पुणे, दि. १३: राज्यातील शाळांमध्ये त्रिभाषा धोरण निश्चित करण्यासाठी शिक्षणतज्ज्ञ डॉ. नरेंद्र जाधव यांच्या अध्यक्षतेखाली गठित समितीने विधानभवन येथे शिक्षण क्षेत्रात काम करणाऱ्या व्यक्ती, शिक्षण संस्थांचे प्रतिनिधी, भाषातज्ज्ञ, विचारवंत, राजकीय पक्षांचे प्रतिनिधी, लोकप्रतिनिधी, नागरिक आदींशी संवाद साधून त्यांच्या सूचना व प्रतिक्रिया जाणून घेतल्या.

राज्यातील शाळांमध्ये राष्ट्रीय शिक्षण धोरण २०२० च्या अनुषंगाने त्रिभाषा धोरण निश्चित करण्यात आलेली समिती या अनुषंगाने विभागनिहाय भेटी देऊन विविध घटकांशी संवाद साधत आहे. त्याअंतर्गत विधानभवन येथे हा जनसंवाद कार्यक्रम आयोजित करण्यात आला होता. यावेळी खासदार मेधा कुलकर्णी, आमदार बापूसाहेब पठारे, विभागीय आयुक्त डॉ. चंद्रकांत पुलकुंडवार, समितीचे सदस्य तथा शिक्षणतज्ज्ञ डॉ. अपर्णा मॉरिस, डेक्कन महाविद्यालयाच्या मराठी भाषा विज्ञान प्रमुख डॉ. सोनल कुलकर्णी जोशी, बालमानसतज्ज्ञ डॉ. भूषण शुक्ल, पुणे विभागीय अतिरिक्त आयुक्त तुषार ठोंबरे, महाराष्ट्र प्राधमिक शिक्षण परिषदेचे उपसंचालक संजय डोर्लीकर, पुणे विभागीय शिक्षण उपसंचालक डॉ. गणपत मोरे आदी उपस्थित होते.

यावेळी डॉ. नरेंद्र जाधव म्हणाले, राष्ट्रीय शिक्षण धोरण २०२० ची राज्यात अंमलबजावणी कशा पद्धतीने करावयाची या अनुषंगाने शिफारशी करण्यासाठी ज्येष्ठ शास्त्रज्ञ डॉ. रघुनाथ माशेलकर यांच्या अध्यक्षतेखाली उच्चस्तरीय समिती स्थापन करण्यात आली होती. या समितीने सन २०२१ मध्ये आपला अहवाल सादर केला होता. त्या अहवालात त्रिभाषा सूत्राच्या अंमलबजावणीचीही एक शिफारस आहे, असेही ते म्हणाले.

डॉ. जाधव पुढे म्हणाले, राज्यातील शाळांमध्ये त्रिभाषा सूत्र कोणत्या इयत्तेपासून, कशा प्रकारे लागू करावे या अनुषंगाने राज्य शासनाने समिती गठित केली असून विभागनिहाय भेटी देऊन मते व सूचना जाणून घेण्याचा निर्णय घेतला असून आज पुणे येथे संवाद साधण्यात येत आहे. यावेळी येणाऱ्या सूचनांचा सखोल विचार करण्यात येईल. तसेच त्रिभाषा समितीचे https://tribhashasamiti.mahait.org हे संकेतस्थळही विकसित करण्यात आले असून त्यावर उपलब्ध करुन दिलेली प्रश्नावली आणि सविस्तर मते मांडण्यासाठीची मतावली भरून संकेतस्थळावर सादर करावी, जेणेकरून येणाऱ्या सूचनांवर विचार करुन राज्य शासनाला डिसेंबर अखेर अहवाल सादर करण्यासाठी प्रयत्न करण्यात येईल, असेही ते म्हणाले.

यावेळी खासदार श्रीमती कुलकर्णी, आमदार श्री. पठारे तसेच विभागीय आयुक्त डॉ. पुलकुंडवार यांनीही आपले विचार व सूचना मांडल्या.

यावेळी मराठी भाषेशी संबंधित किंवा संलग्न शासकीय किंवा अशासकीय, खासगी शिक्षण संस्थांचे अध्यक्ष, सदस्य, प्राथमिक, माध्यमिक शिक्षक संघटना, पालक-शिक्षक संघटनाचे पदाधिकारी, महाविद्यालयांचे प्राचार्य, प्राध्यापक, शाळांचे मुख्याध्यापक, भाषा विषयाचे शिक्षक आदींनी त्रिभाषा सूत्र अंमलबजावणी, संगणक अभ्यासक्रम, मूल्यशिक्षण आदी अभ्यासक्रमांच्या अंमलबजावणीच्या अनुषंगाने विविध सूचना केल्या.

