महाराष्ट्र हौसिंग फेडरेशन आणि पुणे जिल्हा फेडरेशन आयोजित

पुणे : सहकारी गृहनिर्माण संस्थाना सहकारात स्थान नव्हते, त्यावेळी २०१९ साली त्याकरिता स्वतंत्र चॅप्टर आम्ही केला. त्यामुळे कायद्याने आधार मिळाला. येत्या १० ते १२ दिवसात  उर्वरित नियम देखील आम्ही प्रसिद्ध करू, तसेच अपार्टमेंट कायद्यात देखील येत्या महिन्याभरात आवश्यक पूर्तता करू. सहकारातून समृद्धीकडे नेण्याचे पंतप्रधान मोदी आणि गृहमंत्री अमित शहा यांचे धोरण हे स्वयंपूनर्विकासातून साध्य करण्याचा विचार आहे. स्वयंपुर्नविकास हा आणखी सोप्या पद्धतीने व्हायला हवा. त्यामध्ये सहकारातून समृद्धीकडे नेण्याचे धोरण आहे, असे मत महाराष्ट्राचे मुख्यमंत्री देवेंद्र फडणवीस यांनी व्यक्त केले.

पुणे जिल्हा आणि महाराष्ट्र राज्य सहकारी गृहनिर्माण संस्था आणि अपार्टमेंट्स महासंघ, सहकारी पतसंस्था महासंघ, सहकारी बँक महासंघ यांच्यावतीने महाराष्ट्रातील गृहनिर्माण संस्था आणि अपार्टमेंट्स यांना मार्गदर्शन व सहकार्य मिळावे, यासाठी पुण्यात महाअधिवेशन आणि प्रदर्शनाचे आयोजन गणेश कला क्रीडा मंच येथे करण्यात आले होते.

समारोपप्रसंगी केंद्रीय मंत्री मुरलीधर मोहोळ, राज्याचे माहिती व तंत्रज्ञान मंत्री आशिष शेलार, आमदार प्रवीण दरेकर, ज्येष्ठ सहकार तज्ज्ञ विद्याधर अनास्कर, आमदार हेमंत रासने, धीरज घाटे, दीपक मिसाळ, संघटनेचे अध्यक्ष सुहास पटवर्धन, सीताराम राणे, मुंबई गृहनिर्माण संस्थेचे अध्यक्ष प्रकाश दरेकर, सचिव मनिषा कोष्टी, नॅशनल को-ऑपरेटिव्ह युनियन ऑफ इंडिया नवी दिल्लीचे कार्यकारी संचालक आशिष त्रिवेदी आदी यावेळी उपस्थित होते. यावेळी अनेक ऑनलाईन सेवा व स्मरणिका, विविध पुस्तकांचे प्रकाशन मान्यवरांच्या हस्ते झाले.

देवेंद्र फडणवीस म्हणाले, क्लस्टर पद्धतीने स्वयंपुर्ण विकास करण्याचा आमचा प्रयत्न आहे. गृहनिर्माण संस्थाना टँकरमुक्त आम्ही करू. मात्र, सोलरयुक्त संस्था हा उपक्रम सर्वत्र राबविणे गरजेचे आहे. त्याकरिता प्रधानमंत्री सूर्य धन योजनेचा संस्थानी लाभ घ्यायला हवा. पुढील ३ महिन्यात संस्थाशी निगडित ऑनलाईन प्रणाली सुरु होत असून पुढील सहा महिन्यात व्हाट्स अँप वर सुविधा उपलब्ध होतील. यामुळे नागरिकांना हेलपाटे मारावे लागणार नाहीत, असे आश्वासनही त्यांनी दिले.

मुरलीधर मोहोळ म्हणाले, भारत हा कृषीप्रधान देश असल्याने ४० टक्के  पेक्षा अधिक लोकसंख्या सहकाराशी जोडली गेली आहे. देशात ८ लक्ष तर राज्यात २.२५ लक्ष सहकारी संस्था असून त्यातील १.२५ लक्ष गृहनिर्माण संस्था आहेत. त्यामुळे ही चळवळ मजबूत करण्याचा प्रयत्न आहे. आज ३० वेगवेगळ्या क्षेत्रात अशा पद्धतीचे काम सुरु आहे.

