पुणे : एमआयटी वर्ल्ड पीस युनिव्हर्सिटीच्या विज्ञान आणि पर्यावरण अभ्यास शाळेतील बायोसायन्सेस आणि तंत्रज्ञान विभागातर्फे ‘शाश्वततेसाठी विज्ञानाचे समन्वय स्वच्छ ऊर्जा, लवचिक शेती आणि वर्तुळाकार अर्थव्यवस्था’ या विषयावर तीन दिवसीय राष्ट्रीय परिसंवादाचे आयोजन करण्यात आले आहे. तीन दिवसीय परिसंवाद २४ ते २६ एप्रिल दरम्यान कोथरूड येथील डब्ल्यूपीयूच्या कॅम्पसमधील चाणक्य बिल्डिंगमधील तोरणा हॉल मध्ये होणार आहे. अशी माहिती एमआयटी डब्ल्यूपीयूचे प्र कुलगुरू डॉ. मिलिंद पांडे यांनी पत्रकार परिषदेते दिली.
या परिसंवादाचे उद्घाटन राष्ट्रीय विज्ञानाचे अध्यक्ष पद्मश्री प्रा.डॉ. गणपती डी.यादव यांच्या हस्ते सकाळी १० वाजता होणार आहे. अध्यक्षस्थानी एमआयटी डब्ल्यूपीयूचे संस्थापक अध्यक्ष डॉ. विश्वनाथ कराड हे असतील. तसेच समारोप २६ एप्रिल रोजी दुपारी ३ वाजता होणार आहे. यावेळी आयसीएआर-डीआयएफआरचे संचालक डॉ.के.व्ही. प्रसाद आणि जेनोव्हा बायोफार्मास्युटिकल्स चे मेजर विशाल कराड उपस्थित राहणार आहेत.
हा कार्यक्रम एमआयटी डब्ल्यूपीयूचे कार्यकारी अध्यक्ष डॉ. राहुल कराड यांच्या मार्गदर्शात संपन्न होत आहेे.
या परिसंवादात परवडणारी आणि स्वच्छ ऊर्जा, हवामान-लवचिक शेती, वर्तुळाकार अर्थव्यवस्था आणि नैसर्गिक संसाधने आणि नैसर्गिक उत्पादने आणि कार्यात्मक अन्न या चार विषयांवर चर्चा होणार आहे. ज्यामध्ये खरगपूर आयआयटीचे डॉ. आदिपुण्य मित्र, एमआयटी डब्ल्यूपीयूचे डॉ. भरत काळे, एसपीपीयूचे डॉ. विठ्ठल बरवकर, आयसीएआर-एनआरसीजीचे डॉ. सुजॉय साहा, माजी वरिष्ठ शास्त्रज्ञ डॉ. मालती वेंकटेशन, आयसीजीईबीचे डॉ. शशी कुमार रोड, बीएआयएफ डेव्हलपमेंट रिसर्च फाउंडेशनचे डॉ. राजश्री जोशी, आयडब्ल्यूएमआयच्या डॉ. मानसी त्रिपाठी, सायरिओचे डॉ. समथा मॅथ्यू, डॉ. आनंद घोसाळकर, आयसीएआर एनआरसीजीचे संचालक डॉ. कौशिक बॅनर्जी, बिट्स पिलानीचे डॉ. उत्पल रॉय, लोयोला कॉलेजच्या डॉ. किरण कुमारी आणि आयसीटीच्या डॉ. रेखा सिंघल हे विचार मांडणार आहेत.
या कार्यक्रमाचा मुख्य उद्देश्य आंतरविद्याशाखीय सहकार्यांना व नाविन्यपूर्ण विचारांना चालना देणे आणि शाश्वत भविष्यासाठी प्रभावी भागीदारी निर्माण करणे हे आहे.
येथे तळागळातील उदयोन्मुख नवोपक्रम आणि संशोधनाला प्रोत्साहन देणारे संशोधन विद्वान आणि तरूण शास्त्रज्ञांचे मौखिक आणि पोस्टर सादरीकरण देखील असेल.
या परिसंवादात शिक्षणतज्ज्ञ, संशोधक, उद्योग तज्ञ आणि तरूण वैज्ञानिक विचारांना आणि काही सर्वात महत्वाच्या शाश्वत आव्हानांना तोंड देण्यासाठी सहकार्य करण्यासाठी आणि विचारांची देवाणघेवाण करण्यासाठी एक संगम म्हणून कार्य करणार आहे.
या कार्यक्रमाला भारत सरकारच्या अनुसंधान राष्ट्रीय संशोधन फाउंडेशनचे पाठबळ आहे. तसेच शाश्वत ग्रामीण विकास, स्वच्छ ऊर्जा आणि वर्तुळाकार जैव अर्थव्यवस्थेला प्रोत्साहन देण्यासाठी अग्रणी असलेल्या बायफ डेव्हलपमेंट रिसर्च फाउंडेशनची भागीदारी आहे. नेक्स्ट जेन सायन्सेस हे उद्योग प्रायोजक आहे.
या पत्रकार परिषदेत डब्ल्यूपीयूच्या स्कूल ऑफ सायन्स अँड एर्न्व्हामेंटल स्टडीजचे डीन इनचार्ज डॉ. अनुप काळे, डॉ. शिल्पा चापडगावकर आणि सहयोगी प्रा. डॉ. मानसी मिश्रा उपस्थित होत्या.

