रायपूर: छत्तीसगडच्या सक्ती जिल्ह्यातील सिंघीतराय येथील वेदांता पॉवर प्लांटमध्ये मंगळवारी दुपारी एक भीषण दु्र्घटना घडली. कारखान्यातील बॉयलरचा मोठा स्फोट झाला. प्राथमिक माहितीनुसार, या दुर्घटनेत ३० ते ४० मजूर गंभीर जखमी झाले. या स्फोटात आतापर्यंत ९ जणांचा मृत्यू झाला आहे. पोलीस अधीक्षकांनी या माहितीला दुजोरा दिला आहे. यातील चौघांचा जागीच मृत्यू झाला. तर पाच जणांनी उपचारादरम्यान अखेरचा श्वास घेतला.
अधिकाऱ्यांनी दिलेल्या माहितीनुसार, रायगढच्या फोर्टिस रुग्णालयात पाच जणांची प्राणज्योत मालवली. त्यांची मृत्यूसोबतची झुंज अपयशी ठरली. गंभीररित्या जखमी झालेले १८ मजूर फोर्टिसमध्ये दाखल आहेत. काही जखमींना रायगढच्या वैद्यकीय महाविद्यालय रुग्णालयात पाठवण्यात आलं आहे. या दुर्घटनेनंतर परिसरात एकच घबराट पसरली. स्थानिकांमध्ये भीतीचं वातावरण आहे.मंगळवारी दुपारीच्या दोनच्या सुमारास कारखान्यात स्फोट झाला. त्यावेळी सगळे मजूर कारखान्यात काम करत होते. अचानक झालेल्या स्फोटामुळे संपूर्ण परिसरात एकच खळबळ उडाली. कामगारांची पळापळ सुरु झाली. आक्रोश आणि आरडाओरडा सुरु झाला. स्फोटानंतर लगेचच मदत आणि बचाव कार्य सुरु करण्यात आलं.
