पुणे, दि. १५ मार्च २०२५: तळेगाव येथील पीजीसीआयएल ४०० केव्ही अतिउच्चदाबाच्या उपकेंद्राबाहेर गवत पेटवल्याने महापारेषणच्या तळेगाव-लोणीकंद ४०० केव्ही टॉवर लाइनमध्ये शनिवारी (दि. १५) दुपारी ३.०५ वाजता ट्रिपिंग आले. परिणामी ३४६ मेगावॅटची तूट निर्माण झाल्याने स्वयंचलित भारव्यवस्थापन यंत्रणा (एलटीएस) कार्यान्वित होऊन महावितरणच्या ८० वीजवाहिन्यांचा वीजपुरवठा बंद करण्यात आला. त्यामुळे पिंपरी चिंचवड, चाकण एमआयडीसी व परिसर, भोसरी गाव व भोसरी एमआयडीसी, मंचर ग्रामीण परिसरातील सुमारे २ लाख ४९ हजार ग्राहकांचा वीजपुरवठा तासभर खंडित होता.

याबाबत माहिती अशी की, पॉवरग्रीड कॉर्पोरेशन ऑफ इंडिया लिमिटेडचे (पीजीसीआयएल) तळेगाव येथे ४००/२२० केव्ही अतिउच्चदाब उपकेंद्र आहे. या उपकेंद्राबाहेर अदानीच्या कार्यक्षेत्रातील ४०० केव्ही टॉवर लाइनखाली अज्ञाताने गवत पेटवल्याने महापारेषणच्या तळेगाव-लोणीकंद ४०० केव्ही टॉवर लाइनला आज दुपारी ३.०५ वाजता ट्रिपिंग आले. परिणामी तब्बल ३४६ मेगावॅटची पारेषण तूट निर्माण झाली. पारेषण यंत्रणेतील संभाव्य धोके व बिघाड टाळण्यासाठी स्वयंचलित भारव्यवस्थापन यंत्रणा म्हणजेच ‘एलटीएस’ (Load Trimming Scheme) यंत्रणा कार्यान्वित झाली. त्यामुळे महापारेषण कंपनीच्या चाकण ४०० केव्हीसह चाकण, चिंचवड, भोसरी, ब्रीज स्टोन, थेऊर आणि काठापूर या २२० केव्ही अतिउच्चदाब उपकेंद्रांमधून महावितरणच्या ८० उच्चदाब वाहिन्यांचा वीजपुरवठा बंद करण्यात आला.

एलटीएस कार्यान्वित झाल्यामुळे चाकण एमआयडीसी तसेच शिंदेगाव, सावरदरी, वराळे, वासुली, येलवाडी, खालुंब्रे, सांगुर्डी, एमआयडीसी फेज दोन, भांबोली, कुरुळी, नाणेकरवाडी, चिंबोली, निघोजे, सारा सिटी, आळंदी फाटा, मोई आदी गावांतील ८०० उच्चदाब व ४ हजार लघुदाब औद्योगिक ग्राहक आणि ३५ हजार घरगुती व व्यावसायिक ग्राहकांचा वीजपुरवठा तासभर खंडित होता. यासह पिंपरी चिंचवड शहर, भोसरी गाव, भोसरी एमआयडीसी, जय गणेश साम्राज्य, किवळे, ताथवडे, रहाटणी, थेरगाव, निगडी, प्राधीकरण, नाशिक रोड, इंद्रायणीनगर, ब्लॉक जे, क्यू, एस, ईएल, टी, जनरल ब्लॉक, मंचरचा ग्रामीण परिसर, नारायणगावचा पूर्व परिसर, केसनंद, आव्हाळवाडी, पेरणे, थेऊर, वडती, कुंजीरवाडी, लोणी काळभोर, सोरतापवाडी, फुरसुंगी, उरुळी देवाची आदी परिसरातील सुमारे २ लाख ४९ हजार वीजग्राहकांचा वीजपुरवठा आज दुपारी ३.०५ ते ४.०५ वाजेपर्यंत तासभर बंद होता.  

तळेगाव-लोणीकंद ४०० केव्ही टॉवर लाइनला ट्रिपिंग आल्यामुळे महापारेषणच्या अभियंते व कर्मचाऱ्यांनी युद्धपातळीवर पाहणी सुरू केली. यामध्ये पीजीसीआयएल अतिउच्चदाबाच्या उपकेंद्राबाहेर टॉवर लाइनखालीच गवत पेटवल्यामुळे हा प्रकार घडल्याचे निदर्शनास आले. पेटवलेल्या गवताच्या धुरामध्ये बाष्प असल्यामुळे ४०० केव्ही लाइनमध्ये ट्रिपिंग आले. ही आग तातडीने विझवल्यानंतर त्या ठिकाणच्या टॉवर लाइनची तपासणी करून वीजपुरवठा पूर्ववत सुरू करण्यात आला.