यावेळी शिक्षण विभागाचे अधिकारी, कर्मचारी, नागरिक आदी उपस्थित होते.

पुणे-सत्ताधारी राष्ट्रवादी काँग्रेसचे अध्यक्ष तथा राज्याचे उपमुख्यमंत्री अजित पवार यांचे सुपुत्र पार्थ पवार यांच्या कथित भूखंड घोटाळ्यामुळे राज्याचे राजकारण ढवळून निघाले आहे. अजित पवार यांनी हा व्यवहार रद्द करण्याची घोषणा केली आहे. पण या प्रकरणी त्यांच्या राजीनाम्याची मागणी होत असल्यामुळे सरकारवरील दबाव वाढला आहे. या पार्श्वभूमीवर पिंपरी चिंचवडच्या ताथवडे येथील शासनाच्या जमिनीची परस्पर विक्री केल्याची घटना उजेडात आली आहे. हा व्यवहार जानेवारी 2025 मध्ये झाला. पण तो आता प्रकाशझोतात आला. पशुसंवर्धन विभागाला अंधारात ठेवून पिंपरी चिंचवडच्या ताथवडे येथील शासनाच्या या तब्बल 15 एकर जमिनीची कोट्यवधी रुपयांना परस्पर विक्री करण्यात आली आहे. या प्रकरणी हवेलीच्या सहाय्यक दुय्यम निबंधकांवर निलंबनाची कारवाई करण्यात आली आहे. राज्याचे महसूलमंत्री चंद्रशेखर बावनकुळे यांनी या प्रकरणी हवेलीच्या सहाय्यक दुय्यम निबंधक विद्या शंकर बडे (सांगळे) यांच्यावर निलंबनाची कारवाई केली आहे. पुणे जिल्ह्यातील ताथवडे गावातील शाससकीय ताब्यातील जमीन विक्रीस नोंदवण्याच्या प्रक्रियेतील गैरव्यवहारात सहभागी झाल्यामुळे प्रभारी दुय्यम निबंधक विद्या शंकर बडे (सांगळे) यांना निलंबित करण्यात येत आहे, असे यासंबंधीच्या आदेशात नमूद करण्यात आले आहे.

यासंबंधीच्या माहितीनुसार, पिंपरी चिंचवड शहरातील ताथवडे परिसरात पशुसंवर्धन विभागाची सर्वे नंबर 20 येथे 15 एकर जागा आहे. या जागेची कोट्यवधी रुपयांत पशुसंवर्धन विभागाला अंधारात ठेवून परस्पर विक्री करण्यात आली. हा व्यवहार हेरंब गुपचूप नामक व्यक्तीने जानेवारी 2025 मध्ये केला. मुद्रांक शुल्क विभागाने त्याची माहिती पशुसंवर्धन विभागाला दिली. त्यानंतर पशुसंवर्धन विभागाच्या आयुक्तांनी त्याची तक्रार पुण्याच्या विभागीय आयुक्तांकडे केली. त्यानुसार आता पुण्याचे विभागीय आयुक्त व पशुसंवर्धन विभाग या प्रकरणाचा तपास करत आहेत.

ताथवडे येथील सर्वे नंबर 20 मधील 6 हेक्टर 32 आर क्षेत्रफळ असणाऱ्या जमीन विक्रीचा दस्त क्रमांक 685/2025 दिनांक 9 जानेवारी 2025 रोजी नोंदवण्यात आला होता. पण नोंदणी करताना अद्ययावत 7/12 उतारा जोडला नव्हता. दस्तासोबत 2023 मधील जुना 7/12 जोडण्यात आला होता. त्यावर शासनाचा ताबा किंवा विक्रीवरील बंदीचा उल्लेख नव्हता. चौकशीत असे निष्पन्न झाले की, फेब्रुवारी 2025 मधील अद्ययावत 7/12 उताऱ्यावर या जमिनीवर ‘आयुक्त पशुसंवर्धन यांचा ताबा असून शासनाच्या परवानगीशिवाय विक्रीस बंदी’ असा स्पष्ट शेरा होता. त्यानंतरही दुय्यम निबंधकांनी तांत्रिक अडचणीमुळे म्युटेशन होत नव्हते म्हणून ‘स्किप ऑप्शन’ वापरून दस्त नोंदवला. परंतु यासाठी त्यांनी वरिष्ठांची परवानगी घेतली नाही.

