डॉ. प्रकाश जाधव लिखित ‘प्रक्षोभ’ कादंबरीचे प्रकाशन

पुणे : गावकुसाच्या आतील आणि गावकुसाबाहेरील अनेक व्यक्तिरेखा डॉ. प्रकाश जाधव यांनी मनोविश्लेषणात्मक पद्धतीने ‘प्रक्षोभ’ या कादंबरीत मांडलेल्या आहेत. बुद्धिवादी संवेदनशील मनाचा प्रकाश या कादंबरीतून दिसतो आहे. वेदनेतून निर्माण झालेली ही कलाकृती मराठी साहित्यातील वैभव आहे,असे गौरवोद्‌गार अखिल भारतीय मराठी साहित्य संमेलनाचे माजी अध्यक्ष, ज्येष्ठ विचारवंत डॉ. श्रीपाल सबनीस यांनी काढले. वेदनेच्या जंजाळात अडकलेल्या या नायकाने कांदबरीच्या माध्यमातून आयुष्याचे सोने करण्याचा प्रयत्न केला आहे, असेही ते म्हणाले.

डॉ. प्रकाश जाधव लिखित ‘प्रक्षोभ’ या कादंबरीच्या दुसऱ्या आवृत्तीचे प्रकाशन आज (दि. २८) ज्येष्ठ लेखिका इंदूमती जोंधळे यांच्या हस्ते झाले. त्या वेळी डॉ. श्रीपाल सबनीस अध्यक्षपदावरून बोलत होते. ज्येष्ठ लेखक भीमराव पाटोळे, सुप्रसिद्ध लेखक देवा झिंजाड, महाराष्ट्र साहित्य परिषदेचे कार्यवाह शिरीष चिटणीस, सकाळ प्रकाशनचे प्रमुख आशुतोष रामगीर, मराठी अभ्यास मंडळाचे अध्यक्ष डॉ. संदीप सांगळे मंचावर होते. महाराष्ट्र साहित्य परिषदेच्या माधवराव पटवर्धन सभागृहात कार्यक्रमाचे आयोजन करण्यात आले होते. सकाळ प्रकाशनतर्फे पुस्तक प्रकाशित करण्यात आले आहे.

लेखकाने अनेक पात्रांची वास्तव भाषेत केलेली मांडणी भावते, असे सांगून डॉ. सबनीस पुढे म्हणाले, मनोविश्लेषणात्मक केलेले लिखाण हा या कादंबरीचा आत्मा आहे.

भीमराव पाटोळे म्हणाले, जगण्यासाठी आयुष्यभर संघर्ष करणाऱ्या समाजासाठी ही कादंबरी मार्गदर्शक ठरणारी आहे. शालेय वयात मराठी बोलता, लिहिता न येणाऱ्या व्यक्तीला कादंबरी लिहिता येणे ही एक प्रकारे दैवी शक्ती आहे.

जगणे, भोगणे आणि लिहिणे यातील अंतर खूप कमी असलेला डॉ. प्रकाश जाधव हा माणूस आहे. लिखाणातून त्यांच्या मनाची अस्वस्थता दिसून येते. घरातूनच त्यांच्या शिक्षणाला विरोध झाला नसता तर ते लिहिते झाले नसते. आयुष्यात भोगलेल्या हालअपेष्टा लिखाणातून रिते करण्याचा त्यांनी प्रयत्न केला आहे. आयुष्यात जे घडले ते त्यांनी प्रांजळपणे मांडले आहे.

इंदूमती जोंधळे म्हणाल्या, समाजाचे देणे लागतो या भावनेने डॉ. प्रकाश जाधव यांनी स्वत:च्या शिक्षणासाठी पैसा नसतानाही २५ मुलांच्या शिक्षणाची जबाबदारी घेतली यासाठी मोठे औदार्य लागते. हलाखीची परिस्थिती असतानाही शिक्षणाद्वारे ते स्वत: प्रकाशनमान झाले त्याचप्रमाणे इतरांच्या आयुष्यातही त्यांनी प्रकाश दिला.

