पुणे, दि. २४ मार्च २०२५: कायमस्वरुपी वीजपुरवठा खंडित असलेल्या ग्राहकांना केवळ मूळ थकबाकीच्या रकमेचा एकरकमी किंवा सहा हप्त्यांत भरणा करून थकबाकीमुक्ती व पुनर्वीजजोडणीची संधी देणाऱ्या महावितरण अभय योजनेला आता केवळ सात दिवस उरले आहेत. येत्या ३१ मार्चला या योजनेची मुदत संपत आहे. पुणे परिमंडलामध्ये आतापर्यंत उच्च व लघुदाबाच्या १० हजार ३०६ ग्राहकांनी २७ कोटी ६४ लाख रुपयांचा भरणा करून थकबाकीमुक्ती मिळवली आहे.

मा. सर्वोच्च न्यायालयाच्या निकालानुसार, वीजबिलांची थकबाकी असलेल्या एखाद्या जागेची मालकी बदलल्यानंतर देखील नवीन जागामालक किंवा ताबेदारांना थकबाकीची रक्कम भरावी लागेल. त्यामुळे जागा वापरासह नवीन वीजजोडणीची गरज असो किंवा नसो, जागेवरील वीजबिलांच्या थकबाकीतून मुक्त होण्याची संधी महावितरणच्या अभय योजनेअंतर्गत घरगुती, वाणिज्यिक, औद्योगिक व इतर अकृषक ग्राहकांना येत्या दि. ३१ मार्चपर्यंत उपलब्ध आहे. त्यामुळे या योजनेचा त्वरित लाभ घ्यावा असे आवाहन मुख्य अभियंता श्री. राजेंद्र पवार यांनी केले आहे.

       पुणे परिमंडलामध्ये अभय योजनेसाठी ११ हजार ९९७ वीजग्राहकांनी अर्ज दाखल केले आहे. त्यातील ९ हजार ४६४ ग्राहकांनी २३ कोटी ३८ लाखांचा एकरकमी भरणा केला आहे तर ८४१ ग्राहकांनी हप्त्यांमधील ४ कोटी २६ लाख रुपयांचा भरणा केला आहे. यातील ४ हजार २२७ ग्राहकांकडे वीजपुरवठा सुरु करण्यात आला असून २ हजार ५१३ ग्राहकांनी नवीन वीजजोडणीची मागणी केली आहे तर ५ हजार २५७ ग्राहकांनी विजेची गरज नसतानाही या योजनेतून थकबाकीमुक्तीला प्राधान्य दिले आहे. 

या योजनेत दि. ३१ मार्च २०२४ पर्यंत कायमस्वरुपी वीजपुरवठा खंडित झालेल्या ग्राहकांना वीजबिलांच्या थकबाकीमुक्तीसाठी सहभागी होता येईल व योजनेची मुदत दि. ३१ मार्च २०२५ पर्यंत आहे. कृषी व सार्वजनिक पाणीपुरवठा योजना वगळून उर्वरित घरगुती, वाणिज्यिक, औद्योगिक व इतर वीजग्राहकांसाठी ही योजना आहे. यामध्ये व्याज व विलंब आकार १०० टक्के माफ होत असून ग्राहकांना केवळ मूळ थकबाकीचा भरणा करावा लागत आहे. तसेच मूळ थकबाकीचा एकरकमी भरणा केल्यास त्यात लघुदाब ग्राहकांना आणखी १० टक्के तर उच्चदाब ग्राहकांना ५ टक्के सूट मिळत आहे. किंवा मूळ थकबाकीची सुरवातीला ३० टक्के रक्कम भरून उर्वरित ७० टक्के रक्कम व्याजमुक्त सहा हप्त्यांत भरण्याची देखील सोय आहे.

या योजनेत सहभागी होण्यासाठी महावितरणची www.mahadiscom.in ही वेबसाईट व मोबाईल अॅपद्वारे योजनेत सहभागी होण्याची व थकबाकी भरण्याची सोय उपलब्ध आहे. तसेच योजनेचा लाभ घेण्यासाठी व अधिक माहितीसाठी नजीकच्या महावितरण कार्यालयात संपर्क साधावा असे आवाहन करण्यात आले आहे.

