‘मुख्यमंत्री – माझी लाडकी बहीण’ योजनेच्या लाभासाठी आधार जोडणी करण्याचे आवाहन ‘मुख्यमंत्री – माझी लाडकी बहीण’ योजनेची रक्कम न आलेल्या महिलांनी आपल्या बँक खात्याशी आधारकार्ड जोडणी व सिडींग करण्यासह आपले बँक खाते सुरू असल्याची खात्री करावी, असे आवाहन करण्यात आले आहे.राज्यातील महिलांच्या आर्थिक स्वातंत्र्यासाठी आणि त्यांच्या आरोग्य आणि पोषणात सुधारणा करणे तसेच कुटुंबातील त्यांची निर्णायक भूमिका मजबूत करण्यासाठी राज्यात ‘मुख्यमंत्री – माझी लाडकी बहीण’ योजना राबविण्यात येत आहे. या योजनेबाबत कोणतीही अडचण असल्यास आपल्या जवळच्या अंगणवाडी केंद्रामध्ये संपर्क साधावा, असेही जिल्हा महिला व बाल विकास अधिकारी श्रीमती मनिषा बिरारीस यांनी कळविले आहे.

पुणे- SMS आल्यावर आनंदित होऊन बँकाकडे धावलेली लाडक्या बहिणींची पावले आता बँकांनी सुरु केलेय त्रासदायी वर्तनामुळे मंदावली आहेत . सरकारने सुरु केलेल्या लाडक्या बहिणीच्या योजनेचा फायदा मिळणे ज्यामुळे सरकारला दुर्लभ होऊ शकणार आहे असी नीती काही बँकांनी अवलंबली असल्याचे दिसून आले आहे. तुमचे खाते अॅकटीव्ह नाही असे सांगून नवीन खात्याचे फॉर्म देणे, नंतर जुने खाते अॅकटीव्ह करण्यास फॉर्म देणे,खाते १५ दिवसांच्या नंतर अॅकटीव्ह होईल सांगणे, ATM कार्ड नसताना , चेक बुक नसताना वीड्रॉल स्लीप वर पैसे न देता ,चेक बुक साठी अर्ज करायला लावणे , अशा पद्धतीचा कारभार धनकवडीतील महाराष्ट्र बँकेने सुरु केल्याने येथे खाते असलेल्या गोरगरीब लाडक्या बहिणी हेलपाटे मारून त्रस्त झाल्या आहेत तर इकडील अक्सीस बँकेने एक हप्ता दिल्यावर दुसऱ्या हप्त्याचा sms आलेल्या महिलांना देखील पैसे आलेत पण ते इथे रिफ्लेक्ट होत नाहीत असे सांगून हेलपाटे मारायला लावल्याचे सांगण्यात येते आहे.

मुख्यमंत्री एकनाथ शिंदे , उपमुख्यमंत्री अजित पवार आणि देवेंद्र फडणवीस यांनी सुरु केलेय लाडक्या बहिणीच्या योजनेला तुडुंब प्रतिसाद मिळाला . कार्यकर्त्यांनी देखील हि योजना घरोघरी पोहोचविली आणि या योजनेमुळे भाजपवासियांना आणि एकूणच शिंदे गट , पवार गट अशा सत्तेतील सर्वांना निवडणुकीसाठी हि योजना लाभदायी ठरेल अशी मोठी आशा वाटू लागली . परंतु अशा पद्धतीने बँकांनी वर्तन ठेऊन महिलांचे हेलपाटे वाढवीत पैसे देण्याचा आखडता हाथ घेतल्याचे चित्र दिसू लागल्याने आता आनंदित होऊन बँकांकडे जाणारी पावले मंदावू लागल्याचे जाणवू लागले आहे .आधार कार्ड, पॅन कार्ड,निवडणूक ओळखपत्र, बँकेचे पासबुक असे सारे असतानाही केवळ आर्थिक स्थितीमुळे त्या बँकांची खाती अविरत पणे सुरु न ठेऊ शकल्याने त्यांची स्थिती बँकांनी अशी करवून पैसे वापरण्याचा घाट सुरु ठेवला कि काय ? असा प्रश्न निर्माण करण्याजोगी स्थिती आहे. धनकवडीतील बँकचा अनुभव मोठा त्रस्त करणारा असल्याच्या जास्त तक्रारीआहेत .

