पुणे पोलीस आयुक्त अमितेश कुमार यांच्याकडे पठारे यांची मागणी..
पुणे – वडगावशेरी मतदारसंघातील चंदननगर येथील जुन्या मुंढव्या रस्त्यालगत असलेल्या डाॅ. बाबासाहेब आंबेडकर वसाहतीत दि. २३ एप्रिल २०२५ रोजी पहाटेच्या सुमारास भीषण आग लागली. या आगीत अनेक घरांचे मोठे नुकसान झाले असून, यात नागरिकांचे आर्थिक नुकसानही मोठ्या प्रमाणावर झाले आहे. या दुर्घटनेत अनेक कुटुंबांचे संसार उघड्यावर आल्याने अनेकांनी आपले सर्वस्व गमावले आहे. ही आगीची घटना अतिशय दुर्दैवी होती.
सदर घटना घडून एक आठवडा होवूनही आगीचे कारण अद्याप स्पष्ट झाले नसल्याने आमदार बापूसाहेब पठारे यांनी पुणे पोलीस आयुक्त अमितेश कुमार यांच्याकडे सदर आगीच्या दुर्घटनेची सखोल उच्चस्तरीय चौकशी करण्याची निवेदनाद्वारे मागणी केली आहे. या आगीच्या घटनेमुळे परिसरातील नागरिकांमध्ये असुरक्षितता आणि भीतीमय वातावरण तयार झाले आहे. सदर वसाहतीत लागलेल्या आगीच्या घटनेबाबत अनेक नागरिक खाजगीत वेगवेगळी चर्चा करत आहे. आगीच्या घटनेचे कारण अद्याप स्पष्ठ झाले नसल्या कारणाने सदर घटनेकडे नागरिक संशयाने पाहत आहेत. या सर्व बाबी विचारात घेता या घटनेची उच्चस्तरीय सखोल चौकशी होणे अत्यंत गरजेचे आहे. जेणेकरून सदर दुर्घटनेमागील सत्य कारणे समोर येतील आणि भविष्यात अशा घटना टाळण्यासाठी उपाययोजना करता येवू शकतात असे पठारे म्हणाले.
सदर आगीच्या गंभीर घटनेची तातडीने दखल घेवून आगीच्या कारणांचा शोध घेण्यासाठी एका उच्चस्तरीय चौकशी समितीची नेमणूक करावी. ज्यामार्फत ही समिती निष्पक्ष आणि सखोल चौकशी करून सत्य कारणे समोर आणतील. जेणेकरून भविष्यात अशा घटना टाळण्यासाठी योग्य त्या उपाययोजना करता येतील. तसेच या दुर्घटनेस जबाबदार असलेल्या व्यक्तींवर कठोर कारवाई करावी, अशी नागरिकांची मागणी असल्याचे पठारे यांनी सांगितले