ही गंभीर अनियमितता मानून विद्या शंकर बड़े (सांगळे) यांना महाराष्ट्र नागरी सेवा (शिस्त व अपील) नियम 1979 अंतर्गत 12 नोव्हेंबर 2025 पासून पुढील आदेश येईपर्यंत निलंबित करण्यात आले आहे. निलंबन काळात त्यांचे मुख्यालय प्रधान मुद्रांक कार्यालय, मुंबई येथे राहील आणि त्यांनी वरिष्ठांची पूर्वपरवानगीशिवाय मुख्यालय सोडू नये, असेही सरकारच्या आदेशात नमूद करण्यात आले आहे.

आत्मकथनाचे शुक्रवारी प्रकाशन

पुणे: संपर्क बालग्राम संस्थेचे संस्थापक अमितकुमार बॅनर्जी यांच्या ‘संघर्षगाथा माझ्या आयुष्याची’ आत्मकथनाचे प्रकाशन येत्या शुक्रवारी (ता. १४ नोव्हेंबर) सकाळी १० वाजता कमिन्स सभागृह, पत्रकार भवन, नवीपेठ पुणे येथे होणार आहे. ज्येष्ठ साहित्यिक, विचारवंत आणि संत साहित्याचे अभ्यासक डॉ. सदानंद मोरे व भारतीय जनता पार्टीचे माजी राष्ट्रीय सचिव, माय होम इंडिया फाउंडेशनचे संस्थापक सुनील देवधर यांच्या शुभहस्ते या आत्मकथनाचे प्रकाशन होणार आहे. यावेळी सावित्रीबाई फुले पुणे विद्यापीठाचे अधिसभा सदस्य, तसेच यशवंतराव चव्हाण मुक्त विद्यापीठाच्या व्यवस्थापन मंडळाचे सदस्य प्रसेनजीत फडणवीस, माजी शिक्षणाधिकारी व साहित्यिक डॉ. अनिल गुंजाळ, साहित्यिक प्रसाद मिरासदार, अमितकुमार बॅनर्जी, प्रकाशक सु. वा. जोशी यांची प्रमुख उपस्थिती असणार आहे.
अनाथ, गरजू मुलांच्या संगोपनासाठी अमितकुमार बॅनर्जी यांनी संपर्क बालग्राम संस्थेच्या माध्यमातून उभारलेल्या कार्याचा हा खडतर प्रवास या आत्मकथनातून मांडला आहे. वेगवेगळ्या प्रतिकूल परिस्थितीतून आलेल्या मुलांना संस्कार, नैतिकता आणि सामाजिक भान देऊन जबाबदार नागरिक घडविण्यासाठी बॅनर्जी यांनी आपले संपूर्ण आयुष्य समर्पित केले आहे. प्रेम, सुरक्षितता, काळजी आणि त्यांचे जीवन पुन्हा निर्माण करण्यासाठी पोषक वातावरण देऊन त्यांचा भूतकाळ विसरत चांगला भविष्यकाळ घडवण्यासाठी त्यांनी निःस्वार्थ भावनेने केलेल्या कार्याचा आढावा, या आत्मकथनातून घेतला गेला आहे.

सुतारवाडी बस डेपोच्या २४ मीटर रस्त्याच्या कामाचा शुभारंभ

पुणे – कोथरुड मतदारसंघाचे आमदार आणि राज्याचे उच्च व तंत्रशिक्षण मंत्री चंद्रकांतदादा पाटील यांच्या पाठपुराव्याला यश आले असून, मतदारसंघातील सुतारवाडी मधील रस्त्याचा प्रश्न मार्गी लागला आहे. ना. पाटील यांच्या हस्ते या रस्त्याच्या कामाचे भूमिपूजन आज झाले. विकास आराखड्यातील रस्ते पूर्ण झाल्याशिवाय पुण्यातील वाहतूक कोंडीचा प्रश्न सुटणार नाही, अशी भावनाही त्यांनी यावेळी व्यक्त केली.कोथरुड मतदारसंघातील मिसिंग लिंकचा प्रश्न सोडवण्यासाठी आग्रही भूमिका असून, यासाठी सातत्याने महापालिकेत पाठपुरावा सुरु होता. ना. पाटील यांच्या पाठपुराव्यामुळे रजपूत वीटभट्टी परिसरातील रस्त्याचे रुंदीकरण, एकलव्य महाविद्यालयापासून राष्ट्रीय महामार्गाला जोडणाऱ्या मिसिंग लिंकचे काम पूर्ण होऊन त्याचे लोकार्पण झाले आहे.