लेखनाविषयी मनोगत व्यक्त करताना डॉ. प्रकाश जाधव म्हणाले, शिक्षण, लिखाणामुळे जीवनाकडे बघण्याचा दृष्टीकोन मिळाला. मराठी भाषेची जबाबदारी केवळ अभिजनांनीच घेतलेली नाहीये तर आम्ही सुद्धा घेतली आहे, हे मुद्दाम सांगावेसे वाटते.   

शिरीष चिटणीस यांनी मान्यवरांचा परिचय करून दिला तर स्वागत आशुतोष रामगीर, रश्मी जाधव यांनी केले. कार्यक्रमाचे सूत्रसंचालन अपर्णा जोग यांनी केले. आभार डॉ. संदीप सांगळे यांनी मानले.

पुणे- भाजपमधील अंतर्गत संघर्ष टोकाला गेला आहे. भाजपच्या एका महिला पदाधिकाऱ्याला भारतीय जनता युवा मोर्चाच्या प्रदेशाध्यक्षाच्या नावाने टोळक्याने जिवे मारण्याची धमकी दिल्याची संतापजनक घटना चिंचवड येथे घडली आहे. या प्रकरणी भाजयुमोचे प्रदेशाध्यक्ष अनुप मोरे यांच्यासह आठ जणांविरोधात चिंचवड पोलिस ठाण्यात गुन्हा दाखल करण्यात आला आहे.

३६ वर्षीय पीडित महिला ही भाजपमध्ये संघटनात्मक पदावर कार्यरत आहे. २६ ऑक्टोबर रोजी त्यांनी चिंचवड पोलिस ठाण्यात याबाबत तक्रार नोंदवली. तक्रारीनुसार अनुप मोरे (वय ४३, रा. निगडी प्राधिकरण), अनिता तिपाले, एकविरा खान, प्रवीण यादव, आशिष राऊत, गौरव गोळे, सागर घोरपडे आणि जयेश मोरे अशी आरोपींची नावे आहेत.२६ ऑक्टोबर रोजी दुपारी सुमारास पीडित महिला ओळखीच्या व्यक्तीला भेटण्यासाठी चिंचवड येथे गेल्या असता काही संशयितांनी त्यांना अडवले. ‘आमचा दादा अनुप मोरे येथे असताना तू इथे का आलीस? तुला जिवंत ठेवणार नाही. तुला गाडीखाली घालून संपवू. अनुप मोरेने तुला संपवायचे सांगितले आहे. तुला बदनाम करून जगणे अवघड करू,’ अशा धमक्या त्या टोळक्याने दिल्या, असे तक्रारदार महिलेच्या फिर्यादीत नमूद आहे.
या धमकीने घाबरलेली पीडित महिला परत बंगल्यात गेल्या असता, नंतर काही महिला आणि तरुणांनी त्यांच्या गाडीला घेराव घातला. नंतर त्या पोलिस ठाण्यात फिर्याद देण्यासाठी गेल्या असता, अनिता तिपाले आणि एकविरा खान यांनी पोलिस ठाण्याच्या परिसरातच त्यांच्याशी वाद घालून मारहाण आणि शिवीगाळ केली, असा आरोप करण्यात आला आहे. तक्रार दाखल केल्यानंतर पीडित महिला पोलिस ठाण्याबाहेर पडताच सुमारे शंभर जणांच्या गर्दीने पुन्हा ‘तुला ठार करू’ अशी धमकी दिली. दरम्यान, पीडित महिलेच्या जबाबात आठ जणांची नावे नमूद केली असताना सुरुवातीला अनुप मोरे यांचे नाव गुन्ह्यातून वगळण्यात आले होते. मात्र फिर्यादीने यावर आक्षेप घेतल्यानंतर पोलिसांनी अनुप मोरे यांचा नाव आरोपींमध्ये समाविष्ट केल्याची माहिती मिळाली. या त्रुटीबाबत पोलिसांनी ‘नाव अनावधानाने राहून गेले’ असे स्पष्टीकरण दिले आहे. सध्या या प्रकरणामुळे भाजपमध्ये मोठी खळबळ उडाली असून, अंतर्गत गटबाजी पुन्हा एकदा चव्हाट्यावर आली आहे.पोलिस उपनिरीक्षक सुजाता पाटील या घटनेचा अधिक तपास करत आहेत.