आशिष शेलार म्हणाले, माहिती तंत्रज्ञानाशिवाय सहकार चळवळ चालू शकत नाही. कोविड काळात गृहनिर्माण संस्थाच्या सभा या ऑनलाईन पद्धतीनेच होत होत्या. त्यामुळे यामध्ये माहिती तंत्रज्ञानाला महत्व आहे. व्यवसायिकीकरण आणि स्वायत्तता या दोन गोष्टी सहकारी संस्थांमध्ये असायला हव्या. संस्थांच्या कार्यपद्धतीवर लोकांचा विश्वास अवलंबून असल्याचे त्यांनी सांगितले.

प्रवीण दरेकर म्हणाले, आज स्वयंपुर्नविकास मोठी गती घेत आहे. पुण्यासह पिंपरी चिंचवड मध्ये याकरिता खूप मोठा वाव आहे. बिल्डर शिवाय पुर्नविकास करण्याबाबत आपण आत्मनिर्भर होत आहोत. याबाबत मुंबई मध्ये केलेले प्रकल्प यशस्वी झाले आहेत. त्यामुळे पुणेकरांनी पुर्नविकास चळवळीत मागे राहू नये.

विद्याधर अनास्कर म्हणाले, गृहनिर्माण संस्थांमध्ये सहकार संस्कृती विकसित होईल, याकडे लक्ष देणे गरजेचे आहे. गृहनिर्माण संस्था म्हणजे भांडण हे सगळ्यांचे असलेले मत आपण दुरुस्त करायला हवे. अनेक संस्थांमध्ये चांगली संस्कृती आहे. एकमेकांना मदत देखील केली जाते. एकी हेच बळ हे सहकाराचे तत्व असून सहकाराची शिस्त आपल्यामध्ये सहकार टिकवण्यासाठी हवी.

सुहास पटवर्धन म्हणाले, नोंदणीकृत सहकारी गृहनिर्माण संस्था स्वयंपुनर्विकास २०१९ च्या आदेशानुसार अंमलबजावणी होणे गरजेचे आहे. तसेच २०१९ च्या सहकार कायद्याच्या नियमावलीची देखील अंमलबजावणी होणे आवश्यक आहे. मानीव हस्तांतरण ऑनलाईन पद्धतीने, एका खिडकी योजना, बिगरशेती कर आकारणी कायम स्वरूपात रद्द व्हावी. जिल्हा आणि राज्य महासंघास कार्यालय आणि सहकार संवाद ऑनलाईन पोर्टलचा विकास आवश्यक असल्याच्या मागण्या त्यांनी केल्या.

बंगळुरूच्या निरुपमा आणि राजेंद्र यांच्या नृत्याविष्कार ठरला नृत्य महोत्सवाचे प्रमुख आकर्षण

नामदार चंद्रकांतदादा पाटील आयोजित दुसऱ्या पंडिता रोहिणी भाटे नृत्य महोत्सवाची उत्साहात सांगता

तिसऱ्या रोहिणी भाटे नृत्य महोत्सवात राज्याचा सांस्कृतिक विभाग सहभागी होणार!

सांस्कृतिक कार्य मंत्री ॲड. आशिष शेलार यांची घोषणा

विख्यात भरतनाट्यम नृत्यांगना निरुपमा आणि राजेंद्र यांचा डौलदार पदन्यास, समर्थ अभिनय आणि आकर्षक हस्तमुद्रा यांचा मेळ जमलेला नृत्याविष्कार हे नामदार चंद्रकांतदादा पाटील आयोजित युवा सुराज्य प्रतिष्ठानच्या संयोजनातून आणि शास्त्रीय नृत्य संवर्धन संस्थेच्या वतीने प्रस्तुत पंडिता रोहिणी भाटे नृत्य महोत्सवाच्या अखेरच्या सत्राचे प्रमुख आकर्षण ठरले.