सुतारवाडी सुतारवाडी बस डेपो (सर्वे नं. १२४) येथील २४ मीटर रस्त्याच्या कामातील अडथळे दूर झाले असून, रस्ता रुंदीकरणासाठी पाच गुंठे जागेची आवश्यक्ता होती. यासाठी संबंधित जागा मालकांकडून जमीन हस्तांतरणाचे काम पूर्ण झाले आहे. सदर हस्तांतरणाची प्रक्रिया पूर्ण झाल्यानंतर या कामाचे भूमिपूजन ना. पाटील यांच्या उपस्थितीत स्थानिक नागरिकांच्या हस्ते झाले. या कामांमुळे मुख्य महामार्गाकडून सुतारवाडी-सुस रोड शिवमंदिर चौक जाणाऱ्या नागरिकांची मोठी सोय झाली आहे. तसेच, जमीन अधिग्रहणामुळे समान पाणीपुरवठ्याच्या कामाला गती मिळून ते काम ही पूर्ण झाले आहे. त्यामुळे या परिसरातील पाणीपुरवठा सुरळीत झाला आहे.

यावेळी बोलताना ना. पाटील यांनी सर्व जागा मालकांप्रति कृतज्ञता व्यक्त केली. ते म्हणाले की, बाणेर बालेवाडी भाग विकसित होत असताना अनेक भागांचा महापालिकेशी जोडली गेली. या भागाच्या विकासासाठी नागरि सुविधा सुलभ होण्यासाठी अनेक विकास कामांची अवश्यक्ता असते. यामध्ये रस्ते विकास हा मोठा भाग असून, दोन भाग जोडण्यासाठी मिसिंग लिंक दुवा ठरतो. सुतारवाडीतील सुस गाव- सुतारवाडी शिव मंदिराला जोडणारा सर्व्हे नंबर १२४ चा भाग हा अतिशय महत्वाचा होता. ह्या रस्त्याच्या विकासामुळे सुतारवाडी-पाषाण-सुस गाव मधील नागरिकांना मोठा दिलासा मिळणार आहे.

ते पुढे म्हणाले की, पुणे शहरातील वाहतूक कोंडी सुटण्यासाठी विकास आराखड्यातील रस्ते पूर्ण होणे आवश्यक आहे. समृद्धी महामार्गाला पाच पट मोबदला दिला. हा महामार्ग झाल्याने दळणवळण अतिशय सुलभ आणि गतिमान झाले आहे. त्यामुळे शासन अतिशय संवेदनशीलतेने आणि नागरी सुविधांसाठी काम करत असल्याने अनेक विकास कामे मार्गी लागत आहेत. सुतारवाडीतील रस्त्यासाठी स्थानिक नागरिकांनी ही सहकार्य केल्याने हा मार्ग सुकर होईल, अशी भावना यावेळी व्यक्त केली.

या भूमिपूजन कार्यक्रमावेळी सर्व सुतार कुटुंबीय, पथ विभागाचे मुख्य अभियंता अनिरुद्ध पावसकर, माजी नगरसेवक अमोल बालवडकर, माजी नगरसेविका ज्योती कळमकर, स्वप्नाली सायकर, भाजप उत्तर मंडल अध्यक्ष लहू बालवडकर, माजी अध्यक्ष सचिन पाषाणकर, पुणे शहर सरचिटणीस पुनीत जोशी, आबा सुतार, शिवम सुतार, सचिन सुतार, राहुल कोकाटे, रोहन कोकाटे, गणेश कळमकर, प्रल्हाद सायकर, प्रकाश तात्या बालवडकर, मोरेश्वर बालवडकर, सुभाष भोळ, सचिन दळवी, अनिकेत चांधेरे यांच्यासह भाजपचे सर्व पदाधिकारी आणि नागरिक मोठ्या संख्येने उपस्थित होते.