पुणे- बोपदेव घाटात मित्राबरोबर फिरायला गेलेल्या तरुणीवर सामुहिक बलात्कार केल्याच्या घटनेने पुणे शहरात एकच खळबळ उडाली आहे. या अत्याचार करणार्‍या काही आरोपींची रेखाचित्रे पोलिसांनी प्रसिद्धीला दिली आहेत.बोपदेव घाटात फिरायला गेलेल्या तरुणीवर तिघा नराधमांची सामुहिक बलात्कार केला. (Gang Rape In Bopdev Ghat Pune) गुरुवारी रात्री अकरा वाजता ही घटना घडली होती. याची पोलिसांना माहिती मिळताच गुन्हा दाखल करुन तपास सुरु केला. या तरुणीने व तिच्या मित्रांनी सांगितलेल्या वर्णनावरुन पोलिसांनी दोघांची रेखाचित्रे तयार केली आहेत. त्यांच्याबाबत कोणाला काही माहिती मिळाल्यास त्यांनी वरिष्ठ पोलीस निरीक्षक विनय पाटणकर (Sr PI Vinay Patankar) 8691999689, पोलीस निरीक्षक गुन्हे शाखा युनिट ५ चे युवराज हांडे (PI Yuvraj Hande) 8275200947 / 9307545045 तसेच गुन्हे शाखा 020-26122880 यांच्याशी संपर्क साधावा, असे आवाहन करण्यात आले आहे.

पुणे – ‘नवरात्रीचा उत्सव म्हणजे  स्त्री शक्तीचे पूजन करण्याचा उत्सव, मात्र सध्या समाजात सातत्याने घडणार्या स्त्री अत्याचाराच्या घटना पाहता, स्त्रियांनी पुढाकार घेत, एकत्रित येऊन स्त्री मधील शक्तीचे जागरण केले पाहिजे. स्त्री ही कोमल असेल, पण ती कमजोर अजिबात नाही, हे ठामपणाने सांगितले पाहिजे’, असे आवाहन अखिल भारतीय महिला कॉंग्रेस पक्षाच्या अध्यक्षा अलका लांबा यांनी शुक्रवारी येथे केले. व्यासपीठावरील औपचारिकता सोडून देत, अलका लांबा उपस्थित महिलांमध्ये मोकळेपणाने मिसळल्या. त्यांनी अनेक महिलांशी संवाद साधला. सेल्फी काढल्या. गाणे म्हटले आणि महिलांनीही कोरस देत, त्यांना प्रतिसाद दिला. मराठमोळा फेटा बांधून आणि नथ घालून लांबा यांनी महिलांशी कनेक्ट होण्याचा प्रयत्न केला.
पुण्याची गौरवशाली ओळख असलेल्या पुणे नवरात्रौ महिला महोत्सवात शुक्रवारी  दुपारी लांबा यांच्या हस्ते २५ व्या महिला महोत्सवाचे श्री लक्ष्मीमाता मंदिर प्रांगण, शिवदर्शन, पुणे येथे उद्घाटन झाले. महाराष्ट्र प्रदेश महिला काँग्रेस कमिटीच्या अध्यक्षा संध्या सव्वालाखे याप्रसंगी प्रमुख पाहुण्या म्हणून उपस्थित होत्या. याप्रसंगी पुणे नवरात्रौ महिला महोत्सवाच्या अध्यक्षा जयश्री बागुल,  पुणे नवरात्रौ महोत्सवाचे अध्यक्ष आबा बागुल, महाराष्ट्र प्रदेश महिला कॉंग्रेस सरचिटणीस संगीता तिवारी, महिला कॉंग्रेसच्या सुनीता गवांडे , पुणे शहर महिला कॉंग्रेस अध्यक्ष पूजा आनंद, व्यासपीठावर उपस्थित होत्या.

