पुणे, दि. २७: सशस्त्र सेना ध्वजदिन निधीमध्ये योगदान देता यावे यासाठी जिल्हा सैनिक कल्याण कार्यालयाने क्युआर कोडची सुविधा उपलब्ध करुन दिली असून इच्छुकांना योगदान देण्याबाबत आवाहन करण्यात आले आहे.

युद्ध क्षेत्रात किंवा अतिरेकी कारवायांमध्ये शहीद, दिव्यांगत्व आलेले जवान तसेच माजी सैनिक व त्यांच्या कुटुंबियासाठी राज्यशासनाच्यावतीने विविध कल्याणकारी योजना राबविण्यात येत आहे. या योजनांकरीता लागणारा खर्च ध्वजदिन निधी संकलनाच्या माध्यमातून उभारला जातो. सशस्त्र सेना ध्वजदिन निधी संकलनाचे कार्य जिल्हाधिकाऱ्यांच्या देखरेखीखाली जिल्हा सैनिक कल्याण कार्यालयामार्फत करण्यात येते.

ध्वजदिन निधीमध्ये देण्यात येणाऱ्या देणगी रक्कमेवर आयकर अधिनियम १९६१ कलम ८० जी (५) (६) च्या अंतर्गत आयकर सवलत लागू राहणार आहे, अशी माहिती जिल्हा सैनिक कल्याण अधिकारी लेफ्टनंट कर्नल (नि.) स. दै. हंगे यांनी दिली आहे.

पुणे : खडकवासला विधानसभा क्षेत्रातील निवडणूक प्रक्रियेतील प्रत्येक टप्प्यात कर्मचाऱ्यांनी अत्यंत मेहनत घेतली. त्याचबरोबर त्यांच्या कार्यशक्तीच्या आणि कुशलतेच्या जोरावर प्रक्रिया यशस्वीपणे पार पडली. खडकवासला कार्यालयाने पारदर्शक व अचूक निवडणूक प्रक्रियेसाठी एक नवा आदर्श निर्माण केला आहे, असे मत खडकवासला मतदारसंघ निवडणूक निर्णय अधिकारी डॉ. यशवंत माने यांनी व्यक्त केले.
खडकवासला विधानसभा निवडणूक प्रक्रियेच्या यशस्वी आयोजनानंतर कार्यालयाने अधिकाऱ्यांचा व कर्मचाऱ्यांचा सन्मान
करण्यासाठी निरोप सामारंभाचे आयोजन केले. या सामारंभात निवडणूक प्रक्रियेतील उत्कृष्ट व्यवस्थापन, अचूकता आणि पारदर्शकतेचा उल्लेख करत योगदान देणाऱ्यांचा गौरव करण्यात आला.तर, मतमोजणी प्रक्रिया, ईव्हीएम व्यवस्थापन आणि मतदान केंद्र नियोजनात अधिकारी व कर्मचाऱ्यांनी दाखवलेल्या कौशल्याबद्दल सहायक निवडणूक निर्णय अधिकारी किरण सुरवसे यांनी आभार मानले. प्रशिक्षक प्रा. तुषार राणे आणि प्रा. माधुरी माने यांनी मतमोजणी प्रक्रियेतील तांत्रिक आणि व्यवस्थापकीय बाजूंवर मार्गदर्शन केल्याबद्दल त्यांचे आभार व्यक्त केले. नायब तहसीलदार सचिन आखाडे (इव्हीएम कक्षाचे नोडल अधिकारी), नारायण पवार (इव्हीएम कक्षाचे सहाय्यक), अंकुश गुरव (कार्यक्रम समन्वयक), मनीष झंसारी, दीपगौरी जोशी (पोस्टल बॅलेट कक्ष अधिकारी), प्रमोद भांड (सहा. महसूल अधिकारी), धम्मदीप सातकर, साहिर सय्यद, भूमेश मसराम (मनुष्यबळ कक्ष अधिकारी) यांच्या निवडणूक प्रक्रियेत अचूकता आणि दक्षता राखण्याच्या कार्याची प्रशंसा केली. मतदान केंद्रस्तरीय अधिकारी समन्वय कक्षाचे नोडल अधिकारी प्रा. मनीष खोडस्कर यांच्या कामगिरीचेही विशेष कौतुक करण्यात आले. मीडिया कक्ष प्रमुख योगेश हांडगे यांनी जागरुकता निर्मितीसाठी घेतलेल्या पुढाकाराचे सर्वांनी कौतुक केले.

