पुणे महानगरपालिका अतिरिक्त आयुक्त एम. जे. प्रदीप चंद्रन यांच्या समवेत आमदार बापूसाहेब पठारे यांनी मतदारसंघातील पाणीपुरवठा सुरळीत व सुनियोजित करावा यासंदर्भात पाहणीदरम्यान मागणी केली .
पुणे – वडगावशेरी मतदारसंघातील पाणीपुरवठा अधिक सुरळीत, सुरक्षित आणि नियोजनबद्ध करण्याच्या दृष्टीने आमदार बापूसाहेब तुकाराम पठारे यांच्या पुढाकाराने पुणे महानगरपालिकेचे अतिरिक्त आयुक्त एम. जे. प्रदीप चंद्रन आणि पाणीपुरवठा विभागाचे मुख्य अभियंता नंदकिशोर जगताप यांच्यासह अधिकाऱ्यांनी पाहणी दौरा केला.
या दौऱ्यात लोहगाव बाजारतळ येथील सुरू असलेल्या पाण्याच्या टाकीच्या कामाची पाहणी करण्यात आली. हे काम सहा महिन्यांच्या आत पूर्ण करण्याच्या सूचना संबंधित ठेकेदाराला दिल्या. त्यानंतर हरणतळे वस्ती, विमाननगर, तुळजा भवानी नगर, खराडी या भागांतील पाण्याच्या टाक्यांची पाहणी करण्यात आली. या भागांमध्ये कमी दाबाने पाणीपुरवठा होत असल्याने टाक्यांमध्ये साठा होत नाही. त्यामुळे नागरिकांना त्रास सहन करावा लागत असून, यावर त्वरित उपाययोजना करण्याचे निर्देश देण्यात आले.
भामा आसखेड योजनेअंतर्गत वडगावशेरी परिसरासाठी दररोज २०० एमएलडी पाण्याची मंजुरी असूनही सध्या केवळ १४२ एमएलडी पाणीपुरवठा होत आहे. उर्वरित ५८ एमएलडी पाणी तत्काळ उपलब्ध करून देण्याची मागणी केली. तसेच अनियमित पाणीपुरवठा सुरळीत व सुनियोजित करण्यासाठी आवश्यक त्या उपाययोजना व कामांच्या गतीचा अधिकाऱ्यांसह आढावा घेतला. यावेळी काही महत्त्वाच्या गोष्टींची अंमलबजावणी करण्यासाठी आवश्यक त्या उपाययोजना तातडीने राबविल्या जातील असे अतिरिक्त आयुक्तांनी सांगितल्याचे पठारे यांंनी सांगितले.