अलका लांबा पुढे म्हणाल्या, ‘देशाच्या लोकसंख्येपैकी निम्मी संख्या आपली आहे. आपणच आपल्या संरक्षणासाठी, प्रगतीसाठी कटिबद्ध असले पाहिजे. घटनेने आपल्याला दिलेले अधिकार आणि हक्क बजावले पाहिजेत. एकमेकींना पाठिंबा देत, एकत्रित प्रयत्नाने समाजात पुढे आले पाहिजे. नवरात्र महोत्सवात शक्तीचे, देवीचे पूजन करणार्या पुरुषांनी आधी घराघरातील शक्तीरूपे समजून घेतली पाहिजेत. घरातील स्त्रीचे हक्क, अधिकारांची जाणीव ठेवली पाहिजे. बदलांची सुरवात घरापासून केली पाहिजे. स्त्रीचे शांत राहणे, म्हणजे तिचा दुबळेपणा नाही. स्त्री कोमल असेल पण ती कधीच कमजोर नाही, हे लक्षात ठेवले पाहिजे’. आपल्या मोबाईलवर ‘कोमल है कमजोर नही तू’  हे प्रसिद्ध गीत लांबा यांनी सिलेक्ट केले आणि ते ध्वनिक्षेपकावरून सर्वांना ऐकवले. स्वतःही गात गात, त्या व्यासपीठावरून खाली उतरल्या आणि उपस्थित महिलांमध्ये मिसळल्या.

याप्रसंगी कर्तबगार महिलांना दिला जाणारा ‘तेजस्विनी’ पुरस्कार  सामाजिक कार्याबद्दल सोहम संस्थेच्या अध्यक्षा डॉ. मनिषा  सोनवणे, आपत्ती व्यवस्थापक सुषमा खटावकर आणि  क्रीडापटू मधुरा धामणगावकर यांना लांबा यांच्या हस्ते प्रदान करण्यात आला. तसेच खडतर परिस्थितीत आपल्या मुलांना उत्तम शिकवणूक, विचार देऊन आदर्श नागरिक घडविणाऱ्या सुमारे ४०० अधिक महिलांचा आदर्श माता पुरस्काराने गौरव करण्यात आला.
प्रास्ताविक करताना जयश्री बागुल म्हणाल्या, ‘महिलांना हक्काचे व्यासपीठ मिळावे व त्यांच्या कलागुणांना वाव मिळावा या हेतूने सुरु झालेल्या या महिला महोत्सवाचे यंदा २५ वे वर्ष आहे. दरवर्षी हजारो महिला या महोत्सवात सहभागी होतात. महिलांसाठी अनेक स्पर्धा घेतल्या जातात. उत्तम टीमवर्कमुळेच हा उपक्रम इतकी वर्षे सातत्याने शक्य होत आहे’.
आबा बागुल म्हणाले, ‘स्त्रीशक्तीच्या विविध रूपांचे दर्शन या महिला महोत्सवात घडते. आपल्या कर्तृत्वाने समाजासाठी योगदान देणार्या तसेच मातृशक्तीला वंदन करण्याच्या हेतूने हा महिला उत्सव साजरा केला जातो’.
प्रारंभी शिवांजली नृत्य अकादमीच्या विद्यार्थिनींनी गणेशवंदना सादर केली. रत्नाकर शेळके डान्स अकॅडमी च्या विद्यार्थिनींनी सादरीकरण केले. मान्यवरांच्या हस्ते दीपप्रज्ज्वलन तसेच देवीची आरती करण्यात आली. रत्ना दहिवेलकर यांनी सूत्रसंचालन केले. याप्रसंगी योगिता नकम, प्रांजली गांधी, निर्मला जगताप, विद्युलता साळी उपस्थित होत्या.