श्रीकृष्णाच्या रासलिलेवर आधारित कथाभागातून सादर केलेल्या नृत्याविष्कारातून संवेदनशील अभिनयाचे, सुंदर देहबोलीचे दर्शन रसिकांना घडले. तर मनिषा नृत्यालयाने कथ्थकच्या माध्यमातून शिवभूषण सादर केले. या कलाकृतीस रसिकांनी उत्स्फूर्त प्रतिसाद दिला. याशिवाय कलासक्त नृत्य संस्थेने सादर केलेल्या योगिनी या ओडिसी नृत्याविष्कारास आणि उत्तुंग अभिनयाला रसिकांनी भरभरून दाद दिली.

आजच्या कार्यक्रमात मुद्रा कथक नृत्य संस्थेने ‘गणेश ध्रुपद’ (कथ्थक), स्वरदा नृत्य संस्था ‘चरिष्णू’ (भरतनाट्यम्), आरोहिणी नृत्य संस्थेने ‘शिव ध्रुपद’ (कथ्थक), स्नेहललितने ‘तिल्लान’ (भरतनाट्यम्), रुपक नृत्यालयने ‘चतरंग’ (कथ्थक), शिल्पा नृत्यालयाने एक श्लोकी रामायण (कथ्थक), नृत्यांजली संस्थेचे श्री गणेश (भरतनाट्यम्), नृत्यभारती संस्थेचे राग सागर (कथ्थक), कलासाधनम् नृत्य संस्थेचे डमरु (भरतनाट्यम्), अर्चना नृत्यालयाचे ठुमरी (कथ्थक), रुपक कलासदनने अंजनेय स्तुती (भरतनाट्यम्) आदी नृत्याविष्कार सादर केले.

सांस्कृतिक कार्य मंत्री ॲड. आशिष शेलार म्हणाले की, पंडिता रोहिणी भाटे नृत्य महोत्सवातील नृत्याविष्कार पाहून थक्क झालो. वास्तविक अशाप्रकारचा शास्त्रीय नृत्यासाठी समर्पित महोत्सव हा पुण्यातच होऊ शकतो, हे आजच्या महोत्सवाने दाखवून दिले आहे. रोहिणी ताईंच्या नावाने होणारा हा महोत्सव म्हणजे एकप्रकारे महादेव शंकरांची उपासना आहे. शास्त्रीय नृत्य संवर्धन संस्था नृत्य संकुल उभारण्यासाठी प्रयत्सांनशील आहे. स्कृतिक विभाग त्यासाठी सर्वतोपरी मदत करेल.

ते पुढे म्हणाले की, रोहिणी भाटे नृत्य महोत्सव हा खरंच अविस्मरणीय आहे. त्यामुळे शास्त्रीय नृत्य महोत्सवाचा प्रतिसाद पाहून; पुढील वर्षीचा तिसरा महोत्सव अधिकाधिक भव्यदिव्य करण्यासाठी महाराष्ट्राचा सांस्कृतिक विभाग देखील सहभागी होईल. त्यासोबतच  सांस्कृतिक विभागाच्या वतीने आगामी ३६५ दिवस १२०० कार्यक्रम राज्यभर राबविणार असल्याची माहिती देखील मंत्री शेलार यांनी यावेळी दिली.

समारोप प्रसंगी पंडिता रोहिणी भाटे यांना पुणेकरांनी दिव्याच्या प्रकाशात अनोखी आदरांजली वाहिली. यावेळी राज्याचे उच्च व तंत्रशिक्षण मंत्री चंद्रकांतदादा पाटील, अंजली पाटील, नृत्य गुरु शमाताई भाटे, मनिषा साठे, भाजपा प्रदेश उपाध्यक्ष राजेश पांडे, शास्त्रीय नृत्य संवर्धन संस्थेच्या सर्व पदाधिकारी, आयोजक अजय धोंगडे, संयोजक तथा भाजपा पुणे शहर सरचिटणीस पुनीत जोशी यांच्या सह इतर मान्यवर उपस्थित होते.

