पुणे ;‘पुनीत बालन ग्रुप’चा खेळाडू असलेल्या’महाराष्ट्र केसरी’ सिकंदर शेखने पंजाबमध्ये झालेल्या स्पर्धेत बाजी मारत रुस्तुम-ए-हिंद हा मानाचा किताब जिंकला आहे. हा किताब जिंकणारा शेख हा महाराष्ट्रातील चौथा पैलवान ठरला असून त्याच्या या विजयाबद्दल ‘पुनीत बालन ग्रुप’कडून अभिनंदन करण्यात आले आहे.

गतवर्षी म्हणजे २०२३ ला सिकंदर शेख याने ‘महाराष्ट्र केसरी’ कुस्ती जिंकून ६६ वा महाराष्ट्र केसरी होण्याचा बहुमान मिळविला होता. त्याच्या कुस्तीमधील पुढील करिअरसाठी पुण्यातील ‘पुनीत बालन ग्रुप’ने सर्वतोपरी मदत करण्याचा निर्णय घेतला होता. त्यानुसार ‘पुनीत बालन ग्रुप’ आणि सिकंदर शेख यांच्यात सामंजस्य करार झाला आहे. या मदतीच्या आधारे शेख याची विविध कुस्ती स्पर्धांत भाग घेण्याची आणि त्यात विजय मिळविण्याची घौडदौड जोमाने सुरू असून त्यात आणखी एका मोलाच्या विजयाची भर पडली आहे.पंजाब मधील जांडला जि. जालंधर येथे 2024 च्या रुस्तुम-ए-हिंद स्पर्धेचे आयोजन करण्यात आले होते. त्यात देशातील अनेक नामवंत पैलवानांनी सहभाग घेतला होता. मात्र, त्यांना धुळ चारत सिकंदर शेख याने रुस्तुम-ए-हिंद हा किताब पटकविला. या रुस्तुम-ए-हिंद या किताबावर नेहमीच उत्तर भारतीय मल्लांचे वर्चस्व पाहायला मिळाले आहे. त्यात केवळ पै. हरीशचंद्र बिराजदार, अमोल बुचडे आणि असाब अहमद यांनीच हा किताब जिंकल्याचे सांगितले जाते. त्यांच्यानंतर आता सिकंदर शेख हा किताब जिंकणारा महाराष्ट्रातील चौथा मल्ल ठरला आहे. या स्पर्धेत सिकंदर च्या रोशन किरलगड आणि बग्गा कोहली यांच्यासोबत झालेल्या कुस्त्या रोमहर्षक आणि पाहण्यासारख्या होत्या. अंतिम स्पर्धेत सिकंदर विरूध्द बग्गा कोहली यांच्यात कुस्ती झाली यात सिकंदर विजयी झाला. त्याला बक्षीस म्हणून मानाची गदा, ट्रॅक्टर या बक्षिसाबरोबरच आर्थिक स्वरूपातही बक्षिस मिळाले आहे.

“सिंकंदर शेख हा एक गुणवान खेळाडू आहे. त्याने रुस्तम-ए-हिंद किताब जिंकून आपल्या महाराष्ट्राचं नाव देशपातळीवर गाजवलं. भविष्यात शेख कुस्तीच्या माध्यमातून जगभरात महाराष्ट्राचं आणि देशाचं नाव तो उंचावेल अशी खात्री आहे. ‘पुनीत बालन ग्रुप’कडे असे गुणवंत खेळाडू आहेत, ही आमच्यासाठी आणखी आंनदाची आणि अभिमानाची बाब आहे. शेख याने मिळविलेल्या यशामुळे आणखी प्रतिभावान खेळाडूंच्या मागे उभं राहण्याची प्रेरणा आम्हाला मिळाली.”

