अस्पायर नॉलेज ॲन्ड स्किल्सचे संस्थापक डॉ. संजय गांधी लिखित पुस्तकाचे प्रकाशन

पुणे : तंत्रज्ञानाच्या क्षेत्रात दर दोन वर्षांनी बदल घडत आहेत. तंत्रज्ञानातील बदल लक्षात घेऊन रोजगार क्षमता, उद्योजकता आणि शाश्वत विकास ही त्रिसूत्री केंद्रस्थानी ठेवून डॉ. संजय गांधी यांनी लिहिलेले आकांक्षा नव्या युगाच्या हे पुस्तक युवा पिढीला मार्गदर्शक ठरेल, असा विश्वास सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांनी व्यक्त केला.
सकाळ प्रकाशनतर्फे प्रकाशित आणि अस्पायर नॉलेज ॲन्ड स्किल्सचे संस्थापक डॉ. संजय गांधी लिखित आकांक्षा नव्या युगाच्या या पुस्तकाचे प्रकाशन डॉ. गोसावी यांच्या हस्ते झाले. त्या वेळी ते बोलत होते. बालगंधर्व रंगमंदिरात या कार्यक्रमाचे आयोजन करण्यात आले होते. डॉ. डी. वाय. पाटील विद्यापीठाचे कुलपती डॉ. पी. डी. पाटील, पद्मश्री दादा इदाते, डी. आय. सी. सी.चे संस्थापक अध्यक्ष पद्मश्री डॉ. मिलिंद कांबळे, आय. आय. आय. टी. अलाहाबादचे संचालक प्रा. मुकुल सुतावणे, सकाळ प्रकाशनचे अशुतोष रामगिर, महाराष्ट्र आर्थिक विकास मंडळाचे उपाध्यक्ष सचिन ईटकर, प्र कुलगुरू डॉ. पराग काळकर, पुस्तकाचे शब्दांकनकर्ते प्रसाद मिरासदार, अस्पायर नॉलेज ॲन्ड स्किल्सचे संस्थापक डॉ. संजय गांधी, अस्पायर नॉलेज ॲन्ड स्किल्सच्या संचालक समीधा गांधी, संवाद, पुणेचे सुनील महाजन, निकिता मोघे मंचावर होते.
डॉ. सुरेश गोसावी म्हणाले, डॉ. संजय गांधी यांनी विकासाची त्रिसूत्री मांडताना शाश्वत विकासाचे ध्येय समोर ठेवून पर्यावरणाचा ऱ्हास होऊ नये याचा आढावा पुस्तकामार्फत युवा पिढीपर्यंत प्रभावीपणे पोहोचविला आहे. तंत्रज्ञानाच्या क्षेत्रात पुर्ननिर्मितीवर भर देताना डॉ. संजय गांधी यांनी पाच आरची तत्त्वे मांडली आहेत, ज्यात रिड्युस, रियुज, रिफ्यूज, रिपेअर आणि रिसायकल यांचा विचार केला आहे. त्या बरोबरीनेच आजच्या तांत्रिक युगात रिकॉन्फिगर या सहाव्या आरचाही समावेश व्हावा, अशी अपेक्षाही त्यांनी व्यक्त केली.
सुरुवातीस डॉ. संजय गांधी यांनी पुस्तकाच्या निर्मितीमागील भूमिका विशद केली. युवा पिढीने रोजगारक्षम होऊन शाश्वत विकासाच्या माध्यमातून कार्यरत व्हावे यासाठी या पुस्तकाची निर्मिती केली आहे, असे समीधा गांधी म्हणाल्या.
पद्मश्री दादा इदाते म्हणाले, नाविन्य, धडपड, येणाऱ्या पिढीविषयी आस्था, सतत बदलणाऱ्या तंत्रज्ञानाचा अभ्यास, रोजगार, उद्योजकता या विषयी समाजजीवनात नविन इतिहास घडविणारे व्यक्तीमत्त्व म्हणजे डॉ. संजय गांधी होत. आकांक्षा नव्या युगाच्या हे पुस्तक संभ्रमित युवा पिढीला, त्यांच्या स्पदंनांना साद घालणारे ठरेल.
पद्मश्री मिलिंद कांबळे म्हणाले, या पुस्तकाच्या निर्मितीने साहित्य क्षेत्रात मोलाची भर पडली आहे. हे साहित्य भविष्याचे वेध घेणारे आहे. युवा पिढीच्या आशा, अपेक्षा आणि आकांक्षांना जागृत करणारी त्रिसूत्रीची मांडणी महत्त्वाची ठरणार आहे.
प्रसाद मिरासदार यांनी पुस्तकाविषयी सविस्तर माहिती दिली. युवा पिढीने या प्रेरणादायी पुस्तकाचा लाभ घ्यावा, असे आवाहन केले.
मान्यवरांचे स्वागत डॉ. संजय गांधी, समीधा गांधी, सुनील महाजन यांनी केले. सामाजिक क्षेत्रात कार्यरत हुनर गुरुकुल, असीम फाऊंडेशन, पुणे मॅनेजमेंट असोसिएशन तसेच रिलायन्स ग्रुपचा सन्मान पद्मश्री दादा इदाते आणि पद्मश्री डॉ. मिलिंद कांबळे यांच्या हस्ते करण्यात आला. आभार निकिता मोघे यांनी मानले.