महाराष्ट्र राज्य सांस्कृतिक कार्य संचालनालय व पश्चिम क्षेत्र सांस्कृतिक केंद्र,भारत सरकार, उदयपूर यांच्या संयुक्त विद्यमाने आयोजित तीन दिवसीय लोकोत्सवाचा समारोप

पुणे (दि. २३ मार्च २०२५) लोकोत्सवामुळे पिंपरी चिंचवडकरांना महाराष्ट्र व ओरिसा मधील आदिवासी लोक संस्कृतीचा कलाविष्कार पाहण्याची संधी मिळाली. हा ठेवा अनुभवणे म्हणजे सामाजिक परंपरा, संस्कृतीचे जतन करणे देशाच्या ऐक्यासाठी नितांत गरजेचे आहे हे स्पष्ट झाले. यासाठी पिंपरी चिंचवड सोशल फाउंडेशने समन्वयाची भूमिका महत्त्वाची होती, असे मत विधानपरिषदेच्या आमदार उमा खापरे यांनी व्यक्त केले.
महाराष्ट्र सांस्कृतिक कार्य विभाग, सांस्कृतिक कार्य संचालनालय, महाराष्ट्र राज्य, मुंबई व पश्चिम क्षेत्र सांस्कृतिक केंद्र, भारत सरकार उदयपूर यांच्या संयुक्त विद्यमाने, एक भारत श्रेष्ठ भारत अंतर्गत – लोकोत्सव हा महाराष्ट्र व ओरिसा राज्यातील संस्कृतीचे दर्शन घडविणारा तीन दिवसीय उत्सवाचा शनिवारी (२२ मार्च) प्रा. रामकृष्ण मोरे सभागृह, चिंचवड येथे समारोप झाला. या लोकोत्सवाचे संयोजन पिंपरी चिंचवड सोशल फाउंडेशनने केले केले होते. यावेळी प्राधिकरणाचे माजी अध्यक्ष सदाशिव खाडे, माजी महापौर केशव घोळवे, माजी नगरसेवक राजू दुर्गे, महाराष्ट्र राज्य सांस्कृतिक संचालनालयाच्या पुणे विभागीय अधिक्षक जान्हवी जानकर, पिंपरी चिंचवड सोशल फाउंडेशनचे मुख्य समन्वयक प्रवीण तुपे, अनिल गालिंदे, मलाप्पा कस्तुरे आदी उपस्थित होते.

समारोप समारंभात मुंबई येथील रूद्राक्ष कला विष्कारच्या कलाकारांनी ‘महाराष्ट्र सोहळा संस्कृतीचा’ यामध्ये गण, गवळण, लावणी, वासुदेव, गोंधळ, शेतकरी नृत्य, पोतराज, कोळी नृत्य असे विविध प्रकार सादर करून रसिकांची मने जिंकली. नृत्य दिग्दर्शन उमेश देसाई व राजेश शिर्के आणि सूत्रसंचालन संतोष पेटकर यांनी केले. त्यानंतर ओरिसा येथील कौशल फोक ग्रुप मधील कलाकारांनी थापा नृत्य, दालखाई नृत्य सादर करून उपस्थितांची वाहवा मिळवली. यावेळी उमेश देसाई, नवगंध दास आणि कलाकारांचा आ. उमा खापरे यांच्या हस्ते सत्कार करण्यात आला.
मुख्य समन्वयक प्रवीण तुपे, अनिल गालिंदे यांच्या मार्गदर्शनाखाली गजानन चिंचवडे, सुनील पोटे आदींनी कार्यक्रमाचे संयोजन केले. सूत्रसंचालन अभिजित कोळपकर यांनी केले. आभार अविनाश आवटे यांनी मानले.

पुणे
पटवर्धन बाग येथील डॉ श्यामाप्रसाद मुखर्जी उद्यानाजवळ असलेल्या एरंडवणे ज्येष्ठ नागरिक संघाच्या सभागृहात संपन्न झालेल्या जी पी सहस्रबुद्धे एकेरी कॅरम स्पर्धेचा काल अंतिम सामना झाला.अत्यंत अटीतटीच्या झालेल्या अंतिम सामन्यात क्षणा क्षणाला उत्कंठा वाढवित रंगतदार खेळ करत राजकुमार ठाकूर याने रझाक शेख यांचा २२-७,२२- २० अशा गुणांनी दीड तास सलग सामना खेळून पराभव केला व विजेता ठरले .व जी पी सहस्रबुद्धे चषक एकेरी कॅरम स्पर्धेत अपराजित राहून प्रथम क्रमांकाचे पारितोषिक पटकावले व रोख रुपये तीन हजाराचे बक्षिस ही मिळविले.रझाक शेख यांनी याच बरोबर राजकुमार ठाकूर यांच्या बरोबर चुरशीची लढत देऊन उप विजेते पद मिळवले.रझाक शेख यांनी द्वितीय पारितोषिक रुपये दोन हजार व चषक मिळविले.

