–              ग्लॅमरस दुनियेची अत्यंत हटके सफर घडविणारा चित्रपट

–              ७ सप्टेबर रोजी होणार प्रदर्शित

स्वरूप रिक्रीएशन्स अँड मिडिया प्रा. लि. प्रस्तुत आणि योगायतन फिल्मस निर्मित ‘परी हुँ मैं’ या मराठी चित्रपटाचे मोशन पोस्टर नुकतेच सोशल मिडीयावर रिलीज करण्यात आले. उर्जा, पोर्ट, रिअल इस्टेट, निर्यात, टाउनशीप आदी क्षेत्रात अग्रगण्य असलेल्या योगायतन ग्रुपचे प्रमुख डॉ. राजेंद्र प्रताप सिंह आणि शिला सिंह हे या चित्रपटाचे निर्माते असून संजय गुजर हे सहनिर्माते आहेत तर रोहित शिलवंत यांनी ‘परी हुँ मैं’ चे दिग्दर्शन केले आहे.

‘परी हुँ मैं’च्या मोशन पोस्टर मध्ये एका खिडकीतून घरात विसावलेले दिघे कुटुंब टि.व्ही. बघताना दिसतेय, त्या कुटुंबाची इवलीशी सदस्य साजरी दिघे आपल्याशी संवाद साधत तिला आवडणारा समुद्र, गोष्टी सांगणे आणि तिचे जगातील बेस्ट बाबा म्हणजेच माधव दिघे यांच्या आणि तिच्या आईबद्दल म्हणजेच कल्पना दिघे यांच्या विषयी तिच्या मनात असणारी थोडीशी भीती आणि प्रेमही ती बोलताना व्यक्त करते. तसेच सर्व प्रेक्षकांना ही गोड साजरी तिच्या कुटुंबाची गोष्ट अर्थात ‘परी हूँ मैं’ हा चित्रपट बघण्यासाठी निमंत्रित करत आहे. ही छोटी साजिरी नेमकी काय गोष्ट घेउन येणार याची प्रेक्षकांच्या मनात उत्कंठा निर्माण झाली आहे.

चित्रपट, टीव्ही मालिका, रियालीटी शो या चंदेरी दुनियेचा विषय लेखिका इरावती कर्णिक यांनी ‘वेगे वेगे धावू’ या एकांकिकेमधून मांडला होता,त्यावर आधारीत हा चित्रपट आहे. त्या एकांकिकेचे दिग्दर्शन अद्वैत दादरकर यांनी केले होते. तर ‘परी हुँ मैं’ या चित्रपटाची पटकथा मच्छिंद्र बुगडे, रोहित शिलवंत आणि संकेत माने यांची असून संवाद योगेश मार्कंडे यांचे आहेत. अभिनेते नंदू माधव, देविका दफ्तरदार, बालकलाकार श्रुती निगडे, फ्लोरा सैनी यांच्या प्रमुख भूमिका असलेल्या ‘परी हुँ मैं’ या चित्रपटातील अभिषेक खणकर आणि सचिन पाठक यांच्या गीतांना संगीतकार समीर सप्तीसकर यांनी संगीतबद्ध केले असून शंकर महादेवन, अमृता फडणवीस, जिया वाडकर आणि मंदार पिलवलकर यांचा स्वर गीतांना लाभला आहे. चित्रपटाला पार्श्वसंगीत अनुराग गोडबोले यांनी दिले आहे, ग्लॅमरस दुनियेची अत्यंत हटके सफर घडविणारा बहुचर्चित ‘परी हुँ मैं’ हा मराठी चित्रपट येत्या ७ सप्टेंबर रोजी संपूर्ण महाराष्ट्रात प्रदर्शित होणार आहे.

