पुणे, दि. 12 : आंबेगाव तालुक्यातील महापारेषणच्या पिंपळगाव 132/33 केव्ही अतिउच्चदाब उपकेंद्राचे लोकार्पण दि. 21 जुलैला राज्याचे ऊर्जा, नवीन व नवीकरणीय ऊर्जा व राज्य उत्पादन शुल्क मंत्री ना. श्री. चंद्रशेखर बावनकुळे यांच्याहस्ते होणार आहे.

आंबेगाव तालुक्यातील महापारेषणचे पिंपळगाव (खडकी) 132/33 केव्ही उपकेंद्राची व पारेषण वाहिन्यांची सुमारे 27 कोटींच्या खर्चातून उभारणी पूर्ण झाली आहे. या उपकेंद्राला काठापूर 220 केव्ही उपकेंद्रातून वीजपुरवठा होणार आहे. आंबेगाव तालुका व परिसराला सध्या 33/11 केव्ही उपकेंद्रातून वीजपुरवठा होत आहे. त्यामुळे वीजपुरवठ्यात काही तांत्रिक अडचणी उद्‌भवत होत्या. परंतु महापारेषणच्या या नवीन 132/33 केव्ही उपकेंद्रामुळे या सर्व परिसरातील उद्योजक, कृषीपंपधारकांसह सर्व वीजग्राहकांना यापुढे सुरळीत व योग्य दाबाचा वीजपुरवठा होणार आहे. दि. 21 जुलै रोजी सकाळी 11 वाजता राज्याचे ऊर्जामंत्री ना. श्री. चंद्गशेखर बावनकुळे यांच्याहस्ते या 132 केव्ही उपकेंद्राचे लोकार्पण होणार आहे. कार्यक्रमाच्या अध्यक्षस्थानी पुणे जिल्ह्याचे पालकमंत्री ना. श्री. गिरीश बापट राहतील तर प्रमुख पाहुणे म्हणून खासदार श्री. शिवाजीराव आढळराव पाटील, आमदार श्री. दिलीप वळसे पाटील, जिल्हा परिषदेचे अध्यक्ष श्री. विश्वासराव देवकते, उपाध्यक्ष श्री. विवेक वळसे पाटील यांची उपस्थिती राहणार आहे.

तसेच दि. 21 जुलैला ना. श्री. चंद्गशेखर बावनकुळे हे लोकप्रतिनिधींसमवेत ऊर्जाविषयक समस्यांबाबत बैठक घेणार आहेत. सकाळी 9 वाजता शिरुर तालुक्यासाठी शिरुर येथे तर दुपारी अडीच वाजता आंबेगाव तालुक्यासाठी पंचायत समिती कार्यालय, घोडेगाव येथे बैठक होणार आहे.

पुणे -महानगरपालिकेने महिन्याच्या शेवटच्या सोमवारी पीएमपीतून मोफत प्रवास योजनेच्या अंमलबजावणीबाबत चर्चा करण्यासाठी गेलेले काँग्रेस नगरसेवक आबा बागूल आणि पुणे महानगर परिवहन महामंडळाचे (पीएमपी) अध्यक्ष तुकाराम मुंढे यांच्यात सोमवारी शाब्दिक वाद झाला ,या वेळी बागूल यांनी कर्मचाऱ्यांना धमकावून, मुंढे यांनाही दमबाजी केल्याचे पीएमपी प्रशासनाचे म्हणणे आहे. या पार्श्वभूमीवर पीएमपी प्रशासनाच्या तक्रारीवरून बागूल यांच्या विरोधात स्वारगेट पोलिस स्टेशनमध्ये अदखलपात्र गुन्हा दाखल केला आहे.आबा बागुल यांना १५ मिनिटे आपल्या कार्यालयाबाहेर बसवून नंतर त्यांना मुंडे यांनी आत बोलाविल्याचा प्रकार हि यामुळे उघडकीस आला आहे .या पूर्वी महापौर मुक्ता टिळक ,स्थायी समितीचे अध्यक्ष मुरलीधर मोहोळ यांच्याशी खटके उडाल्यानंतर वाद  वाढू नये म्हणून सत्ताधारी असलेल्या  भाजपाने त्यावर पडदा टाकला होता.तेव्हा खुद्द मुख्यमंत्री च मुंडेंच्या पाठीशी असल्याचे बोलले जात होते .  आता मुंडे यांचा कॉंग्रेस पक्षातील ज्येष्ठ नगरसेवक आबा बागुलांशी वाद झाला आहे . अर्थात बागुलांना पक्षांतर्गत विरोध आहेच . पण अशा घटनेने सर्वच नगरसेवक हबकून गेले आहेत . बस बाबत कोणतीही मागणी मुंडे यांच्याकडे घेवून जायला आता कोणी धजावेल असे चित्र नाही .

