पुणे- महापालिकेच्या कमला नेहरू रुग्णालयातील डॉक्टरांनी एका अविवाहित गरोदर महिलेस दाखल करून घेण्यास नकार दिला. त्यावरून महिलांमध्ये रोष निर्माण झाला असून संबधित डॉक्टरांवर कारवाई करण्याची मागणी केली आहे.काँग्रेसच्या शहर सरचिटणीस संगीता तिवारी यांनी या प्रकरणाला वाचा फोडली आहे .
अविवाहित महिलेल्या प्रसुतीस नकार देणाऱ्या डॉक्टरांवर कारवाई करण्याचे आश्वासन महापालिका आयुक्त कुणाल कुमार यांनी दिले आहे . काँग्रेसच्या शहर सरचिटणीस संगीता तिवारी यांनीही यासंदर्भात महापालिकेच्या आरोग्य विभागाला पत्र पाठवून पुन्हा असे होणार नाही याची दक्षता घेण्याची मागणी केली.
महापालिकेच्या एका रुग्णालयात गरोदर महिलेला प्रसुतीसाठी दाखल करून घेताना ती विवाहित आहे का याची विचारणा करण्यात आली. तसे नसल्याने तिला दाखल करून घेण्यास नकार देण्यात आला. त्यामुळे त्या महिलेला खासगी रुग्णालयात प्रसुती करून घ्यावी लागली.
संगीता तिवारी यांनी प्रभारी आरोग्य अधिकारी डॉ. वैशाली साबणे यांना पत्र पाठवून महापालिकेने फक्त विवाहित महिलांनांच दाखल करून घेतले जाईल असा नियम कधी केला अशी विचारणा केली. एखाद्या महिलेच्या संदर्भात डॉक्टरांनी असे वागावे हे निषेधार्ह असल्याचे तिवारी यांनी म्हटले आहे. संबधित महिलेला त्रास होता, त्वरीत दाखल करून घेणे गरजेचे होते. अशा वेळी यंत्रणा त्यांच्याकडे नाही ती चौकशी करीत बसली व अत्यंत निर्दयपणे विवाहित नाही तर दाखल करून घेतले जाणार नाही असे उत्तर दिले. या प्रकरणाची दखल घ्यावी व संबंधित डॉक्टरांवर त्वरीत कारवाई करावी, अशी मागणी तिवारी यांनी केली आहे.