पुणे, दि. २४ मार्च २०२५: वारंवार आवाहन करूनही थकीत वीजबिलांचा भरणा न केल्यामुळे पुणे परिमंडलामध्ये गेल्या २४ दिवसांत २५ हजार ४३४ थकबाकीदारांचा वीजपुरवठा खंडित करण्यात आला. सद्यस्थितीत घरगुती, व्यावसायिक व औद्योगिक वीजग्राहकांकडे अद्यापही ८८ कोटी ४५ लाख रुपयांची थकबाकी आहे. ही थकबाकी वसूल करण्यासाठी वीजपुरवठा खंडित करण्याची मोहीम आणखी तीव्र करण्यात आली आहे. थकीत वीजबिलांचा ताबडतोब भरणा करावा असे आवाहन महावितरणकडून करण्यात आले आहे.

महावितरणची संपूर्ण आर्थिक मदार ग्राहकांकडील वीजबिलांच्या दरमहा वसूलीवरच आहे. वीजबिलांच्या वसूलीमधूनच वीजखरेदीसह विविध देणी दरमहा द्यावी लागतात. त्यामुळे थकीत वीजबिलांच्या वसूलीला मोठा वेग देण्यात आला आहे. स्वतः मुख्य अभियंता श्री. राजेंद्र पवार परिमंडलात विविध ठिकाणी दौरे करून शाखा कार्यालयांपर्यंत थकबाकी वसूलीचा आढावा घेत आहेत. थकबाकीमुळे वीजपुरवठा खंडित करणे व खंडित केलेल्या वीजजोडण्यांची तपासणी करण्यासाठी अधीक्षक अभियंते युवराज जरग, सिंहाजीराव गायकवाड, रवींद्र बुंदेले (प्र.) यांच्यासह सर्व कार्यकारी अभियंते व इतर अधिकारी, कर्मचारी सध्या ‘ऑन फिल्ड’ आहेत.

पुणे शहरात एकूण घरगुती, व्यावसायिक व औद्योगिक वीजग्राहकांकडे ४० कोटी ९ लाख रुपयांची थकबाकी आहे. गेल्या २४ दिवसांमध्ये १० हजार १७७ थकबाकीदारांचा वीजपुरवठा खंडित करण्यात आला. तर पिंपरी चिंचवड शहरात घरगुती, व्यावसायिक व औद्योगिक वीजग्राहकांकडे १८ कोटी ४० लाख रुपयांची थकबाकी आहे. त्यातील ७ हजार ७९६ थकबाकीदारांचा वीजपुरवठा खंडित करण्यात आला. तसेच ग्रामीण भागातील आंबेगाव, जुन्नर, मावळ, खेड, मुळशी, राजगड, हवेली तालुक्यांमध्ये घरगुती, व्यावसायिक व औद्योगिक वीजग्राहकांकडे २९ कोटी ९६ लाख रुपयांची थकबाकी आहे. त्यातील ७ हजार ४६१ ग्राहकांचा वीजपुरवठा गेल्या २४ दिवसांत खंडित करण्यात आला.

वीजग्राहकांनी थकबाकीचा त्वरीत भरणा करावा व वीजपुरवठा खंडित करण्याची कटू कारवाई टाळावी असे आवाहन महावितरणकडून करण्यात आले आहे. सोबतच लघुदाब वीजग्राहकांना बिलांचा घरबसल्या भरणा करण्यासाठी www.mahadiscom.in  वेबसाईट व मोबाईल अॅपद्वारे ‘ऑनलाईन’ सोय उपलब्ध आहे.

