अमली पदार्थ विक्रेत्यांना पुण्यात थारा नाही- ना. पाटील

झिरो टॉलरन्स हेच पुणे पोलिसांचे अमली पदार्थ विरोधी धोरण- उपायुक्त निखील पिंगळे

पुणे-ड्रग्जमुक्त युवा पिढीसाठी मंगळवारी शिवाजी रायगड स्मारक मंडळ, अंकुर प्रतिष्ठान, शिवश्री प्रतिष्ठान, अखिल भारतीय पूर्वसैनिक सेवा परिषद, अग्रेसर भारत आदी संघटनांच्या वतीने कोथरुड मधील हुतात्मा राजगुरू चौक येथे निदर्शने करण्यात आली. या निदर्शनांमध्ये कोथरुडकरांनी उत्स्फूर्तपणे सहभागी होऊन अमली पदार्थ विरोधात शंखनाद केला. यामध्ये दिव्यांग, ज्येष्ठ नागरिक, महिला मोठ्या संख्येने सहभागी झाले होते.

यावेळी राज्याचे उच्च व तंत्रशिक्षण मंत्री आणि कोथरुडचे आमदार चंद्रकांतदादा पाटील यांनी अमली पदार्थ विरोधी लढा तीव्र करण्यासाठी अमली पदार्थ विक्रीची माहिती पोलिसांना देऊन सहकार्य करणाऱ्यास १० हजारांचे बक्षीस देण्याची घोषणा केली. तसेच, व्यसनाधीन व्यक्तींना यातून बाहेर काढण्यासाठी समुपदेशन केंद्र सुरु करण्याची घोषणा केली. तसेच, झिरो टॉलरन्स हेच पुणे पोलिसांचे अमली पदार्थ विरोधी धोरण असल्याची भूमिका पोलीस उपायुक्त निखील पिंगळे यांनी यावेळी मांडली.

यावेळी नामदार चंद्रकांतदादा पाटील म्हणाले की, कोथरुड मधील नागरिकांनी एकत्रित येऊन सुरू केलेल्या अमली पदार्थ विरोधी चळवळीत सामान्य नागरिक म्हणून सहभागी झालो आहे. सांगली सारख्या जिल्ह्यातही अमली पदार्थांचे साठे जप्त होत आहेत. त्यामुळे सांगलीचा पालकमंत्री नात्याने विविध उपाययोजना केल्या आहेत. पोलीस विभागास अंमली पदार्थांबाबत खात्रीशीर, ठोस आणि अचूक माहिती पुरविल्यास त्यास वैयक्तिकरीत्या रक्कम रूपये १० हजारांचे बक्षीस दिले जात आहे. कोथरुड मध्येही अमली पदार्थांची माहिती पोलीस प्रशासनास देऊन सहकार्य करणाऱ्यास बक्षीस देऊ, अशी घोषणा त्यांनी यावेळी केली.

अमली पदार्थ विक्रेत्यांना पुण्यात थारा मिळू देणार नाही, असा स्पष्ट इशारा देऊन ते पुढे म्हणाले की, कोल्हापूर जिल्ह्याचा पालकमंत्री असताना, डॉल्बीमुक्त गणेशोत्सव साजरा करण्याचे आवाहन केले होते. त्यावेळी मला प्रचंड रोषाचा सामना करावा लागला होता. पण मी कुठेही मागे हटलो नाही, अशी आठवण त्यांनी करुन दिली. तसेच, व्यसनाधीन व्यक्तींना त्यातून बाहेर काढण्यासाठी लोकसहभागातून कोथरुड मध्ये समुपदेशन केंद्र सुरू करण्याची घोषणा त्यांनी यावेळी केली.

यावेळी पोलीस उपायुक्त निखील पिंगळे यांनी अमली पदार्थ ही आपल्या तरुण पिढीला उद्ध्वस्त करत आहे. त्यामुळे झिरो टॉलरन्स हेच पुणे पोलिसांचे अमली पदार्थ विरोधी धोरण असल्याचे स्पष्ट केले. यावेळी उपस्थित सर्वांनी अमली पदार्थ विरोधासाठी शपथ देखील घेतली.

