पुणे : वसू इव्हेंट आणि हॉस्पिटॅलिटी  व  महाराष्ट्र नर्सरीमेन असोसिएशन यांच्यावतीने भारतातील सर्वात मोठे आंतरराष्ट्रीय फुलोत्पादन बागायती, फ्लोरीकल्चर, आर्बोरीकल्चर, ॲग्रीप्रेन्योरशिप आणि प्रगत प्रक्रिया तंत्रज्ञानवरती आधारित असलेल्या प्रदर्शनाचे उद्घाटन निबे डिफेन्सचे संचालक गणेश निबे यांच्या शुभहस्ते पार पडले. यावेळी  प्रमुख पाहुणे म्हणून पंजाब हॉर्टीप्रोचे उपसंचालक डॉ. हर्षदीप सिंग, पुणे पुलाच्या संस्थापक सोनिया कोंजेटी, वसू इव्हेंट आणि हॉस्पिटॅलिटीचे वसंत रासने, श्रद्धा रासने, विजय रासने तसेच  महाराष्ट्र नर्सरी मेन असोसिएशन अध्यक्ष शशिकांत चौधरी, सेक्रेटरी आनंद कांचन, भाग्यश्री पाटील, यशवंत सहकारी साखर कारखाना थेऊरचे चेअरमन सुभाष चंद्रकांत जगताप, मोरेश्वर काळे, मनोज देवरे, अशोक भुजबळ, राजेंद्र चव्हाण, सुनील चोरगे, महिपाल राणा, महानंद माने आदी मान्यवर उपस्थित होते.

निबे म्हणाले की  शेतीला पूरक असलेला फुलोत्पादन आणि बागायत हा व्यवसाय
शेतकऱ्यांसाठी जोड व्यवसाय म्हणून तो फायद्याचा आहे. शेतकऱ्यांनी आपला पारंपारिक व्यवसाय जपत फलोत्पादन आणि बागायत व्यवसायाला प्राधान्य दिले पाहिजे. भारत हा कृषिप्रधान देश असून ज्या देशात मोठ्या प्रमाणात शेती केली जाते. सध्या शहरांमध्ये देखील हॉर्टीप्रोची संस्कृती रुजत आहे. घरातील गॅलरीमध्ये, अंगणात, परस बागेत विविध वाणाची फळझाडे आणि फुलझाडे मोठ्या प्रमाणात लावली जात आहेत आणि याला मोठी मागणी आहे. म्हणून शेतकऱ्यांनी या व्यवसायाला जोड्या व्यवसाय म्हणून प्राधान्य द्यावे.

सदरील हॉर्टिकल्चर प्रदर्शनामध्ये विविध प्रकारच्या वनस्पती तसेच गार्डनिंग क्षेत्रातल्या अधिक नवनवीन गोष्टी पहाण्यासाठी उपलब्ध आहेत. हॉर्टिकल्चर क्षेत्रातील देशातील आणि परदेशातील शेतकरी, व्यावसायिक प्रदर्शनात सहभागी झाले असून  हॉर्टिकल्चर तज्ञांनी शेतकरी आणि व्यावसायिकांना  हॉर्टिकल्चर क्षेत्रामध्ये रोजगार आणि व्यवसायाच्या संदर्भात मार्गदर्शन करून त्यांच्याशी सविस्तर चर्चा केली.

२२ ते २४ नोव्हेंबर रोजी नवीन कृषी महाविद्यालय मैदान (सिंचगर) येथे  सकाळी १० ते ७ पर्यंत सदरील प्रदर्शन पुणेकरांना पाहता येणार आहे. तरी जास्तीतजास्त पुणेकरांनी या प्रदर्शनाला आवर्जून भेट द्यावी असे आवाहन करण्यात आले आहे. 

धर्मांधता दूर होण्यासाठी संविधान संस्कृतीचा उद्घोष आवश्यक : डॉ. श्रीपाल सबनीस
भारतीय संविधान दिन अमृत महोत्सवी वर्षानिमित्त संविधान रत्न पुरस्काराने डॉ. श्रीपाल सबनीस, ॲड. शैलजा मोळक यांचा गौरव
भारतीय संविधान संवर्धन व संरक्षण समितीचा उपक्रम

पुणे : राजकीय क्षेत्रात लोकशाहीचे दिवाळे काढण्याचा प्रयत्न होत आहे. संविधानाला अपेक्षित भारत घडविणे हे राज्यकर्त्यांचे आणि जनमानसांचे आद्य कर्तव्य आहे. आज समाजात धर्मांधता वाढली आहे. या धर्मांधता, संघर्षापासून दूर राहण्यासाठी संविधान संस्कृतीचा उद्घोष करणे आवश्यक आहे, असे प्रतिपादन ज्येष्ठ विचारवंत, अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांनी केले.