अभिनेत्री, गायिका पुष्पा चौधरी करणार विश्वविक्रम : सलग चार तासाहून अधिक वेळ सादर करणार लावणी गीते ; स्वामिनी म्युझिक डान्स अँड अ‍ॅक्टींग अकॅडमी यांच्यातर्फे आयोजन

पुणे : लावणीच्या समृद्ध परंपरेला जागतिक पातळीवर नेण्यासाठी अभिनेत्री गायिका आणि सामाजिक कार्यकर्त्या पुष्पा प्रदीप चौधरी अनोखा विश्वविक्रम करणार आहेत. सलग ५१ लावणी गीतांचे सादरीकरण करून ‘वर्ल्ड रेकॉर्डस इंडिया’ आणि वंडर बुक ऑफ रेकॉर्ड इंटरनॅशनल’ मध्ये विक्रम नोंदविण्यासाठी त्या सज्ज आहेत. विश्वविक्रमाचा हा सोहळा बुधवार, दिनांक २६ मार्च रोजी सकाळी ९.३० ते दुपारी ३ वाजेपर्यंत कोथरूड मधील यशवंतराव चव्हाण नाट्यगृहात होणार आहे, अशी माहिती पुष्पा चौधरी यांनी पत्रकार परिषदेत दिली.

पत्रकार परिषदेला रत्ना दहीवेलकर, अनिरुद्ध हळंदे उपस्थित होते. स्वामिनी म्युझिक, डान्स अँड अ‍ॅक्टींग अकॅडमी वारजे यांनी कार्यक्रमाचे आयोजन केले आहे.

मराठी लावणी ला जागतिक पातळीवर नेण्यासाठी पुष्पा चौधरी यांनी या विश्वविक्रमासाठी पुढाकार घेतला आहे. कार्यक्रमाला ज्येष्ठ कलाकार लीला गांधी, सुरेखा पुणेकर, माया खुटेगावकर, श्वेता शिंदे, माधुरी पवार, प्राजक्ता गायकवाड, प्रतीक्षा जाधव, आरती शिंदे यांच्यासह अनेक मान्यवर उपस्थित राहणार आहेत. चित्रपट महामंडळाचे अध्यक्ष मेघराज राजे भोसले, सिद्धेश्वर झाडबुके, सुरेश विश्वकर्मा, प्रदीप कोथमीरे तसेच कला व सामाजिक क्षेत्रातील मंडळी याशिवाय वॅलेंटिना ग्रुप आॅफ इंडस्ट्रीजचे विश्वस्त देखील उपस्थित राहणार आहेत.  

पुष्पा चौधरी म्हणाल्या, मराठी लावणी कला व संगीत जगभर पोहोचावे यासाठी मी माझ्या आवाजाच्या माध्यमातून विविध ५१ लावण्यांचे बोल व गाणी न थांबता सलग सादर करणार आहे. जागतिक विक्रमामध्ये नोंद होण्यासाठी मराठी लावण्या गाण्याचा मानस आहे. यासाठी आवश्यक वेळ चार तासांपेक्षा जास्त असणार आहे. तरी पुणेकरांनी या विश्वविक्रमाचे साक्षीदार होण्यास उपस्थित रहावे, असे आवाहनही त्यांनी केले आहे.

पुणे, २४ मार्च २०२५ – सिंबायोसिस सेंटर फॉर डिस्टन्स लर्निंग (एस सी डी एल), जानेवारी २०२५ बॅचसाठी प्रवेश जवळपास बंद होणार आहेत. अर्ज करण्याची अंतिम तारीख २५ मार्च २०२५ आहे. २५ वर्षांहून अधिक काळ, एस सी डी एल हे व्यावसायिक, उद्योजक, विद्यार्थ्यांसाठी सुलभ आणि लवचिक शिक्षण प्रदान करण्यात अग्रणी राहिले आहे. ४०+ उद्योग-समर्पित अभ्यासक्रमांसह विविध अभ्यासक्रमांची विस्तृत श्रेणी असलेली ही संस्था, विविध क्षेत्रांतील करिअरच्या आकांक्षा पूर्ण करण्यासाठी कार्यरत आहे. भारताच्या प्रमुख डिस्टन्स लर्निंग संस्थांपैकी एक म्हणून ओळखल्या जाणाऱ्या एस सी डी एल चे ८००,००० पेक्षा अधिक माजी विद्यार्थी आहेत तसेच व्यावसायिकांचे प्रबळ नेटवर्क आहे. एस सी डी एल येथील शिक्षण उदयॊग मानकांशी सुसंगत राहण्यासाठी बनवले गेले आहे, त्यामुळे अनेक क्षेत्रांमध्ये या शिक्षणासाठी विस्तृत मान्यता आहे.

