पुणे :महायुतीतील सर्व कार्यकर्ते,पदाधिकारी, नेते, यांनी एकसंघपणे काम केल्यामुळेच पुणे शहरात आठ पैकी सात जागांवर विजय मिळवता आला असे महायुतीचे समन्वयक आणि भाजपा प्रवक्ते संदीप खर्डेकर यांनी सांगितले.
सर्व घटक पक्षांचे कार्यकर्ते अगदी बूथ लेव्हल पर्यंत एकत्रित काम करत होते वा संयुक्तपणे प्रचार यंत्रणा राबवत होते. कार्यकर्त्यांची वज्रमूठ आणि मतदारांना भावलेले प्रचारातील मुद्दे हेच ह्या विजयाचे – यशाचे गमक आहे असेही खर्डेकर म्हणाले. ह्या लढ्यात आम्ही वडगाव शेरी ची जागा गमावली ह्याचे दुःख आहे च पण ह्या पराभवाच्या कारणांचाही शोध नक्की घेऊ असेही संदीप खर्डेकर यांनी स्पष्ट केले.
सर्व विजयी उमेदवारांचे अभिनंदन करतानाच आम्ही “सबका साथ, सबका विकास, सबका विश्वास, सबका प्रयास” ह्या पंतप्रधान “नरेंद्र मोदी” यांच्या संकल्पानुसार पुण्याला विकासाच्या नव्या क्षितिजावर घेऊन जाऊ असेही संदीप खर्डेकर म्हणाले.

राज्यभरासह पुणे अन् पश्चिम महाराष्ट्रात महायुती आणि भाजपचा झंझावात असताना पुण्यात मात्र एका तरुणाने आपल्या रणनीतीच्या जोरावर वडिलांच्या गळ्यात विजयाची माळ घातली. वडगावशेरी विधानसभा मतदारसंघातून राष्ट्रवादी काँग्रेस शरदचंद्र पवार पक्षाचे उमेदवार बापूसाहेब पठारे विजयी झाले. विद्यमान आमदार सुनील टिंगरे यांचा ४७१० मतांच्या फरकाने पराभव झाला.

विधानसभा निवडणूक जाहीर झाल्यापासून पुण्यातील वडगावशेरी विधानसभा मतदारसंघ चर्चेत होता. महायुतीकडून ही जागा भाजपच्या जगदीश मुळीक यांना जाणार की विद्यमान आमदार सुनील टिंगरे हेच वडगाव शेरीचे आगामी उमेदवार असणार यावरून जोरदार चर्चा रंगली होती. अखेरीस सुनील टिंगरे यांनी पुन्हा उमेदवारी मिळवली आणि निवडणुकीच्या रिंगणात उतरले. तर दुसरीकडे राष्ट्रवादी काँग्रेस शरदचंद्र पवार पक्षाने अनुभवी उमेदवार असलेल्या बापूसाहेब पठारे यांना उमेदवारी दिली. आणि तेव्हापासून वडगावशेरीचा सामना अटीतटीचा होईल अशी शक्यता वर्तवली गेली. आणि प्रत्यक्षात झाले ही तसेच. मतमोजणीला प्रारंभ झाल्यानंतर सुनील टिंगरे यांनी आघाडी घेतली होती. मात्र शेवटच्या टप्प्यात बापूसाहेब पठारे यांनी आघाडी मोडून काढत तब्बल ४७१० मतांच्या फरकाने विजय मिळवला.

दरम्यान स्थानिक असलेले बापूसाहेब पठारे माजी आमदार राहिले. सरपंच ते आमदार असा त्यांचा प्रवास राहिला. मात्र मागील काही वर्षे ते काही कारणास्तव राजकारणापासून लांब राहिले. वडगावशेरी २०१४ आणि २०१९ च्या निवडणूकीत भाजपचे जगदीश मुळीक आणि राष्ट्रवादी काँग्रेसचे सुनिल टिंगरे यांनी विजय मिळवला होता. मात्र २०२४ च्या विधानसभा निवडणुकीत बापूसाहेब पठारे पुन्हा राजकारणात सक्रिय झाले. त्यांनी विधानसभेचे तिकीट मिळवलं आणि त्यात ते विजयी झाले.

विधानसभेच्या या लढाईत बापूसाहेब पठारे यांना मुलाची साथ लाभली ती म्हणजे मुलगा सुरेंद्र पठारे यांची. सुरेंद्र पठारे हे देखील मागील काही वर्षापासून वडगावशेरीचा राजकारणात सक्रिय आहेत. या संपूर्ण परिसरात त्यांचा दांडगा जनसंपर्क आहे. मतदारसंघातील प्रत्येक छोट्या मोठ्या कामात त्यांनी सहभाग घेत अडचणी सोडण्याचा प्रयत्न केला. प्रसंगी आंदोलने ही केली आणि नागरिकांच्या समस्या सोडविण्याला प्राधान्य दिले.