स्पर्धा प्रमुख शिरीष जोशी व मुख्य पंच अभय अटकेकर यांनी घोषित केलेले स्पर्धेतील प्रथम आठ विजेते या प्रमाणे
१) राजकुमार ठाकूर – प्रथम पारितोषिक रुपये तीन हजार व चषक.
२) रझाक शेख – द्वितीय पारितोषिक रुपये दोन हजार व चषक
३) रवी श्रीगादी – तृतीय पारितोषिक रुपये एक हजार व चषक.
४) सुनील वाघ – चतुर्थ रुपये एक हजार व चषक.
५) माधव तिळगुळकर – पाचवे रुपये पाचशे व स्मृतिचिन्ह.
६) दत्तात्रय सलागरे – सहावे रुपये पाचशे व स्मृतिचिन्ह
७) श्रीकांत बाबर – सातवे रुपये पाचशे व स्मृतिचिन्ह
८) पंकज कुलकर्णी – आठवे रुपये पाचशे व स्मृतिचिन्ह.

एरंडवणे ज्येष्ठ नागरिक संघाच्या सभागृहात अंतिम सामना बघण्यास खूप मोठी गर्दी झाली होती.या नंतर लगेचच कॅरम स्पर्धेचा बक्षीस समारंभ संपन्न झाला.प्रमुख पाहुण्यांचे स्वागत अध्यक्ष अजित गोखले यांनी केले.स्पर्धा प्रमुख शिरीष जोशी यांनी वीस तारखेपासून चाललेल्या ह्या स्पर्धेविषयीचा अहवाल सादर केला.प्रमुख पाहुणे दीपक पोटे,संदीप खर्डेकर,जयंत भावे यांच्या हस्ते सर्व विजेत्यांना बक्षिसे व स्मृतिचिन्ह प्रदान करेण्यात आली.
कार्यक्रमास कॅरम प्रेमी, शहरातील ज्येष्ठ नागरिक मोठ्या संख्येने उपस्थित होते.
स्पर्धा यशस्वी करण्यासाठी संस्थेचे अध्यक्ष अजित गोखले,सचिव उर्मिला शेजवलकर,कार्याध्यक्ष प्राजक्ता मोघे,पंच अभय अटकेकर,सतीश सहस्रबुद्धे,पंकज कुलकर्णी,माधव तिळगुळकर, विनय फाटक,जयंत मुळ्ये यांनी परिश्रम घेतले.

पुणे-शिवपुत्र श्री राजाराम छत्रपती महाराजांच्या ३२५ व्या पुण्यतिथी निमित्त आज सिंहगड येथे महाराजांच्या समाधीस युवराज संभाजीराजे छत्रपती यांनी अभिवादन केले.आणि त्यांनी यावेळी छत्रपती राजाराम महाराज सृष्टी प्रकल्पाचे भूमिपूजनही केले. आमदार भीमराव तापकीर, वारकरी मंडळी, राज्य पुरातत्व विभाग, वन विभाग आदी प्रशासकीय अधिकारी व शिवभक्त मोठ्या संख्येने उपस्थित होते.

युवराज संभाजीराजे छत्रपती यांनी असे म्हटले कि,’ श्री राजाराम छत्रपती महाराजांनी १६८९ ते १७०० या अकरा वर्षांत अत्यंत निकराने औरंगजेबापासून स्वराज्याचे रक्षण केले. तामिळनाडू येथील जिंजी किल्ल्यावर आठ वर्षे राजधानी हलवून स्वराज्याचे अस्तित्व जिवंत ठेवले व आपल्या राजनीती कौशल्याने मुघल सेनेला दुर्बल बनविले. आपल्या हयातीत दिल्ली जिंकून श्री शिवछत्रपती महाराजांचे स्वप्न पूर्ण करण्याचे ध्येय श्री राजाराम महाराजांनी बाळगले होते, मात्र १७०० साली वयाच्या केवळ तिसाव्या वर्षी महाराजांचे सिंहगड मुक्कामी अकाली निधन झाले. याचठिकाणी महाराजांची समाधी आहे.