‘लोकपरंपरा पुरस्कार’ शिवाजीराव गोपाळे यांना प्रदान

शनिवार पेठेतील वीर मारुती मंदिर : ‘वीर’ परंपरेच्या जतनासाठी केलेल्या कार्याबद्दल सन्मान

पुणे :  आपण खऱ्या अर्थाने आजही धर्मनिरपेक्ष झालो नाही. शिक्षा आणि पुरस्कार हे धर्म बघूनच दिले जातात. मणिपूर मध्ये हिंसाचार झाला तेव्हा अनेक जण बोलत होते परंतु आज पश्चिम बंगाल मधल्या हिंसाचाराबद्दल ते लोक बोलत नाहीत. मुस्लिम मेले तर संविधान संकटात येते हिंदू मेले तर येत नाही का? , असे मत राष्ट्रीय कीर्तनकार ह.भ.प. चारुदत्त आफळे यांनी व्यक्त केली.

शनिवार पेठेतील वीर मारुती चौक येथे पेशवे काळापासून सुरू असलेली आणि आजही अखंडपणे जपली जाणारी कीर्तन परंपरा यंदाही हनुमान जयंतीपासून अक्षयतृतीया पर्यंत सलग १८ दिवस साजरी होत आहे. महाराष्ट्रातील सलग १८ दिवस कीर्तन उत्सव सुरु असणारे हे बहुधा एकमेव मारुती मंदिर मानले जाते. 

‘शनिवार वीर मारुती उत्सव मंडळा’च्या पुढाकाराने आणि गुरुवर्य श्री श्रीराम धोंडूराम दहाड यांच्या स्मृतिप्रित्यर्थ ‘लोकपरंपरा पुरस्कार’ शिवाजीराव गोपाळे यांना राष्ट्रीय कीर्तनकार चारुदत्त बुवा आफळे यांच्या हस्ते शनिवार पेठेतील वीर मारुती चौक येथे प्रदान करण्यात आला. यावेळी राम दहाड, महेश पानसे, सचिन दाते, मयुरेश जोशी, प्रवीण जोशी व सहकारी मंडळी उपस्थित होते.

ह. भ. प. चारुदत्त बुवा आफळे म्हणाले, पानिपतचे युद्ध मराठ्यांनी जिंकावे यासाठी मारुतीला नवस करण्यात आला. ज्या ज्या वीरांच्या कुटुंबीयांनी नवस केला ते शनिवार पेठेतील मंदिरात आजही येतात. अशा वीरांच्या कुटुंबाचे संकलन शिवाजीराव गोपाळे यांनी केले, त्यांचे काम मोठे आहे. तब्बल २५ वर्षापेक्षा जास्त काळ ते झटले आणि २०० सरदारांची नावे पुढच्या पिढीपर्यंत दिली, अशा तपोवृद्ध माणसाचा सन्मान करायला मिळणे हा आमचा सन्मान आहे, अशी भावना आफळे यांनी व्यक्त केली.