गेल्या काही वर्षांपासून सुरेंद्र पठारे यांनी मतदार संघात आपला जनसंपर्क वाढवत कामाला सुरूवात केली. प्रत्येक गोष्टीत सहभागी होत त्यांनी मतदार संघातल्या अडचणी जाणून घेतल्या व सोबतच पर्यायाने त्या सोडविण्यासाठी लढा उभारला आणि आंदोलने केली. पुण्यातील सीईओपी महाविद्यालयातील गोल्ड मेडलिस्ट असलेल्या सुरेंद्र पठारे यांनी मागील काही वर्षात संपूर्ण मतदारसंघ पिंजून काढला. दीड महिन्यांपासून ते पायाला भिंगरी लागल्यासारखी फिरत होते. आणि त्याचा परिणाम विजयात झाला. वडील बापूसाहेब पठारे यांच्या गळ्यात त्यांनी विजयाची माळ घातली.

वडगाव शेरीत आरपीआयची भूमिका ठरली जाईंट किलर:. वडगाव शेरी विधानसभा मतदार संघात रिपब्लिकन पार्टी ऑफ इंडिया (आरपीआय) तसेच आंबेडकरी चळवळीतील पदाधिकारी, कार्यकर्त्यांनी घेतलेली भूमिका निर्णायक ठरली आहे. गेल्या अनेक वर्षात महायुती मधील प्रमुख नेत्यांनी आरपीआयला सन्मानपूर्वक वागणूक न दिल्याने या मतदारसंघात महायुतीला पराभवाचा फटका बसला आहे. या मतदारसंघात महाविकास आघाडीच्या उमेदवाराच्या विजयात आरपीआयची भूमिका जाईंट किलर ठरली आहे. सर्वसामान्य कार्यकर्ते, पदाधिकारी आणि आरपीआयच्या कष्टाचे हे फळ आहे.– डॉ. सिद्धार्थ धेंडे, माजी उपमहापौर, पुणे महापालिका.

खडकवासला विधानसभा मतदार संघातून महायुतीचे उमेदवार भीमराव तापकीर यांनी ५२,३२२ मताधिक्याने दणदणीत विजय मिळवला आहे. या मतदारसंघात एकूण १४ उमेदवार उभे होते. मात्र, खरी लढत महायुतीचे तापकीर, महाआघाडीचे सचिन दोडके आणि मनसेचे मयुर वांजळे यांच्यामध्ये होती.

पुणे:

“खडकवासला विधानसभा मतदारसंघाच्या तमाम नागरिकांनी दाखवलेल्या विश्वासाने मला पुन्हा एकदा आपला प्रतिनिधी म्हणून सेवा करण्याची संधी दिली आहे, यासाठी मन:पूर्वक आभार व्यक्त करतो. हा विजय केवळ माझा नाही, तर आपल्या सर्वांचा आहे. हा विजय आपल्या विकासाच्या स्वप्नांचा, आपल्या समस्यांच्या समाधानाचा, आणि एकत्रित काम करण्याच्या निर्धाराचा आहे.असे खडकवासल्यात बाजीगर ठरलेले आमदार भीमराव तापकीर यांनी म्हंटले आहे.

ते म्हणाले ‘आपल्या मतदारसंघातील नागरिकांनी दाखवलेल्या प्रेमाने आणि भारतीय जनता पक्ष व महायुतीच्या पदाधिकारी, कार्यकर्त्यांच्या अथक परिश्रमांमुळेच आज ही वेळ आली आहे. हा विजय हा फक्त निवडणूक लढविण्याचा नव्हे तर आपल्या मतदारसंघाच्या सर्वांगीण प्रगतीचा महत्त्वाकांक्षी आराखडा प्रत्यक्षात आणण्याचा संकल्प आहे.आता पुढील वाटचाल ही आपणा सर्वांच्या सहकार्यानेच होईल. खडकवासल्याच्या प्रत्येक नागरिकाचा आवाज हा माझ्यासाठी प्राधान्य असेल. मला खात्री आहे की, आपल्या एकतेच्या जोरावर आपण आपल्या मतदारसंघाला विकासाच्या नवीन उंचीवर नेऊ..आपल्या विश्वासासाठी पुन्हा एकदा धन्यवाद!

