पुणे : अॅल्कॉन स्टायलस इमारतीची संरक्षक भिंत कोसळून झालेल्या दुर्घटनेप्रकरणी अटक करण्यात आलेल्या दोघा बांधकाम व्यावसायिकांना न्यायालयाने मंगळवारपर्यंत (२ जुलै) पोलीस कोठडी दिली आहे. या दुर्घटनेत लहानग्यांसह १५ मजुरांचा मृत्यू झाला होता.
संरक्षक भिंत दुर्घटनेनंतर ‘अॅल्कॉन लँडमार्क्स’ आणि ‘कांचन ग्रुप’च्या आठ बिल्डरांसह इतरांवर कोंढवा पोलिस ठाण्यात गुन्हा दाखल करण्यात आला असून ‘अॅल्कॉन लँडमार्क्स’च्या विपुल अगरवाल आणि विवेक अगरवाल या दोन बिल्डर बंधूंना कालच अटक करण्यात आली होती. या दोघांना आज प्रथम वर्ग न्यायदंडाधिकारी एस. एस. रामदिन यांच्या न्यायालयात हजर करण्यात आले असता दोघांचीही मंगळवारपर्यंत पोलीस कोठडीत रवानगी करण्यात आली. दरम्यान, अन्य आरोपींना अद्याप अटक करण्यात आलेली नाही.
कोंढव्यात कांचन ग्रुपकडून ‘रॉयल एक्झॉटिक’ ही बहुमजली इमारत बांधण्यात येत आहे. सध्या पिलरचे काम सुरू असून जवळच कामगारांना राहण्यासाठी पत्र्यांचे शेड उभारून घरे तयार केली होती. दिवसभर काम केल्यानंतर कामगार या पत्र्याच्या शेडमध्ये राहत होते. काही महिन्यांपूर्वीच कॉन्ट्रॅक्टरने त्यांना या इमारतीच्या कामासाठी आणले होते. शनिवारी पहाटे दीड वाजण्याच्या सुमारास अचानक ‘अॅल्कॉन स्टाइलस’ या इमारतीची संरक्षक भिंत या १५ ते २० झोपड्यांवर कोसळली. ढिगाऱ्याखाली अडकून यात चार चिमुकल्यांसह १५ जणांचा मृत्यू झाला. तर, दोघे जखमी झाले.