अखंड ध्यान आणि तप यांद्वारे जागतिक चेतनेमध्ये आमूलाग्र परिवर्तन होईल – तेजविद्या

‘अखंड ध्यान की ज्वाला’ हा कार्यक्रम मोठ्या उत्साहात पार पडला

पुणे -सिंहगड रोडवर स्थित मनन आश्रमात 25 तासांवर आधारित अखंड ध्यान कार्यक्रमाचे आयोजन करण्यात आले होते. या कार्यक्रमाचे उद्घाटन प्रसिद्ध मराठी आणि हिंदी पार्श्वगायिका मधुरा दातार यांच्या हस्ते दीपप्रज्वलन करून करण्यात आले. यावेळी तेजज्ञान फाउंडेशनच्या विश्वस्त तेजविद्याही उपस्थित होत्या. या सोहळ्यात पुणे आणि पुणे परिसरातील शेकडो लोक सहभागी झाले होते.

यावेळी पार्श्वगायिका मधुरा दातार यांनी ध्यानाचे महत्त्व सांगणारे एक सुंदर भजन गायले आणि तेजज्ञान फाऊंडेशनच्या 25 वर्षांच्या असाधारण आणि समर्पित प्रवासाबद्दल अभिनंदन केले. आपले विचार व्यक्त करताना त्या म्हणाल्या, आजच्या आव्हानात्मक काळात, आपल्या केंद्रस्थानी राहण्यासाठी आणि आपल्या आंतरिक शांतीशी जोडण्यासाठी ध्यान हे एक शक्तिशाली, प्रभावी माध्यम आहे. अखंड ध्यानामुळे शांतता आणि सकारात्मकतेची लाट निर्माण होईल, असा विश्वास त्यांनी व्यक्त केला.

या वैभवशाली प्रसंगी, तेजज्ञान फाउंडेशनच्या विश्वासू तेजविद्या यांनी 25 तास सतत ध्यान करण्याचा उद्देश स्पष्ट केला. ज्याप्रमाणे पाण्याचे वाफेत रूपांतर होण्यासाठी तीव्रतेची आवश्यकता असते, त्याचप्रमाणे 25 तासांचे अविरत ध्यान, जागतिक चेतनेमध्ये आमूलाग्र परिवर्तन घडवून आणेल. म्हणूनच जगातील प्रत्येक व्यक्तीने ध्यानाच्या सान्निध्यात यावे. या शुद्ध निःस्वार्थ भावनेने सर्वांनी अखंड ध्यान करणे गरजेचे आहे, असे ही आवाहन त्यांनी केले.

