पोलीस स्मृतिदिन संचलन २१ ऑक्टोबर २०२५ शोक कवायत

लडाख येथे दि.२१ ऑक्टोबर १९५९ या दिवशी हॉटस्प्रिंग या कडाक्याच्या थंडीच्या ठिकाणी, सुसज्ज चिनी सैन्याने केंद्रीय निमलष्करी पोलीस दलाच्या १० शुर शिपायांच्या तुकडीवर पुर्व तयारी निशी अचानक हल्ला केला. त्यावेळी त्या १० शुर वीरांनी शत्रुशी निकराने लढत देऊन देशासाठी आपले देह धारातिर्थी ठेवले. तेव्हापासुन २१ ऑक्टोबर हा दिवस देशातील विविध पोलीस दलाचे वतीने पोलीस स्मृतीदिन म्हणुन पाळला जातो. पोलीस स्मृतिदिनाचे दिवशी एकाच वेळी देशातील सर्व पोलीस मुख्यालयाचे ठिकाणी मागील एका वर्षाचे कालावधीत ज्या पोलीस अधिकारी व कर्मचा-यांनी आपले कर्तव्य बजावत असताना प्राणांची आहुती दिली त्या सर्वांना आदरांजली वाहण्यात येते.
मागील एका वर्षाचे कालावधीत ज्या पोलीस अधिकारी व पोलीस कर्मचाऱ्यांना आपले कर्तव्य बजावत असताना, वीरमरण आले, अशा संपुर्ण भारत देशातील सर्व राज्य, केद्रातील निमलष्करी पोलीस दलातील पोलीस अधिकारी व पोलीस अंमलदार/जवान यांचे स्मृतिला आज दिनांक २१ ऑक्टोबर २०२५ रोजी सकाळी ०७/३० वा.ते ०८/३० वा.चे दरम्यान पाषाण रोड स्थित महाराष्ट्र राज्य पोलीस संशोधन केंद्र, (सीपीआर), पाषाण पुणे येथील पोलीस हुतात्मा स्मृतिस्थळावर पोलीस दलाच्या वतीने आदरांजली वाहण्यात आली.
आज दिनांक २१ ऑक्टोबर २०२५ रोजी पुणे येथे महाराष्ट्र राज्य पोलीस संशोधन केंद्र, (सीपीआर), पाषाण पुणे येथील पोलीस हुतात्मा स्मृति स्मारकावर सकाळी ०८/०० वा. मा.ना.श्री. अजित पवार, उपमुख्यमंत्री व वित्तमंत्री महाराष्ट्र राज्य, मुंबई तथा पालकमंत्री पुणे व वीड जिल्हा यांचे हस्ते पुष्पचक्र अर्पण करुन आदराजंली वाहण्यात आली. सदर क्रार्यक्रमास श्री. संजीवकुमार सिंघल महासंचालक लाचलुचपत प्रतिबंधक विभाग मुंबई, श्री. अमितेश कुमार पोलीस आयुक्त, पुणे शहर, श्री. विनयकुमार चौबे पोलीस आयुक्त, पिंपरी-चिंचवड, पुणे, श्री. दीपक पाण्डये अप्पर पोलीस महासंचालक व संचालक पोलीस दळणवळण माहिती तंत्रज्ञान व परिवहन महाराष्ट्र राज्य पुणे, श्री. सुनिल रामानंद अपर पोलीस महासंचालक राज्य गुन्हे अन्वेषण विभाग, श्री. रंजनकुमार शर्मा पोलीस सह आयुक्त, पुणे शहर, श्री. संदिपसिंह गिल्ल पोलीस अधिक्षक, पुणे ग्रामीण तसेच पुणे शहरातील सर्व कार्यरत व सेवानिवृत्त वरिष्ठ पोलीस अधिकारी तसेच इतर मान्यवर उपस्थित होते.मा.ना.श्री. अजित पवार, उपमुख्यमंत्री व वित्तमंत्री महाराष्ट्र राज्य, मुंबई तथा पालकमंत्री पुणे व बीड जिल्हा, श्री. अमितेश कुमार पोलीस आयुक्त, पुणे शहर, श्री. विनयकुमार चौबे पोलीस आयुक्त, पिंपरी-चिंचवड, पुणे, श्री. रंजनकुमार शर्मा पोलीस सह आयुक्त, पुणे शहर, श्री. संदिप सिंह गिल्ल पोलीस अधिक्षक, पुणे ग्रामीण, श्री. संजय पाटील अपर पोलीस आयुक्त प्रशासन पुणे शहर यांनी पुष्पचक्र अर्पण केले. त्यानंतर उपस्थित इतर मान्यवर, पोलीस अधिकारी व पोलीस अमंलदार यांनी पुष्प अर्पण करुन श्रध्दांजली वाहिली.
दि.१ सप्टेंबर २०२४ ते ३१ ऑगस्ट २०२५ या कालावधीत महाराष्ट्रातील १. पोलीस कॉन्स्टेवल महेश कावडु नागुलवार या पोलीस जवानाला कर्तव्यावर असताना शहिद झाले.
दि.१ सप्टेंबर २०२४ ते ३१ ऑगस्ट २०२५ या कालावधीत आपले कर्तव्य बजावित असताना, वीरगती प्राप्त झालेल्या देशातील पोलीस अधिकारी व पोलीस जवान (सर्व दर्जाचे) असे एकुण १९१ जवानांच्या नावाच्या यादीचे वाचन शोक कवायतीचे दरम्यान श्री. सुनिल जैतापुरकर सहा. पोलीस आयुक्त, नियंत्रण कक्ष, अभियान, पुणे शहर व श्री. सरदार पाटील, सहा. पोलीस आयुक्त, मानव संशाधन, पुणे शहर यांनी केले.
सदर कार्यक्रमाचे सुत्र संचालन श्री. सिताराम नरके, सेवानिवृत्त, सहा. पो. फौज. एसआरपीएफ, ग्रुप-२. रामटेकडी, पुणे व दत्तात्रय निकम, पोलीस अंमलदार, पिंपरी पो. स्टे यांनी केले.

