इंफाळ आणि गुवाहाटी प्रदेशामध्ये आंतरराष्ट्रीय अंमली पदार्थ तस्करांच्या टोळीतील चार जणांना अटक

अंमली पदार्थांची तस्करी करणाऱ्यांची दया केली जाणार नाही, असे केंद्रीय गृह आणि सहकार मंत्री अमित शाह यांनी म्हटले आहे. 88 कोटी रुपयांच्या मेथमॅफेटाईनच्या गोळ्यांचा मोठा साठा जप्त केल्याबद्दल आणि आंतरराष्ट्रीय अंमली पदार्थ तस्करांच्या चार जणांना अटक केल्याबद्दल अंमली पदार्थ नियंत्रण विभाग -एनसीबीचे गृहमंत्री शाह यांनी अभिनंदन केले. हस्तगत केलेला अंमली पदार्थांचा साठा सखोल आणि चौफेर तपासाचा उत्कृष्ट नमुना ठरतो आहे, असे शाह यांनी आपल्या सामाजिक माध्यमावरच्या एका पोस्ट मध्ये म्हटले आहे. 

अंमली पदार्थ मुक्त भारत निर्मितीच्या मोदी सरकारच्या मोहिमेला गती मिळत असून, त्याचाच भाग म्हणून ही कारवाई करण्यात आली आहे. याशिवाय इंफाळ आणि गुवाहाटी या भागातील अमली पदार्थांची तस्करी करणाऱ्या आंतरराष्ट्रीय टोळीच्या 4 जणांना अटक करण्यात आली आहे, असे देखील शाह यांनी आपल्या सामाजिक माध्यमावरच्या पोस्टमध्ये म्हटले आहे.

अशी सविस्तर कारवाई….

13 मार्च 2025 रोजी केलेल्या पहिल्या कारवाईमध्ये इंफाळ विभागातल्या अंमली पदार्थ नियंत्रण विभागाच्या अधिकाऱ्यांनी लिलॉंग परिसरात एका ट्रकला थांबवून त्याची चौकशी केली असता, ट्रकच्या मागील भागातल्या एका कोपऱ्यामध्ये लपवून ठेवलेल्या 102.39 किलो मेथमॅफेटाईनच्या गोळ्या जप्त करण्यात आल्या  तसेच ट्रक मधल्या दोन जणांना अटक करण्यात आली. या कारवाईनंतर एनसीबीच्या अधिकाऱ्यांनी लगेच पुढच्या कारवाईकडे आपला मोर्चा वळवला आणि लीलोंग परिसरात असलेल्या संशयित अमली पदार्थ तस्करांना ताब्यात घेतले, आणि त्यांच्याकडूनही ड्रग्स तस्करीसाठी वापरले जाणारे चार चाकी वाहन जप्त केले. या प्रकरणातल्या आणखी काहींचा शोध घेतला जात आहे.

या कारवाईनंतर त्याच दिवशी एका माहितीच्या आधारे गुवाहटी विभागातील अंमली पदार्थ नियंत्रण विभागाच्या अधिकाऱ्यांनी सिलचर जवळच्या आसाम- मिझोराम सीमेवर संशयित करीमगंज या ठिकाणी एका चार चाकी गाडीला अडवले व त्याची देखील सखोल तपासणी करण्यात आली, आणि या तपासात गाडीच्या स्टेफनी टायर मध्ये 7. 48 किलो मेथमॅफेटाईन पदार्थाच्या गोळ्या जप्त करण्यात आल्या. या गाडीतून एकाला ताब्यात घेण्यात आले. या प्रकरणामध्येही संशयित असणाऱ्या इतरांचा देखील शोध आता घेतला जातो आहे.

यानंतरच्या दुसऱ्या घटनेमध्ये मिझोराम राज्य उत्पादन शुल्क विभागाने 6 मार्च रोजी ब्रिगेड बावंगकॉन एझोल येथून 46 किलो क्रिस्टल मेथ जप्त केले. या प्रकरणाचा तपास आता अंमली पदार्थ नियंत्रण विभाग करतो आहे. या प्रकरणामध्ये आंतरराज्य किंवा आंतरराष्ट्रीय तस्करीचे धागेदोरे शोधण्यासाठी अंमली पदार्थ नियंत्रण विभाग या प्रकरणाचा तपास करतो आहे.