-माजी आमदार मोहन जोशी

पुणे : स्वर्गीय यशवंतराव चव्हाण साहेबांनी महाराष्ट्र समृद्ध करतानाच सुसंस्कृत राजकारण केले, त्याच विचाराने आणि मार्गाने जाण्याची सद्यस्थितीत गरज आहे, असे प्रतिपादन माजी आमदार आणि प्रदेश काँग्रेस उपाध्यक्ष मोहन जोशी यांनी आज (बुधवारी) स्व.चव्हाण साहेबांच्या जयंतीनिमित्त कार्यक्रमात बोलताना केले.

महाराष्ट्र प्रदेश कॉंग्रेस कमिटी सोशल मिडिया विभाग यांच्या वतीने स्व.यशवंतराव चव्हाण साहेब यांच्या जयंतीनिमित्त मंडईतील त्यांच्या पुतळ्यास पुष्पहार अर्पण करून अभिवादन करण्यात आले.

स्व.यशवंतराव चव्हाण साहेबांनी जलसिंचन, शेती, उद्योग, पायाभूत सुविधा याची चांगली पायाभरणी महाराष्ट्रात केली आणि महाराष्ट्राच्या प्रगतीसाठी विविध समाजाच्या आणि विचारांच्या कार्यकर्त्यांना एकत्र केले. काँग्रेस पक्ष मजबूत केला. काँग्रेस कार्यकर्त्यांनीही पक्ष वाढीसाठी स्व.चव्हाण साहेबांच्या मार्गाने जाऊन मजबुतीने उभे राहिले पाहिजे. प्रत्येक काँग्रेस कार्यकर्त्याची ती जबाबदारी आहे, असे आवाहन माजी आमदार मोहन जोशी यांनी यावेळी बोलताना केले.

या प्रसंगी बाळासाहेब अमराळे, प्रविण करपे, भोला वांजळे, चेतन अगरवाल, गौरव बालंदे, धनंजय भिलारे, साहिल राऊत, गोविंद वांजळे आदी काँग्रेसचे पदाधिकारी आणि कार्यकर्ते उपस्थित होते. प्रदेश काँग्रेसच्या सोशल मीडियाचे सरचिटणीस सुरेश कांबळे यांनी कार्यक्रमाचे आयोजन केले.

पुणे, दि. १२ मार्च २०२५: विजेची मागणी वाढल्यामुळे महाराष्ट्र व गुजरात राज्यातील ४०० केव्ही पारेषण वीजवाहिन्यांचे व्होल्टेज बुधवारी (दि. १२) दुपारी २.४७ वाजता कमी (अंडर व्होल्टेज) झाले. त्यामुळे इतर ४०० केव्ही ग्रीडचा वीजपुरवठा बंद पडण्याचा धोका टाळण्यासाठी एलटीएस (Load Trimming Scheme) यंत्रणा कार्यान्वित झाली. यात २५६ मेगावॅटची तूट निर्माण झाल्यामुळे प्रामुख्याने मंचर, राजगुरुनगर, मुळशी तसेच रास्तापेठ विभागातील सुमारे २ लाख १२ हजार ग्राहकांचा वीजपुरवठा २५ ते ३० मिनिटांपर्यंत बंद ठेवावा लागला.

४०० केव्ही वीजवाहिन्यांचे व्होल्टेज ३७५ ते ३६५ केव्हीपर्यंत आल्याने विजेची आणीबाणीसदृश्य परिस्थिती निर्माण झाली होती. अंडर व्होल्टेजमुळे भार व्यवस्थापनासाठी एलटीएस (Load Trimming Scheme) यंत्रणा कार्यान्वित झाली. यात महापारेषण कंपनीच्या काठापूर, थेऊर, फुरसुंगी, मरकळ, सणसवाडी, पिंपळगाव व कुरुळी या २२० केव्ही उपकेंद्रांचा वीजपुरवठा बंद पडला.