पुणे :“ज्याला नवे जग घडवावयाचे असेल, त्याने स्वतंत्रपणे विचार करावयास शिकले पाहिजे. विचारांचे सामर्थ्य फार मोठे असते. पण सर्वसामान्यपणे आपण रूळलेल्या वाटेनेच जातो. आपल्यावर पूर्वग्रहांचा पगडा असतो. असे म्हटले जाते की, विचारांनीच माणूस घडतो. सकारात्मक विचार करणार्‍यांची प्रगती लवकर होताना दिसते. त्याउलट नकारात्मक विचार करणार्‍यांना खूप अडचणींना सामोरे जावे लागते.,”असे प्रतिपादन गुजरात येथील बीएपीएस-अक्षरधाम येथील परमपूज्य साधू विवेक जीवनदास यांनी प्रतिपादन केले.
विश्‍वशांती केंद्र (आळंदी), माईर्स एमआयटी, पुणे आणि संतश्री ज्ञानेश्‍वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने युनेस्को अध्यासनांतर्गत माईर्स एमआयटीच्या संत ज्ञानेश्‍वर सभागृहात आयोजित करण्यात आलेल्या २२व्या तत्त्वज्ञ संतश्री ज्ञानेश्‍वर-तुकाराम स्मृती व्याख्यानमालेतील सहावें पुष्प गुंफताना ते बोलत होते.
कार्यक्रमाच्या अध्यक्षस्थानी प्रा. (ग्रुप कॅप्टन) दीपक आपटे हे होते. एमआयटी स्कूल ऑफ टेलिकॉमचे प्रकल्प संचालक डॉ. मिलिंद पांडे व एमआयटीचे प्राचार्य डॉ. एल. के. क्षीरसागर इ. उपस्थित होते.
परमपूज्य साधू विवेक जीवनदास म्हणाले,“सामान्यपणे आपले आपल्याच विचारांकडे लक्ष नसते, किंबहुना विचारांच्या बाबातीत जेवढी सजगता असावयास हवी, तेवढी आपल्यामध्ये नसते. एखादी चांगली गोष्ट करताना मनात येणार पहिला सृजनशील विचार पकडून ठेवता आला पाहिजे. कारण तो खर्‍या अर्थाने ताजा असतो. त्यानुसारच आपली वाटचाल असावी. तरच तुम्ही कोणत्याही क्षेत्रात यशस्वी व्हाल. तणावमुक्त जीवन जगण्यासाठी स्वतःबद्दल वेगळे विचार करण्याची क्षमता अंगी बाणविली पाहिजे, खरे म्हणजे ती क्षमता आपणात असतेच. पण आपण तिला प्रोत्साहन देत नाही. यासाठी स्वतःमध्ये शिस्त बाणवावी, जागतिक मूल्यांचे अनुकरण करून ते आपल्या जीवनात उतरवावे. या सर्वासाठी शारीरिक व मानसिक आरोग्य उत्तम असणे गरजेचे आहे. यासाठी गरज आहे ती ज्ञानयोग, भक्तीयोग आणि कर्मयोगाची. आपल्याला जीवनात उन्नती करावयाची असेल तर, त्यासाठी गुरू असणे हे अत्यंत महत्वाचे आहे. त्याशिवाय आपले पाऊल योग्य दिशेने पडत नाही व आपला विकास होत नाही.”
सकाळच्या सत्रात याप्रसंगी लोणेरे येथील डॉ. बाबासाहेब आंबेडकर तंत्रशिक्षण विद्यापीठाचे माजी कुलगुरू डॉ. सुभाष आवळे, व प्रा. दीपक आपटे यांची व्याख्याने झाली.
डॉ.सुभाष आवळे म्हणाले,“शिक्षक हे पद किंवा व्यवसाय नाही तर ही एक शुद्ध विचारांची संकल्पना आहे. ज्यात सामर्थ्य,ऊर्जा व विश्‍व सामावलेले असते. म्हणजेच शिक्षक हा एका अर्थांने गुरू असतो. नवी पिढी व देशाचे भविष्य घडविण्याचे सामर्थ्य फक्त शिक्षकांमध्येच असते. पण त्यासाठीसुद्धा उत्तम शिक्षक तयार करण्याची जवाबदारीही त्यांचीच असते. त्यामुळेच शिक्षकाजवळ शब्दसामर्थ असावे. तो उत्तम गायक, चित्रकार, अभिनेता व प्रवचनकारही असावयास हवा. या सृष्टीवरील सर्वप्रथम शिक्षक ही आईच असते. त्यामुळे तिची शिक्षवण व्यक्तीला आयुष्यभर मार्ग दाखवीत राहते.”
प्रा. दीपक आपटे म्हणाले,“ सुखी जीवन जगावयाचे असेल, तर आपल्या संपर्कातील सर्व गोष्टींचा आनंदाने स्वीकार करा. यात आपले वरिष्ठ, सहकारी, कुटुंबीय, शेजारी हे सर्व तर येतातच. पण आपले वाहन, आपले घर, आपला दूरदर्शंन संच, आपले जेवणाचे टेबल यांचेही स्वागत करा. तुम्हाला असे आढळून येईल, की आपल्या आजूबाजूच्या व्यक्ती, इतकेच नव्हे तर निर्जीव वस्तू सुद्धा आपल्याला सकारात्मक प्रतिसाद देतात. आपल्या आजूबाजूला घडणार्‍या घटना जर अटळ असतील, तर त्यांचेही स्वागत करा. मग त्या अनुकूल असोत की प्रतिकूल.”
डॉ. सुरेंद्र हेळेकर यांनी सूत्रसंचालन केले. डॉ. एल. के. क्षीरसागर यांनी आभार मानले.