• पुनीत बालन
  अध्यक्ष, पुनीत बालन ग्रुप

पुणे:खडकवासला विधानसभा मतदारसंघातील निवडणूक प्रक्रिया निर्भय व शांततापूर्ण वातावरणात पार पाडण्यासाठी सर्व राजकीय पक्ष, उमेदवार आणि त्यांचे कार्यकर्ते यांनी आदर्श आचारसंहितेचे काटेकोर पालन करावे, असे निर्देश निवडणूक निर्णय अधिकारी डॉ. यशवंत माने यांनी दिले आहेत. निवडणूक प्रक्रिया सुरक्षित व पारदर्शकपणे पार पडावी यासाठी प्रशासनास सहकार्य करणे सर्व पक्षांची जबाबदारी असल्याचे त्यांनी आवर्जून सांगितले.
प्रचार मोहिमेत कोणतेही नियमभंग होऊ नये म्हणून उमेदवारांनी भारत निवडणूक आयोगाने घालून दिलेल्या सर्व मार्गदर्शक तत्त्वांचे पालन करणे आवश्यक आहे. सार्वजनिक सभा, रॅली, पोस्टर-बॅनर लावणे यासारख्या सर्व कार्यक्रमांसाठी प्रशासनाची अधिकृत परवानगी घेणे अनिवार्य असून, नियमांचे उल्लंघन झाल्यास कठोर कारवाई केली जाईल, असा इशाराही त्यांनी दिला.निवडणूक प्रक्रिया शांततेत पार पडावी आणि मतदारांमध्ये सुरक्षितता व विश्वास निर्माण व्हावा, यासाठी पोलिस प्रशासन देखील सतर्क आहे. कायदा आणि सुव्यवस्था राखण्यासाठी विशेष सुरक्षा पथकांची नेमणूक करण्यात आली आहे. मतदारसंघातील सर्व मतदान केंद्रांवर सीसीटीव्ही आणि इतर तांत्रिक सुविधांचा वापर करण्यात येणार आहे.
शासनाच्या निर्देशांनुसार कोणत्याही प्रकारची अनुचित घटना किंवा आचारसंहितेचे उल्लंघन झाल्यास त्याची तत्काळ नोंद घेण्यात येईल. उमेदवारांनी व त्यांच्या समर्थकांनी कोणत्याही प्रकारचे दडपशाहीचे किंवा अनुचित दबावाचे प्रकार न करता, कायद्याचे पालन करावे व निवडणूक निर्भयपणे पार पाडावी, असे डॉ. माने यांनी सूचित केले.
खडकवासला मतदारसंघातील प्रत्येक उमेदवार आणि मतदारांनी या निर्देशांचे पालन करून शांतता, कायदा आणि सुव्यवस्था राखावी, यासाठी निवडणूक कार्यालय आणि प्रशासनाला सहकार्य करणे अत्यावश्यक आहे.

पुणे : खडकवासला विधानसभा मतदारसंघातील निवडणूक लढविणाऱ्या उमेदवारांच्या दैनंदिन खर्च तपासणीचे वेळापत्रक जाहीर करण्यात आले असून, ही तपासणी निवडणूक खर्च निरीक्षक अमित कुमार यांच्या समक्ष केली जाणार आहे. उमेदवारांच्या दैनंदिन खर्च तपासणी तीन टप्प्यांत केली जाणार असून, पहिली तपासणी ८ नोव्हेंबर २०२४ रोजी, दुसरी तपासणी १४ नोव्हेंबर रोजी व तिसरी तपासणी १९ नोव्हेंबर २०२४ रोजी सकाळी १० ते सायं ६ पर्यंतवाजेपर्यंत असेल , खडकवासला विधानसभा मतदारसंघाचे कार्यालय, निवडणूक खर्च व सनियंत्रण कक्ष पहिला मजला, सिंहगड टेक्निकल कॉलेज, सेंट्रल लायब्ररी जवळ, आंबेगाव बु. पुणे.
सदर खर्च तपासणीस सर्व उमेदवार / खर्च प्रतिनिधी यांनी सर्व माहितीसह उपस्थित राहणे बंधनकारक असल्याची माहिती निवडणूक निर्णय अधिकारी डॉ. यशवंत माने यांनी दिली.