आम आदमी पक्षाचा इशारा

पुणे:सिंहगड रस्त्यावरील धायरी येथील मध्यवस्तीतील बेनकर वस्तीतील पारी कंपनी जवळील पुणे महापालिकेचा दुर्घटनाग्रस्त कचरा विलिनीकरण प्रकल्प हटविण्यात यावा अन्यथा तीव्र जन आंदोलन करण्याचा इशारा आम आदमी पक्षाने दिला आहे.काल रात्री लागलेल्या भिषण आगीत कचरा विलिनीकरण प्रकल्प जळुन खाक झाला. प्रकल्पातील कामगार गावी गेल्याने सुदैवाने कोणी मृत्यूमुखी पडले नाहीत.याबाबत आम आदमी पक्षाचे शहराध्यक्ष धनंजय बेनकर म्हणाले,मुंबई महापालिका अधिनियम कायद्यानुसार लोकवस्तीच्या पाचशे मीटर दूर अंतरावर कचरा विलिनीकरण प्रकल्प असावा असा नियम आहे याकडे दुर्लक्ष करून प्रशासनाने दाट लोकवस्तीच्या मध्यभागी प्रकल्प उभारला आहे . प्रकल्प सुरू झाल्या पासून सातत्याने या प्रकल्पाला भीषण आगी लागत आहे.त्यामुळे स्थानिक रहिवाशांवर दुर्घटनांची टांगती तलवार कायम आहे ‌

रात्री सुदैवाने कामगार व आसपासच्या लोकवस्त्यांतील रहिवाशांचे प्राण वाचले मात्रआगीत लाखो रुपयांची साहित्य जळुन खाक झाले‌
धायरीच्या मध्यवस्तीतील या प्रकल्पामुळे सोसायट्यांसह परिसरात भितीचे वातावरण आहे.प्रशासनाने तातडीने प्रकल्प बंद करावा.भीषण आगीच्या घटनांमुळे प्रशासन नागरिकांच्या जीवाशी खेळत आहे.अशी तक्रार धनंजय बेनकर, निलेश दमिष्टे, सनी रायकर, संदीप विठ्ठल पोकळे,संतोष चौधरी, चिंतामणी पोकळे, अमर खेडेकर,नेताजी बाबर, सुरेश परकर, अजय बेनकर या स्थानिक रहिवाशांनी केली आहे.

पुणे – महापालिकेच्या विविध विभागाकडून आर्थिक वर्ष ३१ मार्चला संपत असतानाही अखेरच्या दिवसापर्यंत कामाची बिले सादर करतात. यामुळे या महिन्यात प्रमाणाबाहेर खर्च झालेला दिसतो. हे प्रकार बंद करण्यासाठी २४ मार्च ही अंतिम मुदत देण्यात आली आहे. त्यानंतर मुदतवाढ दिली जाणार नाही. तसेच तरतूद लॅप्स झाली तर त्याची जबाबदारी विभाग प्रमुख यांच्यावर असणार आहे. महापालिका आयुक्त डॉ राजेंद्र भोसले यांनी याबाबतचे आदेश जारी केले आहेत.

आयुक्तांच्या आदेशानुसार पुणे महानगरपालिका प्रशासनाने सन २०२४-२५ या आर्थिक वर्षामध्ये विविध विकास कामांसाठी अंदाजपत्रकीय तरतूदी उपलब्ध करून देण्यात आलेल्या आहेत. आर्थिक वर्षाच्या शेवटच्या महिन्यात मोठ्या प्रमाणात देयके अदा करण्यासाठी सादर केली जातात. त्यामुळे या महिन्यात प्रमाणाबाहेर खर्च (Rush of Expenditure) झालेला दिसतो. सदर बाब वित्तीय नियमांशी विसंगत असून प्रशासकीय दृष्ट्याही उचित नसल्याने सन २०२४- २५ या आर्थिक वर्षात तरतूद केलेल्या कामांची देयके २४ मार्च पर्यंत सादर करण्याचे निर्देश देण्यात आले आहेत.

आदेशात म्हटले आहे की, या मुदतीत बिला सोबत सादर करावयाच्या सर्व आवश्यक कागदपत्रासंह परिपूर्ण असे देयक सादर करण्यात यावे. अपूर्ण कागदपत्रासह देयक सादर केल्यास व त्यामुळे देयक अदा करण्यास विलंब झाल्यास किंवा तरतूद व्यपगत झाल्यास त्याचे संपूर्ण दायित्व व जबाबदारी संबधित खात्याची, विभागाची राहील. याबाबत कोणतीही मुदतवाढ दिली जाणार नाही. असे आयुक्तांनी स्पष्ट केले आहे.सर्व खातेप्रमुख यांनी आपले विभागातील सर्व संबधितांना वरील बाबतची सूचना देऊन विहित केलेल्या वेळेत बिले मुख्य लेखा व वित्त विभागाकडे पाठविण्याची सर्व खाते प्रमुख यांनी दक्षता घ्यावी. असेही आदेशात म्हटले आहे.