ईशान्य प्रदेशातील भौगोलिक स्थानामुळे या प्रदेशामध्ये मोठ्या प्रमाणात अंमली पदार्थांची तस्करी होते. म्हणूनच हा प्रदेश देशातील सर्वात असुरक्षित म्हणून ओळखला जातो आहे. त्यामुळेच केंद्रीय गृहमंत्रालयाने 2023 मध्ये या प्रदेशातील अंमली पदार्थाच्या विरोधातील लढाईला बळकटी देण्यासाठी अंमली पदार्थ नियंत्रण विभागाला सशक्त केले आहे. अमली पदार्थ नियंत्रण विभागाच्या पाच शाखांच्या माध्यमातून तसेच ईशान्येकडील प्रादेशिक मुख्यालयाकडून या प्रदेशात होणाऱ्या अमली पदार्थाच्या तस्करीच्या विरोधात विशेषता (YABA)  म्हणून ओळखल्या जाणाऱ्या मेथमॅफेटाईनच्या गोळ्यांसारख्या कृत्रिम औषधांच्या तस्करीत सहभागी होणाऱ्यांच्या विरोधात मोठ्या प्रमाणात आणि सतत कारवाई केली जात आहे. अमली पदार्थ तस्करीमुळे केवळ या भागातील तरुण लोकसंख्येलाच नव्हे तर संपूर्ण देशाच्या सुरक्षेलाही धोका निर्माण झाला आहे,असे याबाबतच्या वृतात म्हंटले आहे.

***

इस्लामाबाद-बलुच लिबरेशन आर्मी (बीएलए) ने रविवारी दावा केला की त्यांनी पाकिस्तानी सैन्यावर आत्मघातकी हल्ला केला होता, ज्यामध्ये ९० पाकिस्तानी सैनिक ठार झाले होते. बीएलएच्या मते, त्यांच्या माजीद ब्रिगेड आणि फतेह ब्रिगेडने लष्कराच्या ताफ्यावर आत्मघातकी बॉम्बस्फोट घडवून आणला.

बीएलएने म्हटले आहे की क्वेट्टाहून कफ्तानला जाणाऱ्या ८ लष्करी वाहनांवर हल्ला करण्यात आला. नोश्की येथील महामार्गाजवळ आत्मघातकी दहशतवाद्यांनी वाहनांना लक्ष्य केले. एका आत्मघातकी बॉम्बरने स्फोटकांनी भरलेल्या वाहनाने लष्कराच्या ताफ्याला धडक दिली.

यानंतर, बीएलएच्या फतेह पथकाच्या सैनिकांनी सैन्याच्या ताफ्यात घुसून सैनिकांना ठार मारले. ज्या वाहनावर आत्मघातकी हल्ला करण्यात आला तो पूर्णपणे उद्ध्वस्त झाला. जखमींना नोश्की येथील रुग्णालयात दाखल करण्यात आले आहे. परिसरात आणीबाणी लागू करण्यात आली आहे.

फक्त ५ दिवसांपूर्वी बीएलएने एका प्रवासी ट्रेनचे अपहरण केले होते. बीएलएने सर्व २१४ ओलिसांना मारल्याचा दावा केला. पाकिस्तानी सैन्याने म्हटले की त्यांचे फक्त २८ सैनिक मारले गेले, तर सर्व ३३ बलुच सैनिक मारले गेले.