व्यवसायाभिमुख शिक्षण, तुमच्या व्यावसायिक जीवनात यश प्राप्त करण्यासाठी –

एस सी डी एल उद्योगाच्या मागण्या लक्षात ठेवून विस्तृत श्रेणी सह ४०+ व्यापक शिक्षण प्रदान करते, ज्यामुळे विद्यार्थ्यांना व्यवसाय, तंत्रज्ञान आणि व्यवस्थापनासारख्या विविध क्षेत्रांमध्ये आवश्यक कौशल्य मिळते.

काही प्रमुख कार्यक्रम :

पी जी डिप्लोमा
बिझनेस ऍडमिनिस्ट्रेशन (एक्सिक्युटिव्ह पीजीडीएम स्पेशलायझेशन्स)
ह्युमन रिसोअर्स मॅनेजमेंट
डेटा सायन्स आणि ऑनालिटिक्स
बँकिंग आणि फायनन्स
इन्फॉर्मेशन टेक्नोलॉजी आणि सप्लाय चेन मॅनेजमेंट

पी जी सर्टिफिकेट (विशेष कौशल्यासाठी शॉर्ट-टर्म कोर्सेस)

• डिजिटल मार्केटिंग
• प्रोजेक्ट मॅनेजमेंट

•बिझनेस ऑनालिटिक्स

कॉर्पोरेट आणि उद्योग-आधारित शिक्षण –

• एस सी डी एल हे आयबीएम, विप्रो, आणि इन्फोसिस सारख्या प्रमुख संस्थांसोबत सहकार्य करते आणि व्यावसायिकांसाठी अनुकूलित शिक्षण विकसित करते. हे कार्यक्रम आयटी, बँकिंग, हेल्थकेअर, आणि मॅन्युफॅक्चरिंगसारख्या उद्योगांमध्ये काम करणाऱ्या कर्मचार्‍यांना त्यांच्या कौशल्यांमध्ये वाढ करण्यासाठी मदत करतात, जेणेकरून ते झपाट्याने बदलणाऱ्या वातावरणात स्पर्धात्मक राहू शकतात.

कधीही, कुठेही शिका – अत्याधुनिक डिजिटल शिक्षण

• एस सी डी एल विद्यार्थ्यांना सुलभ शिक्षण प्रदान करते, जे मोबाइल-अनुकूल प्लॅटफॉर्मवर उपलब्ध आहे.
• विद्यार्थ्यांना संवादात्मक कोर्स सामग्री, सुसज्ज लर्निंग मॅनेजमेंट सिस्टम (LMS) द्वारे प्रवेश मिळवता येतो
• लाइव्ह आणि रेकॉर्ड केलेले लेक्चर्स मोबाइलवर
• AI-आधारित प्रॉक्टर्ड परीक्षा आणि व्हर्च्युअल क्लासरूम्स
• फॅकल्टी, सहली व उद्योग तज्ञांशी नेटवर्किंग

एस सी डी एल का निवडावे ?

• आउटलुक – प्रथम क्रमांक असणारी डिस्टन्स लर्निंग संस्था
• 800,000+ जागतिक विद्यार्थ्यांचे नेटवर्क
• परवडणाऱ्या फीमध्ये विस्तृत तज्ञ कोर्सेस
• पदवीधारक किंवा कामकाजी व्यावसायिकांसाठी 25% सरासरी पगार वाढ
• एस सी डी एलला चा सर्व उद्योगांमध्ये उच्च मान्यता

•शिक्षणा करीत भारतासह यूएई, संयुक्त राष्ट्र, केनिया इत्यादी विविध देशांतील विद्यार्थी

पुणे, २४ मार्च २५ – सिंबायोसिस स्कील्स ॲन्ड प्रोफेशनल युनिव्हर्सिटी, पुणे (SSPU) ने ॲलेन युनिव्हर्सिटी, जर्मनी सोबत विद्यार्थ्यांच्या शैक्षणिक मार्गदर्शना करीता चर्चा सत्राचे आयोजन केले होते. आज ॲलेन युनिव्हर्सिटीच्या अधिकाऱ्यांनी सिंबायोसिस स्कील्स ॲन्ड प्रोफेशनल युनिव्हर्सिटीला भेट दिली.

