेच सीओडी (Chemical Oxygen Demand) व बीओडी (Biochemical Oxygen Demand) यांच्या पातळीचा सविस्तर आढावा घेण्यात आला. तलावात येणाऱ्या सांडपाण्यामुळे प्रदूषणात लक्षणीय वाढ होत असल्याचे निदर्शनास आले. यासंदर्भात उभारण्यात आलेल्या एसटीपी (Sewage Treatment Plant) प्रकल्पांची कार्यक्षमता तपासून, प्रक्रिया केलेले पाणी निर्धारित निकषांनुसारच तलावात सोडले जाईल यासाठी काटेकोर देखरेख ठेवण्याचे आदेश देण्यात आले.
तसेच पुणे महानगरपालिकाच्या हद्दीपर्यंतचे नाले, पाणीप्रवाह व संबंधित यंत्रणांची सखोल पाहणी करण्यात आली. नाल्यांमध्ये साचलेला गाळ, अडथळे तसेच अनधिकृत सांडपाणी सोडण्याच्या प्रकारांवर तातडीने योग्य ती कार्यवाही करण्याचे निर्देश देण्यात आले. तलावात थेट जाणारे दूषित पाणी रोखण्यासाठी स्वतंत्र नाले उपयोजना (Drainage Diversion) प्रभावीपणे राबविण्याचे आदेशही देण्यात आले.
पाषाण तलावाचे पर्यावरणीय संतुलन राखण्यासाठी कोणत्या उपाययोजना तातडीने राबविण्याचे निर्देश दिले….
- एसटीपी प्रकल्प नियमित व पूर्ण क्षमतेने कार्यान्वित ठेवून त्यांच्या कार्यक्षमतेत सातत्याने सुधारणा करणे
- नाल्यांमधील सांडपाणी कोणत्याही परिस्थितीत थेट तलावात जाणार नाही, याची खात्री करणे
- तलाव परिसरात विशेष स्वच्छता व प्लास्टिक निर्मूलन मोहीम राबविणे
- पाण्याच्या गुणवत्तेची नियमित तपासणी करून पारदर्शक अहवाल प्रणाली कार्यान्वित करणे
- स्थानिक नागरिकांचा सक्रिय सहभाग वाढवून व्यापक जनजागृती मोहीम राबविणे
या पाहणी दरम्यान नगरसेविका रोहिणी चिमटे व नगरसेविका मयुरी कोकाटे उपस्थित होत्या. तसेच प्रशासनाच्या वतीने उपायुक्त (पर्यावरण) सौ. किशोरी शिंदे व आपत्ती व्यवस्थापन अधिकारी गणेश सोनुने यांनी सहभाग घेतला.
महापौर नागपुरे यांनी स्पष्ट केले की, पाषाण तलावाचे संवर्धन व प्रदूषणमुक्ती ही शहराच्या पर्यावरणीय दृष्टीने अत्यंत महत्त्वाची बाब असून, सर्व संबंधित यंत्रणांनी समन्वयाने कार्य करून अल्पावधीत ठोस व दृश्यमान परिणाम साध्य करावेत.