पुणे: खडकवासला विधानसभा मतदारसंघात टपाली मतदान प्रक्रियेची सुरुवात प्रभावीपणे करण्यात आली असून निवडणुक निर्णय अधिकारी डॉ. यशवंत माने यांच्या आदेशानुसार या प्रक्रियेच्या व्यवस्थापनाची जबाबदारी हि नोडल अधिकारी आणि त्यांच्या टीमकडे सोपविण्यात आली आहे. निवडणुक संचालन नियम, १९६१ नुसार, निवडणुक कर्तव्यार्थ अधिकारी-कर्मचारी, दिव्यांग मतदार, ८५ वर्षांवरील ज्येष्ठ मतदार, तसेच अत्यावश्यक सेवेतील मतदारांना टपाली मतदानाची सुविधा दिली जाते.
खडकवासला मतदारसंघात संबंधित मतदारांनी EDC (फॉर्म १२ अ) चा वापर केला आहे. तसेच दिव्यांग व ८५ वर्षांवरील मतदारांसाठी मतदारांची नोंदणी करण्यात आली आहे. अशी माहिती तहसीलदार किरण सुरवसे, सचिन आखाडे, अंकुश गुरव यांनी दिली आहे.या व्यवस्थेमुळे अधिकाधिक मतदारांना मतदान करण्याची संधी मिळाली असून, निवडणूक प्रक्रियेत पारदर्शकता व सोय सुविधा वाढली आहे.

पुणे : दिवाळी म्हटलं कि लहान मुलांची लगबग सुरु होते ती किल्ले बनविण्यासाठी. दिवाळीत किल्ले तयार करणं हि महाराष्ट्रातील मुलांची परंपराच. यानिमित्ताने सर्व मुले एकत्र येऊन मातीच्या सुंदर कलाकृती साकारतात. मुलांच्या या कलागुणांचा विचार करून उच्च व तंत्र शिक्षण मंत्री तथा कोथरूड मतदार संघाचे आमदार चंद्रकांत पाटील यांनी ‘किल्ले बनवा स्पर्धा’ आयोजित केली. या स्पर्धेला बच्चे कंपनीचा खूपच चांगला प्रतिसाद मिळाला.

चंद्रकांत पाटील यांनी या स्पर्धेबाबत माहिती देताना म्हटले कि, आजच्या तरुणाईमध्ये संघभावना तसेच संस्कृती जपण्याची ओढ निर्माण व्हावी या हेतूने दिवाळीमध्ये ‘किल्ले बनवा स्पर्धा’ आयोजित करण्यात आली होती. या स्पर्धेत स्पर्धकांनी शिवनेरी, तोरणा, रायगड, राजगड, जलदुर्ग जंजिरा, प्रतापगड अशा विविध किल्ल्यांच्या प्रतिकृती पर्यावरण पूरक घटकांचा वापर करून साकारल्या. या निमित्ताने मोबाइलच्या विश्वात हरवलेलं बालपण बच्चे कंपनीला अनुभवता आलं, याचा विशेष आनंद असल्याचे पाटील यांनी म्हटले.