पुणे, २८ नोव्हेंबर : जिल्हा परिषद वॉटर पोलो स्पर्धा नुकतीच संपन्न झाली . यामध्ये ध्रुव ग्लोबल स्कूलच्या खेळाडूंनी पहिल्याच दिवशी पाण्यातून पदक मिळवून शाळेचा गौरव वाढविला. शेकडो खेळाडूंमध्ये शाळेच्या खेळाडूंनी उत्कृष्ट कामगिरी करून सुवर्णपदक मिळवून विजेतेपद पटकावले.
ध्रुव ग्लोबल स्कूलचे संचालक यश मालपाणी व मुख्याध्यापिका संगीता राऊतजी यांनी सर्व खेळाडूंचे यशाबद्दल अभिनंदन केले.
ध्रुव ग्लोबल स्कूलच्या जलतरण तलावात स्पर्धेला सुरूवात झाली. यामध्ये ध्रुव ग्लोबल स्कूलचा जलतरणपटू मंदार कोल्हटकर याने उत्कृष्ट कामगिरी करत विजयाचे पहिले खाते उघडले. डेक्कन मराठा ज्युनियर कॉलेज लांडेवाडी स्पर्धेत त्याने जोरदार डुबकी मारली आणि रौप्य पदक मिळवले. ध्रुव ग्लोबल स्कूल नांदेने पदक पटकावून आपली प्रतिभा चमकवली.
या स्पर्धेत इशान मंत्री, सोहम बारी, पारिजात चंद्र, जैत्रा भोर, आदर्श खोब्रागडे, पार्थ पोटे, सुमेध पानसे, मंदार कोल्हटकर, यश रेवतकर, विवान काळे, शर्विल जंगम, आयुष नशी आणि अद्विक भालेकर यांनी सहभाग घेतला.  यांच्या थरारक खेळाने पदक जिंकून यांनी आपल्या प्रतिभेची  चमक दाखवली. आयोजित स्पर्धेत मुळशी तालुक्यातील अनेक शाळांनी उत्स्फूर्तपणे सहभाग घेतला होता. दरम्यान वॉटरपोलो प्रकारात ध्रुव ग्लोबल स्कूल संघांनी डेक्कन मराठा ज्युनिअर कॉलेज लांडेवाडीचा ११-१ असा पराभव केला.
स्पर्धेचे उद्घाटन प्राचार्य संगीता राऊतजी, क्रीडा समन्वयक रोहित पाटील, क्रीडा विभाग प्रमुख दत्तात्रय काठे यांच्या प्रमुख उपस्थित झाला.

पुणे, दि. २८ नोव्हेंबर: विश्वशांती केंद्र (आळंदी), माईर्स एमआयटी, पुणे, भारत व श्रीक्षेत्र आळंदी-देहू परिसर विकास समिती यांच्या संयुक्त विद्यमाने संत शिरोमणी तत्वज्ञ श्री ज्ञानेश्वर माऊली यांच्या ७२८ व्या संजीवन समाधी सोहळा व जागतिक सहिष्णुता सप्ताहाचा समारोप ‘श्री संत ज्ञानेश्वर-तुकाराम ज्ञानतीर्थ’, विश्वरूप दर्शन मंच, श्रीक्षेत्र आळंदी येथे दुपारी १२ वा. वारकर्‍यांच्या उपस्थितीत पार पडला. इद्रायणीत वारकर्‍यांच्या गुलाल, बुक्का व फुलांची ओंजळ वाहून ज्ञानेश्वर माऊलीचे भावपूर्ण स्मरण केले. भजन करून नामस्मरणाचा गरज केला. यावेळी विश्वरूप दर्शन मंचावर घंटानाद करण्यात आला. विश्वशांती केंद्राच्या वतीने वारकर्‍यांना महाप्रसाद देण्यात आला.