भारतीय संविधान संवर्धन व संरक्षण समितीतर्फे भारतीय संविधान दिन अमृत महोत्सवी वर्षानिमित्त गुरुवारी आयोजित कार्यक्रमात डॉ. श्रीपाल सबनीस आणि शिवस्फूर्ती प्रतिष्ठानच्या अध्यक्षा ॲड. शैलजा मोळक यांना संविधान रत्न पुरस्काराने गौरविण्यात आले. पुरस्कारांचे वितरण ज्येष्ठ पत्रकार मधुकर भावे यांच्या हस्ते झाले. त्यावेळी सत्काराला उत्तर देताना डॉ. सबनीस बोलत होते. महाराष्ट्र साहित्य परिषदेच्या माधवराव पटवर्धन सभागृहात या कार्यक्रमाचे आयोजन करण्यात आले होते. कार्यक्रमाचे स्वागताध्यक्ष रमाई महोत्सवाचे अध्यक्ष ॲड. प्रमोद आडकर होते तर कार्यक्रमाच्या अध्यक्षपदी महाराष्ट्र आर्थिक विकास मंडळाचे उपाध्यक्ष सचिन ईटकर होते. कार्यक्रमाचे मुख्य समन्वयक विठ्ठल गायकवाड, लता राजगुरू, प्रा. रतनलाल सोनग्रा मंचावर होते. शाल, सन्मानचिन्ह, स्मृतिचिन्ह असे पुरस्काराचे स्वरूप होते.
डॉ. सबनीस म्हणाले, भारतीय संविधान म्हणजे सर्व संतांच्या संतत्त्वाची, महापुरुषांच्या चांगुलपणाची, सत्य-शहाणपण-विवेक आणि धर्मनिपरक्षेतेची बेरीज आहे. दु:खमुक्त मानवता हा समाजातील प्रत्येकाचा ध्येयवाद असला पाहिजे. आज विश्वात अशांती, उपासमार, अन्याय, शोषण आहे अशा सामाजिक परिस्थितीत भारतीय संविधानाच्या माध्यमातून देशा-देशाला, माणसा-माणसाला जोडणे हे कार्य निश्चितच घडू शकते. संविधानाच्या संस्कृतीचा अंगिकार केल्यास संपूर्ण विश्वाला कवेत घेता येणे शक्य आहे. विश्वाचे कल्याण ही संविधानाच्या शिकवणुकीची पहिली पायरी आहे.

मधुकर भावे म्हणाले, स्वातंत्र्य, समता आणि बंधुता हा पाया धरून रचलेले संविधान स्वीकारल्याशिवाय देश चालविता येणार नाही. संविधानाच्या माध्यमातून सर्व जाती-धर्मांना समान न्याय मिळू शकतो, परंतु आजच्या सामाजिक परिस्थितीत संविधानाचा अनादर करण्याची मानसिकता वाढू लागली आहे. घटनेवर आधारित राजकारण आज होते आहे का या विषयी राज्यकर्त्यांनी विचार करणे आवश्यक आहे.
ॲड. शैलजा मोळक यांनी पुरस्काराबद्दल आनंद व्यक्त करीत संविधानाविषयी अभ्यास, वाचन तसेच त्यानुसार आचरण व्हावे अशी अपेक्षा व्यक्त केली. संविधानाच्या विचाराचा प्रचार व प्रसार व्हावा, जातपात-धर्मविरहित समाज एकत्र यावा यासाठी आपण अखंडित कार्यरत राहणार आहोत.
अध्यक्षीय मनोगत व्यक्त करताना सचिन ईटकर यांनी संविधानाची उपयुक्तता सांगितली तर स्वागतपर प्रास्ताविकात ॲड. प्रमोद आडकर यांनी कार्यक्रमाच्या आयोजनामागील भूमिका विशद केली.

