पुणे-येरवडा येथे लिव्ह इन रिलेशनशीप मध्ये राहणाऱ्या 40 वर्षीय महिलेचा किरकोळ वादातून मारहाण करून खून करण्यात आल्याची धक्कादायक घटना उघडकीस आली. याप्रकरणी आरोपी रवी साबळे (वय- 35) आणि त्याचे वडील रमेश साबळे (65) या दोघांना येरवडा पोलिसांनी अटक केले आहे. आराेपींनी सदर महिलेचा खून केल्यानंतर तिचा मृतदेह घरातच दाेन ते तीन दिवस ठेवला. त्यानंतर त्यातून दुर्गंधी येऊ लागल्याने मृतदेह एका स्मशानभूमीजवळील उकीरड्यावर फेकून दिल्याचा खळबळजनक प्रकार निष्पन्न झाला आहे.

पोलिसांनी दिलेल्या माहितीनुसार, मयता महिला आणि आरोपी रवी साबळे हे लिव्ह-इन रिलेशनशिपमध्ये राहत होते. 14 नोव्हेंबर रोजी किरकोळ घरगुती वादातून त्यांच्या दोघांमध्ये भांडण झाले. या वादादरम्यान लाकडी दांडके, विटेने मारहाण केली. या बेदम मारहाणीमुळे महिलेचा मृत्यू झाला असल्याची प्राथमिक माहिती तपासात समोर आली आहे. मृतदेह मिळून आल्यानंतर ताे ससून रुग्णालयात शवविच्छेदनासाठी पाठविण्यात आले. मृत्यूचे कारण ब्लंट फोर्स ट्रॉमा असे नमूद करण्यात आले आहे.

घटनेनंतर मृतदेह लपवण्याच्या उद्देशाने 14 ते 15 नोव्हेंबर दरम्यान मध्यरात्री 2 ते 3 वाजण्याच्या सुमारास आरोपींनी रिक्षा मध्ये मृतदेह टाकून तो लाेहगाव वाघाेली रस्त्यावर स्मशान-भूमीचा जवळील कचराकुंडी जवळ फेकून दिला. डंपिंग स्पॉटवरील सीसीटीव्ही फुटेज आणि तांत्रिक तपासाद्वारे पोलिसांनी मृत महिला आणि दोन्ही आरोपींची ओळख पटवली. त्यानंतर दोघांना ताब्यात घेऊन चौकशी सुरू आहे. या प्रकरणी येरवडा पोलिस ठाण्यात खुनाचा गुन्हा दाखल करण्यात आला आहे. येरवडा पोलिस ठाण्याचे पोलिस निरीक्षक (गुन्हे) विजय ठाकर पुढील तपास करत आहे.

‘ज्याच्या हाती ससा तोच …’ ..या प्रकरणात सरकारी जमीन खाजगी दाखविण्याचा उद्योग होत असल्याचे स्पष्ट होत आहे. दरम्यान राज्य सरकारला आपल्याकडे आपल्या मालकीची किती जमीन आहे ? कोण कोणत्या खात्याकडे ती- किती आहे? याचा काहीही तपास नसल्याचे दिसून आले आहे. आणि अशा सरकारी म्हणजेच ‘बेवारशी’ जमिनी खाजगी व्यक्तींच्या नावावर घालण्याचे घाट प्रशासनातून होत असल्याने अरुण भाटिया पुण्याचे विभागीय आयुक्त असताना त्यांनी प्रशासनातील ९० टक्के अधिकारी निलंबित करण्याचे प्रयत्न देखील केले होते .’ज्याच्या हाती ससा तोच …’ या नियमाने भू माफिया निव्वळ राजकारण्यात आणि गुन्हेगरात नसून प्रशासनात देखील असल्याचे वारंवार स्पष्ट झाले आहे.