तत्पूर्वी हभप डॉ. सुदाम महाराज पानेगावकर यांनी काल्याचे कीर्तन केले. त्यानंतर मान्यवरांच्या हस्ते दहीहंडी फोडण्यात आली. याद्वारे शेकडो वर्षांची परंपरा जपण्यात आली. इंद्रायणीच्या घाटावर वरकर्‍यांनी या समाधी सोहळ्याच्या काल्याच्या महाप्रसादाचा लाभ घेतला.
या समारंभासाठी विश्वशांती केंद्र आळंदी, माईर्स एमआयटी विश्वशांती विद्यापीठाचे संस्थापक अध्यक्ष विश्वधर्मी प्रा.डॉ. विश्वनाथ दा. कराड, हभप तुळशीराम दा. कराड, सौ. उषा विश्वनाथ कराड, माईर्स मायमर वैद्यकीय महाविद्यालयाच्या कार्यकारी संचालिका डॉ. सुचित्रा कराड नागरे, प्रा. स्वाती कराड चाटे, आचार्य श्री शिवम, प्रसाद रांगणेकर, नागपूर विद्यापीठाचे माजी कुलगुरू डॉ. एस.एन. पठाण, डॉ. मिलिंद पांडे, योगगुरू पाडेकर गुरूजी उपस्थित होते.
या सप्ताहात सुफी सं व इस्लाम धर्माचे अभ्यासक लतिफ पटेल, भागवतार्चा स्वामी डॉ. तुळशीराम महाराज गुट्टे, संत साहित्याचे अभ्यासक हभप डॉ. रविदास महाराज शिरसाठ, हभप डॉ. तुकाराम महाराज गरुड ठाकुरबुवा दैठणकर व हभप बापूसाहेब मोरे देहूकर या सारख्या नामवंत कीर्तनकारांनी कीर्तनरुपी सेवा सादर केली. तसेच श्रृती पाटील, मानसी वझे, डॉ. आशिष रानडे  व विश्वशांती संगीत कला अकादमीच्या शिक्षक व विद्यार्थ्यांनीी अभंगवाणी व भक्तीसंगीताचे कार्यक्रम सादर केले.
हभप बापूसाहेब मोरे देहूकर म्हणाले,”सृष्टीवर संताच्या वचनामुळे मानवाचे कल्याण होते. संत हे वात्सल्य मूर्ती  असून त्यांची महिमा शब्दात सांगता येत नाही. संत दुसर्‍यांचे दुख सावरण्यास पुढे येऊन त्याना सुख व शांतीचा मार्ग दाखवतात.”
प्रा.डॉ. विश्वनाथ दा. कराड म्हणाले,” या सप्ताहात प्रवचन, कीर्तन, गायन व भजन या मार्गाने नामवंतांनी माऊलीचरीण सेवा रूजू केली. पुढील वर्षभर लोकशिक्षणाचे विविध कार्यक्रम व विश्वरूप दर्शन मंचावर होणार आहेत. यामध्ये सुसंस्कृत समाजनिर्मितीसाठी जनजागृतीद्वारे विज्ञान व अध्यात्म यांचा संगम होईल. पवित्र तीर्थ क्षेत्रांचे खर्‍या अर्थाने ज्ञान तीर्थ क्षेत्रामध्ये परिवर्तन घडविण्याचा आमचा प्रयत्न आहे. ज्ञान, कर्म आणि भक्तीतून ईश्वर दर्शन होते. त्याग आणि समर्पणाचा संतानी दिलेला संदेश व त्यांची शिकवण आत्मसात करून या मार्गाने चालण्याचा प्रयत्न करावा.”
हभप शालीकराम खंदारे यांनी सूत्रसंचालन व महेश महाराज नलावडे यांनी आभार मानले.