ॲलेन युनिव्हर्सिटीतील, मिरियम कोल्मर-ट्रायनी (एमए), आंतरराष्ट्रीय संबंध आणि संशोधन विपणन तज्ञ, आणि प्रा. डॉ. अंजा डायकमन यांनी शिष्यवृत्तींबद्दल मौल्यवान माहिती दिली. या वेळी मेजर सोनाली कदम (निवृत्त) आणि राघवन संथानम, संचालक – स्कूल ऑफ पोर्ट्स, टर्मिनल मॅनेजमेंट, लॉजिस्टिक्स आणि सप्लाय चेन मॅनेजमेंट हे देखील उपस्थित होते.

या चर्चा सत्रामध्ये विद्यार्थ्यांनी अर्ज प्रक्रिया, पात्रता निकष आणि आंतरराष्ट्रीय शिक्षणाचे फायदे जाणून घेतले. सिंबायोसिस स्कील्स ॲन्ड प्रोफेशनल युनिव्हर्सिटी आणि ॲलेन युनिव्हर्सिटी यांच्या सहयोगामुळे जागतिक संधी आणि शैक्षणिक प्राविण्य मिळवण्यासाठी एक नवा मार्ग खुला झाला आहे.

स्वरावर्तन आयोजित ‌‘कंस‌’ प्रकार मैफलीत आरती ठाकूर-कुंडलकर यांचे सुश्राव्य गायन

पुणे : भारतीय अभिजात शास्त्रीय संगीत अनेकविध रागरागिण्यांनी समृद्ध आहे. यातील ‌‘कंस‌’ या प्रकारातील विविध रागांचे मनोहारी दर्शन आज रसिकांना घडले. किराणा घराण्यातील ज्येष्ठ गुरू लीलाताई घारपुरे आणि जगविख्यात शास्त्रीय गायिका पद्मविभूषण डॉ. प्रभा अत्रे यांचे दीर्घकाळ मार्गदर्शन लाभलेल्या त्यांच्या ज्येष्ठ शिष्या आरती ठाकूर-कुंडलकर यांनी गुरूंच्या सान्निध्यात ग्रहण केलेल्या सांगीतिक वारश्यातील ज्ञान पुढील पिढीपर्यंत प्रवाहित रहावे या हेतूने या मैफलीची मांडणी केली होती.

आरती ठाकूर-कुंडलकर यांच्या शिष्य परिवाराच्या पुढाकारातून स्वरावर्तन फाऊंडेशनतर्फे या राग संगीताच्या मैफलीचे आयोजन करण्यात आले होते. मैफल न्यू इंग्लिश स्कूलच्या आवारातील गणेश सभागृहात आयोजित करण्यात आली होती. डॉ. दिलीप देवधर यांची विशेष उपस्थिती होती.

कुंडलकर यांनी मैफलीची सुरुवात चंद्रकंस रागातील ‌‘अब कल नाही मनवा‌’ या विलंबित एकतालातील बंदिशीने केली. या नंतर तीन तालातील ‌‘मूरत मन भाए मोहन की‌’ ही बंदिश सादर करून त्याला जोडून कौशिकरंजनीतील आडा चौतालातील सुयोग कुंडलकर रचित ‌‘मोरी आली मोहे अब नाही चैन‌’ ही बंदिश प्रभावीपणे सादर केली. रागेश्री कंस सादर करताना रूपक तालातील ‌‘नाद भेद अपार कोहून‌’ आणि ‌‘ए सूर साधे षड्ज गंधार‌’ ही बाळासाहेब पुंछवाले यांची बंदिश सादर करून आरती ठाकूर-कुंडलकर यांनी रसिकांना मोहित केले.

ओडव बागेश्री म्हणजेच राग पुराना चंद्रकंस मांडताना त्यांनी ‌‘लगन तोसे लागी बनवारी‌’ ही अध्धा तीन तालातील बंदिश तयारीने सादर केली. डॉ. प्रभा अत्रे यांची राग मधुकंसमधील ‌‘माने ना माने ना कान्हा मोरी बतिया‌’ या बंदिशीची रसिकांना झलक ऐकविली. मैफलीची सांगता डॉ. प्रभा अत्रे यांच्या सांगीतिक अभ्यासातून निर्माण झालेल्या मधुरकंस रागाने केली. या रागातील ‌‘पार करो मोरी नैय्या‌’ ही गुरूंनी रचलेली बंदिश ऐकविताना आरती ठाकूर-कुंडलकर यांच्या गायनातून गुरुस्वरांची अनुभूती आली.