पुणे, दि. २८: पुणे गृहनिर्माण व क्षेत्रविकास मंडळाकडून विविध योजनेंची ११ सप्टेंबर २०२५ रोजी प्रसिद्ध करण्यात आलेल्या जाहिरातीत अर्ज भरण्याची अंतिम मुदत ३१ ऑक्टोबर २०२५ पर्यंत होती, तथापी नागरिकांकडून कागदपत्रांची पुर्तता करण्याकरिता व इतर कारणांस्तव अर्ज करण्यासाठी मुदतवाढ देण्याबाबत मागणी होत आहे.

नागरिकांची मागणी व सोडतीसाठीचा उत्स्फूर्त प्रतिसाद बघता २१ नोव्हेंबर २०२५ पर्यंत अर्ज करण्यास मुदतवाढ देण्यात येत आहे. सोडतीसाठीचे नवीन वेळापत्रक म्हाडाच्या संकेतस्थळावर उपलब्ध करुन देण्यात येणार असून इतर मजकूरही ११ सप्टेंबर २०२५ रोजी प्रसिद्ध करण्यात आलेल्या जाहिरातीप्रमाणे राहील, असे म्हाडाचे मुख्य अधिकारी राहूल साकोरे यांनी प्रसिद्धी पत्रकान्वये कळविले आहे.