पुणे- ‌‘रंगयात्री‌’ या ऑनलाईन आरक्षण सुविधेमध्ये त्रुटी जाणवत असल्याने नाट्य निर्माते, नाट्य व्यवस्थापक व संयोजकांनी ‌‘रंगयात्री‌’ ॲपला विरोध करत बालगंधर्व रंगमंदिराच्या आवारात आज (दि. 12) घंटानाद करून, घोषणा देत प्रशासनाचा निषेध केला.तर महापालिकेने मात्र रंगयात्रा ॲप – नाट्यगृह बुकिंगसाठी क्रांतिकारी उपक्रम असून,ज्यामुळे दलाल आणि एजंट राज समाप्त होत असल्याचा दावा केला आहे. रंगयात्रा ॲप – नाट्यगृह बुकिंगसाठी क्रांतिकारी उपक्रम असून , कलाकार नाट्य संस्था ,जो कलाकार, नाट्य संस्था पहिल्यादा बुकिंग करतील त्यांना प्राधान्य देऊन नंतर सामाजिक संस्था आणि सर्वांच्या सोयीसाठी १००% पारदर्शक कारभार सर्वांना दाखविणारे ॲप असल्याचा दावा केला आहे. एवढेच नव्हे तर आयुक्त पातळीपर्यंत याचे नियंत्रण असून ॲपमध्ये डॅशबोर्ड सुविधा उपलब्ध असून आयुक्तांना सर्व नाट्यगृहांच्या बुकिंग, महसूल, आणि व्यवहारांचा एकत्रित आढावा तत्काळ मिळतो.असेही म्हटले आहे.

महापालिकेने या ॲप बद्दल केलेले दावे ….

1. १००% पारदर्शकता – मोबाइल ॲपद्वारे सर्व नाट्यगृहांचे उपलब्ध सत्र (Sessions) सार्वजनिकरित्या दिसतात. प्रत्येक महिन्याचे वेळापत्रक सर्वांसाठी खुलं.
2. सवलतीवरील बुकिंगला आळा – पूर्वी काही नाट्यसंस्था प्रमुख सत्रे मोठ्या प्रमाणात बुक करून 60% सवलतीचा फायदा घेत असत; आता ती प्रथा पूर्णपणे थांबवण्यात आली आहे.
3. दलाल आणि एजंट राज समाप्त – रंगयात्रा ॲपमुळे बुकिंग प्रक्रिया थेट नागरिकांच्या हातात; मध्यस्थांची मक्तेदारी 100% संपली.
4. घरबसल्या सोयीस्कर बुकिंग – फक्त दोन क्लिकमध्ये नाट्यगृह आरक्षण तसेच डिपॉझिट आणि भाडे भरता येते.
5. पूर्णतः ऑनलाइन प्रणाली – सर्व व्यवहार व प्रक्रिया ॲपवर असल्याने प्रशासकीय हस्तक्षेप पूर्णतः बंद.
6. कागदविरहित प्रक्रिया – कागदपत्रे, रिफंड किंवा रद्दीकरण प्रक्रियेसाठी स्वतंत्र कार्यालयात येण्याची गरज नाही; सर्व सेवा मोबाइलवर उपलब्ध.
7. एकच डिपॉझिटवर अनेक बुकिंगला आळा – पूर्वी एकाच डिपॉझिटवर अनेक आरक्षणे होत असत ज्यामुळे सामान्य नागरिकांना सत्रे मिळत नसत; आता सर्वांसाठी न्याय्य संधी उपलब्ध झाली आहे.

प्रशासकीय अधिकाऱ्यांच्या सोयीसाठी

1. जीएसटी रिपोर्टिंग सुलभ – ॲपद्वारे सर्व व्यवहारांचे जीएसटी रिपोर्ट स्वयंचलित तयार; हाताने कष्ट घेण्याची गरज नाही.
2. बँकेत जाण्याची गरज संपली – उन्हात, पावसात बँकेत चकरा मारण्याऐवजी सर्व पेमेंट प्रक्रिया ऑनलाइन.
3. दबाव आणि धमकीपासून मुक्तता – ॲपमुळे पूर्ण व्यवहार प्रणाली पारदर्शक असल्याने कोणत्याही बाह्य दबावाची भीती नाही.
4. वेळ आणि पैशाची बचत – डिजिटल प्रक्रियेने दोन्ही घटकांची मोठ्या प्रमाणात बचत.
5. सर्व नाट्यगृहांचे एकत्रित जीएसटी – आधी प्रत्येक नाट्यगृहाचा वेगळा जीएसटी नंबर व भरणा होता; आता एकाच क्लिकमध्ये सर्व डेटा संकलित व सादर.
6. आयुक्त पातळीपर्यंत नियंत्रण – ॲपमध्ये डॅशबोर्ड सुविधा उपलब्ध असून आयुक्तांना सर्व नाट्यगृहांच्या बुकिंग, महसूल, आणि व्यवहारांचा एकत्रित आढावा तत्काळ मिळतो.