पुणे-महाविद्यालयातल्या नि:स्वार्थ, निरागस आणि निखळ मैत्रीच्या सुंदर नात्याविषयी असलेल्या ‘दोस्तीगिरी’ ह्या सिनेमाचा ट्रेलर आणि संगीत अनावरण सोहळा नुकताच मुंबईत आयोजित करण्यात आला होता. ह्या ट्रेलर आणि म्युझिक लाँचसाठी सिनेमाचा नायक संकेत पाठकचे ऑनस्क्रीन आई-वडील उपस्थित होते. दुहेरी मालिकेतली संकेतची आई, अभिनेत्री निवेदिता सराफ, आणि छत्रीवाली मालिकेत संकेत पाठकच्या वडिलांच्या भूमिकेत असलेले अभिनेते अशोक शिंदे ह्यांच्या हस्ते सिनेमाचे संगीत अनावरण झाले.

ह्यावेळेस भावूक झालेला अभिनेता संकेत पाठक म्हणाला, “माझ्या पहिल्या सिनेमाचा संगीत अनावरण सोहळा आणि त्यात माझे ऑनस्क्रिन आई-वडिल आशिर्वाद द्यायला आले, हा माझ्यासाठी अविस्मरणीय क्षण होता. दोस्तीगिरी सिनेमाचे चित्रीकरणही माझ्यासाठी आठवणीतले होते. कारण ह्या सिनेमाच्या शूटिंगच्यावेळी मला अक्षय वाघमारे, विजय गीते, पुजा जयस्वाल, पुजा मळेकर असे जिवाभावाचे फ्रेंड्स मिळाले.”

दोस्तीगिरी सिनेमाच्या ट्रेलर आणि संगीत अनावरण सोहळ्यासाठी संकेत पाठक, पुजा मळेकर, विजय गिते, पुजा जयस्वाल, शुभांगी लाटकर आणि अक्षय वाघमारे ह्या कलाकारांसह संगीत दिग्दर्शक रोहन-रोहन, प्राजक्ता शुक्रे, मिनल जैन, आणि कविता राम ही म्युझिक टीमही उपस्थित होती.

अभिनेत्री निवेदिता सराफ ह्यावेळी म्हणाल्या, “जशी दोस्तीगिरी सिनेमात घट्ट मैत्री दाखवली गेलीय, तशीच अशोक शिंदे आणि माझीही गेल्या तीस वर्षांची घट्ट मैत्री आहे. त्यामूळे माझ्या जुन्या मित्रासोबत दोस्तीगिरी सिनेमाचा ट्रेलर लाँच करणं माझ्यासाठी खूप खास आहे. तसेच संकेत पाठकची मी ऑनस्क्रिन आई झाले होते. आणि तेव्हापासूनच माझी संकेतशीही दोस्तीगिरी सुरू झाली आहे.”

संतोष पानकर निर्मित, विजय शिंदे दिग्दर्शित दोस्तीगिरी सिनेमाचे लेखन मनोज वाडकर ह्यांनी केले आहे. रोहन-रोहन ह्यांच्या संगीताने सजलेल्या ह्या सिनेमात संकेत पाठक, अक्षय वाघमारे, विजय गिते, पुजा मळेकर, पुजा जयस्वाल हे मुख्य भूमिकेत दिसतील. ‘अरिहंत मुव्हिज क्रिएशन्स’ प्रस्तूत ‘मोरया मुव्हिज क्रिएशन्स’ निर्मित “दोस्तीगिरी” 24 ऑगस्ट 2018ला संपूर्ण महाराष्ट्रात प्रदर्शित होणार आहे.

उत्तम आशय-विषयासाठी मराठी सिनेमा ओळखला जातो. याच आशयाच्या प्रेमात हिंदीतले अनेक बडे स्टार्स असून अनेक जण मराठी चित्रपटांची निर्मिती करताहेत. या यादीत आता अभिनेता जॉन अब्राहम यांचे नाव दाखल झाले असून त्यांची पहिली निर्मिती असलेल्या ‘सविता दामोदर परांजपे’ या मराठी चित्रपटाची पहिली झलक नुकतीच एका शानदार सोहळ्यात प्रकाशित करण्यात आली.