मात्र महावितरण, महापारेषण व महानिर्मिती कंपन्यांनी युद्धपातळीवर केलेल्या एकत्रित प्रयत्नांमुळे पुणे परिमंडलामध्ये अर्धा तासात विजेची आपत्कालिन परिस्थिती नियंत्रणात आली. यासाठी महानिर्मितीने कोयना जलविद्युत प्रकल्पाद्वारे विजेची जादा निर्मिती केली. तर महावितरण व महापारेषणने संयुक्तपणे विजेचे भारव्यवस्थापन केले. 

पारेषणमधील २५६ मेगावॅट विजेची तूट भरून काढण्यासाठी नाईलाजाने वीजपुरवठा २५ ते ३० मिनिटांपर्यंत बंद ठेवण्यात आला. यात मंचर विभागातील मंचर शहर, पिंपरखेड, निरगुडसर, काठापूर, लोणी, पेठ, राजगुरुनगर विभाग अंतर्गत आळंदी शहर, गोळेगाव, पिंपळगाव, मरकळ, धानोरे, सोलू, केळगाव, शेलपिंपळगाव, कळूस, भोसेबहूल, वडगाव आणि मुळशी विभाग अंतर्गत वाघोली, केसनंद, आव्हाळवाडी, पेरणे, थेऊर, वडती, कुंजीरवाडी, लोणी काळभोर, सोरतापवाडी, फुरसुंगी, उरुळी देवाची तसेच रास्तापेठ विभागातील कोंढवा व एनआयबीएम परिसर येथील सुमारे २ लाख १२ हजार ग्राहकांचा समावेश होता.  

मुंबई – राज्य सरकारने पुण्याकरिता सर्व्हिसेस हब निर्माण करून पुणे, मुंबईच्या एकत्रित विकासाला चालना द्यावी, असे आवाहन आमदार सिद्धार्थ शिरोळे यांनी मंगळवारी विधानसभेत बोलताना केले.

सन २०२५-२६च्या अर्थसंकल्पावरील चर्चेत आमदार शिरोळे यांनी भाग घेतला. नवी मुंबईत इनोव्हेशन सिटी विकसित होत आहे, त्याचबरोबर पुण्याकरिता सर्व्हिसेस हब निर्माण करावे, ही सध्याची गरज आहे. त्यातून पुणे, मुंबई इकॉनॉमिक रिजनच्या एकत्र विकासाला चालना मिळेल, असे आमदार शिरोळे यांनी सांगितले. पुणे विभागात महिला व्यावसायिकांकरीता ‘स्वतंत्र औद्योगिक क्षेत्र’ निर्माण करावे, अशी सूचना आमदार शिरोळे यांनी केली.

विकसित भारत आणि विकसित महाराष्ट्राच्या उद्दीष्टाकडे नेणारा उद्योग, पायाभूत सुविधा, कृषी आणि सेवा क्षेत्र याचे संतुलन साधणारा अर्थसंकल्प मांडण्यात आला आहे. ‘महाराष्ट्र आता थांबणार नाही’ या घोषणेची ग्वाही देणारा हा अर्थसंकल्प आहे, असे या अर्थसंकल्पाचे वर्णन आमदार शिरोळे यांनी केले.

मुख्य मंत्री देवेंद्र फडणवीस यांच्या कृतीशील भूमिकेमुळे दाओस येथील आर्थिक परिषदेत अनेक कंपन्यांबरोबर करार करण्यात आले. त्यामुळे १६ लाख रोजगार निर्मिती होईल, असा विश्वास शिरोळे यांनी व्यक्त केला. राज्याने निर्यातीत वाढ होण्यासाठी धोरण आखले, त्यामुळे राज्यातील निर्यातीचे प्रमाण १५.४ टक्के झाले. राज्याने लॉजिस्टिक पॉलिसी जाहीर केली त्यातूनही रोजगार निर्मिती होईल, असे शिरोळे म्हणाले.