श्री श्री श्यामा काली पूजा उत्सवाचे रौप्य महोत्सवी वर्षे

पुणे: सध्याच्या काळात सांस्कृतिक राजधानी समजल्या जाणाऱ्या पुणे शहरात वाढलेली गुन्हेगारी पाहता हे शहर भयमुक्त व्हावे, स्वच्छ पुणे, सुंदर पुणे शहर असावे अशी प्रार्थना माजी आमदार आणि शिवसेना शिंदे गटाचे महानगर प्रमुख रवींद्र धंगेकर यांनी काली मातेकडे केली.

बंगाली समाजाकडून साजरा केल्या जाणाऱ्या काली पूजा उत्सवात रविंद्र धंगेकर बोलत होते. यावेळी पुणे शहर सार्वजनिक काली पूजा कमिटीचे कमिटी चे सेक्रेटरी सुब्रतो मजुमदार,विनोद संतरा- खजिनदार ,अमर माझी-उपसेक्रेटरी ,अनुप माईती – सदस्य , महादेव माझी – सदस्य ,पूनचंद्र दास- सदस्य,संकेत मजुमदार
आणि मान्यवर उपस्थित होते.

मागील पंचवीस वर्षापासून हा उत्सव आपल्या भागात साजरा केला जात असून त्यात अनेक बंगाली बांधव सहभागी होत असतात. महाराष्ट्रात 45 वर्षापासून बंगाली बांधव सोन्याचे कारागीर म्हणून पुणे शहरात कार्यरत असून त्यांच्याशी आपला घरगुती संबंध आहे, असे धंगेकर यांनी नमूद केले.

काली मातेवर श्रद्धा बाळगणाऱ्या बंगाली नागरिकांसाठी आवश्यक त्या उपलब्धता मिळवून देणे हे आपले कर्तव्य असून त्यांच्या भावनांचा आपण आदर करत असल्याचे धंगेकर यांनी सांगितले.

पुणे : कलावंताला जात-धर्म नसतो. नास्तिकता, आस्तिकता असलेल्या आपल्या देशात समन्वयातूनच सांस्कृतिक संवाद घडत असतो. भगवान धेंडे यांचे लेखन विरोधाभासी असले तरी अंत:करणात बुद्ध असून गुरुदेव यांच्याविषयी भक्तीभाव आहे. प्रत्येकाच्या जीवनातील अर्थ समजून घेण्याची त्यांची समन्वयाची भूमिका आहे. त्यांच्या लेखनाचा धर्म हा माणुसकीचा आहे, असे प्रतिपादन अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांनी केले.