पुणे- महापालिकेत प्रशासकीय काळात बहुतांशीअधिकारी आणि कर्मचारी वर्ग बदलण्यात आला आहे, सर्वत्र नवे चेहरे दिसू लागले आहेत . कर्मचारी आणि त्यांचे खाते प्रमुख यांच्या संगनमताने घोटाळेबाज कारभार सुरु आहे. या सर्व पार्श्वभूमीवर माजी विरोधी पक्षनेते उज्वल केसकर , सुहास कुलकर्णी आणि प्रशांत बधे यांच्या सारखी मंडळी महापालिकेच्या कारभारावर लक्ष ठेऊन अंकुश ठेवण्याचा आटोकाट प्रयत्न करत असताना आता या तिघांनी नुकताच गंभीर आरोप केला आहे. ड्रेनेज विभागातील अधिकारी आपले उखळ पांढरे करत आहेत तर बनावट सर्टिफिकेट देऊन महापलिकेत रुजू झालेला अधिकारी…मीच होणार आता शहर अभियंता …. अशी डरकाळी फोडताना दिसत आहे. विशेष म्हणजे प्रशासकीय कारकिर्दीत लोकप्रतिनिधी नसताना कारभार अंकुश हिन प्रशासकीय मार्गाने चालतो आहे असे वाटावे अशी स्थिती आहे. असे असताना ड्रेनेज विभागात कामे कागदोपत्री दाखवून १०० कोटीची विल्हेवाट लावली जाणार असल्याचे सांगण्यात आले आहे. या संदर्भात उज्वल केसकर यांनी प्रसिद्धीसाठी शहर अभियंता प्रशांत वाघमारे यांच्या नावे पाठविलेले पत्र येथे जसेच्या तसे देत आहोत … वाचा

माननीय प्रशांत वाघमारेजी शहर अभियंता
पुणे मनपा
सप्रेम नमस्कार,
महानगरपालिकेच्या अर्थसंकल्पात तरतूद केलेल्या कामाची पूर्तता करणे हे प्रत्येक अभियंत्याचे काम आहे.
ड्रेनेज विभागातील काही अधिकारी याबाबत मनापासून स्वतःचे उखळ पांढरे करीत आहेत.
ड्रेनेज विभागाच्या प्रत्येक कामाची आम्ही पुणेकर नागरिक म्हणून तपासणी करण्याचा निर्णय घेतलेला आहे. #लक्षआहेआमचे
याबाबत आपण सर्व संबंधितांना कामाची तपासणी केल्याशिवाय खालच्या अधिकाऱ्यांनी सही केली म्हणून आम्ही केली असे सांगण्याचे स्वातंत्र्य न देता कामाची प्रत्यक्ष पाहणी करा जवळपास 100 कोटी रुपयांची ही कामे निघणार आहेत अशी आमची माहिती आहे.
त्याचे वाटप झाले आहे
कोणीतरी एक बनावट सर्टिफिकेट देऊन मनपा सेवेत रुजू झाले आहे आणि तो म्हणतो मी एक दिवस शहर अभियंता होणार त्याच्या आणि त्याच्या वरिष्ठांच्या प्रत्येक फाईल ची तपासणी होणे आवश्यक आणि गरजेचे आहे.
यात सर्व झोल आहे.

आपले पुणे
आपला परिसर

उज्ज्वल केसकर

सुहास कुलकर्णी
माजी विरोधी पक्षनेता

प्रशांत बधे
माजी नगरसेवक
१६/३/२५

पुणे : पुणे महानगर प्रदेश‍ विकास प्राधिकरणाने पुणे शहर आणि परिसरातील वाहतूक कोंडी सोडविण्याच्या अनुषंगाने संयुक्तपणे विशेष मोहीम हाती घेतली आहे. पहिल्या टप्प्यातील अतिक्रमणविरुद्ध मोहिम यशस्वी पूर्ण होत असून आता दुसऱ्या टप्प्याची आखणी १७ ते ३० मार्चदरम्यान करण्यात आली आहे. वाहतूक व्यवस्थेचा प्रश्न निकाली काढण्यासाठी अनधिकृतपणे उभारलेल्या बांधकामांवर धडक कारवाई करत ते जमिनदोस्त करण्यात येत आहे.

