महिन्यातील प्रत्येक रविवारी मतदार नोंदणीसाठी विशेष मोहिम

पुणे- 1 जानेवारी 2019 या अर्हता दिनांकावर आधारित, 1 सप्टेंबर,2018 ते 30 ऑक्टोबर,2018 या
कालावधीत छायाचित्र मतदार यादीचा विशेष पुनरिक्षण कार्यक्रम निवडणूक विभागातर्फे हाती घेण्यात आला आहे.
जिल्हयातील नवमतदारांची संख्या वाढविण्यासाठी फॉर्म क्रमांक 6,7,8 व 8अ वाटप करुन, आलेले फॉर्म या
मोहिमेमध्ये जमा करुन घेण्यात येणार आहेत. ऑक्टोबर महिन्यातील प्रत्येक रविवारी म्हणजेच दिनांक 7,14,21 व
28 ऑक्टोबर,2018 रोजी सर्व मतदान केंद्रावर विशेष मोहिम दिन राबविण्याचे निर्देश विभागीय आयुक्त, पुणे यांनी
दिलेले आहे.
त्यानुसार, ऑक्टोबर-2018 महिन्यातील सर्व रविवारी, जिल्हयातील सर्व मतदान केंद्रांवर 7,14,21 व 28
ऑक्टोबर,2018 रोजी मतदार केंद्रस्तरीय अधिकारी मतदान केंद्रांवर उपस्थित राहून सकाळी 10 ते सायंकाळी 5
वाजेच्यादरम्यान फॉर्मचे वाटप करण्यात येऊन, आलेले फॉर्म जमा करुन घेणार आहेत. त्याचप्रमाणे 18 ते 19
वयोगटातील मतदारांची संख्या वाढविण्यासाठी जिल्हयातील सर्व महाविद्यालयांमध्ये ऑक्टोबर,2018 मध्ये प्रत्येक
मंगळवारी मोहिम घेण्यात येऊन, नवमतदारांचे फॉर्म जमा करुन घेण्यात येणार आहे. या मोहिमेचा लाभ घेऊन
मतदार यादीमध्ये नांव नोंदवावे, असे आवाहन उप जिल्हा निवडणूक अधिकारी मोनिका सिंह यांनी केले आहे.