पुण्याचे औद्योगिक आणि माहिती तंत्रज्ञान क्षेत्रातील महत्व लक्षात घेऊन अर्थसंकल्पात भरीव तरतुदी करण्यात आल्या आहेत. तळेगाव ते चाकण २५ किलोमीटरचा उन्नत मार्ग (एलिव्हेटेड रोड) प्रस्तावित केला आहे. पुणे ते शिरूर ५४ किलोमीटरचा उन्नत रस्त्याचे काम लवकरच हाती घेण्यात येणार आहे. त्यामुळे या परिसरातील औद्योगिक पट्टा आणि पुणे ते नगर प्रवास करणाऱ्यांना फायदा होईल. वाहतूक कोंडीतूनही मुक्तता होईल. पुण्यामध्ये मेट्रोच्या विस्ताराला उत्तम गती मिळाली आहे आणि असे आमदार शिरोळे यांनी सांगितले. तसेच सुमारे दोनशे सत्तावीस डिझेल बसेस ह्या लवकरात लवकर सी एन जी मध्ये रूपांतर कराव्यात आणि पुण्याला अजून तीन हजार बसेस ची गरज असून लवकर त्यावर अंमलबजावणी व्हावी अशी मागणी शिरोळे यांनी अर्थमंत्र्यांकडे केली. तसेच पुरंदर विमानतळाच्या कामाला गती देण्याचे काम सरकार ने करावे अशी ही सूचना शिरोळे यांनी केली.

प्रस्तावित पुणे-नाशिक इंडस्ट्रिअल एक्स्प्रेस वे चा आराखडा मंजूर करण्यात आला आहे. हा प्रकल्प ३ वर्षात पूर्ण होईल. त्यामुळे पुणे, अहिल्यानगर आणि नाशिक जिल्ह्यातील अर्थकारणाला चालना मिळेल, असा विश्वास आमदार शिरोळे यांनी व्यक्त केला. पुणे रिंग रोड प्रकल्पाच्या सुधारित खर्चाला मान्यता दिल्याबद्द्ल त्यांनी सरकारचे अभिनंदन केले.