लवकरच लोकार्पण सोहळा जगभरातील मान्यवर येणार डॉ. प्रा. विश्वनाथ कराड
      पुणे :- सर्वधर्मसमभाव आणि विश्वबंधुत्वाचा एक नवा आदर्श निर्माण करणाऱ्या लातूर तालुक्यातील मौजे रामेश्वर (रुई) हे महात्मा गांधीजींच्या स्वप्नातील स्वावलंबी व आदर्श गाव म्हणून उदयास आले असून येथे भव्य दिव्य उभारण्यात आलेल्या  ‘विश्वधर्मी मानवतातीर्थ भवन’च्या माध्यमातून संपूर्ण जगाला ‘वसुधैव कुटुंबकम्’ व ‘एकं सत् विप्रा बहुदा वदंती’ हा मानवतेचा संदेश देण्याचा प्रयत्न आहे अशी माहिती एमआयटी वर्ल्ड पीस यूनिवर्सिटीचे संस्थापक अध्यक्ष विश्वधर्मी प्रा. डॉ. विश्वनाथ दा. कराड आयोजित पत्रकार परिषदेत बोलताना दिली.
         राष्ट्रपिता महात्मा गांधी यांनी एक आदर्श व स्वयंपूर्ण खेडे कसे असावे, याची संकल्पना मांडली या संकल्पनेला अनुसरून डॉ प्रा. विश्वनाथजी कराड यांच्या पुढाकाराने रामेश्वर (रुई) येथे आदर्शवत् व स्वावलंबी असे खेडे निर्माण करण्यासाठी ग्रामस्थांसोबत, रामेश्वर (रुई) गावाचे रूप पालटून आता त्याची विश्वधर्मी मानवता तीर्थ अशी ओळख निर्माण झाली आहे. प्रभु श्रीराम मंदिर, जामा मस्जिद व हजरत जैनुद्दिन चिस्ती दर्गा याचे पुर्ननिर्माण रामेश्वर (रुई) गावातील समस्त हिंदू-मुस्लिम बांधवांनी एकत्रित येऊन केले व सर्वधर्मसमभाव आणि विश्वबंधुत्वाचा एक नवा आदर्श भारतासमोर ठेवला. त्याचप्रमाणे, भारतातील सर्वात मोठा लाल मातीचा कुस्ती आखाडा, ग्रामीण रुग्णालय व वाचनालय, सर्व धर्मांचा संदेश देणारा विश्वधर्मी श्रीराम-रहीम मानवता सेतू, तथागत भगवान गौतम बुद्ध विहार व भारतरत्न डॉ. बाबासाहेब आंबेडकर स्मृती भवन, रामेश्वर (रुई) चे श्रद्धास्थान असलेले संत श्री गोपाळबुवा महाराज यांचे अत्यंत सुंदर समाधी मंदिर अशा विविध समाजोपयोगी उपक्रमातून रामेश्वर (रुई) हे महात्मा गांधींच्या स्वप्नातले स्वावलंबी व आदर्श गाव म्हणून ओळखले जाऊ लागले आहे.
         विश्वधर्मी मानवता तीर्थ भवन’ लातूर तालुक्यातील मौजे रामेश्वर येथे साकार होत असून याबाबत माहिती देण्यासाठी आयोजित करण्यात आलेल्या पत्रकार परिषदेस डॉ प्रा विश्वनाथ कराड यांच्यासह प्रगतशील शेतकरी काशीरामनाना कराड, डॉ महेश थोरवे आणि गिरीश दाते यांची उपस्थिती होती यावेळी बोलताना डॉ प्रा विश्वनाथजी कराड म्हणाले की,
विश्वशांती, सर्वधर्मसमभाव, विश्वबंधुत्व आणि मानवतेचा संदेश देणारी एकमेवाद्वितीय वास्तु रामेश्वर (रुई) येथे साकार होत असून या वास्तूस ‘विश्वधर्मी मानवता तीर्थ भवन’ असे नामकरण करण्यात आले आहे. भारतीय संस्कृतीचे ‘वसुधैव कुटुंबकम्’ व ‘एकं सत् विप्रा बहुधा वदन्ति’ हे संदेश जगाला विनाशापासून वाचवू शकतात, अशी आमची धारणा आहे आणि हाच संदेश एकमेवाद्वितीय अशा ‘विश्वधर्मी मानवतातीर्थ भवन’च्या माध्यमातून संपूर्ण जगाला देण्याचा हा प्रयत्न आहे.
       विश्वधर्मी मानवतातीर्थ भवन हे २५० फूट लांब आणि ९० फूट रुंद एवढ्या मोठ्या छताचे उभारणी केली असून भारतीय संस्कृती, परंपरा आणि तत्त्वज्ञानाचे मूर्तिमंत प्रतीकच म्हणावे लागेल. या भवनात मानवतेचा इतिहास घडविणाऱ्या अनेक थोर संत, शास्त्रज्ञ, तत्त्वज्ञ यांच्या भव्य चित्रांमधून आणि त्यांच्या संदेशांमधून मानवता भवनाचे एक आगळेवेगळे दर्शन समाजाला घडेल, यात शंका नाही या भावनाचा योग ध्यानधारणा व ओकार साधना, केंद्र, सरपंच परिषद तसेच इतर ग्रामपंचायती संबंधी कार्यक्रम, कृषी मेळावे, कुस्ती स्पर्धा तसेच टेबलटेनिस, कॅरम इ. इनडोअर खेळ, रक्तदान शिबिरे, विविध विषयांवरच्या परिषद चर्चासत्र कार्यशाळा, मुलांसाठी संस्कार शिबिर, महिला बचत गटांच्या बैठका / मेळावे, लोकशिक्षण व साक्षरता कार्यक्रम, पत्रकारांसाठीचे मेळावे, लोकोपयोगी प्रदर्शने, सांस्कृतिक कार्यक्रम, वारकरी प्रशिक्षण केंद्र, भागवत सप्ताह, भजन / कीर्तन / भारूड संबंधी कार्यक्रम, विविध वस्तूंचे प्रदर्शन
या शिवाय इतर विविध लोकोपयोगी कार्यक्रमाठी वापर केला जाणार आहे.
       सदरील रामेश्वर (रुई) येथे साकारण्यात आलेल्या ‘अद्वितीय विश्वधर्मी मानवतातीर्थ विश्वधर्मी मानवता तीर्थ भवन’ या वास्तूचा लोकार्पण सोहळा १४ नोव्हेंबर २०२५ रोजी आयोजित करण्यात आला आहे या कार्यक्रमास देशभरातीलच नव्हे तर जगभरातील अनेक मान्यवर मंडळी उपस्थित राहणार आहे अत्यंत अस्मरणीय असा लोकार्पण सोहळा होईल. अशी माहिती एमआयटी वर्ल्ड पीस यूनिवर्सिटी चे संस्थापक अध्यक्ष विश्वधर्मी प्रा. डॉ. विश्वनाथ दा कराड यांनी पत्रकार परिषदेत दिली. यावेळी काशीराम दा कराड, गिरीश दाते आणि डॉक्टर महेश थोरवे उपस्थित होते.

