आर्किटेक्ट, इंजिनिअर्स आणि सर्व्हेअर्स असोसिएशन चा दिवाळी कार्यक्रम

पुणे:आर्किटेक्ट, इंजिनिअर्स आणि सर्व्हेअर्स असोसिएशन(एईएसए) कडून ‘अलंकृता’ या संगीतमय दिवाळी कार्यक्रमाचे आयोजन दि. २७ ऑक्टोबर रोजी  सकाळी १०  वाजता  भानुबेन नानावटी कॉलेज ऑफ आर्किटेक्चर (कर्वेनगर) च्या सभागृहात करण्यात आले होते.ग्वाल्हेर घराण्याच्या प्रसिद्ध शास्त्रीय गायिका डॉ.रेवा नातू आणि त्यांच्या सहकाऱ्यांनी हा अप्रतिम कार्यक्रम सादर केला.ज्येष्ठ आर्किटेक्ट डॉ.अभिजीत नातू तसेच आर्किटेक्ट, इंजिनिअर्स आणि सर्व्हेअर्स असोसिएशनचे चेअरमन  आर्किटेक्ट महेश बांगड यांच्या संकल्पनेतून हा कार्यक्रम साकार झाला. हा कार्यक्रम सर्वांसाठी विनामूल्य होता.

कला, अलंकार आणि संस्कृती चा आविष्कार या कार्यक्रमात झाला. सुरेल गीत रचनांच्या लडीमधून दागिन्यांची कहाणी ‘अलंकृता ‘ मधून उलगडली.अलंकार हा परंपरेने नावीन्याकडे सोपवलेला वारसा मैफलीतून पुढे आला.

राजस सुकुमार,बिंदिया ले गयी हमार ये मछलिया,नथ ही सजली, नथनिया ने बडा दुख दिना,मुंदरी मोरी काहेको छीन रहे,बिल्वर अंगठी तोडे हा मराठी गोंधळ,मंगलाष्टक,   रेणुका स्तोत्र अशा अलंकृत रचनांना डॉ.रेवा नातू यांनी अप्रतिम स्वरसाज चढविला.

निवेदन आणि गायनातून उलगडणाऱ्या अलंकृताला पीएनजी(सांगली )च्या दागिन्यांच्या छायाचित्र प्रक्षेपणाने आगळी उंची प्राप्त झाली. भरतमुनीपासून, संत साहित्यापासून लोकसाहित्य, काव्य शास्त्र विनोदातून अलंकारांचे अलवार  रंग  सजून या मैफलीत आले. उपस्थित रसिकांनी भरभरून दाद दिली.स्त्री धन असलेल्या दागिन्यांच्या प्रकारांची गर्भश्रीमंती या कार्यक्रमातून समोर आली.अलंकार हा परंपरेने नावीन्याकडे सोपवलेला वारसा पुढे आला.

डॉ.मृणाल घोंगडे, मंजुषा उकीडवे यांनी कार्यक्रमाचे बहारदार निवेदन केले. त्यातून दागिन्यांचा इतिहास आणि मनोरंजक नोंदी उलगडल्या.राजीव राजे यांनी प्रास्ताविक केले.   आर्किटेक्ट, इंजिनिअर्स आणि सर्व्हेअर्स असोसिएशन(एईएसए)  चे  संजय तासगावकर,जयंत पटवर्धन,जयंत इनामदार, निनाद जोग,दिवाकर निमकर,पुष्कर कानविंदे,पराग लकडे हे पदाधिकारी उपस्थित होते. ईशा उमराणी यांनी परिचय करून दिला.

उमेश पुरोहित,अक्षय शेवडे,प्रज्ञा देसाई,तुषार दीक्षित,हेमंत पोटफोडे,सारिका सोमण,सानिका जोगळेकर,मधुरा भिडे, पायल वाळके,अनुजा महाजन यांनी अनुरूप साथसंगत केली.

न्यायव्यवस्थेला नेमके प्रश्न विचारले पाहिजेत: अॅड. असीम सरोदे

पुणे :युवक क्रांती दलाचे संस्थापक आणि महाराष्ट्र गांधी स्मारक निधीचे अध्यक्ष डॉ.कुमार सप्तर्षी यांनी संपादित केलेल्या ‘सत्याग्रही विचारधारा’ या दिवाळी अंकाचा प्रकाशन समारंभ शनिवार,दि.२६ ऑक्टोबर रोजी,सायंकाळी ६ वाजता गांधी भवन(कोथरूड)येथे झाले.ज्येष्ठ लेखक राजन खान,’निर्भय बनो’ चळवळीचे प्रणेते अॅड.असीम सरोदे यांच्याहस्ते हा प्रकाशन समारंभ झाला. महाराष्ट्र गांधी स्मारक निधीचे अध्यक्ष डॉ.कुमार सप्तर्षी  हे कार्यक्रमाच्या अध्यक्षस्थानी होते.   

