पुणे-स्व. प्रा. यशवंतराव भिमाले यांच्या द्वितीय पुण्यस्मृती दिनानिमित्त सभागृहनेता श्रीनाथ भिमाले यांच्या वतीने गुरुजनांचा गौरव व गुणवंत शिक्षक पुरस्कार वितरण सोहळा  मनपा शाळा क्र १०५ संदेशनगर येथे संपन्न झाला.

कार्यक्रमास अशोक कामत ,शिक्षण अधिकारी शिवाजी दौंडकर,दिपक माळी, सौ.वंदना भिमाले,वबिबवेवाडी परिसरातील शिक्षक मोठ्या प्रमाणावर उपस्थित होते.

पुणे-वटपौर्णिमेनिमित्त वडाच्या पुजेसाठी नटून-थटून निघालेल्या 14 महिलांच्या  गळ्यातील सोन्याचे दागिने हिसकावून पळवणा-या दोन चोरटयांना अटक करण्यात पोलिसांना यश आले आहे. बुधवारी (दि.27 जून) सकाळी 8 ते दुपारी 4च्या दरम्यान या 14 चो-या झालेल्या होत्या.

मुज्जमिल माजीद खान ( वय 24,रा.गंजपेठ, पुणे) व मोसीन अब्बास शेख (वय 30, रा.गंजपेठ, पुणे) असे अटक करण्यात आलेल्या आरोपींची नावे आहेत. पोलिसांनी दिलेल्या माहितीनुसार, वटपौर्णिमेच्या दिवशी पुणे आणि पिंपरी-चिंचवड शहरात एका पाठोपाठ एक अशा तब्बल 14 सोनसाखळी चोरीच्या घटना घडल्या होत्या.महिलांच्या गळ्यातील सोन्याचे दागिने हिसकावून चोरटे फरार झाले होते. एवढेच नाहीतर पोलिस कर्मचा-यांना धक्के देऊन ते पळून गेले होते.

या चोरीच्या अगोदर त्या दोघांनी एक दूचाकी चोरी केली होती. त्या चोरीचा गुन्हा दाखल करण्यात आला होता. दूचाकी चोरीच्या तपासादरम्यान त्या दोघांना पकडण्यात आले. पोलिसांनी आरोपींकडे अधिक चौकशी केली असता वटपौर्णिमेच्या दिवशी दागिने चोरणारे सराईत तेच दोघे असल्याचे उघडकीस आले. लष्कर पोलिस ठाण्याच्या हद्दीत घडलेली सोनसाखळी चोरी करताना वापरण्यात आलेल्या दुचाकीचा क्रमांक सीसीटीव्ही फुटेजमध्ये कैद झाला होता.

वटपौर्णिमेच्या दिवशी केलेल्या 14 चो-यांची त्यांनी कबुली दिली. चोरीच्या दागिन्यांचे एकमेकांत वाटप करण्याच्या कारणावरून दोघांमध्ये वाद झाल्याने ते दागिने विकले नव्हते त्यामुळे चोरीचे शंभर टक्के दागिने पोलिसांनी चोरटयांकडून हस्तगत केले आहेत. यापुर्वी मुज्जमिलवर 8 तर मोसीनवर 4 गुन्हे दाखल आहेत.

ही कामगिरी अप्पर पोलिस आयुक्त रविंद्र सेनगावकर, पोलिस उप आयुक्त सुहास बावचे, सहाय्यक पोलिस आयुक्त प्रदिप आफळे यांच्या मार्गदर्शनाखाली वरिष्ठ पोलीस निरीक्षक राजेंद्र मोकाशी,पोलीस निरीक्षक विजयकुमार शिंदे,सहाय्यक पोलिस निरीक्षक वैभव पवार, पोलीस कर्मचारी विनोद जाधव, प्रमोद नेवसे,संदिप कांबळे, समीर माळवदकर, राकेश क्षीरसागर, इम्रान नदाफ, हिंमत होळकर यांनी केली आहे.

पुणे-सीख समाज पुणे शहराच्यावतीने  आमदार राम कदम यांचा निषेध करण्यासाठी क्वार्टर गेटचौकात राम कदम यांच्या प्रतिमेस जोडे मारो आंदोलन करण्यात आले . राम कदम हाय हाय  … राम कदम दो जुते मारो … अशा घोषणा शीख समाजबांधवांनी दिल्या . राम कदम यांच्या प्रतिमेस जोडे मारण्यात आले .