पुणे- मुंढवा येथील शासकीय भूखंडाच्या कथित गैरव्यवहार प्रकरणात राज्य सरकारने नियुक्त केलेल्या एका समितीने उपमुख्यमंत्री अजित पवार यांचे सुपुत्र पार्थ पवार यांना कथितपणे क्लीन चिट दिली आहे. या समितीने या प्रकरणातील मुख्य खरेदीदार शीतल तेजवानी व विक्रेते दिग्विजय पाटील यांच्यावर सदर भूखंड शासकीय असल्याची माहिती असतानाही ती खासगी मालमत्ता असल्याचे दाखवून विक्रीचा व्यवहार केल्याचा ठपका ठेवला आहे. यामुळे पार्थ पवार यांची या प्रकरणातून अलगद सुटका झाल्याचा दावा केला जात आहे. दरम्यान, मुंढवा प्रकरणात पार्थ पवारांना मिळालेली क्लीनचिट ही महाराष्ट्राचे प्रशासन रसातळाला गेल्याचे लक्षण असल्याची टीका माहिती अधिकार कार्यकर्ते विजय कुंभार यांनी केली आहे.

उपमुख्यमंत्री अजित पवार यांचे चिरंजीव पार्थ संचलाक असलेल्या अमेडिया कंपनीने कोरेगाव पार्क परिसरातील महार वतनाची 40 एकर जमीन खरेदी केल्याचा प्रकार काही दिवसांपूर्वी उजेडात आला होता. कंपनीच्या वतीने भागीदार दिग्विजय पाटील व कुलमुखत्यारपत्र धारक शीतल तेजवानी यांच्यात दस्त नोंदणीचा व्यवहार झाला होता. या प्रकरणाची चौकशी करण्यासाठी उपमहानिरीक्षक राजेंद्र मुठे यांच्या अध्यक्षतेखाली त्रिस्तरीय समिती स्थापन करम्यात आली होती. या समितीने मुद्रांक महानिरीक्षक व मुद्रांक नियंत्रक रवींद्र बिनवडे यांना मंगळवारी आपला अहवाल सादर केला.

काय आहे मुठे समितीच्या अहवालात?

या अहवालात सरकारचा महसूल बुडवण्यात आल्याचा ठपका ठेवण्यात आला असून, ही जमीन शासकीय असल्याचे स्पष्टपणे नमूद करण्यात आले आहे. या अहवालानुसार, अमेडिया कंपनी व शीतल तेजवानी यांच्यात खरेदी विक्री झालेल्या व्यवहाराचा दस्त 700 हून अधिक पानांचा आहे. दस्तासोबत जोडलेल्या 7/12 वर मुंबई सरकार असे नमूद असून त्याला कंस आहे. त्यामुळे त्या जागेची मालकी ही सरकारची असल्याचे स्पष्ट होते. पण त्यानंतरही सातबारा बंद असातनाही तो दस्ताला जोडण्यात आला.

विशेषतः महार वतनाच्या जमीन व्यवहारात मुद्रांक शुल्कात माफी मिळवताना जिल्हा उद्योग केंद्राचे पात्रता प्रमाणपत्र जोडले नसल्याचे दिसून आले आहे. त्यामुळे दस्त नोंदणीवेळी दिलेली मुद्रांक शुल्क माफी ग्राह्य ठरत नाही, असा निष्कर्षही चौकशी समितीने मांडला आहे. मुद्रांक शुल्क माफी घेऊन सरकारचा महसूल बुडवल्याचा ठपकाही चौकशी समितीने आपल्या अहवालात ठेवला आहे.

दस्त नोंदणी करताना तत्कालीन दुय्यम निबंधकांनी म्युटेशन (नावंत्रण) प्रक्रिया टाळण्यासाठी ‘स्किप’ हा पर्याय वापरला. त्यातून मिळकत जंगम (मूव्हेबल) असल्याचे भासवून नोंदणी पूर्ण केली.

सरकारी जमीन असतानाही मुद्रांक शुल्क माफी मिळवण्यासाठी इरादा पत्र जोडले. पण जिल्हा उद्योग केंद्राचे पात्रता प्रमाणपत्र मात्र जोडले नाही. त्यामुळे शासनाचा कोट्यवधी रुपयांचा महसूल बुडाला.