स्कोप्जे-युरोपीय देश उत्तर मॅसेडोनियामधील एका नाईट क्लबमध्ये शनिवारी रात्री लागलेल्या आगीत किमान ५० जणांचा मृत्यू झाला तर १०० हून अधिक जण जखमी झाले. मीडिया रिपोर्ट्सनुसार, कोकानी शहरात आयोजित एका हिप हॉप संगीत मैफिल दरम्यान हा अपघात झाला.सुमारे ३०,००० लोकसंख्या असलेल्या या शहरातील एका नाईट क्लबमध्ये प्रसिद्ध हिप-हॉप जोडी एडीएनचा संगीत कार्यक्रम सुरू असताना आग लागली. या हिप-हॉप कॉन्सर्टसाठी क्लबमध्ये १५०० लोक जमले होते.कार्यक्रमादरम्यान कोणीतरी क्लबमध्ये फटाके फोडले, ज्यामुळे आग लागली, असा अंदाज आहे. आग लागल्यानंतर गोंधळ उडाला आणि चेंगराचेंगरीत काही लोक चिरडले गेले.संगीत मैफिलीत फटाके फोडण्यात आले होते, जे आगीचे कारण असल्याचे मानले जात आहे.

अपघाताचा फोटो सोशल मीडियावर व्हायरल झाला…

पंतप्रधान ह्रिस्टिजान मिकोस्की यांनी X वर लिहिले: उत्तर मॅसेडोनियासाठी हा एक कठीण आणि खूप दुःखद दिवस आहे. इतक्या तरुणांचे दुःखद नुकसान कधीही भरून निघू शकत नाही. या कठीण काळात पीडितांचे दुःख कमी करण्यासाठी सरकार सर्वतोपरी प्रयत्न करेल.

अधिकाऱ्यांनी सांगितले की, जखमींना राजधानी स्कोप्जेसह देशभरातील विविध रुग्णालयात दाखल करण्यात आले आहे. यामध्ये अनेक स्वयंसेवी संस्थांची मदतही घेतली जात आहे. या प्रकरणात एका व्यक्तीला अटकही करण्यात आली आहे, परंतु अद्याप त्याबद्दल सविस्तर माहिती देण्यात आलेली नाही.

10 कोटी लोकसंख्या प्रभावित, 2 लाख घरे वीजेशिवाय
वॉशिंग्टन-अमेरिकेत, अर्कांसस, कॅन्सस, मिसूरी, इलिनॉयसह सुमारे 6 पश्चिमेकडील राज्ये चक्रीवादळाच्या विळख्यात आहेत. एबीसीच्या अहवालानुसार, या राज्यांमध्ये आतापर्यंत २६ वादळे आली आहेत.शनिवार आणि रविवारी आतापर्यंत ३४ जणांना आपला जीव गमवावा लागला आहे. मिसूरीमध्ये सर्वाधिक १२ मृत्यू झाले आहेत. १० कोटी अमेरिकन लोकसंख्येवर याचा परिणाम झाला आहे. २ लाख घरांमध्ये वीज गेली आहे.

कॅन्ससमध्ये धुळीच्या वादळामुळे महामार्गावर सुमारे ५० वाहने एकमेकांवर आदळली. यामध्ये ८ जणांचा मृत्यू झाला. मिसिसिपीमध्ये सहा जणांचा मृत्यू झाला आणि तीन जण बेपत्ता झाले.१०० किमी/तास वेगाने धुळीचे वादळ वाहत आहे. इमारती आणि रस्ते उद्ध्वस्त झाले आहेत. कॅनडाच्या सीमेवर हिमवादळे आणि उष्ण भागात जंगलातील आगी लागण्याची शक्यता आहे.
अमेरिकेतील वादळ अंदाज केंद्राने असा दावा केला आहे की, हे वेगाने वाहणारे वादळ गंभीर धोका निर्माण करू शकतात. आज अनेक राज्यांमध्ये बेसबॉलच्या आकाराचे गारा आणि वादळ देखील शक्य आहे.
पूर्व लुईझियाना, मिसिसिपी, अलाबामा, पश्चिम जॉर्जिया आणि फ्लोरिडामध्ये चक्रीवादळाचा इशारा देण्यात आला आहे. टेक्सास, कॅन्सस, मिसूरी आणि न्यू मेक्सिको हे जंगलातील आगींचा धोका आहे.
टेक्सास, ओक्लाहोमा, मिसूरी, इलिनॉय, इंडियाना आणि मिशिगनमध्ये जोरदार वाऱ्यांमुळे २,००,००० हून अधिक घरांची वीज गेली आहे.
राष्ट्रीय हवामान सेवेने दक्षिण डकोटा आणि पश्चिम मिनेसोटाच्या काही भागांसाठी हिमवादळाचा इशारा जारी केला आहे. या भागात ६ इंचांपर्यंत बर्फवृष्टीची शक्यता आहे.