या बाबत मिळालेल्या माहितीनुसार, सोमवारी सकाळी बागूल हे पीएमपीच्या स्वारगेट येथील कार्यालयात गेले होते. पीएमपीच्या प्रवाशांना एक दिवसीय मोफत पास देण्याची योजना चर्चेत होती. त्या योजनेच्या अंमलबजावणीबाबत चर्चा करण्यासाठी बागूल गेले होते. त्यावेळी मुंढे आणि बागुल यांच्यातील चर्चेच रुपांरत वादात झाले. त्या वेळी बागूल यांनी मुंढे यांना कार्यकर्त्यांसह उपोषण करण्याची धमकी दिली. या पार्श्वभूमीवर पीएमपी प्रशासनाने स्वारगेट पोलिस स्टेशनमध्ये सुरक्षा रक्षकामार्फत तक्रारीचे पत्र पाठविले.
या बाबत बागुल म्हणाले शहराची सार्वजनिक वाहतूक सेवा असलेल्या पीएमपीकडे नागरिक आकर्षित व्हावेत आणि खासगी वाहने न वापरता सार्वजनिक वाहतूक सेवेचा अधिकाधिक वापर वाढावा यासाठी पुणे महानगरपालिकेने महिन्याच्या शेवटच्या सोमवारी पीएमपीतून मोफत प्रवासासाठी पालिकेच्या मुख्यसभेने मान्य केलेल्या ठरावाची अंमलबजावणी आजतागायत झालेली नाही.
विशेष म्हणजे पीएमपीला तोट्यातून वाचविण्यासाठी तसेच या योजनेचा आर्थिक भार पडू नये यासाठी सुमारे पावणे दोन कोटी रुपयेही महापालिका पीएमपीएमएलला अदा करणार आहे. त्यासाठीच महिन्यातून शेवटच्या सोमवारी पीएमपीतुन मोफत प्रवास हा सार्वजनिक वाहतुकीला चालना देणारा ठरणार आहे असे असताना पीएमपी प्रशासनाची भूमिकाच नकारात्मक असल्याचे वेळोवेळी दिलेल्या निवेदनाला कोणतीही दखल न दिल्याने स्पष्ट होत आहे.
त्यामुळे करदात्या पुणेकरांच्या रकमेची लूट होऊ नये आणि पीएमपीचे तूट कमी करण्यासाठी वेळ पडली तर रस्त्यावर उतरण्यास मागे पुढे पाहणार नाही, पुणेकरांच्या हितासाठी अगदी पीएमपीसेवा रोखून आंदोलन होईल असा इशाराही आबा बागुल यांनी दिला आहे.

पुणे ज्येष्ठ व्यंगचित्रकार मंगेश तेंडुलकर  यांचे रात्री उशिरा निधन झाले. पुण्यातील राहत्या घरी त्यांनी अखेरचा श्वास घेतला. ते ७८ वर्षे वयाचे होते .व्यंगचित्राबरोबरच ललित लेख व विविध विषयांवर ते नियतकालिके व वर्तमानपत्रात लिहित. आज (मंगळवार) दुपारी एक वाजता वैकुंठ स्मशानभुमीत त्यांच्यावर अंत्यसंस्कार करण्यात येणार आहे.

मंगेश तेंडुलकर अखेरच्या क्षणापर्यंत कार्यरत होते. मागील महिन्यातच त्यांच्या व्यंगचित्रांचे प्रदर्शन पुण्यात भरले होते. त्यांच्या प्रत्येक प्रदर्शनाला उत्तम प्रतिसाद मिळत असत. प्रत्येक विषयावर ते परखडपणे भाष्य करत. व्यंगचित्राबरोबरच पुण्यातील सामाजिक व सांस्कृतिक क्षेत्रातही ते हिरिरीने भाग घेत. पुण्यातील वाहतूक समस्येसाठी ते 1996 पासून कार्यरत होते .सविता चारुदत्त गोखले यांच्या ; पुणे दर्शन नावाच्या भारतातील पहिल्या खाजगी व्हिडीओ न्यूज बुलेटीन ला त्यांची व्यंगचित्रे प्रदर्शित करण्याचे काम तत्कालीन पुणे दर्शन चे संपादक आणि मुख्य वार्ताहर लोणकर बंधू यांनी केले होते . तेव्हा पासून पुण्याच्या वाहतूक विषयावर ते वेळोवेळी रस्त्यावर उतरत आले . . ते नियमितपणे कर्वे रस्त्यावर उभे राहून वाहतुकीचे नियम पाळण्यासाठी जनजागृती करत.  त्यांचा हा शिरस्ता सुरूच  होता