एकूण 89 कुलमुखत्यारपत्रे दस्तासोबत जोडली गेली. यापैकी फक्त 34 नोंदणीकृत, उरलेली नोटरीकृत. 34 पैकी कोणत्याही पत्रात मोबदला (पैसा) देण्याचा उल्लेख नाही. तर 55 कुलमुखत्यारपत्रे विकास करारावर आधारित असून ती योग्य मुद्रांक शुल्क भरलेली नाहीत. पॅरामाउंट इन्फ्रास्ट्रक्चर कंपनीने अशोक गायकवाड व इतर 271 मालकांच्या वतीने शीतल तेजवानी यांना ही पत्रे दिली होती. दस्ताच्या अंतिम मसुद्यात बदल करून जमीन वैयक्तिक मालमत्ता असल्याचे दाखवण्यात आले.

मुठे समितीचा अहवाल एकटाच अंतिम नाही. जमाबंदी आयुक्तांची समिती आणि जिल्हाधिकाऱ्यांची स्वतंत्र समिती हे प्रकरण तपासत असून त्यांचे अहवाल लवकरच सादर होणार आहेत. या दोन्ही अहवालांमध्ये कोण दोषी ठरते आणि कोणाला क्लीन चीट मिळते, याकडे सर्वांचे लक्ष लागले आहे.

दुसरीकडे, पार्थ पवारांना देण्यात आलेली क्लीनचिट म्हणजे केवळ विनोद नाही, तर ते महाराष्ट्राचे प्रशासन रसातळाला गेल्याचे लक्षण आहे, अशी जोरदार टीका माहिती अधिकार कार्यकर्ते विजय कुंभार यांनी केली आहे. प्रशासनाने राजकारणी व घराणेशाहीशी संगनमत केल्याचा आरोपही त्यांनी या प्रकरणी केला आहे. ते म्हणाले, मुंढवा जमीन घोटाळ्यात पार्थ पवारांना दिलेली “ क्लिन चिट” म्हणजे केवळ विनोद नाही तर ते महाराष्ट्राचं प्रशासन रसातळाला गेल्याचं लक्षण आहे.

घोटाळ्याची सुरुवात ज्यातून झाली त्या LLP च्या ठरावावर त्यांची स्वतःची सही आहे. जिल्हा उद्योग केंद्राकडून LOI, करोडोंच्या स्टॅम्प ड्युटीतून सूट, रजिस्ट्रेशनची सर्व प्रक्रिया, प्रत्येक कागद त्यांच्या स्वाक्षरीमुळे शक्य झाला. आणि तरीही ते ‘निर्दोष’. ही चौकशी नाही. हे प्रशासनाने राजकारण्यांशी – घराणेशाहीशी केलेलं संगनमत आहे. कागदपत्रांचा मार्ग सुरू होतो आणि संपतो तो पार्थ पवारांवर. त्यामुळे क्लिन चिट देणं म्हणजे त्या व्यवहारात थेट सहभागी असणं, असे कुंभार यांनी म्हटले आहे.

पुणे- महापालिकेने शहरात शेकोटी पेटवण्यावर बंदी घातली आहे. वाढत्या वायू प्रदूषणामुळे आणि श्वसनाचे आजार वाढत असल्याने हा निर्णय घेण्यात आला आहे.महापालिका आयुक्त नवलकिशोर राम यांनी याबाबतचे निर्देश दिले आहेत.अनेक गृहनिर्माण संस्था, व्यावसायिक संकुले आणि निवासी परिसरांमध्ये रात्रीच्या वेळी सुरक्षा कर्मचारी थंडीपासून बचाव करण्यासाठी उघड्यावर लाकूड, कचरा, चिंध्या किंवा कोळसा जाळतात. यातून निघणाऱ्या धुरामुळे शहरातील हवा प्रदूषणात वाढ होत आहे, ज्याचा थेट परिणाम नागरिकांच्या आरोग्यावर होतो.

महापालिकेने स्पष्ट केले आहे की, शेकोट्या पेटवल्यामुळे धूर, कार्बन मोनोऑक्साइड, पीएम १०, पीएम २.५ आणि इतर हानिकारक वायूंचे उत्सर्जन होते. यामुळे श्वसनसंस्थेवर परिणाम होऊन दमा, अस्थमा आणि इतर श्वसनाचे आजार वाढण्याचा धोका निर्माण होतो.शहरातील हवेची गुणवत्ता सुधारण्यासाठी केंद्र आणि राज्य शासनाने विविध कायदे व नियम बनवले आहेत. यामध्ये ‘हवा (प्रदूषण नियंत्रण) अधिनियम, १९८१’, ‘घनकचरा व्यवस्थापन नियम, २०१६’ आणि पर्यावरण, वन व हवामान बदल मंत्रालयाच्या राष्ट्रीय स्वच्छ वायू कार्यक्रमाची मार्गदर्शक तत्त्वे यांचा समावेश आहे. या नियमांनुसार उघड्यावर कोळसा, जैविक पदार्थ (बायोमास), प्लास्टिक, रबर आणि इतर कचरा जाळण्यास मनाई आहे.