पुणे-अपह्त झालेल्या दोन अल्पवयीन मुलींचा सीसीटीव्ही कॅमे-याच्या फुटेजचे आधारे शोधुन काढण्यात फरासखाना पोलीस स्टेशन कडील तपास पथकातील पोलीस अधिकारी व अंमलदार यांना यश आले आहे.
फरासखाना पोलीस स्टेशन येथे दिनांक ०७/०३/२०२५ रोजी १४ वर्षे व ८ वर्षे वयोगटातील दोन अल्पवयीन मुली तितली फाऊडेशन बुधवार पेठ पुणे येथुन अपह्त झाल्याची तक्रार नोंदवली गेल्याने, पोलीस आयुक्त अमितेश कुमार यांनी तात्काळ सदर घटनेची दखल घेवुन तपासाबाबत पोलीस उप आयुक्त, परिमंडळ १ श्री. संदिप सिंग गिल्ल पुणे शहर यांना आदेश दिले.
त्या अनुषंगाने पोलीस उप आयुक्त, परिमंडळ १ संदिप सिंग गिल्ल यांनी लागलीच परिमंडळ १ मधील गुन्हे पथकाचे पोलीस अधिकारी व पो. अंमलदार यांना वर नमुद गुन्हयाचे अनुषंगाने तैनात करुन, फरासखाना पोलीस ठाण्याचेवरिष्ठ पोलीस निरिक्षक व पोलीस निरिक्षक गुन्हे याचे देखरेखीखाली तपास करणेबाबत आदेश दिले.
नमुद गुन्हयाचे अनुषंगाने वरीष्ठ पोलीस निरीक्षक, प्रशांत भस्मे यांनी फरासखाना पोलीस स्टेशन कडील पोलीस अधिकारी सहाय्यक पोलीस निरिक्षक वैभव गायकवाड, पोलीस उप निरिक्षक अरविंद शिंदे व तपास पथकातील पोलीस अंमलदार व खडक पोलीस स्टेशन, समर्थ पोलीस स्टेशन, विश्रामबाग पोलीस स्टेशन कडील तपास पथकातील पोलीस अंमलदार यांना गुन्हयाचे अनुषंगाने सुचना देवुन वेगवेगळ्या ७ पथके तयार करुन त्यांना कामाची विभागणी करुन दिले. त्याप्रमाणे तपासकामी नेमण्यात आलेल्या ७ पथके यांनी एकमेकांचे संपर्कात राहुन, वर नमुद गुन्हयातील अपह्त झालेल्या दोन अल्पवयीन मुलीचा सीसीटीव्ही फुटेजचे मदतीने शोध सुरु केला, गुन्हयाचे अनुषंगाने पासोडया विठोबा मंदिर, बुधवार चौक, शिवाजी रोड, स्वारगेट सीटी बस स्टॅण्ड, ससुन हॉस्पीटल, पुणे स्टेशन, केशवनगर, पदमावती सहकारनगर भागात जवळपास २५२ सीसीटीव्ही कॅमे-याच्या तपासुन, सीसीटीव्ही फुटेज चे मदतीने दोन अल्पवयीन मुलीचा माग काढुन, त्याचा शोधु घेवुन गुन्हा उघडकीस आणण्यात फरासखाना पोलीस स्टेशनला यश आले आहे.सदरची कामगिरी अपर पोलीस आयुक्त, पश्चिम प्रादेशिक विभाग प्रविणकुमारपाटील, पोलीस उप-आयुक्त परी-१ संदिप सिंग गिल्ल, सहा. पो. आयुक्त फरासखाना विभाग अनुजा देशमाने, यांचे मार्गदर्शनाखाली वरीष्ठ पोलीस निरीक्षक, प्रशांत भस्मे, पो.नि. (गुन्हे) अजित जाधव, स.पो.नि. वैभव गायकवाड, पो.उप-नि. अरविंद शिंदे, पोलीस उप निरिक्षक संतोष गोरे, सपाफौ गेहबुब मोकाशी, पोलीस अमंलदार, तानाजी नागंरे, नितीन तेलंगे, प्रविण पासलकर, वैभव स्वामी, विशाल शिंदे, महेश राठोड, अविनाश गोपनर, नितीन जाधव, गजानन सोनुने, सुमित खुट्टे, संदिप कांबळे, महेश पवार, शशिकांत ननावरे, चेतन होळकर, अर्जुन कुंडाळकर, अमोल गावडे, भाग्येश यादव, शोएब शेख, मयुर काळे, सागर मोरे यांनी केलेली आहे.

मुंबई: महाराष्ट्र विधानसभा अर्थसंकल्पीय अधिवेशनात वडगावशेरी मतदारसंघाचे आमदार यांनी महानगरपालिकेत समाविष्ट झालेल्या लोहगाव सह इतर गावांच्या विकास आराखड्याबाबतीत शासनाचे लक्ष वेधले. पठारे म्हणाले, “समाविष्ट झालेल्या गावांचा विकास आराखडा अद्याप शासनाकडून मंजूर न झाल्याने नागरिकांना विविध समस्यांचा सामना करावा लागत आहे. या गावांमध्ये डीपी (विकास आराखडा) प्लॅन नसल्यामुळे नागरिकांच्या जमिनी, भूखंड आणि बांधकाम संदर्भातील कायदेशीर प्रक्रिया रखडल्या आहेत. परिणामी, अनेक कुटुंबांना मालमत्तेच्या संदर्भातील तांत्रिक आणि प्रशासकीय अडथळ्यांमुळे मोठ्या समस्यांना तोंड द्यावे लागत आहे.”

पुढे बोलताना ते म्हणाले, “वडगावशेरी मतदारसंघातील प्रमुख रस्ते, जोडरस्ते आणि पदपथांवर अतिक्रमण मोठ्या प्रमाणात वाढले असून, याबाबत नागरिकांनी वारंवार तक्रारी करूनही महापालिकेकडून दुर्लक्ष केले जात आहे.” महानगरपालिकेच्या अतिक्रमण विभागातील संबंधितांकडून हप्ते वसूली होत असल्याचे आढळून आल्याचे त्यांनी सांगितले.