पुणे – वडगावशेरी विधानसभा मतदार संघातील एकुण मतदारांच्या संख्येत वाढ झाली असून एकुण मतदार ५ लाख ३ हजार ५३९ झाले आहेत. तसेच, एकुण ४४३ मतदार केंद्रावर वेब कास्टींगची सुविधा उपलब्ध करून देण्यात येणार आहे.मतदान केंद्रावर सीसीटीव्हीचा वॉच राहणार असून व्हिडीओ चित्रीकरणही करण्यात येणार आहे.

वडगाव शेरी विधानसभा मतदार निवडणूक निर्णय अधिकारी सचिन बारवकर व सहायक निवडणूक निर्णय अधिकारी तृप्ती कोलते-पाटील यांनी पत्रकार परिषद घेतली. मतदार संघात पुरुष मतदार २ लाख ५९ हजार ४५३ तर महिला मतदार २ लाख ४३ हजार ९८४, ट्रान्सजेंडर मतदार १०२ आहेत. या मतदार संघातील शहरी भागीतील ४३७ तर ग्रामीण भागातील निरगुडी -१, वडगावशिंदे – २, मांजरी – ३ या ६ मतदान केद्रांवर वेब कास्टींगच्या सुविधा पुरविण्यात येणार आहे.

निवडणुकीच्या कामकाजासाठी २ हजार ४५० अधिकारी, कर्मचारी एवढे मनुष्यबळ वापरण्यात येणार आहे. मतदार संघात या निवडणुकीसाठी एकही संवेदनशील मतदान केंद्राचा समावेश नाही. उपलब्ध मतदान केंद्रात वीज, पाणी, स्वच्छता आदीसह अन्य आवश्यक त्या सर्व सुविधा उपलब्ध करून देण्यात येणार आहेत. त्यादृष्टीने मतदान केंद्राची पाहणी करण्यात आलेली आहे.

असे आहेत मतदान केंद्र…
शहरी भागातील ११ पत्राशेड व ५३ इमारतींच्या पार्किंगमध्ये मतदान केंद्र असणार आहेत. याबरोबरच विश्रांतवाडीतील कस्तुरबा हौसिंग सोसायटीत चार तर मुंढवा रस्त्यावरील सेंट क्रिसेंट या सोसायटीत दोन मतदान केंद्र असणार आहे. १४ केंद्र बदलण्यात आली आहेत. ३१ मतदारांसाठी १४ व १५ नोव्हेंबरला होम वोटींग घेण्यात येणार आहेत. यात प्रामुख्याने वय वर्ष ८५ च्या पुढील मतदारांचा समावेश आहे.

पुणे, दि. ५: विधानसभा निवडणूक निर्भयपणे व शांततापूर्ण वातावरणात पार पाडण्यासाठी सर्व राजकीय पक्षांनी, उमेदवारांनी आदर्श आचारसंहितेचे पालन करून प्रशासनास सहकार्य करावे. तसेच कायदा, सुव्यवस्था राखण्यासाठी उमेदवारांनी प्रचार करताना भारत निवडणूक आयोगाच्या निर्देशानुसार प्रत्येक गोष्टीची रिसतर परवानगी घ्यावी, असे निर्देश चिंचवड विधानसभा मतदारसंघाचे निवडणूक निरीक्षक मनवेश सिंग सिद्धू यांनी दिले.

पिंपरी चिंचवड महानगरपालिका, ग क्षेत्रीय कार्यालय, थेरगाव येथे निवडणूक निर्णय अधिकारी कार्यालयात आयोजित बैठकीत श्री. सिद्धू बोलत होते. यावेळी निवडणूक निर्णय अधिकारी अनिल पवार,सहाय्यक निवडणूक निर्णय अधिकारी अमोल कदम, आशा होळकर, किशोर ननवरे तसेच संबंधित अधिकारी, कर्मचारी आणि उमेदवार व त्यांचे प्रतिनिधी उपस्थित होते.