भगवान धेंडे लिखित ‘तुफानातील दिवा’ आणि ‘कुणाची वाट बघताय?’  या दोन पुस्तकांचे प्रकाशन महाराष्ट्र साहित्य परिषदेचे जिल्हा प्रतिनिधी रावसाहेब पवार आणि डॉ. सबनीस यांच्या हस्ते झाले. त्या वेळी डॉ. सबनीस बोलत होते. महाराष्ट्र साहित्य परिषदेच्या माधवराव पटवर्धन सभागृहात कार्यक्रमाचे आयोजन करण्यात आले होते. डेक्कन एज्युकेशन सोसायटीचे अध्यक्ष डॉ. शरद कुंटे, महाराष्ट्र साहित्य परिषदेचे कार्यवाह ॲड. प्रमोद आडकर, माजी उपमहापौर डॉ. सिद्धार्थ धेंडे, चित्रपट निर्माते आप्पा बोराटे, अभिनेते जगन्नाथ निवंगुणे, ॲड. रंजना भोसले यांची प्रमुख उपस्थिती होती. मयूरी प्रकाशनतर्फे पुस्तके प्रकाशित करण्यात आली आहेत.

जाती-पातीच्या व्यवस्थेत राहूनही भगवान धेंडे यांचे साहित्याच्या क्षेत्रातील योगदान मोलाचे आहे. श्रद्धेचा सन्मान करताना त्यांनी लिखाणातून साक्षरतेचे महत्त्व अधोरेखित केले आहे, त्याचप्रमाणे माणुसकीचा धर्म जोपासला आहे. त्यांना जीवनात अनेक संकटांचा सामना करावा लागला तरी जीवनातील सकारात्मकता हे त्यांच्या यशाचे खरे कारण आहे.

अध्यक्षीय मनोगत व्यक्त करताना रावसाहेब पवार म्हणाले, सध्याचे समाजकारण, राजकारण याकडे बघितल्यानंतर आपण का जगतो आहोत असा प्रश्न पडतो. सकारात्मकता जपणारी माणसे वेचावी लागतात. सकारात्मक वृत्तीने जगणाऱ्या व्यक्तींकडे पाहिल्यानंतर जगण्याची उमेद मिळते. माणसाला माणूस म्हणून उभे करणे ज्याला समजते तो खरा माणूस होय.

ॲड. प्रमोद आडकर म्हणाले, आयुष्यात सेवाभाव महत्त्वाचा आहे. भगवान धेंडे यांच्या कथा-कवितांचे अभिवाचन झाल्यास त्यांच्या लेखनाची महती कळू शकेल.

डॉ. शरद कुंटे म्हणाले, धेंडे यांच्या कथा-कविता वाचल्यानंतर त्यांची विचारपद्धती समजून येते. विपरित पस्थितीत त्यांनी सकारात्मकता अंगी जोपासली असल्याने त्यांच्या लेखानात हुंकार दिसून येतो.

भगवान धेंडे यांनी लेखन प्रवास उलगडला. डॉ. सिद्धार्थ धेंडे, आप्पा बोराटे, जगन्नाथ निवंगुणे यांनी मनोगत व्यक्त केले. कार्यक्रमाचे सूत्रसंचालन रुपाली अवचरे यांनी केले. सागर धेंडे, ब्रह्मानंद धेंडे यांनी स्वागत केले.

मराठवाड्यातील पूरग्रस्त विद्यार्थ्यांसाठी निधी संकलन; रोटरी क्लब ऑफ पुणे सनराईजतर्फे आयोजन

पुणे: भारतरत्न पं. भीमसेन जोशी यांच्या बुलंद स्वरांच्या आठवणी, गानसम्राज्ञी लता मंगेशकर यांच्या मधुर स्वरांच्या स्मृती आणि ज्येष्ठ राजनीतिज्ञ, कवी अटल बिहारी वाजपेयींची समर्थ शब्दकळा, यांचा त्रिवेणी संगम रसिकांनी शनिवारी सायंकाळी अनुभवला. विद्यार्थी सहाय्यक समितीच्या फर्ग्युसन रोडवरील संकुलातील मोडक सभागृहात झालेल्या या कार्यक्रमाला रसिकांनी उत्स्फूर्त प्रतिसाद दिला.