मुंबई १६ मार्च – ज्यांनी संपूर्ण महाराष्ट्राला आपल्या विनोदातून मनमुराद हसविले, असे तमाशा सम्राट काळू- बाळू कवलापूरकर यांच्या स्मृतीला उजाळा देण्यासाठी सोमवारी (ता. १७ मार्च ) सांस्कृतिक कार्य संचालनालयाच्यावतीने मुंबई विद्यापीठाच्या लोककला अकादमीमध्ये “रंगबाजी”हा सांस्कृतिक कार्यक्रम आयोजित करण्यात आला असून या कार्यक्रमात काळू – बाळू यांच्या पाचव्या पिढीतील वंशज सूरजकुमार आणि निलेशकुमार सहभागी होणार आहेत.

काळू -बाळू म्हटलं तरी मराठी माणसांच्या चेहऱ्यावर सहज हसू उमटतयं, असे हे वाक्य केवळ काळू-बाळू कवलापूरकर यांच्या एका गाजलेल्या वगनाट्याच्या विनोदामुळे प्रचलित झाला आहे. ते वगनाट्य म्हणजे ‘जहरी पेला’, म्हणूनच या जोडगोळीच्या आठवणीला उजाळा देण्यासाठी सांस्कृतिक कार्य विभागाने सोमवार दिनांक १७ मार्च रोजी “रंगबाजी”हा विशेष कार्यक्रम आयोजित केला आहे.
कलिना येथील मुंबई विद्यापीठातील लोककला अकादमीच्या सांस्कृतिक भवनामध्ये (उत्तर द्वार) सदर सांस्कृतिक कार्यक्रम सकाळी ११:०० वाजता आयोजित करण्यात आला आहे.
या कार्यक्रमाची संकल्पना ॲड. आशिष शेलार मा मंत्री सांस्कृतिक कार्य तथा माहिती तंत्रज्ञान यांची असून या कार्यक्रमास मार्गदर्शन श्री विकास खारगे मा मुख्यमंत्र्यांचे अपर मुख्य सचिव तथा अपर मुख्य सचिव सांस्कृतिक कार्य विभाग यांचे लाभले आहे. प्रा. डॉ.गणेश चंदनशिवे, डॉ. शिवाजी वाघमारे, काळू बाळू यांच्या पाचव्या पिढीतील वंशज सूरजकुमार, निलेशकुमार आणि इतर कलाकार या सांस्कृतिक कार्यक्रमात सहभागी होणार आहेत. लोककला अकादमी आणि लोकजीवन फाउंडेशन, मुंबई हे सदर कार्यक्रमाचे समन्वयक म्हणून काम पाहत आहेत.

विशेष चर्चा सत्र….!
या दरम्यान तमाशा कला क्षेत्राच्या परंपरेवर विशेष चर्चा सत्र आयोजित करण्यात आले असून यामध्ये लोककलेचे जेष्ठ अभ्यासक प्रा. डॉ. प्रकाश खांडगे, मंत्रालयातील जेष्ठ पत्रकार खंडूराज गायकवाड, मराठी नाट्यक्षेत्रातील अभिनेते, दिग्दर्शक संतोष पवार सहभागी होणार आहेत. तर या संपूर्ण कार्यक्रमाचे सूत्रसंचालन डॉ. मोनिका ठक्कर हे करणार आहेत. हा कार्यक्रम सर्वांना निशुल्क असून याचा सर्वांनी लाभ घ्यावा असे आवाहन श्री बिभीषण चवरे संचालक सांस्कृतिक कार्य संचालनालय यांनी केली आहे