निवडणूक निरीक्षक श्री. सिद्धू म्हणाले, उमेदवारांच्या प्रचारासाठी काढण्यात आलेल्या रॅली, रोड-शो, प्रचार सभा इत्यादी बाबत एक खिडक कक्ष योजनेअंतर्गत भारत निवडणूक आयोगाच्या निर्देशानुसार ४८ तास अगोदर परवानगी घेणे बंधनकारक आहे. ही परवानगी २४ तासांच्या आत देण्यात येईल. तसेच उमेदवारांकडून प्रचारासाठी वापरण्यात येणारे स्पिकर आणि वाहने याबाबतही परवानगी घेणे बंधनकारक आहे. याव्यतिरिक्त प्रचार प्रसारासाठी जे पोस्टर्स छपाई करून घेतले जातात त्यावर संबंधित मुद्रणालयाचे नाव, संपर्क क्रमांक छापणे, एकूण छपाई केलेल्या पोस्टर्सचा तपशील निवडणूक निर्णय अधिकारी कार्यालयास कळविणे आवश्यक आहे.

सोशल मिडीयाचा वापर प्रसिद्धीसाठी करताना प्रसिद्धीस दिलेला मजकुर प्रक्षोभक आढळल्यास उमेदवाराविरोधात भारत निवडणूक आयोगाच्या निर्देशानुसार आचारसंहितेचा भंग केल्याप्रकरणी कारवाई केली जाईल. वर्तमानपत्र व टीव्ही चॅनल्सवर दिलेल्या जाहिरातीबाबतचा तपशील विभागीय आयुक्त कार्यालय, जिल्हाधिकारी कार्यालय आणि निवडणूक निर्णय अधिकारी कार्यालयास कळविणे आवश्यक आहे, असेही त्यांनी सांगितले.