पहिल्या फेरीत दोडके यांना ४७०७, तापकीर यांना ४१७१ आणि वांजळे यांना २२१८ मते मिळाली. तर दुसऱ्या फेरीत दोडके १०८२१, तापकीर १०४४० आणि वांजळेंना १७२८ मते मिळाली. यामध्ये तापकीर ४२० मताने पिछाडीवर होते. तर तिसऱ्याच फेरीत तापकीर यांनी १७०५९ मते मिळवत दोडके यांची आघाडी मोडीत काढली. दहाव्या फेरीत दोडके ४७,६५९ , तापकीर ६३,१७४ आणि वांजळे यांना १४,१०२ मते मिळाली पंधराव्या फेरीत तापकीर यांना तब्बल ९९,०५० मते तर दोडकेंना ६५,४०२ मते मिळाली.तापकीर विजयाच्या दिशेने वाटचाल करत असताना निर्णायक २३ व्या फेरीत १,५६,५५८ तर दोडके यांना १,०४,४७९ आणि वांजळेंना ३९,६२६ मते मिळाली. शेवटी अखेर शेवटच्या फेरीत १,६२,७६६ तर दोडके यांना १,१०,४५३ आणि वांजळे यांना ४२,४०८ मते मिळाली. पाोस्टल मतांसह भीमराव तापकीर यांना १,६३,१३१ मते, दोडके-१,१०,८०९ आणि वांजळे यांना ४२,८९७ मते मिळाली.

काँग्रेस 63 वरून 16वर, भाजपची 79 वरून 132वर झेप
महाराष्ट्र विधानसभा निवडणुकीत भाजपचा विजय अभूतपूर्व आहे. भाजपने एकूण 149 जागांवर निवडणूक लढवली आणि 132 जागांवर आघाडीवर आहे. म्हणजे स्ट्राइक रेट 86% आहे. यासह महाराष्ट्रात भाजपचा अश्वमेध यज्ञ पूर्ण झाला.
1990 मध्ये बाळासाहेब ठाकरेंच्या शिवसेनेसोबत लहान भाऊ म्हणून 42 जागा जिंकणारा भाजप एकटाच बहुमताच्या जवळ आहे. त्याचवेळी बाळासाहेबांचे पुत्र उद्धव ठाकरेंची शिवसेना केवळ 17 जागांवर मर्यादित असल्याचे दिसत आहे.
मात्र, 5 महिन्यांपूर्वी झालेल्या लोकसभा निवडणुकीचे निकाल पाहिल्यानंतर अशा निकालांचा अंदाज लावला जाऊ शकत नव्हता. महाराष्ट्र लोकसभा निवडणुकीचे विधानसभानिहाय रूपांतर केले, तर काँग्रेसने 63 जागा जिंकल्या होत्या, ती आता केवळ 16 जागांपर्यंत मर्यादित असल्याचे दिसते. त्याचवेळी, त्यानुसार भाजपच्या जागा 79 वरून 132 जागा वाढत आहेत.

आपले आमदार पहा.!
(पुणे शहर आणि जिल्हा)२३ नोव्हेंबर, २०२४

शिरुर-हवेली विधानसभा
ज्ञानेश्वर कटके – घड्याळ

पुरंदर-हवेली विधानसभा
विजय शिवतारे – धनुष्यबाण

दौंड विधानसभा
राहूल कुल – कमळ

इंदापूर विधानसभा
दत्तात्रय भरणे – घड्याळ

बारामती विधानसभा
अजित पवार – घड्याळ

भोर-वेल्हा विधानसभा
शंकर मांडेकर – घड्याळ

मावळ विधानसभा
सुनिल शेळके – घड्याळ

जुन्नर विधानसभा
शरद सोनवणे – अपक्ष

आंबेगाव विधानसभा
दिलीप वळसे पाटील – घड्याळ

खेड विधानसभा
बाबाजी काळे – मशाल

हडपसर विधानसभा
चेतन तुपे – घड्याळ

वडगावशेरी विधानसभा
बापूसो पठारे – तुतारी

शिवाजी नगर विधानसभा
सिद्धार्थ शिरोळे – कमळ

पुणे कॅन्टो. विधानसभा
सुनिल कांबळे – कमळ

कसबा विधानसभा
हेमंत रासणे – कमळ

कोथरुड विधानसभा
चंद्रकांत पाटील – कमळ

पर्वती विधानसभा
माधुरी मिसाळ – कमळ

खडकवासला विधानसभा
भीमराव तापकीर – कमळ

पिंपरी विधानसभा
आण्णा बनसोडे – घड्याळ

चिंचवड विधानसभा
शंकर जगताप – कमळ

भोसरी विधानसभा
महेश लांडगे – कमळ

एकूण जागा – २१

कमळ – ९
घड्याळ- ८
तुतारी – १
धनुष्यबाण – १
मशाल – १
अपक्ष – १

मतदार संघाचे नाव आणि क्रमांक – आघाडीवरील उमेदवाराचे नाव आणि पक्ष-२ क्रमांकाच्या उमेदवाराचे नाव – मताधिक्य -एकूण फेऱ्यापैकी किती फेरीअखेर आणि रिझल्ट अशा सीरिअल ने हा तक्क्ता वाचावा …