बालवयात किल्ले बनविणाऱ्या या कलेला प्रोत्साहन देण्यासाठी आणि बालवयातच छत्रपती शिवाजी महाराजांची प्रेरणा मिळावी या उद्देशाने चंद्रकांत पाटील कोथरूडमध्ये दरवर्षी ‘किल्ले बनवा स्पर्धा’ आयोजित करतात. या स्पर्धेतील विजेत्यांना शिवचरित्राच्या प्रति भेट दिल्या जातात ज्या लहान मुलांमध्ये शिवरायांच्या स्फूर्ती जागवतात आणि शिवरायांची प्रेरणा मिळवून देतात. चंद्रकांत पाटील यांच्या संकल्पनेतून आणि पुढाकाराने राबविण्यात येणाऱ्या या स्पर्धेतून मुलांना छत्रपती शिवाजी महाराजांचा इतिहास समजण्यास नक्कीच मदत होईल हे निश्चित.

काँग्रेस प्रदेशाध्यक्ष नाना पटोलेंनी पंतप्रधान नरेंद्र मोदींना पत्र लिहून केली मागणी.

कापूस आयातीचा निर्णय व्यापाऱ्यांच्या फायद्याचा, केंद्र सरकारने शेतकऱ्यांचे हित पहावे.

मुंबई, दि. ३ नोव्हेंबर २०२४
कापूस उत्पादनात महाराष्ट्र देशातील दुसऱ्या क्रमांकाचे राज्य असून ४० लाखांपेक्षा जास्त शेतकरी कापसाचे उत्पादन घेतात. राज्यात भरपूर कापूस उत्पादन होत असताना २२ लाख गाठी कापसाची आयात करण्यात आल्याच्या बातम्यांमुळे देशात कापसाच्या भावात मोठी घसरण होण्याची भिती आहे. भारतीय कापूस महामंडळाकडेही विक्री न झालेल्या ११ लाख कापूस गाठी पडून आहेत. शेतकऱ्यांचे हित लक्षात घेऊन केंद्र सरकारने कापसाच्या आयातीवर तत्काळ बंदी घालून भारतीय कापूस महामंडळाला (CCI) हमीभावाने कापूस खरेदी करण्याचे निर्देश द्यावेत, अशी मागणी काँग्रेस प्रदेशाध्यक्ष नाना पटोले यांनी पंतप्रधान नरेंद्र मोदी यांना पत्र लिहून केली आहे.

पंतप्रधान नरेंद्र मोदी यांना पाठवलेल्या पत्रात काँग्रेस प्रदेशाध्यक्ष नाना पटोले म्हणतात की, सध्या कापसाचे भाव ६५०० ते ६६०० रुपये प्रति क्विंटल असून हा भाव ७१२२ रुपये या हमीभावापेक्षा कमी आहे. बाजारात कापसाला भाव नसल्याने शेतकऱ्यांनी कापूस विकलेला नाही. शेतकऱ्यांकडे कापूस आहे तसेच सीसीआयकडेही कापूस गाठी पडून आहेत. देशात एवढ्या मोठया प्रमाणात कापूस असताना कापसाची आयात केल्याने कापूस बाजार कोलमडून त्याचा मोठा फटका शेतकऱ्यांनाच बसेल आणि या निर्णयाचा फायदा फक्त व्यापाऱ्यांना होणार आहे. महाराष्ट्रात कापूस उत्पादक शेतकरी आधीच संकटात आहे, कमी भाव,शेती अवजारांवर १२ ते १८ टक्के जीएसटी आणि अवकाळी पाऊस या दुष्टचक्रात कापूस उत्पादक शेतकरी सापडला असून खराब हवामानामुळे यावेळी १९ लाख हेक्टरील कापूस क्षेत्राचे नुकसान झाले आहे. केंद्र सरकारने जाहीर केलेली नुकसान भरपाईही अद्याप कागदावरच आहे. प्रधानमंत्री पीक विमा योजना केवळ विमा कंपन्यांच्या फायद्यासाठी आहे. केंद्र सरकारने शेतकऱ्यांचे हित लक्षात घेऊन कापूस आयातीवर बंदी घालावी, असे नाना पटोले म्हणाले.

