मुंबई-बॉलिवूडमधील प्रसिद्ध दिग्दर्शक आणि निर्माता रोहित शेट्टी यांच्या घराबाहेर झालेल्या गोळीबार प्रकरणात पोलिसांनी महत्त्वाची कारवाई केली आहे. या प्रकरणाच्या तपासात गुन्हे शाखेच्या पोलिसांनी मुख्य आरोपी शुभम लोणकरचा भाऊ प्रवीण लोणकर याला ताब्यात घेतल्याची माहिती समोर आली आहे. मुंबईतील जुहू परिसरात घडलेल्या या घटनेने काही दिवसांपूर्वी मोठी खळबळ उडाली होती. या हल्ल्यामागील सूत्रधारांचा शोध घेण्यासाठी पोलिसांकडून तपास वेगाने सुरू आहे. तपासादरम्यान समोर आलेल्या माहितीनुसार, या गुन्ह्यात वापरण्यात आलेले शस्त्र आणि हल्ल्यासाठी लागणारे पैसे प्रवीण लोणकरने पुरवले असल्याचा संशय व्यक्त करण्यात आला आहे.
पोलिस सूत्रांच्या माहितीनुसार, प्रवीण लोणकर याला यापूर्वीच एका वेगळ्या प्रकरणात अटक करण्यात आली होती. माजी मंत्री बाबा सिद्दिकी यांच्या हत्या प्रकरणाच्या तपासात गुन्हे शाखेने त्याच्यावर मकोका अंतर्गत कारवाई केली होती. त्या प्रकरणात तो आधीपासूनच पोलिसांच्या ताब्यात होता. मात्र रोहित शेट्टी यांच्या घरावर झालेल्या गोळीबार प्रकरणातही त्याचा संबंध असल्याचे तपासात समोर आल्यामुळे गुन्हे शाखेने न्यायालयाची परवानगी घेऊन त्याचा ताबा घेतला आहे. या प्रकरणात लोणकर बंधूंच्या सांगण्यावरूनच शेट्टी यांच्या घरावर गोळीबार करण्यात आल्याची माहिती तपासात समोर आली असल्याचे सूत्रांनी सांगितले.
दरम्यान, या प्रकरणाच्या तपासात आणखी एक महत्त्वाची माहिती समोर आली आहे. पोलिसांच्या तपासात मुख्य आरोपी शुभम लोणकर व्यतिरिक्त आरजू बिश्नोई नावाच्या व्यक्तीचाही या प्रकरणात संबंध असल्याचे उघड झाले आहे. पोलिसांनी दिलेल्या माहितीनुसार, आरजू बिश्नोई हा अटक करण्यात आलेल्या आरोपींच्या संपर्कात होता. त्यामुळे शुभम लोणकर आणि आरजू बिश्नोई या दोघांनाही या प्रकरणात ‘वॉन्टेड’ घोषित करण्यात आले आहे. या दोघांचा शोध घेण्यासाठी पोलिसांनी विशेष पथके तयार केली असून त्यांच्या हालचालींबाबत माहिती गोळा करण्याचे काम सुरू आहे.
या हल्ल्याच्या घटनेविषयी बोलायचे झाले तर, 1 फेब्रुवारी रोजी रविवारी हा प्रकार घडला होता. त्या दिवशी काही अज्ञात व्यक्तींनी रोहित शेट्टी यांच्या घराबाहेर गोळीबार केला होता. हल्ल्यापूर्वी आरोपींनी शेट्टी यांच्या घरासह संपूर्ण परिसराची सविस्तर रेकी केल्याचे तपासात समोर आले आहे. ही रेकी त्याच स्कूटरवरून करण्यात आली होती, ज्याचा वापर नंतर गोळीबारासाठी करण्यात आला. त्यामुळे हल्ल्यानंतर आरोपींना पळून जाणे सोपे व्हावे, असा त्यांचा उद्देश होता, असे पोलिसांचे म्हणणे आहे.
योजनेप्रमाणे आरोपींनी रोहित शेट्टी यांच्या घराबाहेर पाच राउंड गोळीबार केला. त्यानंतर हल्लेखोर स्कूटरवर बसून तात्काळ घटनास्थळावरून पळून गेला. पुढे तो विलेपार्ले रेल्वे स्टेशन येथे पोहोचला आणि तिथे स्कूटर सोडून दिली. त्यानंतर रेल्वेने मुंबई सोडून फरार झाल्याचे तपासात समोर आले आहे. या संपूर्ण घटनेनंतर पोलिसांनी परिसरातील सीसीटीव्ही फुटेज आणि इतर पुरावे तपासून आरोपींचा माग काढण्यास सुरुवात केली आहे. आता प्रवीण लोणकरचा ताबा मिळाल्यानंतर या प्रकरणातील आणखी महत्त्वाची माहिती समोर येण्याची शक्यता व्यक्त केली जात आहे.