निमित्त होते, मराठवाड्यातील पूरग्रस्त भागातील मुलामुलींसाठी सहाय्यता निधी उभारण्यासाठी आयोजिलेल्या ‘तीन भारतरत्न’, या सांगीतिक मैफलीचे! भारतरत्न पंडित भीमसेन जोशी, गानसम्राज्ञी लता मंगेशकर व कवी अटलबिहारी वाजपेयी यांच्या गाणी, कविता आणि आठवणी असा गोफ या मैफलीच्या माध्यमातून रसिकांनी अनुभवला. गायिका मनीषा निश्चल, गायक अमोल निसळ व संजीव मेहेंदळे यांच्या बहारदार सादरीकरणाने ही मैफल दीर्घकाळ स्मरणात राहील, अशी झाली. मनीष आपटे यांच्या ओघवत्या निवेदनाने मैफलीचा आनंद द्विगुणित झाला. 

गायिका मनीषा निश्चल यांनी ज्योतिकलश झलके, अपनेही मन से कुछ मांगे, राम का गुणगान करिये, मेंदीच्या पानावर, दिल हुम हुम करे… ही गीते सादर केली. संजीव मेहेंदळे यांनी आरंभी वंदिन अयोध्येचा राजा, भाग्यदा लक्ष्मी बारम्मा, राम का गुनगान करिये, भेटीलागी जीवा… या रचना ऐकवल्या, तर अमोल निसळ यांनी आता कोठे धावे मन, तीर्थ विठ्ठल क्षेत्र विठ्ठल, राजस सुकुमार मदनाचा पुतळा.. यांचे सादरीकरण केले. बाजे रे मुरलिया बाजे या रचनेने या रंगतदार मैफलीची सांगता झाली.

पं. भीमसेन जोशी यांच्या संतवाणीतील काही निवडक रचना, प्रखर राजनीतिज्ञ तथा कवी अटल बिहारी वाजपेयी यांच्या काही कविता आणि गानसम्राज्ञी लता मंगेशकर यांची काही अभिजात गीते, असा मेळ या कार्यक्रमाच्या निमित्ताने जुळून आला. विवेक परांजपे (सिंथेसायजर आणि संगीत संयोजन), यश भंडारे (की बोर्ड), अमेय ठाकूरदेसाई (तबला), अनिल करंजवकर (पखवाज), चेतन परब (आक्टोपड) यांनी पूरक साथसंगत केली. 

रोटरी क्लब ऑफ पुणे सनराईजच्या वतीने या कार्यक्रमाचे आयोजन करण्यात आले होते. गेट सेट गो हॉलिडेज प्रस्तुत, मनीषा निश्चल्स महक निर्मित ‘तीन भारतरत्न’ या कार्यक्रमाला सूर्यदत्त ग्रुप ऑफ इन्स्टिट्यूट्सचे संस्थापकअध्यक्ष डाॅ. संजय बी. चोरडिया, दिव्यांग इंडियन चेंबर ऑफ कॉमर्स अँड इंडस्ट्रीजचे (डिकाई) रघुनाथ येमुल गुरुजी, विद्यार्थी साहाय्यक समितीचे कार्यकारी विश्वस्त तुषार रंजनकर, ‘रोटरी’चे अध्यक्ष जीवराज चोले, सचिव तेजस्विनी थिटे उपस्थित होते.

रोटरी क्लब ऑफ पुणे सनराईजचे अध्यक्ष जीवराज चोले यांनी उपस्थितांचे स्वागत केले. मी स्वतः समितीचा माजी विद्यार्थी आहे. विद्यार्थी समितीला कधीच विसरत नाहीत. त्यामुळे मराठवाड्यातील पूरग्रस्त विद्यार्थ्यांसाठी मदतीचा हात पुढे करणे, हे कर्तव्य समजून, या कार्यक्रमाचे आयोजन केले आहे. रोटरी क्लब ऑफ पुणे सनराईजच्या वतीने विद्यार्थ्यांच्या मदतीसाठी एक लाख ५१ हजारांचा निधी समितीला देत असल्याचे त्यांनी सांगितले. 