श्री महालक्ष्मी मंदिर, सारसबाग तर्फे आयोजित सार्वजनिक नवरात्रोत्सव ; श्रीसूक्त व अथर्वशीर्ष पठण कार्यक्रम
पुणे : ओम हिरण्यवर्णां हरिणीं सुवर्णरजतस्त्रजाम्, चंद्रा हिरण्यमीं लक्ष्मीं जातवेदो म आवह… च्या स्वरांनी श्री महालक्ष्मी मंदिराचा परिसर दुमदुमून गेला. तब्बल ५ हजार महिलांनी सामुहिकरित्या केलेल्या श्रीसूक्त आणि श्री गणपती अथर्वशीर्ष पठण, माता माता की जय… चा नामघोष आणि शंख वादनाच्या निनादाने नवरात्र उत्सवातील द्वितीयेची पहाट मंगलमय झाली. 
निमित्त होते, श्री महालक्ष्मी मंदिर, श्री बन्सीलाल रामनाथ अग्रवाल धार्मिक व सांस्कृतिक ट्रस्ट च्यावतीने आयोजित सार्वजनिक नवरात्र उत्सवात झालेल्या सामुहिक श्री सूक्त पठण कार्यक्रमाचे. यावेळी मुख्य आयकर आयुक्त रिना झा-त्रिपाठी, डॉ.सतिश देसाई, ट्रस्टचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड. प्रताप परदेशी, भरत अग्रवाल, तृप्ती अग्रवाल, प्रवीण चोरबेले, हेमंत अर्नाळकर, निलेश लद््दड आदी उपस्थित होते.  
कार्यक्रमाची सुरुवात ढोल-ताशा वादनाने झाली. त्यानंतर केशव शंखनाद पथक आणि श्रीमंत केसरी शंखनाद पथकातील वादकांचे शंखवादन झाले. कार्यक्रमास पारंपरिक वेशात उपस्थित महिलांनी जय माता दी… च्या जयघोष करीत आसमंत दणाणून सोडला. श्रीसूक्त म्हणजे काय? त्याचे महत्व आणि महती याविषयी मीनल चौरसिया यांनी उपस्थितांना माहिती दिली. त्यानंतर अथर्वशीर्षाचा एक पाठ आणि श्री सूक्ताचे तीन पाठ असे सामुदायिकरित्या पठण करण्यात आले. कार्यक्रमाची सांगता आरतीने झाली. 
अमिता अग्रवाल म्हणाल्या, धार्मिकतेला सामाजिकतेची जोड देणारा समाजातील सर्व घटकांना सामावून घेणारा ‘सार्वजनिक नवरात्र उत्सव’ महालक्ष्मी मंदिरात दरवर्षीप्रमाणे यंदाही साजरा होत आहे. सामुहिक श्रीसूक्त पठणाच्या माध्यमातून महिला शक्तीने एकत्र येऊन स्त्री शक्तीचा जागर करावा, हा उद्देश दरवर्षी असतो. यंदा श्रीसूक्त पठणाच्या मोठया कार्यक्रमासह नारीशक्तीचा सन्मान सामुहिक गरबा आणि प्रतिकात्मक रावण दहन कार्यक्रम देखील होणार आहे. पुणेकरांनी या सर्व कार्यक्रमांमध्ये मोठया संख्येने सहभागी व्हावे, असे आवाहनही त्यांनी केले आहे.

पुणे-आर एम डी फाऊंडेशन द्वारा दरवर्षी हजारो झाडं संपूर्ण भारतभर लावली जातात . यावर्षीही रांजणगाव , उपलाट तलासरी , वाघोली , दमण ईत्यादी ठिकाणी मोठ्याप्रमाणात वृक्षारोपण करण्यात आले. वृक्षारोपण करतांना शाळा , महाविद्यालयं, रुग्णालय , सार्वजनिक उद्याने ,डोंगर भाग तसेच गायरान ठिकाणी वृक्षारोपण करण्यात येते , त्यांना वर्षभर पाणी मिळेल व झाडं जगतील याची काळजी घेतल्या जाते . यापुढे शाळा-महाविद्यालयांमधून विद्यार्थ्यांच्या माध्यमातून “एक झाड आईचे” अशी योजना कार्यान्वीत करीत असल्याची माहिती आर एम डी फाऊंडेशनच्या उपाध्यक्षा शोभाताई आर धारीवाल यांनी महात्मा गांधी विद्यालय उरळी कांचन येथे दिली . प्रत्येक विद्यार्थ्याने झाडं लावावी , ती झाडं दत्तक घ्यावी व जगवावी असे आवाहन त्यांनी केले. तसेच महात्मा गांधी जयंतीच्या निमित्ताने 2700 स्वदेशी झाडांचे वितरण व वृक्षारोपण करण्यात आले . वितरीत केलेल्या झाडांची निगा , वाढ व जोपासना केलेल्या विद्यार्थ्यांना प्रमाणपत्र व योग्य बक्षीस देऊन गौरवण्यात येईल असेही त्या म्हणाल्या . यावेळी शाळेचे विश्वस्त श्री देवीदास भन्साळी यांचेही सहकार्य मिळाले .
वृक्षवितरण व वृक्षारोपण वेळी प्राचार्य श्री भोसले , शिक्षक व कर्मचारी वृंद तसेच विद्यार्थी मोठ्या प्रमाणात उपस्थित होते .

