मुंबई, दि. 17- राज्यात कोविड-19 विषाणूचा प्रादूर्भाव वाढत असल्याने शासनाने प्रतिबंधात्मक अत्यावश्यक उपाययोजना करण्यासाठी राज्यातील लॉकडाऊनच्या कालावधीत 31 मे 2020 पर्यंत वाढ करण्याचा निर्णय घेतला आहे. साथरोग कायदा 1897 तसेच आपत्ती व्यवस्थापन कायदा 2005 अंतर्गत शासनास असलेल्या अधिकारांचा वापर करून राज्याच्या कार्यकारी समितीचे अध्यक्ष तथा मुख्य सचिव अजोय मेहता यांनी हे आदेश जारी केले आहेत.
यापूर्वी वेळोवेळी जारी करण्यात आलेल्या मार्गदर्शक सूचनांची शासनाच्या सर्व विभागांनी या कालावधीत काटेकोर अंमलबजावणी करावी. तसेच यापूर्वी काढण्यात आलेले सर्व आदेश 31 मे पर्यंत लागू राहतील, असे निर्देश मुख्य सचिवांनी दिले आहेत. विभागनिहाय सूट किंवा लॉकडाऊन उठविण्यासंदर्भात योग्य त्या सूचना वेळोवेळी दिल्या जातील, असेही त्यांनी या आदेशात म्हटले आहे.
यापूर्वी दि. 2 मे 2020 रोजीच्या आदेशानुसार राज्यात 17 मे 2020 पर्यंत लॉकडाऊन वाढविण्याचा निर्णय शासनाने घेतला होता. तसेच त्यात गरजेनुसार वेळोवेळी मार्गदर्शक सूचना जारी करण्यात आल्या होत्या.
पुणे : राज्य सरकारने लाॅकडाउनचा चौथा टप्पा हा ३१ मे पर्यंत वाढविण्याचा निर्णय घेतला. लाॅकडाउनच्या ४.० ची अंमलबजावणी कशी असणार याचे स्वतंत्र आदेश अद्यापपर्यंत आले नाहीत. राज्य सरकारचे हे आदेश आल्यानंतर महापालिका आयुक्त शेखर गायकवाड आणि पोलिस सहआयुक्त डाॅ. रवींद्र शिसवे हे पुणे शहरातील अंमलबजावणीबाबत नव्याने आदेश काढतील. यामध्ये प्रतिबंधित क्षेत्रांमध्ये नव्याने फेरबदल अपेक्षित आहेत. सध्याच्या प्रतिबंधित क्षेत्रात ज्या ठिकाणी ॲक्टिव्ह रुग्ण नाहीत, अशी ठिकाणे प्रतिबंधित क्षेत्रातून वगळण्यात येतील. तर प्रतिबंधित क्षेत्राबाहेर ज्या ठिकाणी ॲक्टिव्ह रुग्ण आहेत, अशी ठिकाणे, इमारतींना प्रतिबंधित क्षेत्र म्हणून जाहीर करण्यात येईल. याशिवाय खासगी कार्यालये सुरू करण्याबाबत, दुकाने उघडण्याबाबत धोरणात्मक निर्णय होण्याची शक्यता आहे. महापालिका आयुक्तांनी आदेश काढल्यानंतर यामध्ये स्पष्टता येणार आहे.