प्रा. डाॅ. संजय बी. चोरडिया म्हणाले, समितीच्या कार्याला मी अभिवादन करतो. अशा कार्यात सहभागी होणे हे नैतिक व मूल्याधिष्ठित कार्य आहे, असे आम्ही समजतो. त्यामुळे जिथे कमी आहे, तिथे सूर्यदत्त आहे, असे आश्वासन मी देतो.

तुषार रंजनकर म्हणाले, समितीमध्ये निम्मे विद्यार्थी मराठवाड्यातील आहेत. विद्यार्थ्यांसाठी कमवा आणि शिका योजना असून, विद्यार्थ्यांचा सर्वांगीण विकास, कौशल्यविकासाच्या संधी हे समितीचे ध्येय आहे. विद्यार्थ्यांची वेगळ्या प्रकारची जडणघडण समितीमध्ये होते.

पुणे: निराधार आजी-आजोबांना दिवाळीचा फराळ, नवा पोशाख, आकाश कंदील देऊन त्यांच्यासोबत दीपोत्सवाचा आनंद साजरा करण्यात आला. पहिला दिवा निराधार व ज्येष्ठ नागरिकांच्या हस्ते लावून महाराष्ट्र नवनिर्माण सेना पुणे शहर व प्रल्हाद गवळी मित्र परिवाराच्या वतीने दिवाळी साजरी करण्यात आली. या उपक्रमाचे हे पाचवे वर्ष आहे.

भवानी पेठेतील पुष्पा पचनूर सभागृहात ज्येष्ठ नागरिक, निराधार आजी-आजोबा यांच्यासाठी दिवाळी फराळ कार्यक्रमाचे आयोजन केले होते. राष्ट्रवादी काँग्रेस (शरदचंद्र पवार) पक्षाचे प्रवक्ते अंकुश काकडे, ‘मनसे’चे संघटक प्रल्हाद गवळी, मनसे शहर अध्यक्ष साईनाथ बाबर, कॉंग्रेसचे बाळासाहेब दाभेकर, संदिप महाराज जाधव, आळंदी देवस्थान, विक्रम अगरवाल, प्रल्हाद गवळी मित्र परिवाराचे कार्यकर्ते, ज्येष्ठ नागरिक मोठ्या संख्येने उपस्थित होते.

समाजाला अनेक प्रश्न सध्या भेडसावत आहेत. अलिकडे मुले आई-वडिलांनाही जुमानत नाहीत. अशावेळी सामाजिक बांधिलकी जपत घरात मुले, नातवंडे नसलेल्या, तसेच मुले संभाळत नसलेल्या आजीआजोबांचा सन्मान करून त्यांची दिवाळी गोड करून त्यांना प्रेरणा देण्याचा प्रयत्न सुखावणारा आहे. हा उपक्रम स्तुत्य आहे, असे अंकुश काकडे यांनी नमूद केले.

प्रल्हाद गवळी म्हणाले, “मागील पाच वर्षापासून आजी-आजोबांसोबत पहिला दिवा हा उपक्रम राबवत आहे. वसुबारसेदिवशी गाईची पूजा करून पहिला दिवा लावला जातो. सामाजिक भान ठेवून सुदृढ समाज निर्माण करण्यासाठी समाजातील ज्येष्ठ मंडळी, महिला, विधवा अशा घटकांना सन्मानाची वागणूक मिळावी, त्यांचे दुःख कमी करण्याच्या उद्देशाने अशाच प्रकारचे विविध उपक्रम वर्षभर राबवत असतो.”

पुणे :  लक्ष्मीपूजनानिमित्त सारसबागेसमोरील श्री महालक्ष्मी देवीला शुद्ध सोन्यात बनविलेली सुमारे १६ किलो वजनाची साडी मंदिर प्रशासनाकडून नेसविण्यात आली. श्री महालक्ष्मी देवीचे हे सुवर्णवस्त्रातील रुप पाहण्याकरीता देवीभक्तांनी मोठी गर्दी केली. वर्षभरात केवळ दोन वेळा म्हणजेच दसरा आणि लक्ष्मीपूजनाच्या दिवशी ही साडी देवीला नेसविण्यात येते. तसेच मंदिराला आकर्षक सजावट देखील करण्यात आली आहे. 