गुरूंकडून प्राप्त झालेले शास्त्रीय संगीताच्या क्षेत्रातील ज्ञान आरती ठाकूर-कुंडलकर यांनी संगीत अभ्यासक, विद्यार्थी, रसिक यांच्यासमोर सादर करताना त्यांची गुरूंप्रति असलेली श्रद्धा, प्रेमभाव, तल्लीनता, एकरूपता आणि ज्ञान प्राप्त करण्याच्या ओढीतून बहरत गेलेले गायन रसिकांच्या मनात अवितरपणे गुंजत राहिले. आरती ठाकूर-कुंडलकर आणि सुयोग कुंडलकर यांच्या शिष्यांनी आयोजित केलेल्या या मैफलीत गुरू आणि शिष्यांमधील भावनिक अनुबंधाचे अनोखे दर्शन रसिकांना घडले. आरती ठाकूर-कुंडलकर यांना संजय देशपांडे (तबला), सुयोग कुंडलकर (संवादिनी), मीनलता जोशी-देशपांडे, कस्तुरी कुलकर्णी (तानपुरा) यांनी सुरेल-समर्पक साथ केली.

डॉ. दिलीप देवधर, आरती ठाकूर-कुंडलकर आणि सुयोग कुंडलकर यांच्या हस्ते सुरुवातीस दीप प्रज्वलन झाले. अभिजात भारतीय शास्त्रीय संगीताच्या प्रचार-प्रसारासाठी दहा वर्षांपासून स्वरावर्तन फाऊंडेशनच्या माध्यमातून आरती ठाकूर-कुंडलकर आणि सुयोग कुंडलकर सजगपणे कार्यरत आहेत. फाऊंडेशनच्या कार्याची ओळख करून देणाऱ्या माहितीपटाचे अनावरण या प्रसंगी डॉ. दिलीप देवधर यांच्या हस्ते झाले. संगीत क्षेत्रातील दिग्गज कलाकारांसह अनेक मान्यवर मैफलीस आवर्जून उपस्थित होते.

मुख्यमंत्री देवेंद्र फडणवीस यांचा शब्द; शिष्टमंडळाची मुख्यमंत्र्यांशी सकारात्मक चर्चा

पुणे : मंगळवार पेठ येथील डॉ. बाबासाहेब आंबेडकर सांस्कृतिक भावनालगतची सुमारे अडीच एकर जागा डॉ. बाबासाहेब आंबेडकर यांच्या स्मारकासाठीच राहील. यासंदर्भात लवकरच निर्णय करून ही जागा स्मारक उभे करण्यासाठी उपलब्ध करून दिली जाईल, असा शब्द मुख्यमंत्री देवेंद्र फडणवीस यांनी दिला.

मुख्यमंत्री फडणवीस काल पुणे दौऱ्यावर आले असता, डॉ. बाबासाहेब आंबेडकर सांस्कृतिक भवन विस्तारीकरण समितीच्या शिष्टमंडळाचे त्यांची भेट घेऊन सविस्तर चर्चा केली. मुख्यमंत्र्यांनी स्मारक उभारण्याबाबत सकारात्मकता दर्शवली असून, स्मारकाचा मार्ग प्रशस्त झाल्याची भावना शिष्टमंडळातील सर्वच प्रतिनिधींनी व्यक्त केली.

केंद्रीय मंत्री मुरलीधर मोहोळ यांच्या पुढाकाराने मुख्यमंत्र्यांना भेटलेल्या या शिष्टमंडळात माजी उपमहापौर डॉ. सिद्धार्थ धेंडे, राहुल डंबाळे,ॲड. अविनाश साळवे, परशुराम वाडेकर, ॲड. जयदेव गायकवाड, शैलेंद्र चव्हाण, रोहिदास गायकवाड, ॲड. अरविंद तायडे, युवराज बनसोडे, शैलेंद्र मोरे व अतुल साळवे यांचा समावेश होता.