एम. एस. जाधव,अन्वर राजन, डॉ उर्मिला सप्तर्षी, प्रशांत कोठडिया, रवींद्र धनक, डॉ. प्रवीण सप्तर्षी, भारदे, एड. स्वप्नील तोंडे,अभय देशपांडे, सौ.रमा सप्तर्षी, प्रसाद झावरे, अप्पा अनारसे, सचिन पांडुळे उपस्थित होते.अभय देशपांडे यांनी सूत्रसंचालन केले. अन्वर राजन यांनी आभार मानले.

ज्येष्ठ लेखक राजन खान म्हणाले,’डॉ. कुमार सप्तर्षी हे पित्याच्या जागी आहेत.ते देशातील मानवी विद्यापीठ आहेत.सत्याग्रही विचारधारा चालणार नाही असे पुण्यातील अनेकांना वाटत होते. पण या मासिकाने यशस्वी होऊन दाखवले.

‘डॉ. सप्तर्षी यांच्या समाजाबद्दल च्या कल्पना, विचार आवडले. म्हणून एकत्र काम केले. युक्रांद आणि पँथर ने राजकारणात यायला नको होते. त्यांनी देशाला दिशा दिली असती.   समाजकारणात राहून काम करायला हवे होते, राजकारणात जायला  नको होते. राजकारण हा जुगार आहे. कोणाला पाठिंबा द्यावा असा प्रश्न पडतो. धर्म आणि राजकारण हे धंदे आहेत.त्यातून चलन निर्मिती होते. महा विकास आघाडी ला पाठिंबा दिला पाहिजे पण त्यांनी अदानी बरोबर हात मिळवणी केलेली चालणार आहे का ?  असा प्रश्न राजन खान यांनी विचारला.

विचारधारा आणि सध्याच्या नेत्यांबद्दल बोलताना राजन खान पुढे म्हणाले,’नेहरू आणि गांधी सर्वच पक्षांच्या दृष्टीने अडचणीत ठरले असले तरी राहुल गांधींना राजकारण ची नाडी सापडली आहे, असे माझ्या लक्षात आले आहे.त्यांनी डॉ. सप्तर्षी यांचे मार्गदर्शन घेतले पाहिजे.डाव्यानी तत्व निष्ठता सोडली नसती तर देशाची इतकी वाताहात झाली नसती. त्यामुळे टुकारांना साहेब म्हणावे लागत आहे. पवारांनी बारामतीत फक्त आपल्या कुटुंबियांना निवडणुकीत का उभे करावे, असा प्रश्न विचारला पाहिजे. छत्रपतींचा वारसा त्यांचे वारसा चालवतात का, असाही प्रश्न पडतो.अण्णा हजारे देखील उघडे पडले. आपण त्यांनाही फसलो.

सर्वच जण समाजाला फसवणार असतील तर आपण जायचे कुठे? सरंजामशाही आपल्यालाच हवी आहे, म्हणून ती टिकून आहे. आपण निवडून देतो म्हणून हे सारे चालू आहे.मनुस्मृती टिकून होतीच समाजात, पण लागू होण्याच्या बेतात आहे. परंतु, तरीही या देशातील करुणेचा प्रवाह थांबणार नाही. आपण काय करणार यावर लक्ष ठेवावे लागणार आहे.

एड. असीम सरोदे म्हणाले,’ डॉ सप्तर्षी यांनी सत्याग्रही विचारधाराची वैचारिक बैठक तयार केली आहे. अण्णा हजारेंच्या नादात देश वाहवत गेला. सत्याग्रह कल्पनेबाबत गैरसमज तयार केला. त्यांनी इलेक्टोरल बाँड बद्दल बोलायला हवे होते. न्यायाला अन्यायाचे स्वरूप दिले जात आहे. न्याय व्यवस्थेत लहान लहान चंद्रचूड तयार होत आहेत. न्यायव्यवस्थेला नेमके प्रश्न विचारणारे उरले नाहीत.आपण संवैधानिक पद्धतीने लढलो तर दुराग्रह करणाऱ्यांना अधिक त्रास होतो. असत्य बोलणारांना मोठी किंमत मिळत आहे.म्हणूनच व्रत घेतल्यासारखे सत्याचा मार्ग धरला पाहिजे.गांधी आणि आंबेडकर यांना एकत्र करून चालले पाहिजे.