पुणे, दि. ०४ ऑक्टोबर २०२४: थकबाकीमुळे कायमस्वरुपी वीजपुरवठा खंडित असलेल्या जागेवर व्याज व विलंब आकारासह वीजबिलांची थकबाकी वाढतच जाणार आहे. जागेची मालकी बदलली तरी वीजबिलांची थकबाकी भरावीच लागणार. त्यामुळे सध्याच्या वीजबिल थकबाकीचा प्रश्न निकाली काढण्यासाठी संपूर्ण व्याज व विलंब आकार शुल्काची माफी असलेल्या महावितरण अभय योजनेला चांगला प्रतिसाद मिळत आहे. थकबाकी असलेल्या जागेवर सध्या विजेची गरज नसली तरी अभय योजनेचा फायदा घेत वीजबिलांच्या थकबाकीमुक्तीला प्राधान्य देत ४ हजार ११४ ग्राहकांनी नवीन वीजजोडणीची मागणी नसल्याचे अर्जात नमूद केले आहे. तर उर्वरित ५ हजार ५८३ ग्राहकांनी मात्र नवीन वीजजोडणी घेणार असल्याचे स्पष्ट केले आहे.

वीजबिलांची थकबाकी असलेल्या एखाद्या जागेची मालकी बदलली तरी नवीन जागा मालक किंवा ताबेदार यांना थकबाकीची रक्कम भरावी लागेल असा निकाल मा. सर्वोच्च न्यायालयाने दिला आहे. थकबाकी असलेल्या जागेवर पुन्हा वीजपुरवठा पाहिजे असल्यास एरवी सर्वप्रथम संपूर्ण थकबाकीची रक्कम भरणे आवश्यक असते. मात्र आता दि. ३१ मार्च २०२४ पर्यंत थकबाकीमुळे कायमस्वरुपी वीजपुरवठा खंडित झालेल्या जागा वीजबिलातून थकबाकीमुक्त करण्यासाठी महावितरणने अभय योजनेतून विशेष संधी उपलब्ध करून दिली आहे. या योजनेनुसार एकूण थकीत रकमेतील व्याज व विलंब आकाराची संपूर्ण १०० टक्के रक्कम माफ होणार आहे व केवळ मूळ थकबाकीचाच भरणा करावा लागणार आहे.

कृषी व सार्वजनिक पाणीपुरवठा योजना वगळून उर्वरित घरगुती, वाणिज्यिक, औद्योगिक व इतर वीजग्राहकांसाठी ही अभय योजना आहे. विशेष म्हणजे केवळ मूळ थकबाकीच्या रकमेचा एकरकमी भरणा केल्यास लघुदाब ग्राहकांना आणखी १० टक्के तर उच्चदाब ग्राहकांना ५ टक्के सूट मिळत आहे. किंवा मूळ थकबाकीची सुरवातीला ३० टक्के रक्कम भरून उर्वरित ७० टक्के रक्कम व्याजमुक्त सहा हप्त्यांत भरण्याची देखील सोय आहे. सोबतच मागणीनुसार नवीन वीजजोडणी घेण्याची सोय उपलब्ध आहे. महावितरणच्या फ्रेंचायझी क्षेत्रातील ग्राहकांना देखील ही संधी आहे. ही योजना दि. १ सप्टेंबर ते दि. ३० नोव्हेंबरपर्यंत असल्याने थकबाकीमुक्तीच्या या योजनेचे केवळ ५७ दिवस शिल्लक आहेत.

कायमस्वरुपी वीजपुरवठा खंडित असलेल्या जागेवर वीजबिलांची जुनी थकबाकी भविष्यात विजेच्या वापरासाठी नियमानुसार भरावीच लागणार आहे. त्यामुळे सध्या वीज वापराची गरज असो किंवा नसो, थकबाकीदार ग्राहकांनी अभय योजनेचा लाभ घेऊन किमान वीजबिलाच्या सध्याच्या थकबाकीतून मुक्त् व्हावे असे आवाहन पुणे प्रादेशिक संचालक श्री. भुजंग खंदारे यांनी केले आहे.