पुणे: पुण्यात शनिवारी रात्री घरगुती सिलेंडरचे दोन ठिकाणी स्फोट झाल्याच्या घटना घडल्या आहेत. पुण्यातील वारजे माळवाडी आणि अप्पर इंदिरानगर परिसरात दोन घरगुती सिलेंडरचे स्फोट झाल्याच्या घटना घडल्या आहेत.या घटनेची माहिती मिळताच अग्निशमन दलाचे जवानांनी घटनास्थळी दाखल झाले. दोन्ही ठिकाणी लागलेल्या आगीवर तातडीने नियंत्रण मिळवण्यात यश आले
सिलेंडरच्या स्फोटामध्ये दोन जण गंभीर जखमी झाल्याची माहिती आहे. सिलेंडरच्या स्फोटामुळे दोन्ही घरात मोठी आग लागली आहे. अग्निशमन दलाच्या जवानांकडून दोन्ही ठिकाणी आग वेळेत नियंत्रणात आणण्यात आली त्यामुळे मोठी हानी टळली आहे. जखमींना जवळच्या खाजगी रुग्णालयात करण्यात दाखल करण्यात आले.
या दोन्ही घटना काल (दि. 2) रात्रीच्या सुमारास वारजे माळवाडी आणि अप्पर इंदिरानगर परिसरात घडल्या आहे. या घटनेने परिसरात मोठी खळबळ उडाली आहे. घटनेबाबत मिळालेल्या माहितीनुसार, पुणे शहरातील वारजे माळवाडी आणि अप्पर इंदिरानगर परिसरात घरगुती सिलेंडरचे स्फोट झाले. या घटनेत दोन जण गंभीर जखमी झाले. जखमी व्यक्तींना उपचारासाठी जवळच्या रुग्णालयात दाखल करण्यात आले असून त्यांच्यावर उपचार सुरु आहेत.

धनकवडी :पुणे इन्स्टिट्यूट ऑफ कॉम्प्युटर टेक्नॉलॉजी (PICT) च्या उद्योजकता विकास कक्ष (EDC) आणि बिझनेस इनक्युबेशन सेंटरच्या वतीने संचालक डॉ. प्रल्हाद कुलकर्णी आणि प्राचार्य डॉ. संजय गंधे यांनी PICT चे माजी विद्यार्थी आणि यशस्वी उद्योजक श्री. अतिंद्रिय सान्याल यांचे अभिनंदन केले आहे. श्री. सान्याल हे Galileo चे संस्थापक आणि CEO आहेत.
Galileo या कंपनीचा समावेश आंतरराष्ट्रीय स्तरावरील प्रतिष्ठित “AI Impact 50” यादीत 45 व्या स्थानावर करण्यात आला आहे. यादीत OpenAI, Anthropic, Meta, आणि Google सारख्या जगभरातील प्रसिद्ध कंपन्यांसह Galileo चे नाव समाविष्ट आहे. श्री अतींद्रियो सान्याल यांच्या पुढील वाटचालीस बिझिनेस इंकुबेशन सेंटर तर्फे प्रा. प्रविण पाटील आणि अंकुश सपकाळ यांनी शुभेच्छा दिल्या.
PICT समुदायासाठी हा एक मोठा अभिमानाचा क्षण असून या यशामुळे संस्थेच्या माजी विद्यार्थ्यांच्या कामगिरीचा ठसा जागतिक पातळीवर उमटला आहे.

पुणे: खडकवासला विधानसभा मतदारसंघाच्या निवडणूक कार्यालयाच्या ‘स्वीप’ टीमने ‘एकच लक्ष्य: 100% मतदान’ या मोहिमेअंतर्गत मतदार जागरूकता वाढवण्यासाठी विशेष कार्यक्रमाचे आयोजन केले आहे. या मोहिमेच्या अंतर्गत, स्वीप टीमने अभिरुची मॉल,डीमार्ट धायरी आणि वारजे डीमार्टमध्ये उपस्थित ग्राहकांशी संवाद साधत, त्यांना मतदानाचे महत्व पटवून देण्याचे कार्य केले.
स्वीप टीमचे सदस्य नागरिकांना मतदान प्रक्रियेत सक्रीय सहभाग घेण्यास प्रोत्साहित करताना सांगितले की, प्रत्येक मतदाराचा हक्क हा लोकशाहीसाठी अत्यंत महत्त्वाचा आहे. त्यांनी लोकांना आपल्या मताचा योग्य वापर करण्याचे आवाहन करत मतदार म्हणून आपली जबाबदारी ओळखण्याचा संदेश दिला. मतदानाद्वारे सामाजिक परिवर्तन घडवण्याची संधी असल्याने प्रत्येकाने मतदान करणे अत्यावश्यक आहे, असे मत त्यांनी मांडले.
या मोहिमेचा मुख्य उद्देश मतदारांमध्ये 100% मतदानाची जागरूकता निर्माण करणे हा आहे. निवडणूक कार्यालयाने नागरिकांपर्यंत पोहोचण्यासाठी विविध ठिकाणी जनजागृती अभियान हाती घेतले आहे. या अभियानामुळे खडकवासला मतदारसंघातील अधिकाधिक नागरिक मतदान प्रक्रियेत सहभागी होतील, असा विश्वास निवडणूक कार्यालयाच्या शरदचंद्र गव्हाळे आणि अमोल पिसाळ यांनी व्यक्त केला.
या जागरूकता अभियानाने मतदारांमध्ये सकारात्मक प्रतिसाद उमटला असून, विविध माध्यमांद्वारे अधिकाधिक मतदारांपर्यंत पोहोचण्यासाठी प्रयत्न करण्यात येत आहेत.