पहिल्या टप्प्यात पीएमआरडीएच्या संयुक्त कारवाईमध्ये पुणे शहर पोलीस, पिंपरी चिंचवड शहर पोलीस, पुणे ग्रामीण पोलीस, पुणे महानगरपालिका, पिंपरी चिंचवड महानगरपालिका, राष्ट्रीय महामार्ग प्राधिकरण, सार्वजनिक बांधकाम विभाग, एमएसआरडीसी, एमआयडीसी, एमएसईबी आदी विभागांमार्फत ३ ते १३ मार्चपर्यंत २५०० पेक्षा अधिक अतिक्रमणांवर हातोडा फिरवण्यात आला आहे. यासह अनेक स्थानिकांनी स्वत:हून आपली अतिक्रमणे काढून घेतली. या अतिक्रमणविरुद्धच्या मोहिमेचा पहिला टप्पा संपत आला असून दुसऱ्या टप्प्याचे नियोजन करण्यात आले आहे. यात पुणे शहराच्या महामार्गासह मुख्य रस्त्यांवरील अतिक्रमणावर विविध शासकीय यंत्रणेच्या माध्यमातून १७ ते ३० मार्चदरम्यान संयुक्तपणे कारवाई करण्यात येणार आहे.

या कारवाईमध्ये महामार्ग व राज्यमार्ग रस्त्यालगत असणाऱ्या दुकाने, पत्राशेड, गाळे, टपरी व अनधिकृत बांधकामे काढण्यात आली आहे. पुढील टप्प्यामध्ये संयुक्त कारवाई ही पुणे व पिंपरी चिंचवड शहरात वाहतुकीस अडथळा निर्माण करणारे महामार्ग व रस्त्यांवर होणार आहे. दुसऱ्या टप्प्यात अतिक्रमण कारवाई १७ ते ३० मार्च २०२५ पर्यंत चालणार आहे. त्यामुळे पीएमआरडीए, पुणे म.न.पा, पिंपरी चिंचवड म.न.पा हद्दीतील रस्त्यांवरील अतिक्रमण धारकांनी स्वत: अतिक्रमणे काढून घेत प्रशासनास सहकार्य करावे यासह कोणतेही बांधकाम पूर्वपरवानगी घेऊनच करावेत, असे आवाहन महानगर आयुक्त डॉ. योगेश म्हसे यांनी केले आहे.

महामार्गाचे नाव, कारवाईची तारीख
१) पुणे–सातारा रोड (नवले ब्रिज ते सारोळे) दि. १७ ते ३० मार्च २०२५
२) सुस रोड, दि. १७ ते ३० मार्च २०२५
३) हडपसर (शेवाळवाडी) ते दिवे घाट, दि. १७ ते ३० मार्च २०२५
४) नवलाख उंब्रे ते चाकण, दि. १७ ते ३० मार्च २०२५
५) हिंजवडी परिसर – माण, दि. १७ ते ३० मार्च २०२५
६) तळेगाव – चाकण – शिक्रापूर, दि. १७ ते ३० मार्च २०२५

विविध रस्त्यांवर १३ मार्चपर्यंत झालेली कारवाई
१) पुणे–नाशिक महामार्गावरील चिंबळी (बर्गेवस्ती) ते सांडभोरवाडीपर्यंत अंदाजे २९ किलोमीटर परिसरात ३ ते १३ मार्चपर्यंत ८९८ अतिक्रमण व अनधिकृत बांधकामे पाडण्यात आली असून त्याचे अंदाजे क्षेत्रफळ ८९८०० चौ. फूट आहे.
२) पुणे-सोलापूर रस्त्याच्या दोन्ही बाजूने अंदाजे ३३ किलोमीटर परिसरात १०४७ स्ट्रक्चर्सवर कारवाई करण्यात आली असून त्याचे अंदाजे क्षेत्रफळ १०४७०० चौ. फूट आहे.
३) चांदणी चौक ते पौड रस्त्याच्या बाजूस अंदाजे २१ किलोमीटर परिसरात ५५७ स्ट्रक्चर्सवरील कारवाई अंदाजे क्षेत्रफळ ५५७०० चौ. फूट आहे.

पुणे, दि.१५: बाजारामध्ये अनेक प्रकारे फसवणूक होऊ शकते ती टाळण्यासाठी ग्राहकांनी सदैव जागरूक ग्राहक असणे गरजेचे आहे, असे प्रतिपादन जिल्हा ग्राहक तक्रार निवारण आयोगाचे अध्यक्ष अनिल जवळेकर यांनी केले.जिल्हाधिकारी कार्यालयाच्यावतीने स्वारगेट मेट्रो स्थानक येथे जागतिक ग्राहक हक्क दिनानिमित्त आयोजित प्रदर्शनाच्या उद्घाटन प्रसंगी श्री. जवळेकर बोलत होते. यावेळी अन्नधान्य वितरण अधिकारी प्रशांत खताळ, सहायक जिल्हा पुरवठा अधिकारी अंकुश कांबळे, अखिल भारतीय ग्राहक पंचायतीचे उपाध्यक्ष विलास लेले, पुणे जिल्हा ग्राहक संरक्षण परिषदेचे सदस्य तुषार झेंडे पाटील उपस्थित होते.