राम दहाड म्हणाले, कीर्तन उत्सवाच्या या पावन परंपरेत चारुदत्त बुवा आफळे, वासुदेव बुवा बुरसे, मकरंद बुवा दीक्षित यांसारख्या नामवंत कीर्तनकारांनी सहभाग घेतला असून, आजही ही परंपरा अखंड सुरू आहे.  हा उत्सव कोणतीही वर्गणी न घेता, लोकवर्गणीतून साजरा केला जातो. महाराष्ट्रातील लोप पावत चाललेल्या परंपरांना जपणे आणि पुढील पिढीपर्यंत पोहोचविण्यासाठी काम करणाऱ्या व्यक्तींना ‘लोकपरंपरा पुरस्कार’ देण्यात येतो.  

ही परंपरा अधिक जिवंत राहावी म्हणून राम दहाड, महेश पानसे, सचिन दाते, मयुरेश जोशी, प्रवीण जोशी व सहकारी मंडळी ही उत्साहाने प्रयत्नशील आहेत.

मुख्य अभियंता श्री. पवार यांच्याहस्ते बक्षिसांचे प्रातिनिधिक वितरण

पुणे, दि. २५ एप्रिल २०२५: सलग तीन किंवा किंवा त्यापेक्षा अधिक महिन्यांपासून वीजबिल ऑनलाइन भरणाऱ्या लघुदाब वीजग्राहकांसाठी महावितरणने जानेवारी ते मे महिन्याच्या कालावधीसाठी ‘लकी डिजिटल ग्राहक योजना’ सुरु केली आहे. यात पहिल्या ड्रॉमध्ये पुणे परिमंडलातील २३० वीजग्राहकांना बक्षिसे जाहीर झाली आहे. गुरुवारी (दि. २५) मुख्य अभियंता श्री. राजेंद्र पवार यांच्याहस्ते प्रातिनिधिक स्वरूपात ५ वीजग्राहकांना स्मार्ट फोन व स्मार्ट वॉच बक्षिसांचे वितरण करण्यात आले.

‘लकी डिजिटल ग्राहक योजने’त प्रत्येक उपविभागस्तरावर ५ बक्षिसे असून एकूण तीन लकी ड्रॉ काढण्यात येणार आहे. प्रत्येक उपविभागासाठी प्रथम – एक स्मार्ट फोन, द्वितीय – दोन स्मार्ट फोन आणि तृतीय बक्षिस म्हणून दोन स्मार्ट घड्याळ असे प्रत्येकी पाच बक्षिसे ठेवण्यात आली आहेत. त्यानुसार पुणे परिमंडलातील ४६ उपविभागांसाठी एकूण २३० बक्षिसांसाठी पहिला लकी ड्रॉ ऑनलाईन पध्दतीने दि. ७ एप्रिलला काढण्यात आला. या योजनेतील प्रातिनिधिक विजेते अनिल माने, मारूती मगर, छगनलाल सोळंकी, विद्या देशपांडे, एनरीच एनर्जी लिमिटेड यांना मुख्य अभियंता श्री. राजेंद्र पवार यांच्याहस्ते स्मार्ट फोन व स्मार्ट वॉच बक्षिसांचे वितरण करण्यात आले. उर्वरित विजेत्यांना विभाग व उपविभागस्तरावर बक्षिस वितरीत करण्यात येत आहे.

ग्राहकांना येत्या दि. १ जानेवारी ते ३१ मे २०२५ पर्यंत सलग तीन किंवा त्यापेक्षा अधिक महिन्यांत नेटबँकिंग, डेबिट कार्ड, क्रेडिट कार्ड, यूपीआय, वॉलेट, कॅश कार्ड, एनएसीएच, क्यूआर कोड, एनईएफटी, आरटीजीएस आदींद्वारे ऑनलाइन वीजबिल भरून योजनेत सहभागी होता येईल. तसेच मागील महिन्याच्या वीजबिलाची १० रुपयांपेक्षा अधिक थकबाकी नसावी. ऑनलाइन व संगणकीय पद्धतीने लकी ड्रॉ काढण्यात येणार असून योजनेच्या कालावधीत ग्राहक/ ग्राहक क्रमांक फक्त एकाच बक्षिसासाठी पात्र राहील.

