पुणे-पुणे शहरातील हडपसर परिसरातील रामटेकडी दहशत माजवून वाहनांची तोडफोड करण्यात आल्याची घटना घडली. टोळक्याने पोलिसांना धक्काबुक्की केली. याप्रकरणी पोलिसांनी सात जणांना अटक केली तर पोलिस ठाण्यात गोंधळ घालणारी महिला खडकी पोलिसांनी गजाआड केली आहे.एका आमदाराने पोलिसाच्या मुस्काडात लावल्यावर,आणि त्या आमदारावर थातूर मातुर कारवाई चे सोंग दिसल्यावर आता पोलिसांच्या विरोधात जणू अनेकांना बळ मिळू लागले आहे.
अभिजीत अशोक काकडे, बल्या गायकवाड, नितीन पाटोळे, महेश शिंदे, बाळा, प्यारी उर्फ प्रशांत कांबळे, पप्पूसिंग गुरुबचनसिंग कल्याणी अशी अटक करण्यात आलेल्यांची नावे आहेत. याबाबत पोलीस कर्मचारी अभिजीत चव्हाण यांनी वानवडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, बुधवारी मध्यरात्री पोलीस कर्मचारी चव्हाण आणि त्यांचे सहकारी जगताप रामटेकडी भागात गस्त घालत होते.
त्यावेळी रामटेकडीतील वंदेमातरम चौकात टोळक्याने दहशत माजविल्याची माहिती पाेलिसांना मिळाली. टोळक्याने रिक्षा, मोटार, टेम्पोवर दगडफेक केल्याची माहिती मिळाल्यानंतर पोलीस कर्मचारी चव्हाण आणि जगताप यांनी घटनास्थळी धाव घेतली. तेव्हा आरोपींनी पोलीस कर्मचारी चव्हाण यांना धक्काबुक्की केली. पोलिसांच्या गाडीवर दगडफेक करण्यात आली.पसार झालेल्या सात जणांना अटक करण्यात आली असून, सहायक पोलीस निरीक्षक एस देशमुख पुढील तपास करत आहेत.
पुण्यातील खडकी पोलिस ठाण्यात गोंधळ घालून महिला पाेलिस कर्मचाऱ्याला धक्काबुक्की केल्याप्रकरणी पोलिसांनी एका महिलेस अटक केली. रिना उर्फ हिना फकिरा तायडे (वय 31, रा. महादेववाडी, खडकी बाजार,पुणे) असे अटक करण्यात आलेल्या महिलेचे नाव आहे. पोलिस शिपाई शिवानी जगताप यांनी खडकी पोलिस ठाण्यात तक्रार दिली आहे.
पोलिसांनी दिलेल्या माहितीनुसार, खडकी पोलिसांनी गंभीर गुन्ह्यात सागर चांदणे याला अटक केली. त्याला पाेलिस ठाण्यातील कोठडीत ठेवण्यात आले आहे. आरोपी तायडे चांदणेला भेटण्यासाठी पोलिस ठाण्यात आली. तेव्हा कोठडीतील आरोपीस भेटण्यास मनाई असल्याचे पोलिस शिपाई जगताप यांनी सांगितले. तायडेने पोलिस ठाण्यात शिवीगाळ करण्यास सुरुवात केली. जगताप यांना धक्काबुक्की केली. सरकारी कामात अडथळा आणल्याप्रकरणी तायडेला अटक करण्यात आली. पोलिस उपनिरीक्षक व्ही गुंजाळ पुढील तपास करत आहेत