‘गेल्या काही वर्षांत मराठीत उत्तमोत्तम आशयाचे चित्रपट बनत आहेत. त्यामुळे मी स्वतःही एका मराठी चित्रपटाची निर्मिती करतोय याचा मला आनंद आहे. प्रादेशिक सिनेमांचं आशयावर भर देऊन काम करणं मला आवडतं. एका चांगल्या संकल्पनेसोबतच ताकदीचे कलाकार आणि उत्तम दिग्दर्शक या सगळ्यांमुळे वेगळ्या धाटणीचा ‘सविता दामोदर परांजपे’ प्रेक्षकांनाही आवडेल, असा विश्वास जॉन अब्राहम यांनी याप्रसंगी व्यक्त केला.

‘सविता दामोदर परांजपे’ या गाजलेल्या नाटकावर चित्रपट करण्याचे बरेच दिवसांपासून मनात होते. सगळे योग जुळून येत हा चित्रपट साकारल्याचे, दिग्दर्शिका स्वप्ना वाघमारे-जोशी सांगतात. या निर्मितीदरम्यान जॉनचा सहभागही तितकाच महत्त्वपूर्ण ठरल्याचा त्या आवर्जून सांगतात. ‘एका उत्तम संहितेवर बेतलेल्या या चित्रपटाचा भाग होण्याची संधी मला मिळाल्याने मी स्वत:ला भाग्यवान समजतो’, अशी भावना अभिनेता सुबोध भावे यांनी व्यक्त केली तर ‘सविता दामोदर परांजपे’ ही रीमाताईंनी अजरामर केलेली भूमिका मला साकारायला मिळाल्याने एकाचवेळी आनंद आणि जबाबदारी अशी दुहेरी भावना माझ्या मनामध्ये आहे; असे प्रतिपादन अभिनेत्री तृप्ती तोरडमल यांनी केले. ‘माझ्या आजवरच्या भूमिकांपेक्षा वेगळी व आव्हानात्मक भूमिका मी या चित्रपटामध्ये साकारल्याचे अभिनेता राकेश बापट यांनी सांगितले.

अनेक यशस्वी हिंदी चित्रपटांची निर्मिती व वितरण करणारे ‘पॅनोरमा स्टुडिओज’चे कुमार मंगत पाठक यांनी जॉन अब्राहम यांच्या कंपनीसोबत काम करायला मिळाल्याचा आनंद व्यक्त करताना चांगल्या निर्मिती मूल्यांमुळे मराठी चित्रपटांचाही निर्मिती व वितरणाचा कॅनव्हास मोठा होईल, असा विश्वास व्यक्त केला.

‘जे.ए.एन्टरटेन्मेंट’ आणि ‘पॅनोरमा स्टुडिओज’ ‘सविता दामोदर परांजपे’ या चित्रपटाचे प्रस्तुतकर्ते असून स्वप्ना वाघमारे जोशी या दिग्दर्शिका आहेत. सुबोध भावे, तृप्ती तोरडमल, राकेश बापट, अंगद म्हसकर, पल्लवी पाटील, सविता प्रभुणे आदि कलाकारांच्या भूमिका या चित्रपटात आहेत. चित्रपटाची कथा शेखर ताम्हाणे यांची असून लेखन व संवाद शिरीष लाटकर यांचे आहेत. योगेंद्र मोगरे, तृप्ती मधुकर तोरडमल सहनिर्माते आहेत. मंदार चोळकर व वैभव जोशी लिखित गीतांना निलेश मोहरीर आणि अमित राज यांचं सुश्राव्य संगीत लाभले आहे. छायांकन प्रसाद भेंडे तर संकलन क्षितिजा खंडागळे यांचे आहे. कलादिग्दर्शन संतोष फुटाणे, ध्वनी संयोजन प्रणाम पानसरे यांचे आहे. वेशभूषा मालविका बजाज यांनी तर मेकअप विनोद सरोदे यांनी केला आहे.