गडावरील या समाधीस्थळी छत्रपती राजाराम महाराज पुण्यतिथी सोहळा समिती, सिंहगड यांच्या वतीने आयोजित अभिवादन कार्यक्रमात सहभागी झालो. भारतीय सैन्य दलाची महार रेजिमेंट पाईप बँड पथक व पुणे ग्रामीण पोलीस बँड पथक यांच्या वतीने श्री राजाराम छत्रपती महाराजांस मानवंदना देण्यात आली. तसेच पुणे पोलिसांच्या वतीने बंदुकांच्या तीन फैरी झाडून महाराजांस मानवंदना देण्यात आली. वारकरी मंडळींनी टाळ मृदंगाच्या गजरात महाराजांस अभिवादन केले.

पुणे- :- शिवनेरी, लेण्याद्रीसह शिरूर लोकसभा मतदारसंघातील ४ रोपवे प्रकल्पांना जागा उपलब्धता, आर्थिक सहभाग यासाठी राज्य मंत्रिमंडळाने मान्यता दिली असून गेल्या अनेक वर्षांपासून मागणी होत असलेल्या या रोपवे प्रकल्पांना चालना मिळणार आहे.
शिरूर लोकसभा मतदारसंघातील पर्यटनाला चालना मिळावी यासाठी शिवनेरी, लेण्याद्री, भीमाशंकर आदी ठिकाणी उभारण्याची मागणी रोपवे खासदार डॉ. अमोल कोल्हे यांनी केंद्रीय मंत्री नितीन गडकरी यांच्याकडे केली होती. त्यावेळी केंद्रीय मंत्री गडकरी यांनी राज्य शासनाकडून प्रस्ताव आल्यास ‘पर्वतमाला योजनेंतर्गत” रोपवे बांधण्यासाठी निधी मंजूर करण्याचे मान्य केले होते.
त्यानंतर खासदार डॉ. अमोल कोल्हे यांनी शिरूर लोकसभा मतदारसंघातील शिवनेरीसह विविध रोपवेचे प्रस्ताव केंद्रीय रस्ते परिवहन व महामार्ग मंत्रालयाकडे पाठवण्याबाबत राज्य शासनाकडे सातत्याने पाठपुरावा केला होता. त्यानुसार राज्य शासनाने परिशिष्ट-अ नुसार पुणे जिल्ह्यातील श्री निमगाव खंडोबा, सिंहगड व जेजुरीसह एकूण १६ आणि परिशिष्ट-ब नुसार शिवनेरी किल्ला, अष्टविनायक लेण्याद्री, भीमाशंकर ज्योतिर्लिंग व दाऱ्याघाट यासह एकूण २९ ठिकाणी रोपवे बांधण्याचा प्रस्ताव केंद्रीय रस्ते परिवहन व महामार्ग मंत्रालयाकडे पाठविला होता.
राज्यातील विविध ठिकाणी रोपवे बांधण्यासाठी केंद्र सरकारच्या राष्ट्रीय राजमार्ग लॉजिस्टिक व्यवस्थापन लि. आणि राज्य सरकार यांच्यात ३ फेब्रुवारी २०२४ रोजी सामंजस्य करार करण्यात आला होता. या करारानुसार राज्य पर्यटनस्थळांचा विकास झाल्यास अर्थकारणाला गती मिळेल, असेही कोल्हे म्हणाले .
सरकारने रोपवे बांधण्यासाठी जागा उपलब्धता, आर्थिक सहभाग देणे आवश्यक होते. त्याअनुषंगाने राज्य मंत्रिमंडळाने पर्वतमाला योजनेंतर्गत शिवनेरी, लेण्याद्रीसह शिरूर लोकसभा मतदारसंघातील ४ रोपवे प्रकल्पांना जागा उपलब्धता, आर्थिक सहभागासाठी मान्यता दिली आहे. त्यामुळे शिवनेरी, लेण्याद्रीसह राज्यातील सर्वच रोपवे बांधण्यासाठीचा मार्ग मोकळा झाला आहे.
रोपवे प्रकल्पांबरोबरच राज्य शासनाने शिवनेरी, अष्टविनायक गणपती देवस्थान, वढु-तुळापूरचे छत्रपती संभाजी महाराजांचे स्मारक यांना जोडणारा ‘शिव-शंभू कॉरिडॉर’ रस्ते प्रकल्पही हाती घ्यावा यासाठी माझा पाठपुरावा सुरू आहे. राज्य सरकारने रोपवे प्रकल्पाला गती देतानाच ‘शिव-शंभू कॉरिडॉर’लाही मंजुरी द्यावी.
– डॉ. अमोल कोल्हे, खासदार