अध्यक्ष स्थानावरुन बोलताना डॉ. कुमार सप्तर्षी म्हणाले,’सर्व समाजातील अंतर कमी झाल्याशिवाय देशाची प्रगती होणार नाही. सत्य हे ठामपणे बोलले तर त्याचा प्रभाव पडतो. सध्या अनैतिकता पचविण्याची समाजाची तयारी झाली आहे.तसे होऊ देता कामा नये. लाडकी बहिण म्हणणारे महिलेलाच शिवीगाळ करू लागले आहेत.मागील निवडणुकीत नागरिकांची भीती गेली आहे. अन्याय ही नीती बनू देता कामा नये.काळ सोकावू देता कामा नये.

पुणे-

पुण्यातील चितळे बंधूंच्या दुकानावर दरोडा पडला आहे. औंध बाणेर रोडवरील दुकानावर चोरट्यांचा डल्ला घातला आहे. चोरीची घटना सीसीटीव्हीत चित्रित झाले आहेत. दुकानातील मोठी रोकड लंपास केल्याची माहिती मिळाली आहे. 

बाणेर भागातील चितळे बंधू मिठाई विक्री दुकानाचा दरवाजा उचकटून चोरट्यांनी गल्ल्यातील दीड लाख रुपयांची रोकड चोरुन नेल्याची घटना रविवारी सकाळी उघडकीस आली. दुकानात चोरी करणाऱ्या चोरट्यांना सीसीटीव्ही कॅमेऱ्यांनी टिपले असून, त्यांचा शोध घेण्यात येत आहे.

याप्रकरणी चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, बाणेर भागात चितळे बंधू मिठाई विक्री दुकान आहे. शनिवारी रात्री दुकान बंद करण्यात आले. दुकान बंद करण्यापूर्वी हिशेब करण्यात आला. काही रक्कम गल्लयात ठेवण्यात आली होती. मध्यरात्री चोरट्यांनी दुकानाचा लोखंडी दरवाजा उचकटला. चोरट्यांनी दुकानात प्रवेश केला. गल्ला उचकटून चोरट्यांनी एक लाख ४१ हजार रुपयांची रोकड चोरुन नेली. दुकानातील सीसीटीव्ही कॅमेऱ्यांनी चोरट्यांना टिपले आहे. चित्रीकरण तपासून पोलिसांकडून चोरट्यांचा माग काढण्यात येत आहे.

गेल्या महिन्यात येरवड्यातील गोल्फ क्लब रस्त्यावरील एका मिठाई विक्री दुकानातून चोरट्यांनी रोकड आणि अडीच किलो आंबा बर्फी चोरुन नेली होती. त्यानंतर वारजे भागात एका सुकामेवा विक्री दुकानातून चोरट्यांनी सुकामेव्याची पाकिटे, तसेच गल्ल्यातील रोकड चोरुन नेली होती.

पुणे, दि. 26: विधानसभा सार्वत्रिक निवडणुकीच्या अनुषंगाने जिल्ह्यात ‘सी-व्हिजिल’ ॲपवर आदर्श आचारसंहिता भंगाच्या 333 तक्रारीवर कार्यवाही करण्यात आली आहे. त्यापैकी 301 तक्रारींवर पहिल्या 100 मिनिटात कार्यवाही करण्यात आल्याची माहिती जिल्हाधिकारी तथा जिल्हा निवडणूक अधिकारी डॉ. सुहास दिवसे यांनी दिली.

निवडणूक कालावधीत आचारसंहितेचे उल्लंघन होत असल्यास सर्वसामान्य मतदार, नागरिकांना थेट निवडणूक आयोगाकडे तक्रार करण्याची सुविधा उपलब्ध करुन देण्यात आली आहे. त्यासाठी भारत निवडणूक आयोगाने ‘सी व्हिजिल’ ॲप विकसित केलेले आहे. या ॲपवर दाखल होणाऱ्या तक्रारींवर 100 मिनिटांत पहिली कार्यवाही केली जात आहे.

या ॲपवर जिल्ह्यात नागरिकांकडून 352 तक्रारी दाखल झाल्या असून त्यापैकी 333 तक्रारींवर कार्यवाही करण्यात आली आहे. तर त्यापैकी आंबेगाव विधानसभा मतदार संघात 5 तक्रारी, बारामती 12, भोसरी 1, चिंचवड 6, दौंड 4, हडपसर 3, इंदापूर 1, जुन्नर 3, कसबा पेठ 28, खडकवासला 5, मावळ 6, पर्वती 61, पिंपरी 2, पुणे कॅन्टोन्मेंट 20, शिवाजीनगर 7 आणि वडगाव शेरी विधानसभा मतदार संघात 137 अशा एकूण 301 तक्रारींवर पहिल्या शंभर मिनीटात कार्यवाही करण्यात आली आहे.