या नियमांचे उल्लंघन करताना आढळल्यास कायदेशीर कारवाई केली जाईल. सोसायटीचे वॉचमन, सफाई कामगार, मनपा कर्मचारी किंवा कंत्राटी कामगार नियमांचे उल्लंघन करताना आढळल्यास, पुणे महानगरपालिकेच्या घनकचरा व्यवस्थापन विभागामार्फत त्यांच्यावर दंडात्मक कारवाई केली जाईल, असा इशारा महापालिकेने दिला आहे. त्यामुळे आता नागरिकांना थंडीमध्ये शेकोटी पेटवता येऊ शकणार नाही त्यामुळे अनेकांनी या निर्णयावर नाराजी व्यक्त केली आहे.

पुणे, दि. 18: जम्मू येथील वैष्णो धाम, कालिका धाम येथे होणाऱ्या ६९ व्या राष्ट्रीय शालेय टेबल टेनिस स्पर्धेसाठी महाराष्ट्राचा १९ वर्षाखालील मुला-मुलींचा संघ रवाना झाला. या संघाला क्रीडा आयुक्त शीतल तेली-उगले, क्रीडा सहसंचालक सुधीर मोरे, जिल्हा क्रीडा अधिकारी जगन्नाथ लकडे यांनी राष्ट्रीय स्पर्धेसाठी शुभेच्छा दिल्या.

यापूर्वी क्रीडा व युवक सेवा संचालनालय, महाराष्ट्र राज्य यांच्यावतीने श्री विठ्ठलराय जोशी चॅरिटेबल ट्रस्टचे क्रीडा संकुल, डेरवण (ता. चिपळूण, जि. रत्नागिरी) येथे राज्यस्तरीय टेबल टेनिस स्पर्धा पार पडल्या. या स्पर्धेतून राष्ट्रीयस्तरासाठी पुढीलप्रमाणे खेळाडूंची निवड करण्यात आली.

राष्ट्रीय स्पर्धेसाठी १९ वर्षाखालील मुलामध्ये तेजस हर्षद वासणीकर, मयूरेश विवेक सावंत, प्रणव जयदिप घोळकर, रामानुज अमित जाधव आणि वेदांत नागेश खळदे तर १९ वर्षाखालील मुलीमध्ये उर्दी सिद्धार्थ चुरी, अन्वी शैलेश गुप्ते, अनुष्का संदीप पाटील, निहाली निवास पाटील आणि जान्हवी पराग फणसे यांचा समावेश आहे. संघासोबत प्रशिक्षक अनिल शंकरराव बंदेल, असद अली अब्दुल लतीफ सय्यद तसेच व्यवस्थापक कविता धोंडीराम देसाई आहेत.

याप्रसंगी खेळाडू, प्रशिक्षक व व्यवस्थापकांना जिल्हा क्रीडा अधिकारी जगन्नाथ लकडे यांच्या हस्ते गणवेश किटचे वाटप करण्यात आले. क्रीडा अधिकारी अश्विनी शिवानंद हत्तरगे आणि नानासाहेब तलवाडे उपस्थित होते.

पुणे-

महाराष्ट्र बॉक्सिंग संघटनेच्या निवडणुकीनंतर दिनांक 17 नोव्हेंबर रोजी मुंबई येथे आयोजित करण्यात आलेली प्रथम कार्यकारिणी बैठक आमदार मा. प्रवीण दरेकरजी यांच्या अध्यक्षतेखाली अत्यंत शिस्तबद्ध व सुव्यवस्थित पद्धतीने संपन्न झाली.