पुणे- निवडणुकांच्या गंमती जमती फार असतात,कुठे राग असतो,कुठे मत्सर असतो तर कुठे अस्तित्वासाठी धडपड देखील असते.सुदैवाने पुण्यात राग,मत्सर दिसत नसले तरी अस्तित्वासाठी धडपड मात्र दिसते सर्वात महत्वाचे दिसते ती न्यायासाठी होत असलेली तडफड..बस हि एकदा नजरेत आणून दिली कि भल्या भल्या कार्यकर्त्यांचे बंद देखील पडते थंड..कारण त्यात राग व मत्सर कुठे नसतो…

देवेंद्र फडणवीस यांच्या आजच्या पुणे भेटीच्या दरम्यान त्यांनी आज अनेक इच्छुक असलेल्या पण उमेदवारी न देता आलेल्या किंवा पक्षाचा उमेदवार निवडून यावा म्हणून महत्वाचे असणाऱ्या कार्यकर्त्यांच्या घरी भेटी दिल्या अर्थात अशा सर्व कार्यकर्त्यांना आणि स्थानिक नेत्यांना तुम्ही विमानतळावर या तुमची मी भेट घडवून आणतो असा निरोप केंद्रीय मंत्री मुरलीधर मोहोळ यांनी दिला होताच.पण जर देवेन्द्रजी हे,याच्या घरी, त्याच्या घरी जाऊ शकतात, हेलीकॉप्टर कुणाला पाठवू शकतात तर..आपल्या घरी का येऊ शकत नाहीत ? आपल्याला बाहेर विमानतळावर का बोलाविले जाते ? ज्यांना उमेदवारी मिळालीय काही पडे मिळालीत ते जातील तिकडे हा भाव बहुतेकांच्या कडून व्यक्त होत होता जो केंद्रीय मंत्र्याच्या पुढे व्यक्त होत होता.अशाच सर्व राजकीय वातावरणातून सनी निम्हण, धीरज घाटे,श्रीनाथ भिमाले यांच्या नंतर देवेंद्र फडणवीस पुणे कॅन्टोन्मेंट मधील बंड करायला थंड..गेले डॉक्टर भरत वैरागेंच्या घरी..गेली कित्येक वर्षे भाजपचा हा जुना कार्यकर्ता.३ टर्म नगरसेवकपद घरात असलेला.सदैव लोकसभा,विधानसभा आणि महापालिकेला आपल्या भागातून भाजपाला मताधिक्य मिळवून देणारा कार्यकर्ता…साहेब ..कायम त्याच त्याच लोकांना पुढे नेले जातेय,आमच्या कामाकडे दुर्लक्ष होतेय,अन्याय होतोय आमच्यावर…

बस एवढेच बोलतो अन…साहेब हसतात, पाहू आपण या पुढे लक्ष घालू..करू आपण काही तरी..तुम्ही सोडा हट्ट,आम्ही आहोत ना.. एवढेच बोलतात आणि अर्ज माघारीच्या निर्णयाला..ह्म्म्म याला म्हणतात कार्यकर्ता..असे संबोधत थोड्या वेळाने निघूनही जातात.

पुणे कॅन्टोन्मेंट मधीलच बंड नव्हे तर अशा पद्धतीने अनेकांची नाराजी दूर करण्याचे काम आजच्या दौऱ्यात फडणविसांनी केले तर आहे.आता नेमके मतदार काय निर्णय घेतात हे पाहण्यासाठी २० तारीख आणि नंतर २३ तारीख उजाडून द्यावी लागणार आहे.