‘सी व्हिजिल’ ॲप अँड्रॉइड आणि आयओएस डिव्हाइसवर डाऊनलोड करण्यासाठी उपलब्ध आहे. उल्लंघनाची तक्रार करण्यासाठी, वापरकर्त्यांनी फक्त ॲप उघडणे, उल्लंघनाचा प्रकार निवडणे आणि घटनेचे तपशिल, स्थान, वेळ आणि छायाचित्रे किंवा व्हीडिओ अपलोड करणे आवश्यक आहे. या ॲप तक्रार दाखल करणाऱ्या तक्रारदाराची ओळख गुप्त राखण्यात येते.
0000

पुणे-मेट्रो, रेल्वे, उद्योग, शिक्षण, आरोग्य, अशा क्षेत्रात विकास झाला त्यामुळे देश प्रगतीपथावर आहे. ही बाब लक्षात आल्याने भारताविषयी विकसित देशांना आदर वाटत आहे. विविध देशांमध्ये देशात संधी आहेत. त्या संधींसाठी राजकीय स्थैर्य आवश्यक आहे, असे मत परराष्ट्र मंत्री एस. जयशंकर यांनी व्यक्त केले.

यशस्वी ग्रुपच्या वतीने जागतिक स्तरावरील सध्याच्या उदयोन्मुख संधी या विषयावर आयोजित व्याख्यानात जयशंकर बोलत होते. यावेळी केंद्रीय विमान वाहतूक राज्यमंत्री मुरलीधर मोहोळ, यशस्वी ग्रुपचे अध्यक्ष विश्वेश कुलकर्णी, राष्ट्रीय सेवा योजना समितीचे राज्याचे सल्लागार राजेश पांडे, उद्योजक विशाल चोरडिया आदी उपस्थित होते.

जयशंकर म्हणाले देशात आज मोठ्या प्रमाणात विकासकामे होत आहेत.दररोज १२ ते १४ किलोमीटर रेल्वे ट्रॅकची, तर दररोज साधारण २८ किलोमीटर रस्ते तयार होत आहेत. दिवसाला दररोज दोन कॉलेज कार्यान्वित होत असून, उद्योगांची सुरुवात होत आहे. जगातील विकसित देशांना ही गुंतवणुकीची संधी वाटते. सध्याच्या परिस्थितीत जगातील नामांकीत कंपन्यांचे सुमारे १८०० ग्लोबल कॅपॅबिलिटीज सेंटर विविध महानगरांमध्ये सुरू झाले आहेत. देशाच्या विकासासोबतच हे परिवर्तन वाढणार आहे. त्यासाठी देशात राजकीय स्थैर्य आवश्यक आहे, असे जयशंकर यांनी स्पष्ट केले.

जगातील काही देशांमध्ये युद्ध सुरू आहे, तर काही देशांमध्ये तणाव. मात्र, त्यातही रोजगाराच्या आणि व्यवसायाच्या संधी भरपूर आहे. जागतिक संधींची सुरुवात आपल्या घरातून होते. त्यासाठी कशल मनुष्यबळाची आवश्यकता असते. आपल्या युवकांना कौशल्यांचे योग्य प्रशिक्षण दिल्यास, उत्तम मनुष्यबळाची निर्मिती होईल. देशात राजकीय स्थैर्य आणि चांगले सुशासन असल्यास, भारतीयांना जागतिक संधींचा लाभ घेण्यात कोणतीही अडचण येणार नाही, असे जयशंकर यांनी स्पष्ट केले.

ते पुढे म्हणाले, जर्मनीचे शिष्टमंडळ भारत दौऱ्यावर असून, त्यात अनेक कुलगुरू, उद्योगपती आणि मंत्री आहेत. या शिष्टमंडळाने पंतप्रधान नरेंद्र मोदी यांची भेट घेतली, विविध क्षेत्रात काम करण्याबाबत आश्वासन दिले आहे. त्यांनी दरवर्षी २० हजार भारतीय युवकांना नोकरीसाठी व्हिसा देण्याचे ठरवले आहे. मात्र, आम्ही ही संख्या ९० हजारांपर्यत वाढविण्याचे ठरविले आहे. नरेंद्र मोदी तिसऱ्यांदा पंतप्रधान झाल्यापासून अनेक देशांचे प्रमुख आणि शिष्टमंडळ त्यांच्या भेटीसाठी वेळ मागत आहेत. याहून भारताचे वाढलेले महत्त्व लक्षात घ्यावे लागेल.

कुलकर्णी यांनी स्वागतपर भाषण केले.सूत्रसंचालन अमृता करमरकर यांनी केले. सावित्रीबाई फुले पुणे विद्यापीठाचे अधिसभा सदस्य प्रसेनजीत फडणवीस यांनी आभार मानले.