पश्चिम महाराष्ट्रामध्ये आतापर्यंत ९ हजार ६९८ ग्राहकांनी अभय योजनेत सहभाग नोंदविला आहे. यात पुणे जिल्हा- ४६१७, सातारा- ४५५, सोलापूर- १४३९, कोल्हापूर- ११०२ आणि सांगली जिल्ह्यातील २०८५ थकबाकीदारांनी या योजनेत सहभाग घेतला आहे. या ग्राहकांनी मूळ थकबाकी भरल्यास व्याज व विलंब आकार शुल्काचे संपूर्ण ३ कोटी २४ लाख रुपये माफ होणार आहे. योजनेत सहभागी ४ हजार ११५ वीजग्राहकांनी केवळ जागेच्या थकबाकीमुक्तीला प्राधान्य देत नवीन वीजजोडणीची आवश्यकता नसल्याचे नमूद केले आहे. तर उर्वरित ५ हजार ५८३ ग्राहकांनी नवीन वीजजोडणी घेणार असल्याचे स्पष्ट केले आहे. विशेष म्हणजे सहभागी ९ हजार ३१६ (९६ टक्के) ग्राहकांनी थकबाकी एकरकमी भरण्यास पसंती दिल्याने त्यांना मूळ थकबाकीमध्ये आणखी सवलत मिळणार आहे. 

महावितरण अभय योजनेत सहभागी होण्यासाठी व थकबाकीची रक्कम भरण्याची सोय www.mahadiscom.in ही वेबसाईट व मोबाईल अॅपवर उपलब्ध आहे. अधिक माहितीसाठी नजीकच्या महावितरण कार्यालयात संपर्क साधावा असे आवाहन करण्यात आले आहे.

 निकमार विद्यापीठाचा पहिला दीक्षांत समारंभ संपन्न

पुणे: प्रमाणिकता, सचोटी आणि निष्ठा हा स्व: विकासाचा आणि नवतंत्रज्ञानाच्या निर्माणाचा आधार आहे. विद्यार्थ्यांनी आपल्या अपयशातून शिकण्याची गरज आहे. अपयाशाने खचून न जाता विद्यार्थ्यांनी यातून मार्ग काढून यश संपादन केले पाहिजे. विविध रणनीती आणि अनेक साधनांच्या माध्यमातून यशाची शिखर चढता येतात, म्हणून निराश न होता प्रमाणिकता राखत यश मिळवावे, असे प्रतिपादन निकमार विद्यापीठाच्या विश्वस्त मंडळाचे अध्यक्ष आणि एचसीसी लिमिटेडचे प्रमुख श्री अजित गुलाबचंद यांनी केले.
देशातील पहिली कन्स्ट्रक्शन मॅनेजमेंटमधील विद्यापीठ म्हणून ओळख असणारी निकमार विद्यापीठ पुणे यांचा पहिला दीक्षांत समारंभात प्रमुख पाहुणे म्हणून ते बोलत होते. या कार्यक्रमाच्या अध्यक्षस्थानी निकमार विद्यापीठाचे अध्यक्ष डॉ. अनिल कश्यप होते. यावेळी कुलगुरू डॉ. सुषमा एस. कुलकर्णी, परीक्षा नियंत्रक डॉ. आदिनाथ दामले आणि कुलसचिव डॉ. प्रशांत दवे यांच्यासह अन्य मान्यवर उपस्थित होते.दरम्यान पहिल्या दीक्षांत समारंभात एमबीए अडव्हान्स कंस्ट्रक्शन मॅनजमेंटचा विद्यार्थी लक्ष्मणन, एमबीए – एडवांस प्रोजेक्ट मैनेजमेंट, 2024चा विद्यार्थी पटगर रवींद्र नारायण, एमबीए – रिअल इस्टेट आणि अर्बन इन्फ्रास्ट्रक्चर मॅनेजमेंट, 2024 चा विद्यार्थी बोंडे कुणाल शांताराम, पीजीपी – क्वांटिटी सर्व्यिंग आणि कंट्रक्ट् मैनेजमेंट, 2024चा विद्यार्थी विपुल भालदे, पीजीपी – क्वांटिटी सर्व्यिंग आणि कंट्रक्ट् मैनेजमेंट, 2023 चा विद्यार्थी प्रजापती शिवप्रसाद बाराखुराम आणि पीजीपी – मैनेजमेंट ऑफ फैमिली ओन्ड् कंस्ट्रक्शन बिजनेस , २०२३चा विद्यार्थी चोवट्या श्रेनिल विजयभाई यांना सुवर्णपदक प्रदान करण्यात आले. तसेच विविध विद्याशाखेतील  790 हून अधिक पदवीधर विद्यार्थ्यांना पदवी प्रदान करण्यात आली.