पुणे : तीन नॅशनल गेमसाठी महाराष्ट्र शासनाने दिलेल्या १२ कोटी ४५ लाख रुपयांचा निधी दिला असताना त्या निधीचा अपहार करुन खेळाडुंना निकृष्ट दर्जाचे साहित्य दुप्पट किंमतीला खरेदी केल्याचे दाखवून शासनाची फसवणुक केल्याप्रकरणी महाराष्ट्र ऑलिंपिक असोसिएशनचे महासचिव नामदेव संपत शिरगावकर यांच्याविरुद्ध गुन्हा दाखल करण्यात आला आहे.नामदेव संपत शिरगावकर Namdev Sampat Shirgaonkar (रा. कोरोल्ला ज्युएल हौसिंग सोसायटी,मरोळ, अंधेरी पूर्व, मुंबई) असे गुन्हा दाखल झालेल्यांचे नाव आहे.याबाबत महाराष्ट्र राज्य कुस्तीगार संघ या संघटनेचे कार्याध्यक्ष संदीप उत्तमराव भोंडवे (वय ५१, रा. जाणता राजा कुस्ती केंद्राजवळ, लोणीकंद) यांनी समर्थ पोलीस ठाण्यात फिर्याद दिली आहे.पोलिसांनी दिलेल्या माहितीनुसार, खेळाडुंसाठी अदिदास या कंपनीचे ट्रॅकसुट प्रत्येकी २५०० रुपयांना घेतल्याचे दाखविण्यात आले आहे. परंतु ते ट्रॅकसुट ओरीजनल कंपनीचे नसून नाझीयाबाद येथील एक्झॉटिका एलियन या कंपनीकडून प्रत्येकी १२०० रुपयांना मुंबईतील विरा स्पोर्टस यांनी खरेदी केलेले आहेत. परंतु हे ट्रॅकसुट महाराष्ट्र ऑलिंपिक असोसिएशन यांनी पुण्यातील दत्तवाडी येथील अजिंक्य सप्लायर्स यांच्याकडून २५०० रुपयांना खरेदी केल्याचे दाखविले आहे. असा प्रकार ब्लेझर, शुज, टी शर्ट, टर्कीश टॉवेल, कीट बॅग याबाबतीत देखील झाल्याचे संशय व्यक्त करण्यात आला आहे. तसेच खेळाडुंच्या विमान प्रवासावर ७१ लाख ९६ हजार ८७२ रुपये इतका अवास्तव खर्च दाखविण्यात आला आहे. अपहार लपविण्यासाठी ते खोट्या व बोगस पावत्या गोळा करत असल्याची खात्रीशीर माहिती आहे, असे फिर्यादीत नमूद केले आहे. वरिष्ठ पोलीस निरीक्षक उमेश गित्ते याप्रकरणी तपास करीत आहेत.