श्री. जवळेकर म्हणाले की, वस्तू किंवा सेवा खरेदी करताना ग्राहकाने जागरुक असणे आवश्यक आहे. आपल्या जागरुकतेमुळे दुसऱ्या एखाद्या नागरिकाची फसवणूक वाचू शकते. सर्वसामान्य जनतेला बाजारामध्ये ग्राहकांची कशी फसवणूक होऊ शकते याची माहिती या प्रदर्शनातून चांगल्या प्रकारे मिळेल. दुकानदारांनी आणि विभागांनी आपली जबाबदारी पार पाडताना ग्राहकाला दर्जेदार सेवा सुविधा उपलब्ध द्याव्यात जेणेकरून ग्राहकांना त्यांच्या हक्कासाठी दाद मागावी लागू नये, असेही ते म्हणाले.

श्री. तुषार झेंडे पाटील म्हणाले, ग्राहक संरक्षण परिषदेची जबाबदारी ही ग्राहक संरक्षणाचे कायदे व ग्राहकांना त्यांच्या हक्कांची माहिती व जाणीव करुन देणे ही आहे. वस्तू किंवा सेवा खरेदी करताना लेखी बिल किंवा पावती घेणे. उत्पादन, उत्पादनाची तारीख, वापराची कालमर्यादा, किंमत, उत्पादन करणारी कंपनी आदी माहिती वस्तूवर छापणे बंधनकारक असून खरेदी करताना ग्राहकांनी ही बाब तपासून घेणे गरजेचे आहे. आता ऑनलाइन सेवा व खरेदीतही ग्राहकाची फसवणूक होऊ शकते. यासाठीही ऑनलाईन तक्रार दाखल करता येते, असे त्यांनी सांगितले.

प्रास्ताविक अन्नधान्य वितरण अधिकारी प्रशांत खताळ यांनी केले. यावेळी ॲड. समृद्धी ढवण, ॲड. अनिता गवळी यांनीही आपले मनोगत व्यक्त केले.यावेळी जिल्हाधिकारी कार्यालयातील अधिकारी, कर्मचारी, परिसरातील नागरिक उपस्थित होते.

प्रदर्शनात महाराष्ट्र राज्य परिवहन महामंडळ, पीएमपीएमएल, प्रादेशिक परिवहन अधिकारी, बँक ऑफ महाराष्ट्र, अग्रणी बँक, राज्य आरोग्य प्रयोगशाळा, अन्नधान्य वितरण कार्यालय, जिल्हा आरोग्य अधिकारी, वैधमापन शास्त्र, जिल्हा व सत्र न्यायालय, भारतीय मानक ब्युरो, अन्न व औषध प्रशासन कार्यालय, बीएसएनएल, हिंदुस्थान पेट्रोलियम कॉर्पोरेशन, भारत पेट्रोलियम कॉर्पोरेशन, इंडियन ऑइल कॉर्पोरेशन यांच्यावतीने स्टॉल लावण्यात आले होते.

पुणे शहरात कर संकलनाच्या अनुषंगाने दामिनी महिलांची 12 पथके तयार करण्यात आलेली आहे सदर प्रत्येक पथकामध्ये पाच महिलांचा समावेश असून त्यांचेमार्फत शहरातील थकबाकीदार मिळकतींची पाहणी करून वसुलीची कार्यवाही सुरू करण्यात आलेली आहे सदरचा प्रयोग हा प्रथमच राबवण्यात आलेला असून त्यासाठी अतिशय चांगला प्रतिसाद मिळत आहे सदर पथकाकडून दहा लाख इतके रक्कम थकबाकी जमा करण्यात आली असून तीन मिळकती जप्त करण्यात आलेले आहेत

-उपायुक्त कर आकारणी कर संकलन प्रमुख माधव जगताप

उपायुक्त कर आकारणी कर संकलन प्रमुख माधव जगताप , महापालिका सहाय्यक आयुक्त अस्मिता तांबे , प्रशासन अधिकारीरवींद्र धावरे सर, प्रशासन अधिकारी सोपान वांजळे , प्रशासन अधिकारी श्रीमती.रजनी शिंदे यांचे मार्गदर्शनाखाली पेठ धायरी येथे मध्यवर्ती महिला वसुली पथक व टीम यांचे समवेत मिळकत कारवाईसाठी गेलेल्या पथकाने , मिळकतदाराकडून PDC व चालू चेकने रक्कम रुपये दहालाख रुपये वसूल केले.ही वसुलीमहिला पथक प्रमुख वंदना पाटसकर, प्रीती चव्हाण,शुभांगी खसासे वैशाली कामथे दिपाली चव्हाण गौतमी कोडम व सर्व विभागीय निरक्षक पेठ निरीक्षक चेतन मोकाशी यांनी केली.