निकमार विद्यापीठाच्या विश्वस्त मंडळाचे अध्यक्ष आणि एचसीसी लिमिटेडचे प्रमुख श्री अजित गुलाबचंद म्हणाले की, अपयश ही यशाच्या जवळ घेऊन जाणारी आणि विविध बाबींचे मार्गदर्शन करणारी संस्था आहे. तुम्ही मजबूत निर्माणासाठी मेहनत घेऊन मानवता समृद्ध करण्यासाठी प्रयत्न करावे.

निकमार विद्यापीठाचे अध्यक्ष डॉ. अनिल कश्यप म्हणाले, की विद्यार्थ्यांच्या जीवनातील अत्यंत महत्वाचा आणि त्यांच्या मेहनतीचा प्रत्यक्ष अनुभव घेण्याचा दिवस आहे. निकमार हा विचार 1983 मध्ये सुरू करण्यात आला आहे. तेव्हापासून आतापर्यंत अनेक फळे या वृक्षाला आली आहे. संशोधन आणि नव तंत्रज्ञानाच्या शिकविण्यासाठी आणि शहरी विकासासाठीचे अभ्यासक्रम येथे शिकविले जातात. ही आताची बॅच सगळ्यात महत्वाची आणि उच्च सॅन्डर्ड सेट करणारी आहे. आम्ही इंडस्ट्री रेडी विद्यार्थी घडविण्यासाठी प्रयत्नशील आहोत. भारताच्या विकासासाठी आणि विविध शहराच्या विकासासाठी आमचे विद्यार्थ्यी कटीबद्ध असतील. आम्ही निकमारच्या विद्यार्थ्यांकडे बदल घडविणारे आणि व्यावसायिक निर्माण करणारे हात म्हणून बघतो. उच्चस्तरावरील शैक्षणिक वातावरण तयार करण्याचा आमचा मानस आहे.  

कुलगुरू डॉ. सुषमा एस. कुलकर्णी यांनी प्रस्तावना केली. त्या म्हणाल्या की विद्यापीठाने व्यवसायिक कौशल्य विकसित करण्यासाठी विद्यार्थ्यांना मार्गदर्शन केले आहे. आमचे धैय्य आहे, की स्किलड टेक्नो मैनेजर निर्माण करणे आणि त्याद्वारे व्यावसायिक निर्माण करणे हा आहे. शाश्वत विकासासाठी आतापर्यंत 227 संशोधन पेपर प्रकाशित केले आहे. परदेशातील विविध विद्यापीठांसोबत एमओयु केल्याने आमच्या विद्यार्थ्यांना परदेशात संधीची दारे उघडी झाली आहेत.
डॉ. ज्योतिष आणि  डॉ.  धामा यांनी सूत्रसंचालन केले. डाॅ. आदिनाथ दामले यांनी आभार मानले. 

एमआयटी वर्ल्ड पीस युनिव्हर्सिटी तर्फे प्रेषित झरथुष्ट्र व हुएन -ए-त्संग यांच्या पूर्णाकृती ब्राँझ पुतळ्याचे अनावरण