महाराष्ट्र ऑलिंपिक असोसिएशन ही खेळ संघटना महाराष्ट्रातील सर्व खेळांची शिखर संघटना आहे. तिला भारतीय ऑलिंपिक असोसिएशनची संलग्नता असल्याने राज्यातील प्राविण्यधारक खेळाडुंना पुरस्कार देण्यासाठी शालेय विद्यार्थ्यांना ५ टक्के गुणांची सवलत देण्यासाठी शासनाकडे यासंघटनेची शिफारस लागत असते. तसेच प्रत्येक ४ वर्षांनी होणाऱ्या नॅशनल गेम्स करीता महाराष्ट्र शासनाकडून निधी घेऊन राज्यातील विविध खेळांचे संघ पाठवण्यासाठी जबाबदारी सुद्धा या असोसिएशनकडे असते. महाराष्ट्र ऑलिंपिक असोसिएशनचे नामदेव शिरगावकर हे महासचिव म्हणून मागील ४ वर्षांपासून कामकाज पहात आहेत.शिरगावकर यांनी स्वत:चे नातेवाईक व जवळच्या व्यक्तींना सोबत घेऊन अनेक खेळ संघटना स्थापन केल्या असून ते स्वत: त्या संघटनेच्या विविध पदावर काम करतात.

नामदेव शिरगावकर यांच्या काळात २०२२ मध्ये गुजरात नॅशनल गेम्ससाठी ३ कोटी ५० लाख, ऑक्टोबर २०२३ मध्ये गोवा नॅशनल गेम्ससाठी ४ कोटी रुपये व जानेवारी २०२५ मध्ये उत्तराखंड नॅशनल गेम्ससाठी ४ कोटी ९५ लाख अशा प्रकारे ३ नॅशनल गेम्ससाठी महाराष्ट्र शासनाने स्पर्धेमध्ये सहभागी होण्यासाठी व खेळाडुंचे कोचिंग कॅम्पसाठी १२ कोटी ४५ लाख रुपयांचा निधी मंजूर करुन महाराष्ट्र ऑलिंपिक असोसिएशनकडे वर्ग केला होता.

निधी घेतल्यानंतर त्याच्या हिशोबाची बिले व पावत्यासहीत त्या वर्षाचे अखेर ३१ मार्च अगोदर शासनास सादर करणे आवश्यक असते. परंतु, गुजरात नॅशनल गेम्स वगळता इतर २ स्पर्धांचा खर्च महासचिव नामदेव शिरगावकर यांनी अद्याप शासनाला सादर केला नाही. फक्त गुजरात नॅशनल गेम्सचा हिशोब सादर करताना लेखा परीक्षण अहवाल सादर केला आहे. त्याच्या पावत्या, बिले व पुरवठादारांना सादर केलेली कागदपत्रे इत्यादी माहिती शासनास सादर केली नाही. त्यासाठी क्रीडा व युवक सेवा संचालनालय यांनी २६ सप्टेंबर २०२५ रोजी शिरगावकर यांना नोटीस बजावली असून त्याबाबत ३ ऑक्टोंबरपर्यंत सर्व हिशोब सादर करण्यास मुदत दिली होती. परंतु त्यांनी हिशोब सादर केला नाही.

गुजरात नॅशनल गेम्सकरीता शासनाने ३ कोटी ५० लाख रुपयांचा निधी दिला होता. त्याचे लेखापरिक्षण अहवाल त्यांनी सादर केला. ऑडिट रिपोर्टमध्ये जो खर्च दाखविण्यात आलेला आहे. त्यामध्ये अनेक बाबतीत ताळमेळ बसत नाही.