विश्वशांती केंद्र (आळंदी), माईर्स एमआयटी विश्वशांती विद्यापीठातर्फे आयोजन
(२४ ते ३० नोव्हेंबर पर्यंत विविध क्षेत्रातील वक्त्यांची व्याख्याने)

पुणे, दि.२१ नोव्हेंबर: एमआयटी वर्ल्ड पीस युनिव्हर्सिटी, विश्वशांती केंद्र (आळंदी), माईर्स एमआयटी, पुणे, भारत आणि संत श्री ज्ञानेश्वर-संत श्री तुकाराम महाराज स्मृती व्याख्यानमाला न्यास यांच्या संयुक्त विद्यमाने, युनेस्को अध्यासना अंतर्गत २४ ते ३० नोव्हेंबर या कालावधीत २९वी तत्त्वज्ञ संतश्री ज्ञानेश्वर-तुकाराम स्मृती व्याख्यानमाला आयोजित करण्यात आली आहे. एमआयटी वर्ल्ड पीस युनिव्हर्सिटीच्या संतश्री ज्ञानेश्वर सभागृह, कोथरूड, पुणे येथे संपन्न होईल.
याचे उद्घाटन २४ नोव्हेंबर रोजी दुपारी ४ वा. उज्जैनचे आध्यात्मिक गुरू व लेखक पंडित विजयशंकर मेहता व संत एकनाथ महाराजांचे १४ वे वंशज ह.भ.प.श्री. योगीराज महाराज गोसावी पैठणकर यांच्या प्रमुख उपस्थित संपन्न होणार आहे. जगविख्यात संगणक शास्त्रज्ञ पद्मभूषण डॉ. विजय भटकर हे सन्माननीय पाहुणे असतील. अध्यक्षस्थानी एमआयटी डब्ल्यूपीयूचे संस्थापक अध्यक्ष व युनेस्को अध्यासनाचे प्रमुख प्रा. डॉ. विश्वनाथ दा. कराड असतील. तसेच एमआयटी डब्ल्यूपीयूचे कार्यकारी अध्यक्ष राहुल विश्वनाथ कराड व एमआयटी एडीटीचे कार्याध्यक्ष डॉ. मंगेश तु. कराड उपस्थित राहतील.
व्याख्यानमालेचा समारोप ३० नोव्हेंबर रोजी स. ११ वा.नवी दिल्ली येथील मौलाना आझाद नॅशनल उर्दु विद्यापीठाचे माजी कुलगुरू मा. फिरोज बख्त अहमद यांच्या प्रमुख उपस्थित होईल. यावेळी एअर मार्शल भूषण गोखले, (सेवा निवृत्त) व्हीएसएम, एव्हीएसए, पीव्हीएसएम हे विशेष अतिथि म्हणून उपस्थित राहतील.
२५ ते २९ नोव्हेंबर या कालावधीत दुपारी ४ वा. होणार्‍या व्याख्यानमालेत वैश्विक स्तरावरील बनारस हिंदू विश्वविद्यालयाचे महामहोपाध्याय प्रा. सदाशिव द्विवेदी, (भारतीय ज्ञान परंपरा व विश्वशांती) व आयआयएसईआर चे प्राध्यापक प्रा.डॉ. रामकृष्ण भट (विज्ञान, अध्यात्म आणि धार्मिक ग्रंथांचे संघटन), मुंबई विद्यापीठाचे माजी कुलगुरू डॉ. संजय देशमुख (विज्ञान आणि आध्यात्माचा सुसंवादः जागतिक शांततेसाठी आयकेएस आणि एनईपी २०२० चा मार्ग उजळणे), माजी मुख्य वनसंरक्षक व हभप रंगनाथ नाईकडे, सुप्रसिध्द अभिनेते श्री. सुरेंद्र पाल (द्रोणाचार्य – धर्म, नीती आणि कर्तव्य यांच्यातील संघर्षाचे प्रतिक) आणि यूजीसीचे माजी उप संचालक डॉ.भूषण पटवर्धन (जीनोम ते ओम) अशा मान्यवरांची व्याख्याने होणार आहेत.
या व्याख्यानमालेला जोडूनच रोज स. ८.४५ ते १२.०० पर्यंत कार्यशाळा होईल. यामध्ये प्रसिद्ध गप्पाष्टककार डॉ. संजय उपाध्ये, प्रसिद्ध लेखक डॉ. ज्ञानश्री लेले, रामकृष्ण मिशनचे सचिव स्वामी आर्यानंद,  प्रसिद्ध संशोधक डॉ. निलेश ओक, वरिष्ठ अभियंता विष्णू भिसे,  शिवम फाउंडेशनचे संस्थापक आचार्य श्री शिवम, भारत सरकारच्या संगीत नाट्य अकादमीचे माजी अध्यक्ष पद्मश्री शेखर सेन, प्रा.डॉ. अक्षय मल्होत्रा, डॉ. श्रृती निरगुडकर, डॉ. ज्ञानदेव निलवर्णा, संकल्प संघई, प्रसिद्ध हदय रोग तज्ञ डॉ. जगदीश हिरेमठ, आणि शिव व्याख्याते नितिन बालगुडे इत्यादी विविध विषयांवर व्याख्यानांची विशेष कार्यशाळाही आयोजित केली आहे.
प्रत्येक व्याख्यानानंतर वक्ता व श्रोते यांच्यामधील प्रश्नोत्तरांचा कार्यक्रम या व्याख्यानमालांचे वैशिष्ट्ये आहे. विशेष म्हणजे या मध्ये २५ ते २९ नोव्हेंबर पर्यंत माईर्स एमआयटी विश्वशांती विद्यापीठ संकुलातील शिक्षक-शिक्षकेतर कर्मचार्‍यांसाठी स. ७ ते ८ या वेळात योगासन वर्गाचे आयोजन क्रीडा विभागाचे संचालक प्रा.डॉ. पी. जी. धनवे यांच्या मार्गदर्शनाखाली होईल.
अशी माहिती एमआयटी वर्ल्ड पीस युनिव्हर्सिटीचे सल्लागार डॉ. संजय उपाध्ये, कुलगुरू डॉ. आर.एम.चिटणीस, २९ व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचे समन्वयक व प्र कुलगुरू डॉ. मिलिंद पांडे, प्रा. मिलिंद पात्रे यांनी दिली.
ही व्याख्यानमाला सर्वांसाठी खुली ठेवण्यात आली आहे.