श्री महालक्ष्मी मंदिर, श्री बन्सीलाल रामनाथ अग्रवाल धार्मिक व सांस्कृतिक ट्रस्ट च्यावतीने लक्ष्मीपूजनानिमित्त विविध कार्यक्रमांचे आयोजन मंदिरात केले जाते. ट्रस्टच्या प्रमुख विश्वस्त अमिता राजकुमार अग्रवाल, प्रमुख संस्थापक विश्वस्त राजकुमार अग्रवाल, विश्वस्त अ‍ॅड.प्रताप परदेशी, डॉ.तृप्ती अग्रवाल, भरत अग्रवाल, प्रविण चोरबेले, हेमंत अर्नाळकर, रमेश पाटोदिया, नारायण काबरा, निलेश लद््दड, राजेश सांकला, मुरली चौधरी आदी यावेळी उपस्थित होते.

लक्ष्मीपूजनाला देवीला नेसविण्यात आलेली ही सोन्याची साडी दक्षिण भारतातील कारागिरांनी साकारली आहे. सुमारे ६ महिने ही साडी तयार करण्याचे काम सुरु होते. आकर्षक नक्षीकाम करुन ही सोन्याची साडी साकारण्यात आली आहे. दिवाळीच्या निमित्ताने मंदिरात आकर्षक विद्युतरोषणाई व आरास करण्यात आली आहे. तसेच महालक्ष्मी मंदिराच्या वेबसाईट www.mahalaxmimandirpune.org यावरुन आॅनलाईन सुविधांची सोय देखील करण्यात आली आहे, असे अमिता अग्रवाल यांनी सांगितले.

उपमुख्यमंत्री अजित पवार यांची उपस्थितीत धान्याचे किट पुण्यातून रवाना ;  पाथर्डी आणि बीड मध्ये वितरण
पुणे : महाराष्ट्रातील ‘बळीराजा’चे यंदा अतिवृष्टीमुळे अपरिमीत नुकसान झाले जे लगेच भरून येणे शक्य नाही. अशा या अस्मानी संकटापुढे उद्ध्वस्त झालेला शेतकरी बांधव हवालदिल झाला आहे. त्यामुळे गुरुवार पेठेतील स्व. प्रकाश ढेरे चॅरिटेबल ट्रस्ट आणि पुणे मर्चंटस को ऑप बँकेच्या वतीने पूरग्रस्तांना १ हजार ५०० धान्य किट पाठविण्यात आले. तसेच पाथर्डी आणि बीड मध्ये त्याचे वितरण करण्यात आले. 

श्रीमंत थोरले बाजीराव पेशवे रस्त्यावरील बीएसएनएल कार्यालयासमोर उपमुख्यमंत्री अजित पवार यांच्या उपस्थितीत मदतीचा ट्रक पाथर्डी आणि बीडकडे रवाना झाला होता. यावेळी ट्रस्टचे आणि बँकेचे अध्यक्ष विजय ढेरे, बँकेचे उपाध्यक्ष सुधीर शेळके, अंकुश काकडे, रवींद्र रच्चा, हेमंत जगताप, योगीराज खिलारे, प्रसन्न जगताप, अजित खेसे, रावसाहेब खंडागळे, प्रदीप मिसाळ, उदय महाले, युवराज खेडकर, राजन उडाणे, हेमा खात्री, प्रमिला कोंढरे, प्रकाश पेटवे, ऍड. अभिजीत बोरकर, ऍड. शिरीष शिंदे, मुख्य कार्यकारी अधिकारी मनोज जगदाळे आदी उपस्थित होते. तसेच स्व. प्रकाश ढेरे चॅरिटेबल ट्रस्टचे पदाधिकारी देखील उपस्थित होते.

स्व. प्रकाश ढेरे चॅरिटेबल ट्रस्टच्या वतीने बीडमधील पूरग्रस्तांना १ हजार धान्य किट आणि पुणे मर्चंटस को ऑप बँकेच्या वतीने पाथर्डी येथे ५०० धान्य किट पाठविण्यात आले. नुकत्याच झालेल्या अतिवृष्टीमुळे शेतकरी बांधव हवालदिल झाला असून अशा परिस्थीतीत बळीराजाला संकटातून सावरणे हे आपले ‘सामाजिक’ कर्तव्य आहे. हीच भावना समोर ठेवत दोन्ही संस्थांकडून ही मदत देण्यात आली.