आमदार पठारे यांच्या ठोस मागणीनंतर उद्योग मंत्री मा. श्री. उदयजी सामंत यांनी या सर्व बाबींची सखोल शहानिशा करून आवश्यक ती कार्यवाही करण्याचे स्पष्ट आश्वासन दिले. यामुळे वडगावशेरी मतदारसंघातील नागरिकांना दिलासा मिळण्याची शक्यता आहे. शासनाच्या त्वरित हस्तक्षेपामुळे या भागातील नागरी समस्यांचे निराकरण होईल, अशी अपेक्षा आहे.

मुंबई – सर्वोच्च न्यायालयाच्या निर्णयानुसार राज्यात सर्व वाहनांना उच्च सुरक्षा नंबर प्लेट (एचएसआरपी) लावण्याचे काम चालू झाले आहे. नंबरप्लेट लाण्यासाठीची मुदत तीन महिने वाढवून मिळावी, अशी मागणी आमदार सिद्धार्थ शिरोळे यांनी विधानसभेत आज (बुधवारी) केली आहे.

एप्रिल २०१९ पूर्वी खरेदी केलेल्या सर्व वाहनांना ‘उच्च सुरक्षा नंबर प्लेट (एचएसआरपी) लावणे सुप्रीम कोर्टाने बंधनकारक केले आहे. त्यानुसार, राज्यात वाहनांना नंबर प्लेट लावण्याचे काम सुरू झाले आहे. त्याची अंतिम मुदत ३० एप्रिल २०२५ आहे. केवळ पुणे शहरातच सर्व प्रकारची ४० लाख वाहने आहेत. आजपर्यंत फक्त २ लाख वाहनांना एचएसआरपी नंबर प्लेट लावण्यात आली आहे. वाहनांची मोठी संख्या पाहता ३० एप्रिल पर्यंत पुण्यातील सर्व वाहनांना एचएसआरपी नंबर प्लेट लावणे सध्याच्या वेगाने अशक्य आहे. आरटीओ कार्यालयांत त्यासाठी सक्षम व्यवस्था नाही. हे त्याचे एक प्रमुख कारण आहे. त्यामुळे नागरिक प्रचंड संतप्त झालेले आहेत. केवळ पुण्यातच नव्हे तर राज्याच्या विविध शहरांमध्ये देखील अशीच परिस्थिती आहे, याकडे आमदार शिरोळे यांनी सभागृहाचे लक्ष वेधले.

तसेच या नंबर प्लेट लावणारी सेंटर्स कमी असल्यामुळे नागरिकांना अपॉइंटमेंट लवकर मिळत नसून, राज्यात सेंटर्स वाढवून द्यावीत आणि नंबर प्लेट लावून देण्यासाठीची मुदत ३ महिने वाढवून द्यावी, अशी मागणी आमदार शिरोळे यांनी केली आहे. या मागणीचे पत्र आमदार शिरोळे यांनी परिवहनमंत्री प्रताप सरनाईक यांनाही पाठविले आहे.

मंगळवारी रात्रभर वीज खंडित नव्हती

पुणे, दि. १२ मार्च २०२५: स्वारगेट येथील एसटी महामंडळाच्या बसस्थानकाचा वीजपुरवठा मंगळवारी (दि. ११) रात्रभर सुरळीतच होता. वीजपुरवठ्यामध्ये कोणताही व्यत्यय आला नाही. तथापि, स्वतंत्र वीजजोडणी असलेल्या बस आगारामध्ये तांत्रिक बिघाडामुळे दोन फेज सुरु असले तरी हायमास्ट व कार्यालयांचा वीजपुरवठा सुरु होता असा खुलासा महावितरणकडून करण्यात आला आहे. स्वारगेट बसस्थानकामध्ये काल रात्रभर वीज खंडित होती का याबाबत बुधवारी (दि. १२) सकाळपासून माध्यमांद्वारे विचारणा होत आहे. त्यासंदर्भात महावितरणकडून हे स्पष्टीकरण करण्यात आले.

