‘आयसीएआय’कडून पोलिसांना ५५० बॉटल्स सॅनिटायझर
पुणे : कोरोना विषाणूच्या लढाईत आपला जीव धोक्यात घालून कर्तव्य बजावणाऱ्या पोलीसांना दि इन्स्टिट्यूट ऑफ चार्टर्ड अकाउंटंट्स ऑफ इंडियाच्या (आयसीएआय) वतीने ५५० सॅनिटायझरच्या बॉटल्सचे वितरण करण्यात आले. ‘आयसीएआय’च्या वेस्टर्न इंडिया रिजनल कैन्सिलचे (डब्ल्यूआयआरसी) माजी अध्यक्ष सीए सर्वेश जोशी यांच्या पुढाकारातून हे वाटप झाले.
‘आयसीएआय’चे उपाध्यक्ष सीए समीर लड्डा व सीए सर्वेश जोशी यांनी गुन्हे शाखेचे सहायक पोलीस आयुक्त डॉ. शिवाजी पवार व पोलीस निरीक्षक अजित लकडे यांच्याकडे ३० लिटर सॅनिटायझरच्या बॉटल्स हस्तांतरित केल्या. डॉ. पवार यांनी पोलिसांच्या वतीने सीए इन्स्टिटयूटचे आभार मानले.
सीए समीर लड्डा म्हणाले, “शहरातील लॉकडाऊनचे काटेकोरपणे पालन व्हावे, याकरिता पोलीस अहोरात्र मेहनत घेत आहेत. त्यांच्या सुरक्षेसाठी त्यांनीही स्वच्छता ठेवणे, सतत हात धुणे आदी गोष्टी गरजेच्या आहेत. कर्तव्यावर असताना तापसणीवेळी अनेकांना त्यांचा स्पर्श होतो. तेव्हा हात स्वच्छ ठेवण्यासाठी सॅनिटायझरचा उपयोग होईल.”