शेतकऱ्यांसाठी धान्यासह कोणत्या स्वरूपाची मदत दिली जात आहे, याची पाहणी अजित पवार यांनी केली. ऊन वारा पावसात राबणाऱ्या आणि जगाचा पोशिंदा असलेला शेतकरी अडचणीत असताना पुण्यातून सहकारी बँकेतर्फे दिली जाणारी मदत अत्यंत महत्वाची असल्याचे पवार यांनी सांगितले. ‘शेतकरी बांधवांना – एका हात मदतीचा’ याअंतर्गत ही मदत दिली जात असून सामान्य नागरिकांचाही या उपक्रमात सक्रिय सहभाग असल्याचे बँकेतर्फे सांगण्यात आले.

विजय ढेरे म्हणाले, शेती प्रधान असलेला आपला विशाल भारत देशाचा शेतकरी बांधव हा देशाचा मुख्य कणा आहे. मुळातच शेतकरी बांधव हा निसर्गाच्या तसेच बाजारामधील दर न मिळाल्यामुळे नेहमीच संकटात असतो. निसर्गावर अवलंबून असलेल्या या ‘बळीराजा’ वर आलेल्या संकटाला तोंड देण्याकरिता आम्हीही त्याच्यासोबत  खंबीरपणे उभे आहोत, असेही त्यांनी सांगितले.  

क्रिएटिव्ह फाउंडेशन च्या माध्यमातून “राजकारण” विरहित “समाजकारणाची” पंचवीस वर्षे.

विविध मंडळाना उपयुक्त वस्तू भेट देताना दीपावली चा आनंद द्विगुणित होत असल्याचे क्रिएटिव्ह फाउंडेशन चे अध्यक्ष संदीप खर्डेकर म्हणाले. दीपावली निमित्ताने विविध गणेशोत्सव मंडळ, विविध संस्था, संघटना, ज्येष्ठ नागरिक संघ, ज्ञाती संस्था,अनाथाश्रम, दिव्यांग केंद्र, वृद्धाश्रम यांना उपयुक्त भेट वस्तू देण्याच्या उपक्रमाचा शुभारंभ करण्यात आला त्यावेळी ते बोलत होते. यावेळी मा. नगरसेविका व क्रिएटिव्ह फाउंडेशन च्या विश्वस्त मंजुश्री खर्डेकर, भाजपा च्या कोथरूड मंडल उपाध्यक्ष अनघाताई जगताप,भाजपा चे सुधीर फाटक, बाल तरुण मंडळ पौड फाटा चे पदाधिकारी अनिकेत मोकर,युवराज कोंडे, यश मोकर, सिद्धांत कुडले, ओंकार मित्र मंडळ चे तुषार दिघे, गणेशनगर मंडळाचे मनीष चव्हाण, पार्थ पालकर, सिद्धांत मगर, साई पालकर,कुमार युवक मित्र मंडळाचे प्रसाद तावरे, उमेश माने,बाल तरुण मित्र मंडळ पांडुरंग कॉलोनी चे हर्षल होजगे, अभिजित साबळे, पार्थ तावरे, अष्टविनायक मित्र मंडळाचे सिद्धेश करंजकर व इतर मान्यवर उपस्थित होते.
क्रिएटिव्ह फाउंडेशन च्या माध्यमातून राजकारण विरहित समाजकारणाचे हे पंचवीसावे वर्ष असून 2001 साली ह्या कार्याला सुरुवात झाली आणि 2007 साली सह धर्मादाय आयुक्तांकडून नोंदणी प्रमाणपत्र व सचोटीने समाजकार्य व पारदर्शी व्यवहारामुळे आयकर विभागाचे कर सवलतीचे “80 जी” हे प्रमाणपत्र देखील मिळाले असेही संदीप खर्डेकर म्हणाले.पुण्यनगरीत अनेक दानशूर व्यक्ती असून त्यांच्या देणगीवर फाउंडेशन चे काम सुरु असून येणाऱ्या काळात सी एस आर निधीच्या माध्यमातून शाश्वत प्रकल्प उभारणीवर भर देणार असल्याचे संदीप खर्डेकर म्हणाले.
यावेळी ओम नवनाथ मित्र मंडळ, बाल तरुण मित्र मंडळ, पांडुरंग कॉलोनी,एरंडवणा मित्र मंडळ,कर्वे रोड,दशभुजा मित्र मंडळ, कर्वे रोड यांना कपाट तर इतर मंडळाना खुर्च्या व वॉटर प्युरिफायर भेट देण्यात आले व दीपावली च्या शुभेच्छा देण्यात आल्या.
सौ.मंजुश्री खर्डेकर यांनी दीपावली च्या शुभेच्छा देतानाच ” आपण आपल्या कुटुंबासह दिवाळी साजरी करत असताना समाजात ज्यांच्या कडे काही कमी आहे जे गरजू आहेत त्यांनाही आपल्या आनंदात सहभागी करून घेतले पाहिजे व फूल ना फुलाची पाकळी म्हणून त्यांच्यासाठी ही काही मिठाई, कपडे, दिवे किंवा इतर वस्तूंचा छोटासा का होईना वाटा देऊन आपली सामाजिक बांधिलकी जपली पाहिजे असे सांगितले.
उपस्थित कार्यकर्त्यांच्या वतीने सुधीर फाटक यांनी आभार व्यक्त करताना ” क्रिएटिव्ह फाउंडेशन तर्फे कायमस्वरूपी उपयोगी वस्तूंची भेट हा नवा पायंडा सर्वांनीच अनुकरण करावे असा असल्याचे मत व्यक्त केले.