0000

२६ व्या स्वर सागर सांस्कृतिक महोत्सवानिमित्त परिसंवादाचे आयोजन

पिंपरी, पुणे (दि. ०५ ऑक्टोबर २०२४) मराठीला अभिजात भाषेचा दर्जा नुकताच मिळाला आहे. यानंतर “पुढे काय?” याचा विचार करताना मराठी माणसाचे कर्तुत्व वाढले पाहिजे; तरच भाषा मोठी होईल. मराठी भाषा ज्ञान भाषा होण्यासाठी आपण काय करणार आहोत, हे महत्त्वाचे आहे. प्रत्येक प्रश्नावर सरकारला जबाबदार धरणे चूक आहे. त्यासाठी आपण काय करणार आहोत याचा विचार सर्वांनी केला पाहिजे. त्यासाठी आत्मपरीक्षण करण्याची गरज आहे. लोक कर्तुत्ववान असतील तरच भाषा मोठी होते. जोपर्यंत मराठी भाषिक हा वैज्ञानिक होत नाही; तोपर्यंत मराठी भाषा ज्ञान भाषा होऊ शकत नाही, असे परखड मत महाराष्ट्र राज्य साहित्य व संस्कृती मंडळाचे अध्यक्ष डॉ. सदानंद मोरे यांनी व्यक्त केले.
पिंपरी चिंचवड सोशल फाउंडेशन आयोजित २६ व्या स्वर सागर सांस्कृतिक महोत्सवानिमित्त सोमवारी (४ ऑक्टोबर) सायन्स पार्क येथे “मराठीला अभिजात भाषेचा दर्जा मिळाला, पुढे काय?” या विषयावर परिसंवादाचे आयोजन केले होते. यावेळी ९१ व्या अखिल भारतीय मराठी साहित्य संमेलनाचे माजी अध्यक्ष लक्ष्मीकांत देशमुख, ज्येष्ठ साहित्यिक रामदास फुटाणे, भाषा तज्ज्ञ व इतिहास संशोधक संजय सोनवणी, स्वर सागर सांस्कृतिक महोत्सवाचे मुख्य संयोजक प्रवीण तुपे आदी उपस्थित होते.
मराठी भाषेचे आपणच मारेकरी आहोत. मराठी शाळा बंद पाडण्यामध्ये साहित्यिकांचा मोठा वाटा आहे. कारण आपणच आपली मुले मराठी शाळांमधून शिकवली नाहीत तर समाजापुढे काय आदर्श ठेवणार. कला, साहित्य, संगीत, चित्रपट या माध्यमांमध्ये भाषा टिकवण्याची मोठी शक्ती आहे. कवी गझलकार सुरेश भट, संगीतकार गायक सुधीर फडके, मंगेशकर कुटुंबीय यांचा मराठी भाषा टिकवून ठेवण्यात मोलाचा वाटा आहे. वारकरी संप्रदाय आणि ग्रामीण भाग येथे मराठी टिकून आहे. मराठी टिकून ठेवण्यासाठी आणि ज्ञानभाषा होण्यासाठी यापुढील काळात ‘मराठी पास नसेल, तिथे त्या व्यक्तीला राज्यात कोठेही नोकरी मिळणार नाही’, असा कायदा करण्याची वेळ आली आहे. आजच्या परिस्थितीचा विचार केला तर मराठीचे मारेकरी मंत्री आहेत. दिल्लीला खुश करण्यासाठी ते मातृभाषेतून बोलतानाच हिंदी आणि इंग्रजी मध्ये माध्यमांशी संवाद साधतात. दिल्लीश्वरांची कृपा करण्यासाठी हे लांगुलचालन केले जात आहे. भाषा जाती जातींमध्ये वाटली जाणार आहे का? असा मला प्रश्न पडतो. मातृभाषा जगण्याचे बळ देते. साहित्य, चित्रपट, माध्यम, संगीत उपासक यांच्यावर भाषा टिकविण्याची जबाबदारी आहे, असे रामदास फुटाणे यांनी सांगितले.
मराठी भाषेला अभिजात मराठी भाषेचा दर्जा मिळाला आहे. आपण यासाठी उत्सव साजरा केला. मराठी राजभाषा म्हणून एक दिवसाचा कार्यक्रम करणार आणि उर्वरित ३६४ दिवस आपण काय करणार आहोत, याचा विचार केला पाहिजे. श्रीमंत इंग्रजी विरुद्ध गरीब मराठी असा लढा सध्या चालू आहे. मराठी ज्ञानभाषा खरोखरच आहे का, मराठी शिकून रोजगार मिळणार आहेत का, याचा सर्वांनीच विचार केला पाहिजे. राज्यांनी इंग्रजीची कास धरली आहे. न्याय व्यवस्था, प्रशासनामध्ये इंग्रजीचा वापर केला जातो; ही खंत आहे. जोपर्यंत आपण मराठीतून संवाद साधण्यावर भर देत नाही; तोपर्यंत परिस्थिती बदलणार नाही. मराठीला अभिजात भाषेचा दर्जा मिळाला यातून पुढे मराठीसाठी संशोधन आणि विकास यावर भर दिला पाहिजे. भारतातील अन्य राज्यांमध्ये जेथे मराठी शाळा महाविद्यालय सुरू होती, ती तशीच चालू राहिली पाहिजे. अन्य राज्यांतील विद्यापीठांमध्ये मराठी अध्ययन केंद्र सुरू झाले पाहिजे. अन्य भाषेतील चांगले साहित्य आणि मराठी भाषेतील चांगल्या साहित्याचा अन्य भाषांमध्ये अनुवाद झाला पाहिजे. यासाठी एखादी अनुवाद अकादमी उभारली पाहिजे, असे मत लक्ष्मीकांत देशमुख यांनी मांडले.
मराठी भाषकांनीच मराठीला अभिजात भाषेचा दर्जा मिळण्यासाठी विरोध केला, ही वस्तुस्थिती आहे. महाराष्ट्रात अठरा हजार मराठी माध्यमाच्या शाळा बंद झाले आहेत. आपल्याला आपल्या भाषेविषयी आस्था नाही. मातृभाषेतून शिक्षण घेतले तर प्रगती होते हे सिद्ध झाले आहे. परंतु याबाबत पालकांना आत्मविश्वास नाही. केवळ सरकारकडे बोट दाखवून चालणार नाही. पालक आपल्या मुलांना इंग्रजी माध्यमाच्या शाळेत प्रवेश घेण्यासाठी धडपडत असतात. मातृभाषा मराठी आणि शिक्षण इंग्रजी भाषेत यामुळे मुलांचा गोंधळ उडतो. मुलांची जिज्ञासा वृत्ती रोखली जाते. अनेक ठिकाणी वाचनालय बंद झाली आहे. जेथे अर्थोद्योग मोठा ती भाषा मोठी होते; हे सप्रमाण सांगता येते. अमेरिकेत गुजराती भाषिकांची संख्या अधिक आहे. तेथे उद्योग व्यवसाय उभारण्यात गुजराती लोकांचा मोठा वाटा आहे. तेथे इंग्रजी बरोबरच गुजराती भाषा वापरली जाते. ‘पटेल्स मोटेल्स’ असे ही म्हटले जाते. तो विचार करता उद्योगांमध्ये मराठी माणूस मागे आहे. भाषिक वैभव मुलांपुढे ठेवण्यासाठी मराठी भाषेत संवाद, वाचन त्याचे महत्त्व समजून सांगणे यावर भर दिला पाहिजे. भाषेच्या कल्याणासाठी आपण सर्वांनी कंबर कसली पाहिजे असे, संजय सोनवणी यांनी सांगितले.
प्रारंभी प्रवीण तुपे यांनी स्वर सागर सांस्कृतिक महोत्सवाच्या २६ वर्षांचा आढावा घेतला. पिंपरी चिंचवड शहरात सांस्कृतिक चळवळ उभी रहावी, स्थानिक कलाकार, साहित्यिकांना व्यासपीठ उपलब्ध झाले पाहिजे या उद्देशाने स्वर सागर कार्य करत आहे, असे तुपे यांनी सांगितले.स्वागत बाबासाहेब काळे यांनी केले. सुत्रसंचलन सीमा गांधी यांनी तर परिसंवादाचे समन्वयन आणि आभार राजन लाखे यांनी मानले.