या योजनेत यापुढे मे आणि जून महिन्यात संगणकीय पद्धतीने लकी ड्रॉ काढण्यात येणार आहे. त्याचा निकाल संबंधित महिन्यांच्या पहिल्या आठवड्यात महावितरणच्या वेबसाईटवर जाहीर होईल. तसेच संबंधित विजेत्या ग्राहकांच्या नोंदणीकृत मोबाईल क्रमांकावर बक्षिस जिंकल्याची माहिती देण्यात येईल. किंवा विजेते ग्राहक देखील तीन दिवसांच्या आत जवळच्या कार्यालयाशी संपर्क साधू शकतात. लकी डिजिटल ग्राहक योजनेबाबत महावितरणच्या www.mahadiscom.in वेबसाईट अधिक माहिती उपलब्ध आहे.

पुणे : ‌‘जय जिजाऊ‌’, ‌‘छत्रपती शिवाजी महाराज की जय‌’, ‌‘छत्रपती संभाजी महाराज की जय‌’ अशा घोषणा देत आणि रंगीबेरंगी फुगे आकाशात सोडून बालकुमार चित्रपट महोत्सवाचा आज (दि.24) शुभारंभ झाला. महोत्सवाच्या पहिल्या दिवशी ‌‘शिवरायांचा छावा‌’ या चित्रपटाद्वारे मुलांनी वीरश्रीची अनुभूती घेतली.
संवाद, पुणे, कोहिनूर ग्रुप व कावरे आईस्क्रीम यांच्या संयुक्त विद्यमाने गुरुवार, दि. 24 ते बुधवार, दि. 30 एप्रिल 2025 या कालावधीत कोथरूड येथील सिटी प्राईड चित्रपट गृहात बालकुमार चित्रपट महोत्सवाचे आयोजन करण्यात आले आहे. महोत्सवाच्या शुभारंभप्रसंगी प्रतिथयश युवा दिग्दर्शक दिग्पाल लांजेकर, प्रसिद्ध उद्योजक कृष्णकुमार गोयल, सिटी प्राईडचे अरविंद चाफळकर, प्रकाश चाफळकर, कावरे आईस्क्रीमचे राजूशेठ कावरे, जान्हवी कावरे, संवाद पुणेचे सुनील महाजन, निकिता मोघे, केतकी महाजन-बोरकर, प्रसाद मिरासदार यांची उपस्थिती होती. या महोत्सवात लांजेकर यांनी दिग्दर्शित केलेले पाच चित्रपट दाखविण्यात येत असल्याने त्यांचा या वेळी विशेष सन्मान करण्यात आला. महोत्सवाचे यंदाचे 27वे वर्ष आहे.

भविष्यात नवीन दिग्पाल दिसेल..
उद्घाटनप्रसंगी चित्रपट महोत्सवाच्या आठवणी सांगताना दिग्पाल लांजेकर म्हणाले, लहानपणापासून मी हा बालचित्रपट महोत्सव अनुभवला आहे. सातत्याने या महोत्सवाचे आयोजन करणे कठीण आहे. परंतु आम्हा बालगोपाळांना या चित्रपट महोत्सवातून उत्तमोत्तम चित्रपट दरवर्षी पहायला मिळत गेले आणि त्यातूचन माझ्यातील कलावंत-दिग्दर्शक घडला. हा महोत्सव वर्षांनुवर्षे अखंडितपणे बालकुमारांना आनंद देईल आणि यातूनच नवीन दिग्पाल उदयास आलेला दिसेल.

प्रास्ताविकात सुनील महाजन म्हणाले, बालगोपाळांसाठी त्यांच्या वयाला रुचतील असे चित्रपट दर्शविण्याचे काम कावरे आईस्क्रीम आणि कोहिनूर ग्रुपच्या सहकार्याने करण्यात येत आहे. या वर्षी चित्रपट महोत्सवात पहिल्यांदाच एकाच दिग्दर्शकाचे पाच चित्रपट दाखविण्यात येत आहे याचा आनंद आहे. महाराष्ट्रातील संत परंपरा आणि वैभवशाली इतिहास मुलांना कळावा या हेतूने ऐतिहासिक चित्रपट दाखविण्यात येत आहेत.

सुरुवातीस विद्या भोपे हिने छत्रपती संभाजी महाराज यांच्या कार्यकर्तृत्वाची माहिती विशद केली. मान्यवरांचे स्वागत राजूशेठ कावरे आणि सुनील महाजन यांच्या हस्ते करण्यात आले.