पुणे : दिवाळीच्या आनंदसोहळ्यात समाजातील विशेष मुलांचा सहभाग वाढविण्याच्या उद्देशाने श्रीकांत सौंदणकर यांच्या *‘पुणे–अक्कलकोट–पुणे वारी’*तर्फे एक अनोखा उपक्रम राबविण्यात आला. या उपक्रमांतर्गत सिंधू विद्या भवन शाळेतील विशेष मुलांना दिवाळी फराळाचे वाटप करण्यात आले.

 या प्रसंगी शाळेचे वातावरण उत्साह, आनंद आणि भावनिक ऊर्जेने भरून गेले.कार्यक्रमास सिंधू विद्या भवनाच्या मुख्याध्यापिका प्रज्ञा सूर्यवंशी, आयईसी शाळेच्या रूपा साळवी, अमृता भागवत, देवयानी बोरसे, अमित होळकर तसेच संस्थेचे सेवेकरी उपस्थित होते. उपस्थित पाहुण्यांनी मुलांशी संवाद साधत त्यांच्या प्रयत्नांचे व कौशल्याचे कौतुक केले.

श्रीकांत सौंदणकर यांनी सांगितले की, “प्रत्येक वर्षी दिवाळीच्या काळात समाजातील विविध घटकांपर्यंत प्रेम आणि आनंद पोहोचवणारे उपक्रम आम्ही राबवतो. विशेष मुलांसोबत वेळ घालवणे आणि त्यांच्या चेहऱ्यावर हास्य फुलवणे हे आमच्यासाठी सर्वात मोठे समाधान आहे. हे उपक्रमाचे चौथे वर्षे असून संस्थेकडून वर्षभर विविध सेवाभावी व सामाजिक कार्यक्रम घेतले जातात. समाजसेवेचा हा सातत्यपूर्ण धागा आता पुण्यातील अनेक शाळा आणि सामाजिक गटांपर्यंत पोहोचला आहे. 

विशेष मुलांनी तयार केलेल्या वस्तूंचे प्रदर्शन

 सिंधू विद्या भवन शाळेतील विशेष मुलांनी स्वतःच्या हाताने तयार केलेल्या वस्तूंचे प्रदर्शन आज झाले. मुलांनी तयार केलेल्या वस्तूंमध्ये जेली मेणबत्त्या, आकर्षक पणत्या, लटकन, तोरणे, टी-कोस्टर, सुबक पाकिटे, ब्रेसलेट, कानातले अशा विविध वस्तूंचा येथे विक्रीसाठी उपलब्ध होत्या. नागरिकांनी मोठ्या संख्येने उपस्थित राहून या मुलांचा उत्साह वाढवला.