    या आंदोलनात भोलासिंग अरोरा , रणजितसिंग अरोरा , हरपालसिंग राजपाल , देवेंद्र चावला , परमजितसिंग सलुजा , सुरेंद्रसिंग गुरुदत्ता , सुखमीतकौर अरोरा , निलोफर मुल्ला , गुरुविंदरसिंग राजपाल , फतेहसिंग व्होरा , इंदरजितसिंग टूटेजा , हरजितसिंग अरोरा , हरपीतसिंग सूरी , नईमबाबा शेख , अयुब खान , सनमितसिंग गुरुदत्ता व कुलदीपसिंग टूटेजा आदी मान्यवर व शीख बांधव मोठ्या संख्येने सहभागी झाले होते

     यावेळी भोलासिंग अरोरा यांनी सांगितले कि , आमदार राम कदम यांनी  मुलींबाबत केलेले विधान माता-भगिनींचा अपमान आहे. त्यामुळे त्यांच्यावर कारवाई झालीच पाहिजे . अन्यथा राम कदम यांना काळे फासण्याचा इशारा शीख समाजबांधवांनी दिला आहे . अफगाणिस्थान सीमेपासून कन्याकुमारीपर्यंत महिलांवर झालेल्या अत्याचाराविरुध्द शीख बांधवानी आपली कुर्बानी देऊन महिलांना संरक्षण दिले . हा  इतिहास लक्षात घेऊन महिलांची सुरक्षा घेण्यात पुढाकार घेतला आहे .

    यावेळी  रणजितसिंग अरोरा यांनी सांगितले कि , मानवी हक्कांवर अन्याय होत असेल तर शीख समाज अन्यायाविरोधात आवाज उठवेल . महिला भगिनींच्या पाठीशी उभे राहील . राम कदम यांच्यावर मुख्यमंत्री देवेंद्र फडणवीस यांनी कायदेशीर कारवाई करावी . त्यामुळे भविष्यकाळात असे बेताल वक्तव्य कुणी करणार नाही . 

पुणे, दि. 6 : वीजबिलांचा तपशील व मीटर रिडींगसह इतर माहिती वीजग्राहकांच्या मोबाईलवर ‘एसएमएस’द्वारे महावितरणकडून पाठविण्यात येत आहे. पुणे परिमंडलातील मोबाईल क्रमांकाची नोंदणी केलेल्या 26 लाख 25 हजार वीजग्राहकांना ही सेवा सुरु करण्यात आली आहे. उल्लेखनीय म्हणजे वीजग्राहकांच्या मागणीनुसार मराठी भाषेतून सुद्धा ‘एसएमएस’ उपलब्ध आहे.

पुणे परिमंडलात घरगुती, वाणिज्यिक व औद्योगिकसह इतर वर्गवारीत 27 लाख 24 हजार वीजग्राहक आहेत. त्यापैकी 25 लाख 26 हजार वीजग्राहकांनी मोबाईल क्रमांकाची नोंदणी महावितरणकडे केलेली आहे. तसेच 1 लाख 14 हजारांपैकी 98,404 कृषीपंपधारकांनी मोबाईल क्रमांकाची नोंदणी केलेली आहे.

सद्यस्थितीत ‘एसएमएस’द्वारे ग्राहक क्रमांक व बिलाची रक्कम, देय दिनांक आदींचा तपशील, मीटर रिडींग घेतल्याची तारीख व एकूण युनिटचा वापर तसेच तांत्रिक बिघाड किंवा नियोजित देखभाल व दुरुस्तीमुळे वाहिनीवरील बंद असलेला वीजपुरवठ्याचा कालावधी वीजग्राहकांना ‘एसएमएस’द्वारे कळविण्यात येत आहे. यासोबतच ‘एसएमएस’द्वारे मिळालेल्या वीजबिलाच्या तपशिलावरून वीजग्राहकांना देयकाचा भरणा करणे शक्य झाले आहे. महावितरणच्या वीजबिल भरणा केंद्गात ‘एसएमएस’ दाखवून वीजबिलाचा भरणा करण्याची सोय उपलब्ध झालेली आहे. विशेष म्हणजे ‘एसएमएस’ची सेवा मराठी भाषेतूनही सुरु करण्यात आली आहे. ‘एसएमएस’ची भाषा बदलण्यासाठी मराठीसाठी MLANG (ग्राहक क्रमांक) 1 तर इंग्रजीसाठी MLANG (ग्राहक क्रमांक) 2 असे टाईप करून 9225592255 या क्रमांकावर ‘एसएमएस’ पाठवावा लागेल.