या बैठकीत विविध समित्यांची प्रभावी पुनर्रचना व महत्त्वपूर्ण पदनियुक्ती जाहीर करण्यात आली. त्यानुसार, महाराष्ट्र बॉक्सिंग कोचिंग कमिशनच्या अध्यक्षपदी पुणे शहरातील आंतरराष्ट्रीय प्रशिक्षक श्री. विजय गुजर यांची एकमताने निवड करण्यात आली.

श्री. गुजर गेल्या २२ वर्षांपासून सातत्यपूर्णपणे बॉक्सिंग प्रशिक्षक म्हणून कार्यरत असून त्यांच्या मार्गदर्शनाखाली अनेक राज्य, राष्ट्रीय व आंतरराष्ट्रीय स्तरावर उल्लेखनीय कामगिरी करणारे खेळाडू घडले आहेत. त्यांच्या प्रशिक्षणाखाली दोन छत्रपती राज्य क्रीडा पुरस्कार विजेते खेळाडू तयार झाले असून, अनेक खेळाडू विविध शासकीय सेवांमध्ये यशस्वीरीत्या रुजू झाले आहेत.

सध्या श्री. विजय गुजर पुणे शहर बॉक्सिंग संघटनेचे सचिव म्हणूनही अत्यंत निष्ठेने व कार्यतत्परतेने जबाबदारी पार पाडत आहेत.
पुणे शहर बॉक्सिंग संघटनेचे सर्व पदाधिकारी व अध्यक्ष मा. अविनाशजी बागवे यांनी त्यांच्या या नियुक्तीबद्दल मनःपूर्वक अभिनंदन करून आगामी कार्यासाठी हार्दिक शुभेच्छा दिल्या.

पुणे-असीम सरोदे यांची सनद रद्द करण्याच्या बार कौन्सिल ऑफ महाराष्ट्र अँड गोवाच्या निर्णयाला बार कौन्सिल ऑफ इंडियाने स्थगिती दिली आहे. यामुळे असीम सरोदे यांना मोठा दिलासा मिळाला आहे. प्रस्तुत प्रकरण खरोखरच व्यावसायिक गैरवर्तनुकीचे आहे का? याचा सखोल अभ्यास करूनच योग्य तो निर्णय घ्यायला हवा होता, असे मत बार कौन्सिल ऑफ इंडियाने या प्रकरणी म्हटले आहे.

असीम सरोदे यांनी एका सार्वजनिक कार्यक्रमात न्यायव्यवस्था, राज्यपाल व विधानसभा अध्यक्ष यांच्या संदर्भात आक्षेपार्ह विधान केले होते. त्यामुळे महाराष्ट्र कौन्सिल ऑफ महाराष्ट्र अँड गोवाने त्यांची वकिलीची सनद 3 महिन्यांसाठी रद्द केली होती. सरोदे यांनी या निर्णयाला बार कौन्सिल ऑफ इंडियाकडे (बीसीआय) आव्हान दिले होते. त्यांच्या अर्जावर सुनावणी करताना बार कौन्सिल ऑफ इंडियाने महाराष्ट्र कौन्सिल ऑफ महाराष्ट्र अँड गोवाच्या निर्णयाला स्थगिती दिली. बीसीआयने या प्रकरणी महाराष्ट्र बार कौन्सिलचे चांगलेच कान टोचल्याची माहिती आहे. हे प्रकरण खरोखरच व्यावसायिक गैरवर्तनुकीचे आहे का? याचा सखोल तपास करूनच योग्य तो निर्णय घ्यायला हवा होता, असे निरीक्षण या प्रकरणी बीसीआयने नोंदवले.

वकील असीम सरोदे यांनी बार कौन्सिल ऑफ इंडियाच्या निर्णयावर आनंद व्यक्त केला आहे. सत्याचा विजय होण्याची सुरुवात कधीतरी होत असते. बार कौन्सिल ऑफ इंडियाचे आभार. मी पुन्हा येतोय, असे ते म्हणालेत.