छावा चित्रपटातील संभाजी महाराजांच्या मृत्युपूर्व दृश्यांनी कबरीबाबतच्या भावना तीव्र

छत्रपती संभाजीनगर-मागील काही दिवसांपासून छत्रपती संभाजीनगर जिल्ह्यातील खुलताबाद येथील मुघल सम्राट औरंगजेबाची कबर हटवण्याची मागणी होत आहे. त्यातच पुण्यातील भाजपचे माजी नगरसेवक ,कट्टर हिंदुत्ववादी आणि धर्मवीर संभाजी महाराज प्रतिष्ठाणचे अध्यक्ष मिलिंद एकबोटे यांनी औरंगजेबाची कबर नष्ट करण्याचा इशारा दिल्याचे वृत्त पसरले. प्रशासनाने त्यांच्या इशाऱ्याची गंभीर दखल घेतली असून मिलिंद एकबोटे आणि त्यांच्या कार्यकर्त्यांना छत्रपती संभाजीनगर जिल्ह्यात जिल्हा बंदी करण्यात आली आहे. 16 मार्च 2025 ते 5 एप्रिल 2025 पर्यंत जिल्हा बंदीचे आदेश काढण्यात आले आहेत.

छत्रपती संभाजीनगरला जाण्याचं माझं कोणतही प्रयोजन नाही, असे असतानाही मला जिल्हाबंदीची नोटीस देण्यात आली आहे. ही नोटीस दिल्यामुळं माझी करमणूक झाली असल्याचे मिलिंद एकबोटे म्हणाले. माझं सर्व लक्ष छत्रपती संभाजी महाराज यांच्या पुण्यततिथीच्या कार्यक्रमाच्या नियोजनावर आहे. हा कार्यक्रम भव्य प्रमाणात व्हावा, यासाठी मी प्रयत्नशील असल्याचे एकबोटे म्हणाले. मला दिलेली नोटीस संपूर्णपणे खोटी आहे. माझा उल्लेख माजी आमदार म्हणून करण्यात आला आहे. मी कोणताही माजी आमदार नाही. कदाचीत भावी आमदार असेन असे एकबोटे म्हणाले. काल्पनिक गोष्टी डोक्यात ठेऊन पोलिस अधिकाऱ्याने ही गोष्ट केलेली आहे.

छत्रपती संभाजी महाराजांच्या जीवनचरित्रावर आधारीत छावा चित्रपट प्रदर्शित झाला. या चित्रपटात मोगल बादशहा औरंगजेबाने छत्रपती संभाजी महाराजांचे कशाप्रकारे हाल केले ते दाखवण्यात आले. या चित्रपटामुळे मराठा समाज व हिंदू धर्मातील लोकांच्या औरंगजेबाच्या कबरीबाबत भावना तीव्र झालेल्या आहेत. छत्रपती संभाजी महाराजांचे हाल करणाऱ्याची कबर कशाला पाहिजे? असा सवाल करत ही कबर हटवण्याची मागणी होत आहे. त्याबाबत सोशल मीडियावर देखील मोठ्या प्रमाणावर आक्रोश पाहावयास मिळत आहे. मिलिंद एकबोटे यांनी औरंगजेबाची कबर नष्ट करण्याचा इशारा दिल्याच्या माहिती नंतर त्यांना जिल्हाबंदी करण्यात आली आहे. याबाबत अपर जिल्हाधिकारी खिराळकर यांनी जिल्हा बंदीचे आदेश काढले आहेत.