 पुणे, दि. ४ ऑक्टोबर ः “सकारात्मक विचार ठेवा, उत्तम कार्य करा आणि चांगले बोला असा संदेश प्रेषित झरथुष्ट्र यांनी मानवतेला दिला. राष्ट्रपिता महात्मा गांधी यांनी प्रेम आणि अहिंसेच्या शक्तीच्या आधारे विश्वशांतीसाठी प्रयत्न केले. जगातील सर्व धर्म हाच मानवतावादी संदेश दिला आहे.” असे मत झोराष्ट्रीयन कॉलेजच्या संस्थापक अध्यक्षा डॉ. मेहेरे मास्टर मूस यांनी व्यक्त केले.  
माईर्स एमआयटी वर्ल्ड पीस युनिव्हर्सिटी आणि माईर्स एमआयटी आर्टस, डिझाइन अँड टेक्नॉलॉजी युनिव्हर्सिटीच्या वतीने गांधी जयंतीच्या निमित्ताने पारशी धर्माचे संस्थापक प्रेषित झरथुष्ट्र आणि चीनी बौध्द भिक्षू व महान दूरदर्शी विद्वान विचारवंत तत्वज्ञ हुएन-ए-त्संग यांच्या पूर्णाकृती ब्राँड पुतळ्याचे अनावरण करण्यात आले. या प्रसंगी त्या बोलत होत्या.
यावेळी ज्येष्ठ संगणक शास्त्रज्ञ पद्मभूषण डॉ. विजय भटकर व जहांगीर रूग्णालयाचे अध्यक्ष जहांगीर प्रमुख पाहुणे म्हणून उपस्थित होते. एमआयटी डब्ल्यूपीयूचे संस्थापक अध्यक्ष विश्वधर्मी प्रा.डॉ.विश्वनाथ दा. कराड हे अध्यक्षस्थानी होते.
तसेच डब्ल्यूपीयूचे कार्याध्यक्ष प्रा. राहुल कराड, एडीटी युनिव्हर्सिटीचे कार्याध्यक्ष डॉ. मंगेश तु. कराड, डब्ल्यूपीयूचे कुलगुरू डॉ. आर.एम.चिटणीस व प्र कुलगुरू डॉ. मिलिंद पांडे उपस्थित होत.
डॉ. मेहेरे मास्टर मूस म्हणाल्या,”जगातील सर्वात मोठ्या विश्वशांती घुमटात दोन महामानवांचे पूर्णाकृती पुतळे स्थापन केल्याबद्दल डॉ. मेहेर मास्टर मूस यांनी डॉ. कराड यांना शुभेच्छा दिल्या. सर्व धर्मांनी आपल्या तत्वज्ञानातून चांगले मानव घडविण्याचा संदेश दिला आहे. त्याआधारेच विश्वधर्मी प्रा. डॉ. विश्वनाथ कराड शिक्षणाच्या माध्यमातून चांगले मानव घडविण्याचा प्रयत्न करत आहेत.”
प्रा. डॉ. विश्वनाथ दा. कराड म्हणाले, “प्रेषित झरथुष्ट्र आणि तत्वज्ञ हुएन-ए-त्संग यासारख्या महामानवांनी मानवतेला विश्वशांती आणि एकोप्याचा संदेश दिला. सध्या जग गोंधळ, संभ्रम, हिंसाचार आणि दहशतवादाचा सामना करत असताना, या महान व्यक्तींचा संदेश समाजात प्रसृत होणे आवश्यक आहे. त्यापासून प्रेरणा घेत विद्यार्थ्यांनी स्वहितापेक्षा विश्वकल्याणाचा विचार केला पाहिजे आणि ज्ञानाची पूजा केली पाहिजे. विश्वशांती घुमट हा ज्ञान पूजेचे स्थान असून, भारत विश्वगुरू होण्यासाठी समाजाला दिशा देण्याची जबाबदारी पार पाडत आहे.”
जहांगीर म्हणाले,”विश्वशांती घुमटाचा परिसर हा खर्‍या अर्थाने धर्मनिरपेक्ष आहे, तसेच सर्व धर्मीयांचे धार्मिक स्थळ आहे. चांगले बोला, सकारात्मक विचार करा आणि योग्य कृत्य करा, असा संदेश देणार्‍या प्रेषितांचे व महामानवांचे पुतळे सर्वांसाठी प्रेरणादायी असून, हे घुमट एकात्मतेचे मंदिर होवो.”
डॉ. विजय भटकर म्हणाले, “नवीन विचार दाबण्याचा प्रयत्न झाला, तेव्हा ते नवीन रुपात पुन्हा उदयास आले आहेत. तक्षशिला-नालंदा ही विद्यापीठे जाळली गेली, तरीही ती विश्वशांती घुमट च्या माध्यमातून पुनःस्थापित होऊन मानवतेला शांततेचा संदेश देत आहेत.”
राहुल कराड म्हणाले, ” या विश्वशांती घुमट परिसरात ५४ महामानवांचे पुतळे असून, त्यांनी मानवतावादाचा पाया रचला, तसेच समाजाला भविष्यवेधी विचार दिला. रस्ते वेगळे असले, तरी अंतिम उद्दिष्ट एकच आहे आणि ज्ञानाचा उपयोग हा मानवाच्या कल्याणासाठी झाला पाहिजे.”
डॉ. आर. एम. चिटणीस यांनी स्वागतपर भाषण केले.
डॉ. गौतम बापट यांनी सूत्रसंचालन केले. डॉ. मिलिंद पांडे यांनी आभार मानले.