महाराष्ट्रीय कलोपासकतर्फे मंगळवारी शिक्षक प्रतिनिधींसाठी कार्यशाळा
नेपथ्य, प्रकाशयोजनेविषयी प्रदीप वैद्य करणार मार्गदर्शन

पुणे : महाराष्ट्रीय कलोपासक आणि नाट्यसंस्कार कला अकादमी आयोजित भालबा केळकर नाटिका स्पर्धा तर महाराष्ट्रीय कलोपासक आयोजित राजा नातू करंडक आंतरशालेय एकांकिका स्पर्धेत सहभागी होऊ इच्छिणाऱ्या शाळांच्या शिक्षक प्रतिनिधींसाठी नेपथ्य आणि प्रकाशयोजनेविषयी कार्यशाळा आयोजित करण्यात आली आहे.
कार्यशाळा मंगळवार, दि. 26 नोव्हेंबर 2024 रोजी सकाळी 10 वाजता द बॉक्स, पाळंदे कुरिअर समोर, एरंडवणे, कर्वे रोड येथे होणार असून प्रसिद्ध लेखक, दिग्दर्शक, तंत्रज्ञ प्रदीप वैद्य मार्गदर्शन करणार आहेत.
भालबा केळकर नाटिका स्पर्धा दि. 10 ते दि. 12 जानेवारी 2025 तर राजा नातू करंडक आंतरशालेय एकांकिका स्पर्धा दि. 13 ते दि. 21 जानेवारी 2025 या कालावधीत होणार आहे. 5 ते 10 वयोगटातील मुलांसाठी भालबा केळकर नाटिका स्पर्धा तर पाचवी ते दहावी या इयत्तेतील मुलांसाठी राजा नातू करंडक आंतरशालेय एकांकिका स्पर्धा घेण्यात येते. भालबा केळकर नाटिका स्पर्धेचे यंदाचे 32वे तर राजा नातू करंडक एकांकिका स्पर्धेचे यंदाचे तिसरे वर्ष आहे.
मंगळवारी आयोजित करण्यात आलेल्या कार्यशाळेत प्रत्येक शाळेतील दोन शिक्षक प्रतिनिधींना सहभागी होता येणार आहे. स्पर्धेत सहभागी होऊ इच्छिणाऱ्या शाळांचे प्रवेश अर्ज याच दिवशी स्वीकारले जाणार आहेत.