पुणे-: शासनाच्या शंभर दिवसाच्या कृती आराखड्याच्या अनुषंगाने पुणे महानगर प्रदेश विकास प्राधिकरणातर्फे ग.दि. मांडगूळकर सभागृहात आर्किटेक, इंजिनियर, बांधकाम संघटनांच्या पदाधिकारी आण‍ि सदस्यासाठी चर्चासत्र घेण्यात आले. यात महानगर आयुक्त डॉ. योगेश म्हसे यांनी नागरिकांचे जीवनमान सुकर होण्यासाठी पीएमआरडीएच्या अधिकाधिक सेवा या ऑनलाइन करण्यावर भर देण्यात येत आहे. यावेळी उपस्थ‍ित मान्यवरांचे पीएमआरडीएची रचना, कार्यप्रणालीचा समावेश असलेली उपयुक्त दिनदर्शिका देत स्वागत करण्यात आले.

प्रशासकीय स्तरावर राबविण्यात येत असलेल्या विविध योजना, प्रकल्प आणि सेवाबाबत अध‍िकाध‍िक पारदर्शकता आणण्यासाठी शासनाकडून शंभर दिवसाच्या कृती आराखड्याची अंमलबजावणी करण्यात येत आहे. त्या अनुषंगानेपीएमआरडीएतर्फे ग.दि. मांडगूळकर सभागृहात इज ऑफ लिविंगच्या अनुषंगाने आर्किटेक, इंजिनियर्स आणि बांधकाम व्यवसायिक संघटनेचे पदाधिकारी आणि सदस्यांसाठी चर्चासत्र घेण्यात आले. पीएमआरडीएच्या अधिकाधिक सेवा ऑनलाईन देण्याच्या दृष्टीने झालेल्या या चर्चासत्रात संबंधितांकडून सूचना घेत घेत त्याची आवश्यकतेनुसार अंमलबजावणी करण्यात येणार आहे.

पीएमआरडीएचा कारभार अधिकाधिक पारदर्शक होण्यासाठी बीपीएमएस प्रणालीचा अवलंब करण्यात आला आहे. यासंबंधी येणाऱ्या अडचणी जाणून घेण्यासाठी या चर्चासत्रात आर्किटेक, इंजिनियर्स आण‍ि बांधकाम व्यवसाय‍िकांना बोलावण्यात आले होते. त्यांच्या अडचणींच्या अनुषंगाने बीपीएमएस प्रणालीबाबत सचिन देवरे यांनी संबंध‍ितांच्या शंकांचे निरसन केले. यावेळी अतिरिक्त महानगर आयुक्त दीपक सिंगला, विकास परवानगी विभागाचे संचालक सुनील मरळे, मुख्य अभियंता र‍िनाज पठाण, प्रशासन विभागाच्या सह आयुक्त पूनम मेहता, अग्निशमन विभागाचे देवेंद्र पोटफोडे यांच्यासह क्रेडाईचे रणजीत नाईकनवरे, मराठी बांधकाम व्यावसाय‍िक संघटनेचे अंकुश असबे, नॅशनल रियल इस्टेट डेव्हलपर्स कौन्सिलचे भरत अग्रवाल, भारतीय वास्तुव‍िशारद संस्थेचे व‍िकास अचलकर, ऐसाचे म‍िलींद पांचाळ, मिडीचे मिलिंद पाटील यांच्यासह आदी उपस्थित होते.