समारोपाला ‌‘संत ज्ञानेश्वरांची मुक्ताई‌’ चित्रपटातील कलावंतांची उपस्थिती..
शुक्रवार, दि. 25 रोजी ‌‘पावनखिंड‌’, शनिवार, दि. 26 रोजी ‌‘फर्जंद‌’, रविवार, दि. 27 रोजी ‌‘फत्तेशिकस्त‌’, सोमवार, दि. 28 रोजी ‌‘धर्मरक्षक महावीर छत्रपती संभाजी महाराज‌’, मंगळवार, दि. 29 रोजी ‌‘तेंडल्या‌’, बुधवार, दि. 30 रोजी ‌‘संत ज्ञानेश्वरांची मुक्ताई‌’ हे चित्रपट महोत्सवात दाखविले जाणार आहेत. समारोप समारंभास केंद्रीय नागरी वाहतूक राज्यमंत्री मुरलीधर मोहोळ, दिग्दर्शक दिग्पाल लांजेकर, प्रसिद्ध उद्योजक, कोहिनूर ग्रुपचे अध्यक्ष कृष्णकुमार गोयल, उद्योजक प्रवीण बढेकर, सिटी प्राईडचे अरविंद चाफळकर तसेच ‌‘संत ज्ञानेश्वरांची मुक्ताई‌’ या चित्रपटातील कलावंतांची प्रमुख उपस्थिती असणार आहे.

संगीता गणबोटे यांनी सांगितला थरारक अनुभव….गणबोटे- जगदाळे यांच्यात गेल्या 25 वर्षांपासून मैत्री

पुणे- पहलगाम येथे झालेल्या अतिरेकी हल्ल्यात मृत्यूमुखी पडलेले संतोष जगदाळे यांचे पार्थिव पुण्यात दाखल झाले आहे. संतोष जगदाळे हे त्यांच्या 86 वर्षांच्या वृद्ध आईला काश्मीरला जाण्यापूर्वी भेटून निघाले होते. मी काश्मीरला फिरायला जातोय, लवकर परत येईल, असे त्यांनी आईला सांगितले होते. मात्र जगदाळे यांचा मृतदेह घरी आल्यानंतर त्यांच्या पत्नीला अश्रू अनावर झाले. त्यांच्या पत्नी धाय मोकलून रडत होत्या.

दरम्यान राष्ट्रवादीचे नेते खासदार शरद पवार हे कर्वे नगर येथे जगदाळे कुटुंबाला भेटण्यासाठी दाखल झाले होते. त्यांनी त्यांच्या कुटुंबाची भेट घेऊन सांत्वन केले. शरद पवार यांच्यासमोर जगदाळे कुटुंबियांना अश्रू अनावर झाले. कौस्तुभ गणबोटे यांच्या निवासस्थानी ही त्यांच्या अंत्यदर्शनासाठी पोहोचलेल्यांना अश्रू अनावर झाले. पुणे एअरपोर्टवर गुरुवारी पहाटे गणबोटे आणि जगदाळे यांचे पार्थिव नेण्यासाठी रुग्णवाहिका पोहचल्या त्यावेळी मंत्री माधुरी मिसाळ आणि मंत्री दत्तात्रय भरणे उपस्थित होते.

काश्मीर मधील पहलगाम परिसरात दहशतवाद्यांनी केलेल्या भ्याड हल्ल्यात 26 भारतीय पर्यटकांचा मृत्यू झाला आहे. यामध्ये महाराष्ट्रातील देखील सहा पर्यटकांचा समावेश आहे. त्यातील पुण्यातील संतोष जगदाळे आणि कौस्तुभ गणबोटे या दोघांचा मृतदेह सकाळी पुण्यात दाखल झाला. त्यानंतर त्यांचा मृतदेह त्यांच्या घरी अंतिम दर्शनासाठी नेण्यात आला. या वेळी घरातील सर्व नातेवाईकांना शोक अनावर झाला होता. जगदाळे यांना अंतिम निरोप देण्यासाठी पुण्यातील नागरिकांनी प्रचंड गर्दी केली होती.पहलगाम येथे झालेल्या हल्ल्यात पुण्यातील संताेष जगदाळे आणि काैस्तुभ गनबाेटे या दाेघांना त्यांच्या कुटुंबीयांच्या डाेळ्यासमाेर अतिरेक्यांनी गाेळ्या घालून ठार केले. या दाेघांत गेल्या 25 वर्षांपासून मैत्री हाेती आणि फरसाणच्या व्यवसायाच्या निमित्ताने त्यांच्यात अधिक जवळीक निर्माण झाली हाेती. हल्ल्यात दोघांचा मृत्यू झाल्याने त्यांच्या मैत्रीचा करुण शेवटही एकत्रच झाला. जगदाळेंचे एकुलत्या एक एमबीए झालेल्या उच्चशिक्षित मुलीच्या लग्नाचे, तर गनबाेटे यांचे नातवाचे बारसे करण्याचे स्वप्न अधुरे राहिले असल्याने हळहळ व्यक्त केली जात आहे.