पुणे –
नॅशनल बुक ट्रस्टचे कार्यालय आता मुंबई येथून कायमस्वरूपी पुण्यात होणार असून त्यांना मनपाची एका इमारतीची जागा देखील तात्काळ भाड्याने दिली आहे. त्यामुळे आता केवळ पुणे पुस्तक मोहत्सव पुरते काम होणार नसून वर्षभर एनबीटी काम होणार आहे. मराठी भाषेला अभिजात दर्जा मिळाला आहे त्यामुळे याबाबत आता त्याची माहिती सर्वसामान्य लोकांना समजण्यासाठी एक फिल्म तयार करून मोहत्सवत दाखवण्यात यावे. मुलांसाठी चित्रपट मोहत्सव सोबत एक पुस्तक आधारित नाटक बसवण्यात यावे. पुस्तकाची आवड त्यातून मुलांमध्ये निर्माण होईल. पुणे शहर हे विविध क्षेत्रात अग्रेसर झाले आहे त्यामुळे पुणे पुस्तक मोहत्सव देखील यशस्वी होईल असे मत माजी मंत्री चंद्रकांत पाटील यांनी गुरवारी व्यक्त केले.
राष्ट्रीय पुस्तक न्यासाच्या वतीने यावर्षीच्या पुस्तक महोत्सवाचे आयोजन 14 ते 22 डिसेंबर या कालावधीत फर्ग्युसन महाविद्यालयाच्या मैदानावर करण्यात आले आहे. पुस्तक महोत्सवाचे कार्यालयाचे उद्घाटन आणि मांडवाचे भूमिपूजन माजी मंत्री चंद्रकांत पाटील यांच्या हस्ते गुरवारी करण्यात आले. यावेळी महोत्सवाचे आयोजक राजेश पांडे , खासदार प्रा. मेधा कुलकर्णी, सावित्रीबाई फुले पुणे विद्यापीठ कुलगुरू सुरेश गोसावी, प्र – कुलगुरू पराग काळकर, एनबीटी संचालक युवराज मलिक, अध्यक्ष मिलिंद मराठे, उद्योजक कृष्णकुमार गोयल, डीक्कीचे अध्यक्ष मिलिंद कांबळे, डीईएस अध्यक्ष प्रमोद रावत, उपाध्यक्ष अशोक पलांडे, जेष्ठ संपादक किरण ठाकूर, भाजप नेते माधव भंडारी, खासदार मेधा कुलकर्णी, युवा सेना नेते किरण साळी, कुमार शंकर, सोमनाथ पाटील, प्रसेनजित फडणवीस, फर्ग्युसन महाविद्यालय प्राचार्य डॉ. विजय तडके, आरपीआय नेते मंदार जोशी, सुशील जाधव उपस्थित होते.
मेधा कुलकर्णी म्हणाल्या, पुणे हे विद्येचे माहेरघर आहे अनेक शैक्षणिक संस्था आहे. पुणे पुस्तक मोहत्सव यंदा मोठ्या प्रमाणात होईल. मुलांना चित्रपट मोहत्सव सोबत मुलांसाठी कथाकथन आणि पुस्तक वाचन कट्टा निर्माण करण्यात यावा. मला अभिमान आहे की, पुण्यात हा ऐतिहासिक मोहत्सव होत असल्याचा अभिमान आहे.
राजेश पांडे यांनी प्रास्ताविकात सांगितले की, हा मोहत्सव कोण एका व्यक्ती चा नाही तर पुणेकर यांचा आहे. लोकसहभाग यामध्ये महत्वाचा आहे. यावर्षी चार विश्व विक्रम यंदा होणार असून चीनचे विक्रम मोडीत कडण्यात येणार आहे. साडेसात लाख लोक मोहत्सवला यंदा भेट देतील अशी अपेक्षा आहे.अनेक व्यक्तींचा हा मोहत्सव आयोजन मध्ये सहभाग आहे. यावेळी पुणे पुस्तक मोहत्सव मध्ये ५९८ स्टॉल राहणार असून ही क्षमता तीन दिवसात भरून आणखी ८० जण स्टॉल मिळवण्याच्या प्रतीक्षेत आहे. साडेअकरा कोटीची मागील वेळी पुस्तक विक्री झाली यंदा ती दुप्पट होईल. परदेशातील लेखक देखील यंदा सहभागी होणार आहे. यंदा देखील एक लाख पुस्तके मोफत वाटप करण्यात येणार आहे. ११ नोव्हेंबर रोजी दुपारी १२ ते १ यादरम्यान शांतता पुणेकर पुस्तक वाचत आहे उपक्रम राबवला जाणार आहे.
युवराज मलिक म्हणाले, पुणे शहरात साहित्य बद्दल जागरूकता आहे. मागील वेळी पुस्तक मोहत्सव मध्ये २०० स्टॉल होते यंदा त्याची संख्या तिप्पट वाढवून ६०० झालो तरी देखील अनेकजण विचारणा करत आहे. देशातील एक क्रमांकाचा हा मोहत्सव करण्याचा आमचा प्रयत्न आहे. पुढील वेळी हा मोहत्सव परदेशात घेऊन जाण्याचा आमचा संकल्प आहे. मोहत्सवात देशभरातील अनेक प्रतिष्ठित लेखक येऊन विविध भाषांत त्यांचे मत लिटरेचर फेस्टिवल मध्ये मांडतील. जगातील बालक यांच्यासाठी प्रसिद्ध चित्रपट दाखवण्यात येणार आहे. फूड फेस्टिवल देखील यंदा असणार आहे. मराठी भाषा अभिजात भाषा दर्जा मिळाला आहे आता मराठी पुस्तके इतर भाषांत मोठ्या प्रमाणात भाषांतरित करण्यात येतील. मराठी भाषा विभाग सक्षम करण्यात येतील. पुण्यातील नवीन कार्यालयात नोकरदार महिला कामावर जातील त्यावेळी त्यांची मुले आमच्या केंद्रात सोडतील आम्ही त्यांना पुस्तक वाचन माध्यमातून सुसंस्कृत करू, मोफत लायब्ररी, मोफत पुस्तक वाचन जागा, स्टोरीटेलिंग उपक्रम , पुणे पुस्तक मोहत्सव आणि एनबीटी यांची दोन स्वतंत्र कार्यालय असणार आहे.
कार्यक्रमाचे सूत्रसंचालन डॉ. संजय चाकने यांनी केले, प्रसेनजीत फडणवीस यांनी आभार मानले.