महावितरणच्या 9225592255 या क्रमांकावर ‘एसएमएस’द्वारे वीजग्राहकांना स्वतःच्या मोबाईल क्रमांकाची नोंदणी करण्याची सोय आहे. नोंदणी करावयाच्या मोबाईल क्रमांकावरून 9225592255 क्रमांकावर (स्पेस)(बारा अंकी ग्राहक क्रमांक) अशी माहिती टाईप करून ‘एसएमएस’ केल्यास मोबाईल क्रमांकाची नोंदणी होते. याशिवाय 24×7 सुरु असणार्‍या कॉल सेंटरचे 1912 किंवा 18001023435 आणि 18002333435 हे टोल फ्री क्रमांक उपलब्ध आहे. याशिवाय www.mahadiscom.in या संकेतस्थळावरून किंवा महावितरण मोबाईल अ‍ॅपद्वारे मोबाईल क्रमांक नोंदणी करण्याची सोय उपलब्ध आहे.

पुणे परिमंडलातील सर्व वर्गवारीतील ज्या वीजग्राहकांनी मोबाईल क्रमांकाची महावितरणकडे नोंदणी केलेली नाही त्यांनी नोंदणी करण्यास सहकार्य करावे व ग्राहकसेवेचा लाभ घ्यावा, असे आवाहन महावितरणने केले आहे.

पुणे दि. ६- माहिती आणि जनसंपर्क महासंचालनालयाच्या वतीने लोकराज्य हे मासिक प्रकाशित करण्यात येते. तरुणांनी हे मासिक आवर्जून वाचावे. लोकराज्य मासिक करीयर घडवण्यासाठी गरजेचे असून ती यशाची गुरुकिल्ली असल्याचे प्रतिपादन वाघीरे महाविद्यालयाचे प्राचार्य डॉ. नितीन घोरपडे यांनी केले.
वाचन संस्कृती वाढावी यासाठी माहिती व जनसंपर्क महासंचालनालयातर्फे सप्टेंबर महिन्यात विविध ठिकाणी लोकराज्य वाचक मेळाव्याचे आयोजन करण्यात येत आहे. या उपक्रमांतर्गत सासवड येथील वाघीरे महाविद्यालयात लोकराज्य वाचक मेळाव्याचे आयोजन करण्यात आले होते. या मेळाव्यात उपस्थितांना मार्गदर्शन करताना प्राचार्य नितीन घोरपडे बोलत होते. यावेळी जिल्हा माहिती अधिकारी राजेंद्र सरग, प्रा. डॉ. एस. एस. जगताप,डॉ. किरण रणदिवे, प्रा. पल्लवी लोळे आदी उपस्थित होते.
डॉ. घोरपडे म्हणाले, आजच्या पिढीत समाज माध्यमांचा प्रभाव वाढत आहे. त्यामुळे वाचनाची सवय मात्र नष्ट होतांना दिसत आहे. लोकराज्य वाचक मेळाव्यातून वाचन संस्कृती वृद्धिंगत होण्यसाठी मदत होणार आहे. लोकराज्य या अंकातील प्रत्येक पान वाचनीय आहे. जसा हा अंक स्पर्धा परीक्षेसाठी महत्वाचा आहे तसाच तो आयुष्यात यशस्वी होण्यासाठी गरजेचा आहे. वाचन हा विद्यार्थ्याचा आत्मा आहे, त्यामुळे वाचनाकडे लक्ष देऊन लोकराज्य अंक नियमित घेण्याचे आवाहन देखील यावेळी डॉ. घोरपडे यांनी केले.
यावेळी जिल्हा माहिती अधिकारी राजेंद्र सरग यांनी लोकराज्य मासिकाचे महत्व सांगीतले. विद्यार्थ्यांना मार्गदर्शन करतांना ते म्हणाले, लोकराज्य मासिक हे स्पर्धा परीक्षेसाठी अत्यंत महत्वाचे आहे. वाचनाने विचारांची कक्षा रुंदावते. या मासिकातील प्रत्येक पान  आपणास विचारांनी समृद्ध करेल. देशाची भावी पिढी वाचनातून प्रगल्भ होण्यासाठी लोकराज्य वाचक मेळाव्याचे आयोजन करण्यात आले असल्याचे देखील          श्री.सरग   म्हणाले. लोकराज्य वाचक मेळाव्याची संकल्पना तसेच उद्देश याबाबत ज्ञानेश भुकेले यांनी यावेळी मार्गदर्शन केले. कार्यक्रमाचे सूत्रसंचालन प्रा.सुनिता कोलते, यांनी केले तर आभार प्रदर्शन प्रा.संजय लांडगे यांनी मानले. कार्यक्रमाला विलास कसबे, नीलिमा आहेरकर, वैशाली रांगणेकर, विशाल कार्लेकर, संतोष मोरे,दिलीप गांगुर्डे शिक्षक, शिक्षकेतर कर्मचारी मोठया संख्यने उपस्थित होते.