आर्थिक वर्ष संपण्यासाठी अवघे काही दिवस शिल्लक असताना महापालिकेला जास्तीत जास्त उत्पन्न मिळावे यासाठी प्रशासनाचे प्रयत्न सुरु आहेत. त्यातच आता मिळकतकर थकबाकीची वसुली करण्याची जबाबदारी महिला अधिकाऱ्यांवर देण्यात आली आहे.यासाठी महिलांची १२ पथके स्थापन करण्यात आली असून, त्यात ६० महिलांचा समावेश आहे.पुणे महापालिकेच्या मिळकतकर विभागाला २०२४-२५ या आर्थिक वर्षासाठी २७२७ कोटी रुपये कर वसुलीचे उद्दिष्ट देण्यात आले आहे. पण या वर्षात हे उद्दिष्ट साध्य होणार नसल्याचे जवळपास निश्‍चित झाले असून, आत्तापर्यंत २१५० कोटी रुपयेच वसुल झाले आहेत.त्यामुळे उर्वरित १५ दिवसात सुमारे ६५० कोटी रुपये कर वसुली करणे प्रशासनाला अशक्य आहे. पण या शेवटच्या १५ दिवसात जास्तीत जास्त कर वसुली करून ही रक्कम महापालिकेच्या तिजोरीत जमा करण्याचे प्रयत्न प्रशासनाचे सुरु आहेत.त्यासाठी महापालिकेकडून थकबाकीदारांना नोटिसा बजावणे, थकबाकीदाराच्या मिळकतीपुढे बॅंड वाजविणे, इमारती जप्त करणे, टाळे ढोकणे अशी कारवाई केली जात आहे. ही कारवाई आणखी प्रभावी करण्यासाठी खास महिला कर्मचाऱ्यांचे थकबाकी वसुलीचे १४ पथक तयार केले आहेत. त्यात ६० महिलांचा समावेश आहेत.

मिळकतकर विभागाचे उपयुक्त माधव जगताप म्हणाले, महापालिकेच्या मिळकतकर थकबाकीच्या वसूलीसाठी आता कार्यालयात काम करणाऱ्या महिलांचीही नेमणूक करण्यात आली आहे. या कामासाठी ६० महिला कर्मचाऱ्यांची १२ पथके वसूलीसाठी नेमण्यात आली आहेत.महिला दिनाचे औचित्य साधत या महिलांवर ही वसुलीची जबाबदारी देण्यात आली आहे. हा प्रयोग प्रथमच करण्यात आला असून, पहिल्या दिवशी या पथकाने तीन मिळकती जप्त केल्या आहेत. तर १० लाख रुपयांची वसुली केली आहे.

महिलांसाठी रॅम्पवॉक स्पर्धा ; मोठ्या संख्येने महिलांचा सहभाग
पुणे: लिंगायत महिला मंचाच्या वतीने महिलांमधील सुप्त गुणांना प्रोत्साहन देण्यासाठी विविध उपक्रमांचे आयोजन आपटे रस्त्याजवळील सेंट्रल पार्क येथे करण्यात आले होते. महिलांच्या सशक्तीकरणासाठी तसेच त्यांच्या कौशल्यांना वाव देणारे विविध कार्यक्रम यावेळी घेण्यात आले.

महिलांच्या आरोग्याची काळजी कशी घ्यावी, ताणतणाव व्यवस्थापन आणि फिटनेस यासंदर्भात तज्ज्ञांनी मार्गदर्शन केले. यावेळी उपस्थित महिलांना आपल्या दैनंदिन जीवनात आरोग्याला प्राधान्य देण्याची गरज आणि योग्य आहार, व्यायाम व मानसिक स्वास्थ्याची महत्वाची माहिती देण्यात आली. कार्यक्रम यशस्वी उपक्रमासाठी सुप्रिया हत्ते, सुप्रिया गाडवे, नीना लिगाडे, राजश्री हापसे, सीमा तोडकर आणि सोनाली कोरे यांनी विशेष परिश्रम घेतले.

महिलांसाठी रुद्रपठण स्पर्धा देखील आयोजित करण्यात आली होती. ज्यामध्ये महिलांनी मोठ्या संख्येने सहभाग घेतला  तसेच, रॅम्पवॉक विशेष आकर्षण ठरला, जिथे विविध वयोगटातील महिलांनी आत्मविश्वासाने सहभाग घेतला. या स्पर्धांचे परीक्षण रूपा सुत्तट्टी आणि पल्लवी शिवकुमारश्री यांनी केले. विविध कार्यक्रमांमुळे महिलांमध्ये आत्मविश्वास वाढवण्यास मदत झाली असून, त्यांना स्वतःच्या आरोग्याची आणि सशक्तीकरणाची जाणीव यानिमित्ताने झाली आहे, असा विश्वास यावेळी व्यक्त करण्यात आला.

