पुणे : एका अज्ञात वाहनाने मंगळवारी (दि. २१) दुपारी ५ वाजेच्या सुमारास धडक दिल्याने ४०० केव्ही कुरुळी अतिउच्च दाब उपकेंद्रातून निघणाऱ्या २२ केव्ही म्हाळुंगे स्विचिंग इनकमर आणि २२ केव्ही एमआयडीसी डबल सर्किट फीडरला आज (दि. २१) फटका बसला आहे. वाहनाच्या धडकेत दोन वीज खांब कोसळले असून वीजवाहिन्यांचेही मोठे नुकसान झाले असुन, महावितरणने दुरुस्तीचे काम वेगाने हाती घेतले आहे.
या अपघातामुळे सुरुवातीला सुमारे ११ मेगावॅट वीजभार बाधित झाला होता. महावितरणच्या तातडीच्या उपाययोजनांमुळे ७ मेगावॅट भार इतर पर्यायी मार्गाने पूर्ववत करण्यात आला आहे. मात्र, या घटनेत खांब पूर्णपणे कोलमडल्याने ‘सनसेरा’ आणि ‘अल्ट्रा’ या दोन एक्सप्रेस फीडरसह सुमारे १७ ग्राहकांचा ४ मेगावॅट वीजपुरवठा अद्याप बंद आहे. तो ही लवकरच सुरळीत करण्याचे प्रयत्न सुरु आहेत.महावितरणकडून नवीन खांब उभारण्याचे आणि वाहिन्या ओढण्याचे काम युद्धपातळीवर सुरू आहे. पुढील काही तासांत उर्वरित वीजपुरवठा सुरळीत करण्यासाठी राजगुरुनगर विभागाकडून प्रयत्न केले जात आहेत.