नाट्य परिषदेच्या कोथरूड शाखेतर्फे सोमवारी होणार गौरव

पुणे : अखिल भारतीय मराठी नाट्य परिषदेच्या कोथरूड शाखेतर्फे देण्यात येणाऱ्या यशवंत-वेणू पुरस्काराने प्रसिद्ध अभिनेते संजय मोने आणि प्रसिद्ध अभिनेत्री सुकन्या कुलकर्णी-मोने यांचा सोमवारी गौरव केला जाणार आहे.
स्व. यशवंतराव चव्हाण यांच्या स्मृतिदिन आणि यशवंतराव चव्हाण नाट्यगृहाच्या 24व्या वर्धापन दिनानिमित्त पुरस्कार वितरण सोहळ्याचे आयोजन करण्यात आले आहे. पुरस्काराचे यंदाचे 7वे वर्ष असून पुरस्कार वितरण ज्येष्ठ अभिनेत्री सुहास जोशी यांच्या हस्ते होणार आहे. कार्यक्रम सोमवार, दि. 25 नोव्हेंबर 2024 रोजी सायंकाळी 5 वाजता यशवंतराव चव्हाण नाट्यगृहात होणार आहे, अशी माहिती नाट्य परिषदेच्या कोथरूड शाखेचे अध्यक्ष सुनील महाजन, सत्यजित धांडेकर, समीर हंपी यांनी निवेदनाद्वारे कळविली आहे. सुहास जोशी यांना या प्रसंगी जीवनगौरव पुरस्काराने सन्मानित केले जाणार आहे. शिवसेना नेते पृथ्वीराज सुतार, उद्योजक अमित गोखले यांची प्रमुख उपस्थिती असणार आहे. पुरस्कार वितरण सोहळ्यानंतर ‌‘तो राजहंस एक‌’ हा संगीतकार श्रीनिवास खळे संगीत रजनी कार्यक्रम आयोजित करण्यात आला आहे. मंदार आपटे आणि मनिषा निश्चल गीते सादर करणार आहेत. कार्यक्रमाचे संयोजन दीपक गुप्ते, दीपक पवार, गिरीष गोडबोले करीत असून कार्यक्रम सर्वांसाठी खुला आहे.

• ८५ स्पर्धकांनी घेतला सहभाग

पुणे :
हिंदुस्थानातील पहिला सार्वजनिक गणपती श्रीमंत भाऊसाहेब रंगारी गणपती ट्रस्ट आयोजित राज्यस्तरीय किल्ले बनवा स्पर्धा 2024 चा बक्षिस वितरण रविवारी पार पडला. या स्पर्धेत तब्बल ८५ स्पर्धकांनी सहभाग घेतला. या स्पर्धेत स्वराज्य दौलत दुर्गानाथ प्रतिष्ठान साकारलेल्या पुरंदर घेरा हा देखावा सर्वोत्कृष्ट ठरला.
श्रीमंत भाऊसाहेब रंगारी गणपती ट्रस्टच्यावतीने राज्य स्तरीय ऑनलाईन किल्ले स्पर्धेचे आयोजन करण्यात आले होते. या स्पर्धेचा बक्षिस वितरण समारंभ रविवारी श्रीमंत भाऊसाहेब रंगारी गणपती मंदिरात पार पडला. ज्येष्ठ इतिहास संशोधक व दुर्ग अभ्यासक पांडूरंग बलकवडे आणि एच व्ही देसाई कॉलेजचे विभाग प्रमुख गणेश राऊत हे प्रमुख म्हणून उपस्थित होते.
या स्पर्धेतील विजेत्यांसाठी पहिल्या क्रमांकाला ९ हजार, द्वितीय क्रमांकासाठी ७ हजार आणि तृतीय क्रमांकासाठी ५ हजारांचे बक्षिस ठेवण्यात आले होते. त्यात मुंबई विभागात आयुष पाटील हे प्रथम क्रमांकाचे विजेते ठरले. यांनी त्यांनी सुवर्णदुर्ग साकारला होता. तर द्वितीय क्रमांक ओमकार मित्र मंडळ – सरस भेड दुर्ग देखाव्याला मिळाले. तर तृतीय क्रमांक घरकूल मित्र मंडळ यांनी साकारलेल्या प्रतापगड दुर्गाला मिळाले.
कोकण विभागात आदर्श मित्र मंडळाने साकारलेल्या वेल्बोर – साजरा – भोजर यांना प्रथम क्रमांक, तर द्वितीय क्रमांक किल्ले रायगड साकारलेल्या अष्टप्रधान मंडळाला मिळाले.
पश्चिम महाराष्ट्र विभागातून प्रथम क्रमांक सांगलीच्या स्वराज्य दौलत दुर्गनाथ प्रतिष्ठानने साकारलेल्या पुरंदर वज्रगड पुरंदर घेरा पुरंदरच्या देख्याव्याला तर सिंहगड हलता देखावा करणाऱ्या पुण्याच्या मिरजकर परिवाराला द्वितीय आणि किल्ले अहिवंतगड आणि किल्ले मार्कड्याचा देखावा करणाऱ्या सांगलीच्या विजेता तरुण मंडळाला तृतीय क्रमांक मिळाला.