जम्मू कश्मीरमधील पहलगाम येथे दहशतवाद्यांनी केलेल्या भ्याड हल्ल्यात पुण्याचे उद्योजक कौस्तुभ गणबोटे दुर्दैवी मृत्युमुखी पडले. त्यांचे पार्थिव त्यांच्या निवासस्थानी आणण्यात आले असून त्यांच्या पार्थिवाचे राष्ट्रवादी नेते शरद पवार यांनी अंत्यदर्शन घेतले. गणबोटे कुटुंबीयांची सांत्वनपर भेट घेत गणबोटे कुटुंबीयांचे सांत्वन केले. यावेळी शरद पवार यांच्या समोर कौस्तुभ यांची पत्नी यांनी घडलेला सर्व थरारक अनुभव सांगितला.“तिथं एकही सुरक्षा रक्षक नव्हता. रक्तात पडलेली आमची माणसं होती. आम्ही कोणाला आवाज देणार तिथं? आम्ही खूपच घाबरलो होतो. ते बंदूक घेऊन आले आणि त्यांनी गोळ्या मारायला सुरुवात केली. त्यांनी काहीच बघितलं नाही. डोक्यात, डोळ्यात, छातीत गोळ्या मारल्या. ते सहा ते सात लोक होते आणि अर्धा तासाच्या आत त्यांनी येऊन गोळ्या झाडल्या व निघून गेले,” काळजाचा थरकाप उडवणारा असा हा प्रसंग संतोष जगदाळे यांच्या पत्नीनं शरद पवारांना सांगितला.

मुलगा पित्याचा मृतदेह आणण्यास गेला; घरात फक्त सून, नातू होते

गनबोटेंची पुण्यात फरसाणची १६ दुकाने आहेत. काेंढवा परिसरातील सुखसागरमधील साईनगर येथे दाेनमजली गनबाेटे फरसाणचा बाेर्ड येणाऱ्या-जाणाऱ्यांचे लक्ष वेधून घेतो. घराशेजारीच फरसाण बनवण्याचे युनिट आहे. ताजे फरसाण मिळण्याचे ठिकाण म्हणून इथे गर्दी असते. पुणे व पिंपरी-चिंचवडमध्ये गनबाेटे फरसाणची तब्बल १६ दुकाने असल्याने व्यवसाय एकदम व्यवस्थितरीत्या सुरू हाेता. मात्र, बुधवारी या ठिकाणी फरसाण कारखान्यातील कामगार घरातील मदतीसाठी झटत हाेते, तर काैस्तुभ गनबाेटेंचा मुलगा कुणाल सकाळच्या विमानाने श्रीनगरला रवाना झाल्याने घरी केवळ सून व नातू हाेते. लाडक्या नातवाचे बारसे मित्राला धूमधडाक्यात करण्याची इच्छा हाेती. परंतु त्यापूर्वीच देवाने त्याला हिरावून नेल्याचे सांगत गनबाेटेंचे मित्र प्रवीण कुलकर्णी म्हणाले, तो मलाही सहलीला साेबत चल म्हणाला हाेता, परंतु मी यापूर्वी काश्मीरला जाऊन आलाे असल्याने त्यास नकार दिला हाेता. आज मी बचावलाे आहे. मात्र, माझ्या मित्राच्या कुटुंबावर आज दु:खाचा डाेंगर काेसळल्याचे ते म्हणाले.