‘एमआयटी एडीटी’च्या ‘पर्सोना महोत्सवा’चा समारोप

पुणेः आयुष्य प्रचंड आव्हानात्मक आहे. मात्र आयुष्यात येणाऱ्या प्रत्येक संकटाला ‘ऑल इज वेल’ म्हणत विद्यार्थ्यांनी धीराने तोंड द्यायला हवं. यासह, विद्यार्थ्यांनी आपल्या आवडीचे क्षेत्र ओळखून त्यात करिअर करायला हवं. आवडीचे क्षेत्र ठरल्यानंतर परिणामाची चिंता न करता 

‘नेवर गिव अप’ वृत्ती स्विकारुन यश मिळेपर्यंत प्रयत्न सोडू नका आणि यश प्राप्तीनंतर त्यात झोकून देऊन आपले सर्वोत्तम देण्याचा प्रयत्न करा. या प्रक्रियेत ज्या गोष्टी आपल्या हातात आहेत, त्यांचाच विचार करावा व ज्या नाहीत त्यांची चिंताच करू नका, असे आवाहन प्रसिद्ध सिनेअभिनेते

शरमन जोशी यांनी मांडले. ते एमआयटी आर्ट, डिजाईन आणि टेक्नाॅलाॅजी विद्यापीठाच्या सातव्या ‘पर्सोना फेस्ट-२५’ या वर्षातील सर्वांत मोठ्या कला महोत्सवाच्या समारोपात बोलत होते. याप्रसंगी, शरमन यांच्या पत्नी प्रेरणा चोप्रा-जोशी

, ‘एमआयटी एडीटी’ विद्यापीठाचे कार्याध्यक्ष प्रा.डाॅ.मंगेश कराड, विद्यापीठाचे कुलगुरू प्रा. डॉ. राजेश एस., प्र.कुलगुरू डाॅ.रामचंद्र पुजेरी, डाॅ.मोहित दुबे, कुलसचिव डाॅ.महेश चोपडे, कार्यक्रमाचे संयोजक प्रा. डाॅ.सुदर्शन सानप, डाॅ.विपुल दलाल, डाॅ.रेणू व्यास, डाॅ.सुराज भोयार आदी उपस्थित होते. 

याप्रसंगी शरमन जोशी यांनी त्यांच्या ‘थ्री इडियट्स’ या त्यांच्या प्रसिद्ध चित्रपटातील ‘गिव मी सम सनशाईन’ या गाण्यातील कवितेच्या ओळी म्हणत विद्यार्थ्यांचा उत्साह वाढविला. ‘थ्री इडियट्स’ या चित्रपटातील विचाराप्रमाने एमआयटी एडीटी विद्यापीठ विद्यार्थ्यांच्या सर्वांगीण विकासाठी प्रयत्नशील आहे, असे म्हणत त्यांनी सर्वांचे तोंडभरून कौतुक देखील केले.  प्रा.डाॅ.कराड म्हणाले की, शैक्षणिक क्षेत्रात काम करत असताना २००९ साली अमीर खान व शरमन जोशी यांचा सहभाग असणारा

, ‘थ्री इडियट्स’ हा अतिशय सुंदर सिनेमा पाहण्यात आला. त्या सिनेमात देण्यात आलेल्या संदेशा प्रमाणे विद्यार्थ्यांना कला, डिजाईन आणि तंत्रज्ञान यांचा संगम असणारे व त्यांना त्यांच्या आवडीच्या क्षेत्रात करिअर करण्याचे शिक्षण देणारे एखादे विद्यापीठ असावे, अशा विचाराने एमआयटी एडीटी विद्यापीठाची स्थापना करण्यात आली, असे ते शरमन जोशी यांना उद्देशून म्हणाले. तसेच, पर्सोना सारखे महोत्सव विद्यार्थ्यांना शिक्षणासोबत त्यांच्या आवडीच्या क्षेत्रात करिअर करण्यासाठी प्रोत्साहन देणारे तथा त्यांच्यातील कलेचा साक्षात्कार करून देणारे उत्तम व्यासपीठ असल्याचेही त्यांनी नमूद केले.

विश्वशांती प्रार्थनेने सुरू झालेल्या या कार्यक्रमाची सांगता, पसायदानाने करण्यात आली. ज्याचे, प्रास्ताविक डाॅ.सुराज भोयार यांनी तर आभार, डाॅ.सुदर्शन सानप यांनी मानले. 