एसटी महामंडळाच्या स्वारगेट बसस्थानक व आगारासाठी स्वतंत्र उच्चदाबाची वीजजोडणी आहे. यातील बसस्थानकाचा वीजपुरवठा अखंडित व सुरळीत आहे. तर आगाराच्या जोडणीला वीजपुरवठा करणाऱ्या भूमिगत वीजवाहिनीमध्ये काल सायंकाळी बिघाड झाला. मात्र महावितरणकडून दोन फेजद्वारे आगारामध्ये कार्यालयीन व हायमास्ट दिव्यांचा वीजपुरवठा सुरु ठेवण्यात आला होता. बिघाड झालेली वीजवाहिनी उड्डाणपुलाखालील कॉन्क्रीट रस्त्याखाली आहे. त्यामुळे आगाराला पर्यायी व्यवस्थेतून तीन फेज वीजपुरवठा उपलब्ध करून देण्यात येत आहे. मात्र स्वारगेट बसस्थानक व आगाराच्या वीजपुरवठ्यात मंगळवारी (दि. ११) रात्रभर कोणताही व्यत्यय आलेला नाही असे महावितरणकडून स्पष्ट करण्यात आले.

मानाचा चौथा गणपती श्री तुळशीबाग सार्वजनिक गणेशोत्सव मंडळ शतकोत्तर रौप्य महोत्सवी वर्ष : महिला उद्योजिकांचा सन्मान

पुणे: महिलांच्या सशक्तीकरणाच्या प्रक्रियेत केवळ आर्थिक स्वावलंबनच नव्हे, तर संस्कृती आणि नैतिक मूल्यांचे संवर्धनही महत्त्वाचे आहे. आजच्या धकाधकीच्या जीवनशैलीत, व्यवसाय किंवा नोकरी करताना महिलांनी केवळ पैसा कमविण्यावर लक्ष केंद्रित न करता, मुलांवर चांगले संस्कार देखील कसे करता येतील याकडे लक्ष द्यायला पाहिजे.अशी भावना ज्येष्ठ उद्योजिका आणि सामाजिक कार्यकर्त्या शोभा धारिवाल यांनी व्यक्त केली.

मानाचा चौथा गणपती श्री तुळशीबाग सार्वजनिक गणेशोत्सव मंडळाच्या वतीने मंडळाच्या शतकोत्तर रौप्य महोत्सवी वर्षानिमित्त महिला उद्योजिकांचा सन्मान सोहळ्याचे आयोजन करण्यात आले होते. यावेळी मृणाली रासने, ढोल ताशा महासंघाचे अध्यक्ष पराग ठाकूर, शतकोत्तर रौप्य महोत्सवी वर्षाचे स्वागताध्यक्ष कृष्णकुमार गोयल, विश्रामबाग पोलीस ठाण्याच्या वरिष्ठ पोलिस निरीक्षक विजयमाला पवार, मंडळाचे अध्यक्ष विकास पवार, कोषाध्यक्ष नितीन पंडित, उपाध्यक्ष विनायक कदम अभिनेत्री वाळके उपस्थित होते. महिलांसाठी मोफत आरोग्य तपासणी शिबिर आणि शासकीय स्वयंरोजगारासाठी योजनांचे माहिती प्रदर्शन यावेळी आयोजित करण्यात आले होते.

यावेळी सारिका पाठक, सोनल गांधी या महिला उद्योजिकांचा सन्मान करण्यात आला.    

कृष्णकुमार गोयल म्हणाले, महिलांचे कर्तृत्व मोठे आहे. रोज त्यांच्याबद्दल आपण कृतज्ञ असले पाहिजे. अनेक रुपात त्या आपले कर्तृत्व पार पाडत असतात. तुळशीबाग गणपती शतकोत्तर रौप्य महोत्सवी वर्ष साजरे करत आहे. महोत्सव अंतर्गत वर्षभर सामाजिक आणि धार्मिक कार्यक्रम होणार आहेत.