पुणे जिल्हा हौशी पॉवरलिफ्टींग असोसिएशनच्या वतीने आयोजन
पुणे : पुणे जिल्हा हौशी  पॉवरलिफ्टींग असोसिएशनच्या वतीने आमदार चंद्रकांत पाटील पुरस्कृत ‘दी आयर्न गेम्स जिल्हास्तरीय पॉवरलिफ्टिंग’ स्पर्धेचे आयोजन करण्यात आले आहे. दिनांक ३० आणि १ डिसेंबर रोजी धायरी येथील समृद्धी लॉन्स येथे ही स्पर्धा पार पडणार आहे, अशी माहिती पुणे जिल्हा हौशी पॉवरलिफ्टिंग असोसिएशनचे उपाध्यक्ष राजहंस मेहंदळे यांनी दिली.

स्पर्धेचे यंदा ७ वे वर्ष आहे. स्पर्धेचे उद्घाटन आमदार चंद्रकांत पाटील यांच्या हस्ते होणार आहे. सब ज्युनिअर, ज्युनिअर, सीनियर, मास्टर आणि खुल्या गटात ही स्पर्धा होणार आहे. नवोदित खेळाडूंसाठी स्पर्धेचे आयोजन करण्यात आले असून यापूर्वी झालेल्या स्पर्धेतील विजयी खेळाडूंनी आंतरराष्ट्रीय स्पर्धांमध्ये सहभागी होत भारतासाठी पदकांची कमाई केली आहे.

पुणे जिल्ह्यातून २०० पेक्षा अधिक स्पर्धक या स्पर्धेत सहभागी झाले आहेत. प्रत्येक गटाच्या प्रथम क्रमांकाला २ हजार रुपये रोख, पदक आणि प्रमाणपत्र मिळणार आहे तसेच स्पर्धेतील स्ट्रॉंग मॅन आणि स्ट्रॉंग वुमन किताब पटकाविणाऱ्यांना ४ हजार रुपये रोख आणि ट्रॉफी मिळणार आहे. प्रत्येक सहभागी खेळाडूंना सहभाग प्रमाणपत्र मिळणार आहे.

• आळंदीत वारकरी भूषण, समाज भूषण, समाज रत्न पुरस्कार प्रदान सोहळा

पिंपरी : प्रतिनिधी

आळंदीत दिंडी सोहळ्यातील जातीय विषमता संपवून समतेचा विचार जोपासणारा लढा उभारण्यात आला होता. त्‍याला यश आले आहे. संत रोहिदास, आजा मेळा, चोखामेळा या दिंड्या, दलित दिंड्या घोड्याच्या पुढे आणि मुख्य पालखी सोहळ्याच्या बाहेर चालत होत्या. त्यांना घोड्याच्या पाठीमागे व पालखी सोहळ्यामध्ये प्रवेश मिळावा, या मागणीसाठी १९७७–७८ साली सत्याग्रह करण्यात आला होता. या सत्याग्रहामुळे दलित दिंड्यांना मुख्य सोहळ्यामध्ये चालण्यास परवानगी मिळाली. त्‍यामुळे आळंदीत माऊलीच्‍या दर्शनाला येणारा प्रत्‍येक भाविक, वारकरी समतेचे विचार पुढे घेऊन जात आहे. समतेचा हा विचार तळागाळात रुजविण्यासाठी दिंडी साहेळ्यातील भेदभाव कमी करणाऱ्या सत्‍याग्रहाचा पन्‍नासावा उत्‍साहात साजरा करणार असल्‍याचे प्रतिपादन आळंदी येथील संत रोहिदास मठ व समस्त हराळे वैष्णव समाज धर्मशाळेचे अध्यक्ष हभप बाबा कांबळे यांनी केले.