वर्षातील सर्वोत्तम ‘पर्सोनां’चा गौरव-पर्सोना महोत्सवाच्या समारोप प्रसंगी, विद्यापीठात वर्षभरात सर्वोत्तम कामगिरी करणाऱ्या विद्यार्थ्यांचा ‘बेस्ट पर्सोना ऑफ द इअर’ पुरस्काराने सन्मान करण्यात आला. यामध्ये तन्वी बोगाडे, अनुष्का जोशी, शिवनेश मोरे, मृण्मयी गोडमाने, सौरेश जबे, तेजस डोंगरे, अक्षत वशीष्ठ, धीर जैन, ओंकार शिंदे, अमोघा पाठक, राहुल देवगावकर, कॅडेट हरमनदीप कौर, आर्या पाटणकर या विद्यार्थ्यांचा समावेश होता. यासह, ‘एमआयटी एडव्हेंचर क्लब’ला वर्षातील सर्वोत्तम क्लब म्हणून गौरविण्यात आले.

विश्व हिंदू परिषद बजरंग दलाची औरंगजेबाच्या कबर विरोधात तीव्र भूमिका : दिनांक १७ मार्च रोजी जिल्हाधिकारी कार्यालय येथे आंदोलन
पुणे : औरंगजेबाची कबर आमच्या गुलामगिरीची, लाचारीची, आणि अत्याचारांची आठवण करून देते. महाराष्ट्र शासनाने लवकरात लवकर ही कबर काढावी. अन्यथा, बजरंग दल स्वभिमानी हिंदू समाजाला घेऊन रस्त्यावर उतरेल, आंदोलन करेल, मोर्चे काढेल, आणि आवश्यकता भासल्यास चक्का जाम करून कारसेवा करून ती कबर उध्वस्त करेल. क्रूरकर्मा औरंग्याची कबर हटाव आंदोलन पूर्ण महाराष्ट्रात एकाच दिवशी सर्व तहसिलदार, जिल्हाधिकारी कार्यालयाबाहेर होणार आहे. तसेच पुण्यात सोमवार, दिनांक १७ मार्च २०२५ ( फाल्गुन कृष्ण तृतीया, छत्रपती श्री शिवाजी महाराज जयंती) रोजी जिल्हाधिकारी कार्यालय येथे सकाळी ११.३० वाजता आंदोलन करून मुख्यमंत्री यांच्या नावे निवेदन देणार आहोत, अशी माहिती विश्व हिंदू परिषद बजरंग दलाच्यावतीने पत्रकार परिषदेत देण्यात आली

यावेळी विश्व हिंदू परिषद प्रांत मंत्री किशोर चव्हाण, बजरंग दलाचे प्रांत संयोजक नितीन महाजन, आणि प्रांत सह संयोजक संदेश भेगडे,श्रीपाद रामदासी उपस्थित होते.

किशोर चव्हाण म्हणाले, आपले संपूर्ण आयुष्य दगाबाजी ,विश्वासघात व हिंदू द्वेष यात घालविणारा,आपल्या सख्या भावांचे खून करणारा,बापाला कैदेत टाकणाऱ्या, काशी विश्वनाथ,मथुरा,सोमनाथ मंदिरे फोडणारा ,छत्रपती संभाजी महाराज यांचा चाळीस दिवस छळ करणाऱ्या औरंगजेबाची कबर म्हणजे त्याने केलेल्या क्रूर आणि अन्यायाला प्रोत्साहन देण्यासारखे आहे, त्यामुळे कबर हटवली पाहिजे.

नितीन महाजन म्हणाले, औरंगजेबाच्या कबरीमुळे आजही त्याच्या विचारसरणीचे अनुयायी इतिहासावर बोट ठेवून त्याच मुघल शासकाच्या पावलावर पाऊल ठेवत या हिंदुस्थानात शरिया कायद्यानुसार वागत आहेत. २०४७ पर्यंत भारताला इस्लामिक राष्ट्र बनवण्याचे स्वप्न पाहणाऱ्या या प्रवृत्तीला औरंगजेबाच्या कबरीतून प्रेरणा मिळते. धर्मवीर छत्रपती संभाजी महाराज यांच्या मारेकऱ्याची कबर जतन करण्याची आवश्यकता नाही.

स्वतःच्या वडीलांना तुरुंगात टाकून मारणारा, स्वतःच्या भावांची क्रूरतेने हत्या करणारा घरातल्या लोकांना सोडत नाही त्याच्यासाठी राष्ट्रातले नागरिक व समाजाची काय किंमत असणार ? अशा राष्ट्रघातकी, क्रूर आणि हिंसाचारी प्रवृत्तीच्या औरंग्याचा करावा तितका निषेध कमी असेल.