लोकसभेला दणका दिला म्हणून मराठीला अभिजात दर्जा – रामदास फुटाणे

लोकसभेच्या निवडणुकीत भारतीय जनता पक्षाला महाराष्ट्रातून दणका मिळाला म्हणूनच मराठी भाषेला अभिजात भाषेचा दर्जा मिळाला अन्यथा आणखीन प्रतीक्षा करावी लागली असती. देहू – आळंदी ही मराठीची दोन विद्यापीठे आहेत. तर ज्ञानोबा माऊलींनी लिहिलेले ‘पसायदान’ वाचले की मराठी भाषा अभिजात आहे हे स्पष्ट होते. अन्य कोणत्याही प्रमाणपत्राची आवश्यकता नाही, असे रामदास फुटाणे म्हणाले. यावेळी त्यांनी खुमासदार शैलीत वात्रटिका सादर केली.
आजोबा नाचू लागले, आजी नाचू लागली ।
शेंबडी नातवंडे इंग्रजी बोलू लागली ।।
नातू नाचू लागला, नात नाचू लागली ।
अन रद्दी इंग्रजीची घरी साचू लागली ।।
परिणाम असा झाला अजान मुळाखाली माती खचू लागली ।

आणि इंद्रायणीच्या डोहाला पोथी टोचू लागली ।।