पुणे-महाराष्ट्र विधानसभा निवडणुकीची मतमोजणी सुरू असून महायुती पुन्हा एकदा विजयाच्या दिशेने वाटचाल करताना दिसत आहे. या निकालावर प्रतिक्रिया देताना भाजपचे नेते चंद्रकांत पाटील यांनी उद्धव ठाकरे यांच्याबाबत मोठे विधान केले आहे. उद्धव ठाकरे आमच्यासोबत आल्यास त्यांचे स्वागत आहे, असे वक्तव्य चंद्रकांत पाटील यांनी केले. त्यामुळे उद्धव ठाकरे पुन्हा महायुतीकडे जातील का हे पहावे लागणार आहे. ते कोथरूडमध्ये पत्रकारांशी बोलत होते.

चंद्रकात पाटील यांना उद्धव ठाकरे हे पुन्हा महायुतीच्या सोबत आल्यास तुमची काय भूमिका असेल? असे विचारण्यात आले असता त्यावर बोलताना ते म्हणाले, उद्धव ठाकरे हे आमच्यासोबत आल्यास त्यांचे स्वागत आहे. आता महायुतीला पूर्ण बहुमत मिळताना दिसत आहे. काही अपक्षांची साथही मिळणार आहे. अशा परिस्थिती महायुतीकडून उद्धवजींना आमंत्रण दिले जाण्याची शक्यता नाही. त्यांनी स्वत: पुढाकार घेतल्यास भाजपचे वरिष्ठ नेते यावर विचार करतील, असे पाटील म्हणाले.

चंद्रकांत पाटील म्हणाले, 2019 मध्ये लोकांनी भाजप-शिवसेनेला कौल दिला होता. मात्र उद्धव ठाकरे यांनी वेगळी वाट निवडली. त्यांच्या निर्णयामुळे अनेकांना वाईट वाटले. आम्हालाही व्यक्तिश: वाईट वाटलं होतं त्यावेळी तसे काही झाले नसते तर आता यापेक्षाही चांगला निकाल शिवसेना-भाजपच्या बाजूने लागला असता. आज हे निकाल पाहण्याची आवश्यकता नसती.

चंद्रकांत पाटील यांनी संजय राऊत यांच्यावरही निशाणा साधला. लोक आता त्यांचे सकाळचे प्रवचन ऐकणार नाहीत. जो वेळेत आपली एक्झिट करतो, तोच शहाणा माणूस असतो. त्यांनी आता लिखाणावर लक्ष केंद्रित करावे. पण त्यांनी रोज टीव्ही समोर येऊन बोलू नये, कारण लोक त्यांना पाहिल्याबरोबर टीव्ही बंद करतील, असे चंद्रकांत पाटील म्हणाले.

मुख्यमंत्रीपदाबाबत बोलताना चंद्रकांत पाटील म्हणाले की, आमचे केंद्रीय बोर्ड याबाबत निर्णय घेतील. तो जे ठरवतील तो मुख्यमंत्री होईल. भाजपचे केंद्रीय नेतृत्व जे ठरवेल, ते आम्हाला मान्य आहे, असे एकनाथ शिंदे आणि अजित पवार यांचेही म्हणणे आहे. देवेंद्र फडणवीस मुख्यमंत्री व्हावे आम्हा सगळ्यांची इच्छा आहे. पण त्याचा निर्णय केंद्रीय नेतृत्व घेईल, कारण त्यांना लांबचे दिसते.

महाराष्ट्र विधानसभेच्या 288 जागांसाठी बुधवारी मतदान झाले. त्यानंतर शनिवारी झालेल्या मतमोजणीत सत्ताधारी महायुतीची मोठ्या विजयाकडे वाटचाल सुरू झाली आहे. सुरुवातीच्या कलांमध्ये महायुतीने सर्वाधिक 214 जागांवर आघाडी घेतली असून, त्यात भाजपने सर्वाधिक 127, शिवसेना 53 व राष्ट्रवादी काँग्रेसने 34 जागांवर आघाडी घेतली आहे. तर विरोधी बाकावरील महाविकास आघाडीने 54 जागांवर आघाडी घेतली आहे. त्यात काँग्रेसने 19, ठाकरे गटाने 21 तर शरद पवार गटाने 14 जागांवर आघाडी घेतली आहे.