छत्रपती संभाजीनगर ग्रामीणचे पोलिस अधीक्षक यांनी अहवालात नमूद केले आहे की, मिलिंद एकबोटे हे अत्यंत कडवट हिंदूत्ववादी कार्यकर्ते असून त्यांचेवर भिमा कोरेगाव दंगलीत सहभागी असल्याचा व इतर धर्मीयांच्या, समाजाच्या धार्मिक भावना दुखावण्याबाबतचे गुन्हे दाखल आहेत. यापूर्वी त्यांनी प्रतापगडावरील अफजलखान कबर हटवण्यासाठी मोठे आंदोलन केले होते. त्यामुळे त्यांना मानणारा मोठा वर्ग महाराष्ट्रात आहे. तसेच त्यांचे संघटनेचे अनेक सदस्य व सक्रीय कार्यकर्ते छत्रपती संभाजीनगर व आजूबाजूच्या जिल्ह्यात आहेत. गोपनिय माहितीनुसार जर सदर लोक तुळापूर वरून खुलताबाद येथे यायला निघाले तर हिंदूत्ववादी संघटनांचे अनेक सक्रीय सदस्य, कार्यकर्ते व कट्टर हिंदू लोक त्यांना मिळण्याची दाट शक्यता आहे. सध्या मुस्लिम समाजाचा पवित्र रमजान महिना चालू आहे. तसेच महाराष्ट्र विधानसभेचे अधिवेशन देखील चालू असून सदर आंदोलनात काही अनुचित प्रकार घडल्यास त्याचे हिंसक पडसाद संपूर्ण महाराष्ट्र राज्यात उमटण्याची दाट शक्यता असल्याने भारतीय नागरिक सुरक्षा संहिता कलम 163(1) अन्वये मिलिंद रमाकांत एकबोटे, माजी नगरसेवक तथा अध्यक्ष “धर्मवीर संभाजी महाराज प्रतिष्ठाण”, “हिंदू एकता मोर्चा”, “समस्त हिंदू आघाडी”, “शिवप्रताप भुमी मुक्ती आंदोलन” यांना व त्यांच्या समर्थकांना दिनांक १६ मार्च ते ५ एप्रिल दरम्यान छत्रपती संभाजीनगर जिल्हा हद्दीमध्ये प्रवेश करण्याबाबत मनाई आदेश निर्गमित करण्याची विनंती अहवालातून करण्यात आली. अपर जिल्हाधिकारी खिराळकर यांनी जिल्हा बंदी आदेश काढले आहेत.

मिलिंद एकबोटे यांच्यासह विश्व हिंदू परिषद आणि बजरंग दलाकडून कबर नष्ट करण्याचा इशारा दिल्यानंतर औरंगजेबाच्या कबर परिसरात पोलिसांचा बंदोबस्त वाढवण्यात आला आहे. एसआरपीएफची एक तुकडी तैनात करण्यात आली आहे. या बंदोबस्तात दोन पोलिस अधिकारी आणि 15 कर्मचारी तैनात करण्यात आले आहेत. कबर परिसरातील दोन ठिकाणी नाकाबंदी आणि फिक्स पॉइंट लावण्यात आले आहेत. कबरीकडे जाणाऱ्या प्रत्येक माणसाची तपासणी करूनच सोडले जात आहे.

औरंगजेब 1707 मध्ये वयाच्या 87 व्या वर्षी मरण पावला. त्याला औरंगाबाद आताचे छत्रपती संभाजीनगरपासून 25 किलोमीटर अंतरावर खुलताबाद येथे दफन करण्यात आले. संभाजीनगरमध्ये त्यांच्या पत्नीची कबर ‘बीबी का मकबरा’ आहे. औरंगजेबाने आपल्या मृत्युपत्रात खुलताबादमध्ये दफन करण्याची इच्छा व्यक्त केली होती. जिथे त्यांचे गुरु, सुफी संत सय्यद जैनुद्दीन यांना दफन करण्यात आले होते. ही कबर सय्यद जैनुद्दीन यांच्या कबरीच्या संकुलातच आहे. त्याने त्याला एका साध्या उघड्या कबरीत पुरण्याचा आदेशही दिला होता. नंतर हैदराबादच्या निजामाने तत्कालीन भारताचे व्हाइसरॉय लॉर्ड कर्झन यांच्या विनंतीवरून थडग्याभोवती संगमरवरी ग्रील बसवली.