• पुरंदर घेरा ठरला सर्वोत्कृष्ट किल्ला
  स्वराज्य दौलत दुर्गानाथ प्रतिष्ठान साकारलेल्या पुरंदर घेरा यांनी 11 किल्ले एकत्र एकूण जो देखावा सादर केलेला देखावा सर्वोत्कृष्ट ठरला. त्यास ११ हजार रुपयांचे बक्षीस होते. तर वेद इनामदार या लहान मुलाने साकारलेल्या मल्हारगडला आणि महिलांनी साकारलेल्या स्वयंभू गर्जनाच्या- रायगडच्या देखाव्याला उत्तेजनार्थ बक्षिस देण्यात आले. मानचिन्ह व प्रशस्तीपत्रक असे उत्तेजनार्थ बक्षिसाचे स्वरूप होते.

पुणे- मांजरी परिसरातील एका शाळेत वार्षिक समारंभाचे आयाेजन करण्यात आले हाेते. मात्र, वार्षिक समारंभाच्या वादातून नववीतील विद्यार्थ्याचा वर्गातच काचेच्या तुकड्याने मित्राने गळा चिरल्याची धक्कादायक घटना उघडकीस आली आहे. या घटनेत 15 वर्षीय मुलगा जखमी झाला असून, त्याच्यावर खासगी रुग्णालयात उपचार सुरू आहेत. याप्रकरणी एका 14 वर्षीय दाेषी मुलाविरुद्ध हडपसर पोलिस ठाण्यात खुनाचा प्रयत्न केल्याप्रकरणी हडपसर पोलिस ठाण्यात गुन्हा दाखल करण्यात आला आहे.

याबाबत जखमी मुलाने हडपसर पोलिस ठाण्यात आराेपी मुला विराेधात तक्रार दिली आहे. मांजरीतील खासगी शाळेत नववी तक्रारदार मुलगा शिकण्यास आहे. गुन्हा दाखल करण्यात आलेला मुलगा त्याच्याच वर्गात आहे. शाळेत वार्षिक समारंभाचे आयोजन करण्यात येणार असून वार्षिक समारंभाच्या आयोजनावरुन दोघांमध्ये जाेरदार वाद झाला होता. 19 नोव्हेंबर राेजी दुपारी अडीच वाजण्च्या सुमारास तक्रारदार मुलगा वर्गात बसला होता. त्यावेळी वर्गातील मुलगा त्याच्या पाठीमागून आला आणि त्याने थेट धारदार काचेच्या तुकड्याने त्याच्या गळ्यावर वार केला. या घटनेत तो गंभीर जखमी झाल्याने खळबळ उडाली व मुलांची धावपळ झाली.या घटनेनंतर गु्न्हा दाखल करण्यात आलेल्या मुलाने त्याला धमकावत त्यास जिवे ठार मारण्याची धमकी दिली. जखमी झालेल्या मुलाला शाळेतील शिक्षक आणि कर्मचाऱ्यांनी त्याला तातडीने खासगी रुग्णालयात दाखल करण्यात आले. खुनाचा प्रयत्न केल्याप्रकरणी मुलाला पोलिसांनी चाैकशीसाठी ताब्यात घेतले आहे.हडपसर पोलिस ठाण्याचे वरिष्ठ पोलिस निरीक्षक संतोष पांढरे यांनी घटनास्थळी भेट दिली असून सहायक निरीक्षक दादासाहेब रोकडे पुढील तपास करत आहेत.