अनेक व्यंगचित्रकारांचे प्रेरणास्त्रोत असलेले मंगेश तेंडुलकर हे समाजातील प्रत्येक घटनेकडे तटस्थपणे पाहत. वयाच्या सत्तरीनंतर त्यांनी कॅरिकेचर्स काढण्यास सुरूवात केली. या वयातही त्यांनी नवीन शिकायची उर्मी बाळगत त्यात हातखंडा मिळवला होता. त्यांनी स्वत:च्या मृत्यूवरही व्यंगचित्र काढले होते. त्यांच्यावर आज दुपारी एक वाजता अंत्यसंस्कार केले जाणार आहे.

मंगेश तेंडुलकरांची लेखनसंपदा:
भुईचक्र
संडे मूड : (५३ लेख आणि जवळपास तेवढीच व्यंगचित्रे असलेले पुस्तक)
अतिक्रमण
कुणी पंपतो अजून काळोख
’बित्तेशां?’ ‘दांकेशां!’

त्यांना मिळालेले पुरस्कार
संडे मूड’ पुस्तकासाठी सावानाचा वि.मा.दी. पटवर्धन पुरस्कार
मसापचा चिं.वि. जोशी पुरस्कार

पुणे – विभागीय भ्रष्टाचार निर्मूलन समितीची बैठक आज विभागीय आयुक्त चंद्रकांत दळवी यांच्या अध्यक्षतेखाली जिल्हाधिकारी कार्यालयातील सभागृहात पार पडली. या बैठकीस पोलीसमहानिरिक्षक विश्वास नांगरे पाटील, महसूल उपायुक्त सुधाकर तेलंग, निवासी उपजिल्हाधिकारी राजेंद्र मुठे, तहसीलदार डी.एस.कुंभार उपस्थित होते.

या बैठकीत भ्रष्टाचाराच्या संदर्भात तीन तक्रारींवर सुनावणी झाली. महानगरपालिका, पोलीस विभागाकडील भ्रष्टाचाराच्या तक्रारींवर तात्काळ कारवाई करण्याचे निर्देश यावेळी विभागीय आयुक्त दळवी यांनी उपस्थित अधिकाऱ्यांना  दिले. त्याचप्रमाणे भ्रष्टाचारासंबधी प्रलंबीत असलेल्या तक्रारींवरील कार्यवाहीचा आढावा विभागीय आयुक्त यांनी घेतला.

बैठकीला समितीचे सदस्य, पोलीस, महानगरपालिका विभागाचे अधिकारी उपस्थित होते.

पुणे -कॅम्प भागातील युवकांनी एकत्रित येऊन सुरु केले ” पोटभर जेवण ” चा व्यवसाय महात्मा गांधी रोडवरील अरोरा टॉवर्स चौक येथे सुरु केला . यामध्ये अरविंद अशोकी तेजी , सोनू केमुसकर या युवकांनी आपल्याला स्वतःच्या पायावर उभे राहण्यासाठी या युवकांनी एकत्रित येऊन लोकांना ना नफा ना तोटा तत्वावर अवघ्या ३० रुपयांमध्ये पोटभर जेवण देण्याचा व्यवसाय केला .

हे युवक स्वतः किराणा माल व भाजी खरेदी करतात . प्युअर रिफाईंड तेलामध्ये सर्व जेवण तयार केले जाते . दुपारी लष्कर भागातील विविध ऑफिसेस तसेच व्यवसायिक या पोटभर जेवणाचा आस्वाद घेतात . जसजशी दुपार होते तशी खवय्यांची गर्दी होते . अशी माहिती सोनू केमुस्कर यांनी दिली . त्यांना मदतीसाठी या युवकांची आजी सुनीता तेजी आणि मीरा चव्हाण हे मसाला बनवून देण्याचे काम करतात . गरमागरम जेवणाचा आस्वाद घेण्यासाठी तुम्हाला पुणे कॅम्पातील एम जी रोडवरील अरोरा टॉवर्स चौकात यावे लागेल .