पुणे:“योग आणि आत्मज्ञानाने प्रेरित होऊनच आपण विश्‍वशांती स्थापित करू शकतो. अध्यात्म आणि विज्ञान यांच्या समन्वयातून निर्माण होणारे ज्ञान-विज्ञान हे विश्‍व शांतीसाठी सर्वात प्रेरक असेल. भारतीय परंपरांमध्ये योगाचा पहिला प्रयोग ऋग्वेदात झाला. त्यानंतर या माध्यमातूनच मानव परिवर्तनाची प्रक्रिया सुरू झाली आहे,”असे प्रतिपादन भारत सरकारच्या आयकर विभागाचे प्रधान मुख्य आयुक्त डॉ.ए.सी.शुक्ला यांनी केले.
विश्‍वशांती केंद्र (आळंदी), माईर्स एमआयटी, पुणे आणि संतश्री ज्ञानेश्‍वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने युनेस्को अध्यासनांतर्गत आयोजित करण्यात आलेल्या 22व्या तत्त्वज्ञ संतश्री ज्ञानेश्‍वर-तुकाराम स्मृती व्याख्यानमालेच्या समारोप समारंभाचे प्रमुख पाहुणे म्हणून ते बोलत होते. अध्यक्षस्थानी प्रख्यात संगणकतज्ज्ञ आणि नालंदा विद्यापीठाचे कुलपति पद्मभूषण डॉ. विजय भटकर हे होते. नवी दिल्ली येथील जवाहरलाल नेहरू विद्यापीठाचे माजी उपकुलगुरू व हिंदू विश्‍वकोशाच्या दुसर्‍या खंडाचे प्रमुख संपादक डॉ.कपील कपूर हे सन्माननीय अतिथी म्हणून उपस्थित होते.
यावेळी विश्‍वशांती केंद्र (आळंदी), माईर्स एमआयटी, पुणेचे संस्थापक-अध्यक्ष प्रा. डॉ. विश्‍वनाथ दा. कराड, व्याख्यानमालेचे समन्वयक आणि मिटसॉटचे प्रकल्प संचालक प्रा.डॉ. मिलिंद पांडे, एमआयटी डब्ल्यूपीयू चे कुलसचिव (ग्रुप कॅप्टन) डी.पी. आपटे व एमआयटीचे प्राचार्य डॉ. एल. के. क्षीरसागर हे उपस्थित होतेे.
डॉ.ए.सी.शुक्ला म्हणाले,“विश्‍वशांती बद्दल विचार केल्यावर हे कळते की मनामध्ये अशांती असेल, तर आमचा विश्‍व आणि पर्यावरणाचा काय संबंध जुळू शकणार नाही. सृष्टीमधील उर्जेचा योग्य वापर न करणे व मानवामध्ये वाढत चाललेली स्वार्थी भावना यामुळेच अशांती वाढत आहे. योग आणि समाधी हे अध्यात्म आहे. त्या माध्यमातूनच आपण विश्‍वात परिवर्तन घडवून आणू शकतो. आपल्याला परंपरेने दोन गोष्टी दिल्या आहेत. त्या म्हणजे तपस्या आणि ध्यान. तसेच, जीवनामध्ये धर्म हा वैराग्य निर्माण करून विश्‍वाला जोडतो. त्यातून आत्मशांती निर्माण होते. यातूनच विश्‍व शांती निर्माण होईल.”

डॉ.कपिल कपूर म्हणाले,“ सुरूवातीपासून हा देश ज्ञान देणारा देश आहे. भारताने जगाला अध्यात्म दिले. पंजाब ने नाथपंथ व भक्ती दिली व तमिळनाडूने ज्ञान दिले. ज्ञानेश्‍वरांनी दोघांचा संगम घडवून आणला. पण वर्तमानकाळत जी संस्कृती आली आहे, ती म्हणजे पोटाची संस्कृती, विज्ञानात जेवढ्या गोष्टी होतात त्या फक्त सुख, सुविधा यावरच असतात. त्यामुळेच व्यक्ती हा शांती पासून दूर होत आहे. महाभारतीय युद्धावरून लोकांचा तत्त्वज्ञानावरून विश्‍वास उडाला. त्यानंतर भगवान महात्मा बुद्ध यांनी कर्म सिद्धांत मांडला. भागवतधर्माने फक्त कर्मसिद्धांत मांडला नाही, तर संत ज्ञानेश्‍वरांनी भक्ती परंपरा सुरू करून आत्मशांतीचा संदेश दिला. विज्ञान इंद्रियजन्य तर ज्ञान आंतरिक आहे.”
डॉ.विजय भटकर म्हणाले,“या देशातील तक्षशीला, नालंदा व काशी विद्यापीठ ही विश्‍वज्ञानाची भांडारे होती. भारताला जर 21व्या शतकात विश्‍वगुरू व्हावयाचे असेल, तर आपण या विद्यापीठांसारखी केंद्रे निर्माण केली पाहिजेत. सर्व सामान्य माणसाला सुद्धा समझेल, अशा तर्‍हेने येथील अध्यापनाची पद्धत असली पाहिजे. भाषा हा त्यातील मुख्य घटक आहे. त्यातूनच विश्‍वशांती साध्य होईल.”
प्रा. डॉ.विश्‍वनाथ दा. कराड म्हणाले,“ 1897 मध्ये स्वामी विवेकानंदांनी सांगितल्यानुसार भारत हा 21 व्या शतकात ज्ञानाचे दालन म्हणून उदयास येईल. आजची परिस्थिती पाहता आपण योग्य त्या दिशेने प्रयत्न केल्यास हे भाकीत निश्‍चितपणे साध्य होईल.”
डॉ. मिलिंद पांडे यांनी प्रास्ताविक केले. प्रा.गौतम बापट यांनी सूत्रसंचालन केले. प्रा.डी.पी. आपटे यांनी आभार मानले.