असीम सरोदे यांनी एका सार्वजनिक कार्यक्रमात न्यायव्यवस्था, राज्यपाल व विधानसभा अध्यक्ष यांच्याविषयी काही आक्षेपार्ह विधाने केली होती. त्यांच्या या विधानांमुळे न्याय व्यवस्थेचा अवमान झाला असून, न्यायालयांविषयी अविश्वास निर्माण झाला आहे, अशी तक्रार एका व्यक्तीने बार कौन्सिलकडे केली होती. या प्रकरणी असीम सरोदे यांना 19 मार्च 2024 पर्यंत लेखी माफी मागण्याची संधी देण्यात आली. पण त्यांनी माफी मागण्यास ठाम नकार दिला. त्यामुळे महाराष्ट्र व गोवा बार कौन्सिलने या तक्रारीवर कारवाई करत त्यांची वकिलीची सनद 3 महिन्यांसाठी रद्दबातल केली होती.

ॲड. डी. बी. सोनवणे हे आंबेडकर यांच्या विचारांचे वारसदार : राज अहेरराव

ॲड. डी. बी. सोनवणे लिखित चार पुस्तकांचे प्रकाशन

पुणे : संत, महापुरुषांची आज समाजा-समाजात वाटणी झाली आहे. समाज शिक्षित, संघटीत झाला पाहिजे, अशी डॉ. बाबासाहेब आंबेडकर यांची अपेक्षा होती. पण तसे होताना आजही दिसत नाही. डॉ. आंबेडकर यांचे पुतळे उभारण्यापेक्षा त्यांच्या साहित्यातील विचार अंगीकारले गेले पाहिजेत, अशी अपेक्षा ज्येष्ठ साहित्यिक राज अहेरराव यांनी व्यक्त केली. महापुरुषांच्या अंत:करणातील भाव ॲड. डी. बी. सोनवणे यांनी आपल्या लेखनातून उतरविले असून ते खऱ्या अर्थाने डॉ. आंबेडकर यांचा वारसा चालवीत आहेत, असे गौरवोद्‌गारही त्यांनी काढले.

ज्येष्ठ लेखक ॲड. डी. बी. सोनवणे लिखित ‘सम्राट अशोक : परिवर्तनाचा पुरस्कर्ता’, ‘वाळवंटातील वृक्ष’, ‘संघर्षातून उमललेलं असित्व’ आणि ‘स्त्री’ या पुस्तकांचे प्रकाशन सोमवारी राज अहेरराव यांच्या हस्ते झाले. त्यावेळी ते बोलत होते. प्रा. नीलिमा फाटक, मोहन वाडेकर, डॉ. सुहासिनी धिवार, ॲड. केशव गाडे मंचावर होते. एस. एम. जोशी कॉन्फरन्स हॉल येथे कार्यक्रमाचे आयोजन करण्यात आले होते. रोहिणी पब्लिकेशनतर्फे पुस्तके प्रकाशित करण्यात आली आहेत.

अंत:करणातील भाव शब्दातून उमटवितो तो खरा लेखक असे सांगून राज अहेरराव म्हणाले, संत, महापुरुषांच्या विचारांचा बोलण्यापूर्वी अभ्यास होताना दिसत नाही. संत, महापुरुषांच्या विचारातून समाज घडवत नाही तोपर्यंत समाज मोठा होत नाही.

प्रा. नीलिमा फाटक म्हणाल्या, समाजातील प्रत्येक स्त्री वंदनीय आहे हे ॲड. सोनवणे यांच्या लिखाणातून प्रकर्षाने जाणवते आहे. ‘स्त्री’ या पुस्तकातील विचार प्रत्येकाने अंगीकारल्यास समाजाचा सर्वांगिण विकास होईल.

मोहन वाडेकर म्हणाले, ॲड. डी. बी. सोनवणे यांच्या लिखाणावर शाहू, फुले, आंबेडकर यांच्या विचारांचा प्रभाव दिसतो. वडिलांनी केलेल्या कष्टातून प्रेरणा घेऊन त्यांनी लिखाण केले आहे.

डॉ. सुहासिनी धिवार यांनी कौटुंबिक आठवणींना उजाळा देत ॲड. सोनवणे यांनी ऐतिहासिक आणि सामाजिक विषय कौशल्याने हाताळले असल्याचे सांगितले.

कार्यक्रमाचे सूत्रसंचालन सीमा गांधी यांनी केले.