मंगळवार पेठेतील सार्वजनिक बांधकाम विभागाची जागा खाजगी विकसकाला देण्याचा घाट घातला आहे. मात्र, या जागेवर शासनाने यापूर्वी जाहीर केल्याप्रमाणे भारतरत्न डॉ. बाबासाहेब आंबेडकर यांचे यथोचित स्मारक व्हावे, यासाठी पुणे शहरातील आंबेडकरी चळवळीतील विविध पक्ष, संघटना व कार्यकर्त्यांकडून आंदोलन केले जात आहे.

मुरलीधर मोहोळ यांनीही बाबासाहेबांचे चांगले स्मारक उभारण्यासाठी लागेल तितका निधी उपलब्ध करण्यास सहकार्य करण्याची भावना व्यक्त केली. डॉ. आंबेडकरांचे स्मारक व्हावे, ही भावना पुण्यासह पश्चिम महाराष्ट्रातील आंबेडकरी जनतेची आहे. यासाठी आम्ही सर्वजण कटिबद्ध असल्याचे शिष्टमंडळातील सदस्यांनी यावेळी सांगितले.

इमारती पाडल्या जाण्याचा आणि ६० कुटुंबाची ये-जा बंद होण्याचा धोका –

पुणे :भूमी अभिलेख कार्यालयातील कर्मचाऱ्याच्या चुकीच्या मोजणीने सोसायटीची ये-जा करण्याचा पूर्ण रस्ता दुसऱ्याच मिळकतीत दाखवला गेल्याने  बालेवाडीतील २ सोसायट्या संकटात सापडल्या आहेत.भविष्यात या इमारती पाडल्या जाण्याचा आणि ६० कुटुंबाची ये-जा बंद होण्याचा धोका निर्माण झाला असून या संशयास्पद कृतीविरुद्ध संबंधित भू-कर मापक कर्मचाऱ्यावर कारवाई करावी,अशी लेखी तक्रार आणि  मागणी  सोसायटी पदाधिकाऱ्यांनी भूमी अभिलेख कार्यालयाकडे केली आहे. बालेवाडी येथील  अमित एमराल्ड पार्क सोसायटी आणि सेलिब्रेशन सोसायटीच्या पदाधिकाऱ्यानी ही तक्रार नोंदवली आहे.खासगी मिळकतदारासाठी हे कारस्थान केल्याचा आरोप या पदाधिकाऱ्यांनी आज पत्रकार परिषदेत केला. 

पुणे श्रमिक पत्रकार संघ येथे २४  मार्च २०२५ रोजी सकाळी साडेअकरा वाजता झालेल्या पत्रकार परिषदेत याबाबत दोन्ही सोसायट्यांच्या पदाधिकाऱ्यांनी माहिती दिली.अमित इम्राल्ड पार्क चे अध्यक्ष डॉ. विजय भिलवाडे,सेलिब्रेशन सोसायटीचे सचिव  संतोष छाजेड, राजाराम ढवळे यांच्यासह अनेक पदाधिकारी,फ्लॅट धारक या पत्रकार परिषदेला उपस्थित होते. 

बालेवाडी येथे स. नं ३१/१ मध्ये अमित एमराल्ड पार्क सोसायटी आणि सेलिब्रेशन सोसायटी आहे. इमारती चे नकाशे २००७ आणि २०१० ला महापालिकेकडून मान्य झाले व त्यानंतर बांधकाम होऊन लोकांनी ह्या इमारती मधे सरकारी स्टैम्प ड्यूटी भरून फ्लॅट विकत घेतले व त्याला महापालिकेने भोगवटा पत्र सुद्धा दिले आहे.  त्यासाठी आवश्यक त्या सरकारी मोजण्या २००५ आणि २०१० झालेल्या आहेत ,पुणे महापालिकेच्या परवानग्या घेतल्या गेलेल्या आहेत आणि ह्या सर्व इमारती अधिकृत आणि कायदेशीर आहेत. अमित एमराल्ड पार्क चा रस्ता महापालिकेने एफ एस आय स्वरूपात मोबदला देऊन ताब्यात घेतला आहे. काही दिवसांपूर्वी ह्या दोन्ही सोसायटी ने हायकोर्टात महापालिकेच्या विरोधात रस्ता दुरुस्त करून द्यावा असा दावा सुद्धा दाखल केलेला आहे आणि आज भूमीअभिलेख ने रस्ता गायब करून दुसऱ्यालाच देऊन टाकला आहे.