पुणे-

देआसरा फाऊंडेशनने एस एम जोशी सभागृह, पुणे येथे लघुउद्योजकांसाठी ‘आर्थिक व्यवस्थापन’ या विषयावर एक दिवसाची कार्यशाळाआयोजित केली होती. या कार्यशाळेत व्यावसायिकांना लघु उद्योग वाढीसाठी आथिर्क व्यवस्थापन व त्याचे महत्त्व या बाबतीतमार्गदर्शन करण्यात आले.
देआसरा आगामी व्यवसायांमध्ये संपूर्ण प्रक्रियेद्वारे त्यांना मार्गदर्शन करण्याकरता व्यवसायात अडथळा-मुक्त दृष्टिकोन देण्यासाठीप्रसिध्द आहे.

४० वर्षांपेक्षा जास्त अनुभव असणारे बँक ऑफ इंडियाचे माजी उपमहा व्यवस्थापक अधिकारी  वरिष्ठ अधिकारी श्री. सुधीर गिजरे जेदेआसरामध्ये मार्गदर्शक म्हणून कार्यरत आहेत यांनी उपस्थितांना मार्गदर्शन केले. त्यांनी उद्धृत केले की “नवउद्योजकांनी ग्राहकांच्यासेवा आणि समाधानावर परिणाम होऊ न देताही आपल्या वैयक्तित खर्चाचा ताळेबंद ठेवणे आवश्यक आहे. देआसरा फाऊंडेशनच्या श्री.प्रकाश आगाशे म्हणाले की, “एखाद्या व्यवसायाच्या शाश्वत विकासासाठी यशस्वी उद्योजकाने कठोर आर्थिक साक्षरता आणिव्यवस्थापन ही प्रमुख कौशल्ये आत्मसात करणे गरजेचे आहे.”

कार्यशाळेमुळे आर्थिक व्यवस्थापनासाठी मदत झाली आणि विकास, आर्थिक नियोजन, रोख प्रवाह व्यवस्थापन, जोखीम व्यवस्थापनआणि संसाधन व्यवस्थापन यासाठी आर्थिक धोरणांकडे वाटचाल कशी करावी याबाबत मार्गदर्शन मिळाले.

कार्यशाळेत सहभागी होणा-या व्यवसायात नियोजन, निर्णय घेण्याचे मूल्य आणि मूल्य निर्माण करण्याच्या महत्वाच्याव्यवस्थापनात्मक बाबींचे समर्थन करण्यासाठी आणि जोखीम आणि संधींचे मूल्यांकन करण्यासाठी या वित्तीय माहितीची मदतमिळाली.

या कार्यशाळेत बँक ऑफ महाराष्ट्रचे श्री आर.आर.शांताप्पा , श्री ओंकार कुमार,श्री.शशिकांत एम चौधरी,  श्री.अनिल सावंत,  श्रीमंत आनंद, श्री. नितीन भार्गवे मुख्य प्रबंधक श्री. लवाळे , श्री. राजेश कुमार बैठा , आणि श्री. उमेश जोशीयांची उपस्थिती होती तसच शंभरहून अधिक उद्योजकांनी या कार्यशाळेद्वारे तज्ञांचे मार्गदर्शन प्राप्त केले. भविष्यात अनेक यशस्वीनवउद्योजक या कार्यशाळेद्वारे घडतील असा आशावाद कार्यशाळेला उपस्थित असलेल्या उद्योजकांनी व्यक्त केला आहे.

पुणे-घोरपडी गावठाणातील तालीम चौकातील वेशीवरच्या मारुती मंदिराचा जीर्णोद्वार व कळशारोहन सोहळा पार पडला . आळंदीचे श्री. श्री. श्री. शंकर महाराज यांच्याहस्ते कळस बसविण्यात आला . यानिमित्ताने मंदिरात चार दिवस धार्मिक कार्यक्रम सुरु होते . कळस व मारुतीच्या प्रतिमेची पारंपरिक वाद्यांच्या गजरात गावातून मिरवणूक काढण्यात आली . होमहवन व घोरपडी गाव व नवजीवन महिला भजनी मंडळाचा भजनाचा कार्यक्रम झाला . शेवटच्या दिवशी आरती व महाप्रसादाचा कार्यक्रम पार पडला . देवस्थान पंच मंडळाचे अध्यक्ष निवृत्ती कवडे यांनी आळंदीचे श्री. श्री. श्री. शंकर महाराज यांचा सत्कार केला .

      कै. विठ्ठलराव गुलाबराव कवडे पाटील यांच्या स्मरणार्थ मंदिराचे नूतनीकरण करण्यात आले . या मंदिराची पूजा पिढ्यान पिढ्या कवडे पाटील परिवाराकडे आहे . या कार्यक्रमासाठी गौरव कवडे पाटील  , सुनील  कवडे पाटील , संजय कवडे पाटील व घोरपडी गाव देवस्थान पंच मंडळाच्या कार्यकर्त्यांनी विशेष परिश्रम घेतले .