                  लोकराज्य अंकावरील परीक्षेत
५०० हून अधिक विद्यार्थ्यांचा सहभाग
            वाघिरे महाविद्यालयाच्या वतीने लोकराज्य वाचक मेळाव्याच्या निमित्ताने लोकराज्य अंकावर आधारित परीक्षेचे आयोजन करण्यात आले होते. विद्यार्थ्यांनी या परीक्षेस भरघोस प्रतिसाद दिला. ५०० हून अधिक विद्यार्थ्यांनी परीक्षेत सहभाग घेतला होता.
                  लोकराज्य अंकांचे प्रदर्शन
लोकराज्य वाचक अभियानांतर्गत महाविद्यालयात लोकराज्य च्या विविध अंकाचे प्रदर्शन भरवण्यात आले होते. अनेक विद्यार्थी व विद्यार्थिनींनी प्रदर्शनास भेट देवून अंकांची पहाणी केली. तसेच वर्गणीदार म्हणून नावनोंदणीही केली.

पुणे,दि.6 :- मुख्य निवडणूक अधिकारी, महाराष्ट्र राज्य यांच्यावतीने यशदा येथे निवडणूक विषयक इव्हीएम व व्हीव्हीपॅट याबाबत आज राज्यस्तरीय कार्यशाळेचे आयोजन करण्यात आले होते. या कार्यशाळेत  सर्व जिल्हाधिकारी व उपजिल्हा निवडणूक अधिकारी सहभागी झाले होते. श्री.अश्विन कुमार, मुख्य निवडणूक अधिकारी, महाराष्ट्र राज्य यांच्या उपस्थितीत यावेळी सर्व अधिकाऱ्यांना प्रशिक्षण देण्यात आले. यावेळी उपस्थित जिल्हाधिकारी व उपजिल्हा निवडणूक अधिकारी यांना नव्याने प्राप्त झालेल्या एमथ्री-इव्हीएम व व्हीव्हीपॅट मशीन संदर्भात  “फर्स्ट लेव्हल चेकिंग” (एफएलसी) ची तांत्रिक माहिती देण्यात आली. भारत निवडणूक आयोगाकडील तज्ञ अधिकारी तसेच बीईएल, बेंगळूरु येथील तज्ञांनी जिल्हाधिकारी व उपजिल्हा निवडणूक निर्णय अधिकारी यांना, ही यंत्रणा नेमकी कशी कार्य करते यांची माहिती दिली. तसेच तज्ञ अभियंत्यांमार्फत प्रात्याक्षिक दाखविण्यात आले आणि सखोल माहिती देण्यात आली.

4 व 5 सप्टेंबर रोजी राज्यातील सर्व उपजिल्हा निवडणूक अधिकारी व निवडक मतदार नोंदणी अधिकारी यांना निवडणूक आयोगातर्फे यशदा येथे आयोजित कार्यशाळेत प्रशिक्षण देण्यात आले. नवतरुण मतदारांमध्ये निवडणूक विषयक जागरुकता निर्माण होण्यासाठी भारत निवडणूक आयोगाने तयार केलेली माहिती पुस्तिका देऊन, इयत्ता नववी ते बारावीपर्यतच्या तरुण मतदारांना निवडणूक विषयक माहिती सहज व सोप्या पध्दतीने उपलब्ध व्हावी यासाठी विविध प्रकारच्या खेळांच्या माध्यमातून माहिती कशी देता येईल तसेच मतदार साक्षरता क्लब याबद्दल प्रशिक्षण देण्यात आले. अपंग कल्याण आयुक्त यांच्या सहकार्याने दिव्यांग व्यक्तींना निवडणूक प्रक्रियेमध्ये सामावून घेण्यासाठी निवडणक अधिकाऱ्यांना सविस्तर प्रशिक्षण यावेळी देण्यात आले असे, उपजिल्हा निवडणूक अधिकारी मोनिका सिंह यांनी कळविले आहे.