संत ज्ञानेश्वर महाराज संजीवनी समाधी सोहळ्याच्या निमित्ताने श्री क्षेत्र आळंदी देवाची येथील संत रोहिदास मठ, हराळे वैष्णव समाज धर्मशाळाच्या वतीने आयोजित वारकरी भूषण समाज भूषण समाज रत्न पुरस्कार प्रदान सोहळ्याच्या निमित्ताने बाबा कांबळे बोलत होते. यावेळी हभप रामकृष्ण महाराज खाडे यांना वारकरी भूषण पुरस्कार, हभप रोहिदास साधू उगले यांना समाज भूषण पुरस्कार, तसेच सोनाबाई श्रीपती गाडेकर, अंकुश भिकाजी चव्हाण, नामदेव सदाशिव साळुंखे, भालचंद्र कोरेगावकर, खंडूसेठ बनसोडे, विश्वनाथ महादेव शेटे, मारुती बळीबा ढवळे, यांना समाज रत्न पुरस्कार देऊन गौरव करण्यात आला.

यावेळी संत रोहिदास मठ व समस्त हराळे वैष्णव धर्मशाळेचे कार्याध्यक्ष अनिल सातपुते, सचिव बाळासाहेब चव्हाण, ज्येष्ठ विश्वस्त श्री कुमार काळे, संत रोहिदास दिंडी क्रमांक 24 चे अध्यक्ष हभप सुरेश सोनवणे, पुजारी नारायण गाडेकर, संस्थेचे उपाध्यक्ष सुखदेव आबनावे, सुरेखा सुर्वे, विश्वस्त दत्तात्रय शिंदे, नारायण कोकाटे, सिद्धेश्वर सोनवणे, तुषार नेटके, उषा विश्वनाथ नेटके, डॉ. के. टी. कांबळे, लता गाडेकर आदीसह वारकरी, संत रोहिदास मठ व समस्त हराळे वैष्णव धर्मशाळेचे पदाधिकारी, कार्यकर्ते सभासद, यावेळी उपस्थित होते.

बाबा कांबळे म्‍हणाले की, संत परंपरा ही महाराष्ट्रातील अत्यंत उज्वल व मोठी परंपरा आहे. आळंदी येथून निघणारी पालखी ही देशातील एकमेव समतेचे उदाहरण आहे. सामाजिक समता राखणारा हा सोहळा अनेक वर्षापासून सुरू आहे. संत ज्ञानेश्वर, संत रोहिदास, संत तुकाराम, संत नामदेव, संत चोखामेळा, संत जनाबाई, संत गोरा कुंभार या संतांनी समाजातील चुकीच्या रूढी परंपरा अंधश्रद्धा संपवण्यासाठी आपल्या लेखणीतून जनतेला संदेश दिला.

पन्नास वर्षांपूर्वी या सोहळ्यामध्ये जातीभेद व भेदभाव पाळला जात होता. संत रोहिदास महाराज चोखामेळा, आजामेळा, या चर्मकार मातंग व महार समाजाच्या दिंड्या, या सोहळ्याच्या बाहेर घोड्याच्या पुढे चालत होत्या. यासाठी आळंदी मध्ये सत्याग्रह झाला. या दिंड्यांना मुख्य सोहळ्यामध्ये समाविष्ट करून घ्यावे, अशी मागणी करण्यात आली. यानंतर या दिंड्या मुख्य सोहळ्यामध्ये सहभागी झाल्या. या घटनेला आता पन्नास वर्षे पूर्ण होतील.

या निमित्ताने आळंदी येथे या सत्याग्रहाच्‍या ५० वे वर्ष साजरे केले जाणार आहे. संत रोहिदास महाराज दिंडी क्रमांक 24, समस्त हराळे वैष्णव समाज धर्मशाळा व सर्व वारकरी भाविक भक्त यामध्ये सहभागी होतील. हा उत्‍सव साजरा करताना सामाजिक समता, जातिभेद विरोध, चुकीच्या रूढी परंपरा यावर प्रकाश टाकण्यात येणार आहे, असे संत रोहिदास महाराज मठ तसेच समस्त हराळे वैष्णव समाज धर्मशाळेचे अध्यक्ष हभप बाबा कांबळे म्‍हणाले.