पुणे : महापालिकेच्या प्रस्तावित ‌‘रंगयात्री‌’ या ऑनलाईन आरक्षण सुविधेमध्ये त्रुटी जाणवत असल्याने नाट्य निर्माते, नाट्य व्यवस्थापक व संयोजकांनी ‌‘रंगयात्री‌’ ॲपला विरोध दर्शविला आहे. महापालिकेच्या या निर्णयाला विरोध करत बालगंधर्व रंगमंदिराच्या आवारात आज (दि. 12) घंटानाद करून, घोषणा देत प्रशासनाचा निषेध केला. नाट्य निर्माते, नाट्य व्यवस्थापकांच्या वतीने महापालिका प्रशासनास मागण्यांचे निवेदन देण्यात आले.
नाट्यगृहांच्या आरक्षणाची सुविधा ‌‘रंगयात्री‌’ ॲपद्वारे उपलब्ध करून दिल्यास नाट्यगृहांचे आरक्षण कोणत्या कारणासाठी होईल यावर प्रशासनाचे नियंत्रण राहणार नाही. राजकीय संस्था किंवा राजकीय वर्चस्व असलेल्या सामाजिक संस्थांमुळे कलावंत, नाट्य व्यावसायिकांना नाटकांच्या तारखा मिळणे अवघड होईल. ‌‘रंगयात्री‌’ ॲप रंगकर्मी, नाट्य निर्माते, नाट्य व्यावसायिक यांच्या दृष्टीने जसे त्रासदायक ठरणार आहे त्याप्रमाणे महापालिकेला आर्थिक फटका बसण्याची शक्यता आहे.
महापालिका प्रशासनाला दिलेल्या निवेदनात म्हटले आहे की, बालगंधर्व रंगमंदिर हे पुण्यातील प्रथम सांस्कृतिक केंद्र आहे व ते रंगमंदिरच रहावे, व्यावसायिक सभागृह होऊ नये असे वाटते. तारखांच्या आरक्षणासंदर्भात प्रशासनाकडे लेखी अर्ज आले तर नाट्यगृहाचे आरक्षण कोणत्या कारणासाठी होत आहे, हे समजू शकेल आणि त्या प्रमाणे भाडे आकारणी करता येईल.
या विषयी बोलताना कोथरूड नाट्य परिषद शाखेचे अध्यक्ष सुनील महाजन म्हणाले, सध्या चौमाही तारखा वाटपाची पद्धत आहे. नाट्य व इतर संस्थांना त्यांचे झालेले कार्यक्रम बघून पुढील तारखा दिल्या जातात. प्रसिद्ध कलाकारांच्या तारखा ऐनवेळी मिळतात त्यामुळे संयोजकांना धावपळ करावी लागते. ऑनलाईन सुविधेमुळे तारखा निश्चित होण्यावर परिणाम होईल आणि नाट्यप्रयोगांची संख्या कमी होईल. महापालिकेने रंगयात्री ॲपचा निर्णय रद्द न केल्यास कलावंत आंदोलन करतील.
राष्ट्रवादी चित्रपट व सांस्कृतिक विभागाचे प्रदेशाध्यक्ष बाबासाहेब पाटील म्हणाले, नाट्य निर्माते, नाट्य व्यवस्थापकांच्या प्रश्नासंदर्भात पालकमंत्री अजित पवार यांच्यासमवेत बैठक आयोजित करण्यात येत आहे. ही बैठक जो पर्यंत होत नाही तो पर्यंत महापालिका प्रशासनाने कुठलाही निर्णय घेऊ नये.
सुनील महाजन, बाबासाहेब पाटील, सत्यजीत धांडेकर, समीर हंपी, प्रमोद ननावरे, प्रवीण बर्वे, शशी कोठावळे, मोहन कुलकर्णी, शिरीष रायरीकर, शिरीष कुलकर्णी, वरुण कांबळे, रणजीत सोनावळे, दीपक पवार, राजन भुवड, प्रमोद रणनवरे, अतुल वायचळ, शिरीष गोडबोले, अक्षय जगताप, जतिन पांडे, अशोक जाधव, स्वाती शहा, उमेश बेहरे, गणेश भोसले, मुकेश देठीया, बाळकृष्ण कलाल यांनी आंदोलनात सहभाग घेतला.