दिनांक ०३-०२-२०२५ रोजी भूमी अभिलेख कार्यालयाचे  हद्दीच्या खुणा दाखविणा बद्दल पत्र सेलिब्रेशन  आणि अमित इमराल्ड सोसायटीला मिळाले व भूमी अभिलेख चे भूकरमापक व्ही व्ही कोकरे यांनी दोन्ही सोसायटी च्या लोकांना विश्वासात न घेता जागेवर येऊन परस्पर हद्दी दाखवल्या व हा रस्ता दुसऱ्याच्या मिळकती मधे दाखवला व सोसायटीच्या हरकती न नोंदवता व्ही व्ही कोकरे निघून गेले. त्यानंतरसोसायटीनी  त्वरित ४ तारखेला हरकत दाखल केल्या. हद्द दाखविण्यासाठी आलेले भुकरमापक व्ही. व्ही. कोकरे यांनी हद्दींची नोंद चुकीच्या पद्धतीने केली आणि सोसायटी चा रस्ता म्हणजे स. नं ३१/१ मधील भाग शेजारच्या खासगी  मिळकतीत म्हणजे स. न. २९ मधे दाखविला गेला .त्यामुळे तेवढी जागा आणि रस्ता कागदोपत्री महापालिकेचा भाग राहिलेला नाही व ती मिळकत खासगी झाली आहे. भविष्यात संबंधित मिळकतीचे मालक ती जागा ताब्यात घेऊन अमित एमराल्ड सोसायटीच्या इमारती पाडण्याचा आणि ६० कुटुंबाची ये-जा असलेला रस्ता बंद करू शकतात. त्यामुळे दोन्ही सोसायटयांनी सावध होऊन या मोजणीला आणि चुकीच्या हद्दीला हरकत घेऊन भूमी अभिलेख कार्यालयात तक्रार दाखल केली आहे.चुकीची नोंद दुरुस्त करण्याची मागणी केली आहे.

भू -करमापक व्ही. व्ही. कोकरे यांनी दाखविलेल्या हद्दी चुकीच्या आणि भ्रष्ट पद्धतीने केल्या असल्यामुळे सदर चुकीचे नकाशा ची प्रत कोणालाही देऊ नये, वरिष्ठांनी  स्वतः खातरजमा केल्या शिवाय मोजणी प्रक्रिया निकाली काढू नये,सदर नकाशे  संपूर्ण रेकोर्ड सहित म्हणजेच गुगल नकाशे, जुन्या मोजणी, टिपण, फाळणी वर्गरे पुन्हा तपासून त्याची वरिष्ठांनी  स्वतः खातरजमा करून जागेवर पुन्हा हद्दी दाखविण्यात याव्यात,अशी मागणी या तक्रारीत करण्यात आली आहे.भुकरमापक व्ही. व्ही. कोकरे यांनी सदर प्रकरणात भ्रष्टाचार करून हद्दी दाखविल्या असल्यामुळे भु-करमापक व्ही. व्ही. कोकरे यांची चौकशी करावी आणि सदर प्रकरण त्यांच्याकडून काढून इतर वरिष्ठ अधिकारी यांच्या नावे वर्ग करणेत यावे  व नव्याने त्याच्या हद्दी दाखवाव्यात असेही या तक्रारीत म्हटले आहे.
जमाबंदी आयुक्तांनी ह्या गैरप्रकारात स्वतः लक्ष घालावे आणि त्याच बरोबर हा रस्ता महापालिकेने २००८ सालीच ताब्यात घेतलेला आहे त्यामुळे महापालिका आयुक्तांनी जागेवर येऊन पाहणी करून ह्या बाबतीत निर्णय घ्यावा आणि हा रस्ता दुसऱ्यांच्या घशात घालू नये अशी मागणी सोसायटीच्या सभासदांनी पत्रकार परिषदेत  केली आहे..