#pahalgamterrorattack#jammukashmirattack#kaustubhganbote

पुणे:पहलगाम येथे दहशतवाद्यांच्या भ्याड हल्ल्यात मृत्युमुखी पडलेल्या पुण्यातील कौस्तुभ गनबोटे आणि संतोष जगदाळे यांचे पार्थिव आज पहाटे विशेष विमानाने पुण्यात आणण्यात आले. यावेळी पुणे आंतरराष्ट्रीय विमानतळावर त्यांच्या पार्थिवाचे दर्शन घेऊन मान्यवरांनी श्रद्धांजली अर्पण केली.

यावेळी केंद्रीय मंत्री, मुरलीधर मोहोळ राज्याचे कॅबिनेट मंत्री दत्ता भरणे, कॅबिनेट मंत्री प्रकाश आबिटकर, राज्यमंत्री माधुरी मिसाळ, आमदार बाप्पू पठारे आणि प्रशासकीय अधिकारी समवेत होते.

आमदार बापूसाहेब पठारे यांची महानगरपालिका अधिकाऱ्यांसमवेत पर्यायी मार्गांची पाहणी

पुणे: वडगावशेरी मतदारसंघातील पुणे-नगर रस्त्यावरील वाहतूक कोंडीचा तसेच इतर वाहतूक संदर्भातील प्रश्न सोडविण्याच्या दृष्टीने आमदार बापूसाहेब पठारे यांनी महानगरपालिका अधिकाऱ्यांसमवेत पर्यायी रस्त्यांची पाहणी केली. यात प्रामुख्याने, नदीपात्रालगतचा खराडी-शिवणे रस्ता, ५०९ चौक ते धानोरी जुना जकात नाका तसेच विमानतळ ते रामवाडी यांचा समावेश होता.महानगरपालिका शहर अभियंता प्रशांत वाघमारे, पथ विभागाचे मुख्य अभियंता अनिरुद्ध पावसकर, अधिक्षक अभियंता साहेबराव दांडगे, कार्यकारी अभियंता संजय धारव, राजेश भुतकर, अजित सुर्वे, मकरंद वाडेकर आदि अधिकारी यावेळी उपस्थित होते.

सद्यस्थितीनुसार वाहतूकीचे प्रश्न सोडवण्यासाठी पर्यायी वाहतूक मार्गाचा विचार करून त्यावर तातडीने कार्यवाही करण्याची आवश्यकता आहे. पुणे-नगर रस्त्याची वाहतूक कोंडी मार्गी लावण्यासाठी नदीपात्रालगतचा खराडी-शिवणे रस्ता महत्त्वाचा मानला लागतो. जो की भूसंपादनामुळे रखडला आहे. तसेच, पुणे विमानतळाचा रन-वे वाढवल्यामुळे ५०९ चौक ते लोहगाव हा एअर फोर्स हद्दीतील रस्ता बंद होण्याची शक्यता आहे. पर्यायी मार्ग म्हणून ५०९ चौक ते धानोरी जुना जकात नाका तसेच विमानतळ ते रामवाडी हे रस्ते होणे क्रमप्राप्त आहे.

पाहणीदरम्यान, सदर रस्ते येत्या वर्षभरात पूर्ण करणार असल्याचे आश्वासन अधिकारी वर्गाने दिले आहे. पठारे यांनी अनेक वर्षे प्रलंबित राहिलेल्या खराडी-शिवणे रस्त्याच्या भूसंपादनाबाबत अधिकाऱ्यांशी सविस्तर चर्चा केली. त्यावर प्रशासकीय मार्गाने तोडगा काढण्याबाबत सूचना केल्या.

लोकप्रतिनिधी म्हणून नागरिकांना सहन करावा लागणारा वाहतुकीचा गंभीर प्रश्न सोडवण्याकरिता सातत्याने विविध मध्यमातून व विविध पातळ्यांवर प्रयत्न सुरू आहेत. पर्यायी मार्ग सुरू झाल्यास वाहतुकीचा प्रश्न मार्गी लागेल आणि नागरिक बांधव यातून सुटकेचा नि:श्वास घेतील, ही खात्री आहे.

बापूसाहेब पठारे (आमदार, वडगावशेरी विधानसभा मतदारसंघ)