व्यंगात्मक चारोळ्यांनी ‘गणेशकला’त हास्यकल्लोळ
लायन्स क्लब ऑफ पूना सारसबागतर्फे पद्मश्री सुरेंद्र शर्मा व सहकाऱ्यांचे हास्य कवी संमेलन
पुणे : राजकारणापासून समाजकारणापर्यंत, संस्कृतीपासून अध्यात्मापर्यंत, व्यक्तीपासून कुटुंबापर्यंत अनेक गोष्टींवर व्यंगात्मक टिपण्णी करत त्यांनी श्रोत्यांना हसायला लावतानाच अंतर्मुख व्हायला लावले. छोट्या छोट्या चारोळ्यांतून झालेल्या विनोदांनी गणेश कला क्रीडा मंच हास्यमय झाला. कवींचे अफलातून सादरीकरण आणि पोटभर खळाळून हसत, टाळ्यांच्या गजरात श्रोत्यांची मिळालेली दाद यामुळे सभागृह कवितेच्या विश्वात रममाण झाले.
निमित्त होते, लायन्स क्लब ऑफ पूना सारसबाग चॅरिटेबल ट्रस्ट आणि लायन्स क्लब ऑफ पूना सारसबाग यांच्या वतीने आयोजित, सिस्का एलईडी प्रायोजित हास्यकवी संमेलनाचे. क्लबच्या वतीने गरिबांसाठी चालविण्यात येणाऱ्या ‘सारस डायलिसिस सेंटर’च्या निधी उभारणीकरिता या कार्यक्रमाचे आयोजन करण्यात आले होते. अवघ्या दोनशे रुपयांत डायलिसिसची सुविधा या सेंटरवर उपलब्ध करून दिली जाते. पद्मश्री सुरेंद्र शर्मा, शंभू शिखर, महेंद्र अजनबी, पद्मिनी शर्मा व चिराग जैन यांनी ‘एकसे बढकर एक’ कविता सादर करीत श्रोत्यांची ‘वाहवा’, ‘बहोत अच्छे’ अशी उत्स्फूर्त दाद मिळवली. जवळपास २००० श्रोते या कार्यक्रमाला उपस्थित होते. उत्तम केटरर्स यांनी उपस्थितांच्या भोजनाची व्यवस्था केली होती.
या कार्यक्रमावेळी धर्मादाय सहआयुक्त दिलीप देशमुख, लायन्स क्लब इंटरनॅशनलचे प्रांतपाल रमेश शहा, उपप्रांतपाल ओमप्रकाश पेठे, अभय शास्त्री, माजी प्रांतपाल फतेचंद रांका, लायन्स क्लब ऑफ पूना सारसबागचे अध्यक्ष प्रवीण ओसवाल, सचिव संतोष पटवा, खजिनदार दीपाली गांधी, उत्कर्ष गांधी, आशा ओसवाल यांच्यासह अनेक मान्यवर उपस्थित होते. सारस डायलिसिस सेंटरला भरघोस देणगी देणाऱ्या दिलेर ग्रुपचे सबीरभाई दिलेर, अष्टेकर ज्वेलर्सचे नितीन अष्टेकर, अशोक अष्टेकर, योगेंद्र अष्टेकर, उत्तम केटरर्स, नगराज गुंदेचा, श्रीजी फौंडेशनचे हरिभाई पटेल, जगदीश जैन, रमेश सोनिग्रा, जयंतीभाई ओसवाल, आशा-प्रवीण ओसवाल, विक्रम ओसवाल यांच्यासह गेली १० वर्षे मोफत डायलिसिस करणारे डॉ अभय सदरे यांचा यावेळी विशेष सत्कार करण्यात आला.
शंभू शिखर यांनी दिल्ली, बिहारमधील राजकारणासह देशातील राजकीय वातावरणावर बिहारी शैलीत टिप्पणी करीत श्रोत्यांना हसवले. त्यांच्या गायकी स्वरातील कवितांनी कार्यक्रमात रंगात आणली. पद्मिनी शर्मा यांनी कवितेतून शृंगार, त्यागभावना, प्रेम, कोमलता, स्त्रीचे कर्तृत्व प्रकट केले. पती-पत्नीच्या नात्यावर हळुवार फुंकर घालत सगळ्याच वयोगटातील पुरुषी आणि स्त्री मानसिकतेवर त्यांनी भाष्य केले. महेंद्र अजनबी यांनी विसरभोळेपणा आणि श्रोत्यांचा प्रतिसाद यावर भाष्य करीत सभागृहाला हसवले. चिराग जैन यांच्या आईवरील कवितेने श्रोत्यांच्या डोळ्यांत पाणी आणले, तर राजकीय भाष्यावर टाळ्यांचा कडकडाट झाला. सुरेंद्र शर्मा यांच्या ‘एंट्री’लाच उपस्थितांनी दाद देत स्वागत केले. सर्वच क्षेत्रातील व्यंगावर भाष्य करीत सुरेंद्र शर्मा यांनी प्रकाश टाकला. बदलती संस्कृती, तारुण्यातील दिवस, कुटुंबव्यवस्था, राजकारण, समाजकारण, शिक्षण आदींवर भाष्य करीत श्रोत्यांना अंतर्मुख व्हायला लावले.
रमेश शहा म्हणाले, “गरिबांना २०० रुपयांत डायलिसिसची सुविधा माझ्या प्रांतात मिळत आहे, याचा आनंद आहे. अत्याधुनिक आणि अद्ययावत अशा या सेंटरमुळे हजारो रुग्णांना जीवनदान मिळाले आहे. अतिशय मोठे सामाजिक काम उभारून इतरांना प्रेरणा देण्याचे कार्य सारसबाग क्लब करीत आहे.”
श्री देशमुख म्हणाले, “गेल्या अनेक वर्षांपासून डायलिसीस सेंटरचे काम पाहत आहे. अतिशय उत्तम पद्धतीने हे काम सुरु आहे. धकाधकीच्या जीवनातून तणावमुक्त होण्यासाठी आजचा हा कविसंमेलनाचा कार्यक्रम महत्त्वाचा असून, दानशूर लोक पुढे आले तर ही डायलीसीस सुविधा मोफत देणे शक्य होईल.”
सुरेंद्र शर्मा म्हणाले, “डायलिसीस सेंटर हे एक मंदिर आहे. येथे जीवनदान मिळालेल्या व्यक्तीत ईश्वर आहे. त्यामुळे दगडी देवाच्या मंदिरात देणग्या देऊ नका. दोनशे रुपयात डायलिसीस करणाऱ्या या संस्थेला देणगी द्या. दुसऱ्याना हसवले, दुसर्याचे अश्रू पुसले तर ईश्वर तुमच्या पाठीशी उभा राहतो.” प्रवीण ओसवाल यांनी स्वागत-प्रास्ताविक केले. फतेचंद रांका यांनी सूत्रसंचालन केले.