डेक्कन विश्वविद्यालयाचे कुलगुरू डॉ.प्रसाद जोशी ; शुक्ल यजुर्वेदीय माध्यंदिन महाराष्ट्रीय ब्राह्मण मध्यवर्ती मंडळातर्फे विविध वेद पुरस्कार वितरण तसेच पाच वैदिक पाठशाळांना मदतीचा हात
पुणे : ज्ञानपरंपरा हे भारताचे वैशिष्ट्य आहे. ही भूमी भोगभूमी नाही, तर ज्ञानभूमी, तपोभूमी आहे. ज्ञानाचा मूलस्रोत वेद हा आहे. मानवजातीचा सर्वात प्रथम वाङ्मय अविष्कार हे आपले वेद आहे. असे वाङ्मय कोणत्याही देशाला लाभले नाही. समाज धारणेची पायाभूत गोष्ट ही वेद आहेत. वेदांचे संक्रमण एका पिढीकडून दुसऱ्या पिढीपर्यंत सुरु आहे. आजच्या पिढीपर्यंत सुरु असलेली मौखिक परंपरा आहे. गुरुकुल चालविणाऱ्या वेदमूर्ती यांच्याकडे याचे श्रेय जाते, असे मत डेक्कन विश्वविद्यालयाचे कुलगुरू डॉ.प्रसाद जोशी यांनी व्यक्त केले.

शुक्ल यजुर्वेदीय माध्यंदिन महाराष्ट्रीय ब्राह्मण मध्यवर्ती मंडळाच्या वेदविद्या संवर्धन समिती तर्फे आयोजित वेदविद्या पुरस्कार वितरण सोहळा सणस मैदानासमोर, वेदशास्त्रोत्तेजक सभा येथे पार पडला. यावेळी यावेळी सिंघल फाउंडेशन चे मुख्य न्यासी संजय सिंघल, वेदविद्या समिती अध्यक्ष प्रा.रवींद्र मुळे, कार्यवाह श्रीकांत जोशी आदी व्यासपीठावर उपस्थित होते.

कार्यक्रमात वेदमूर्ती विजय भालेराव यांना वैदिक घनपाठी पुरस्कार, वेदमूर्ती राहुल बेळे यांना वैदिक अध्यापक पुरस्कार तसेच अथर्व हरिदास, हर्षद कुलकर्णी, प्रसन्न कुलकर्णी,  सोमनाथ जोशी यांना वैदिक छात्र पुरस्कार प्रदान करण्यात आले. पुरस्काराचे स्वरूप शाल, श्रीफळ व रोख रक्कम असे होते.

याशिवाय श्री राजेश्वर देशमुख शास्त्र पाठशाळा, संत नामदेव महाराज वेद विद्यालय, औंढा नागनाथ, ब्रह्मचैतन्य याज्ञिक पाठशाळा, अध्यात्मिक प्रतिष्ठान, आळंदी, जीवन ज्योती प्रतिष्ठान पिरंगुट या पाच वैदिक पाठशाळांना प्रत्येकी ११ हजार रुपये छात्र भोजनासाठी प्रदान करण्यात आले.  तसेच माणिक शेठ दुधाने यांना ज्ञानेश्वरी प्रदान करण्यात आला. त्याच वेळी कै. रत्नमाला व कै गजानन जोशी स्मरणार्थ दिला जाणारा सेवारत्न पुरस्कार विवेक गोपाळ कुलकर्णी यांना देण्यात आला. पुरस्काराचे स्वरूप शाल, श्रीफळ, मानपत्र आणि रोख रक्कम रू ११,०००/- असे होते.

संजय सिंघल म्हणाले, वेदांच्या संरक्षणासाठी अशोकजी सिंघल यांनी संपूर्ण जीवन व्यतीत केले. त्यांना सर्वजण राम मंदिराच्या विषयाकरिता अधिक ओळखतात. मात्र, त्यांच्या जीवनातील मुख्य कार्य वेदांचे संरक्षण हे होते. वेदांकडून त्यांनी प्रेरणा घेऊन कार्य केले. वेदांमध्ये जी ताकद आहे, त्यांचे उदाहरण म्हणजे माझे काका अशोक सिंघल हे आहेत. त्यामुळे आम्ही अखिल भारतीय स्तरावर पुरस्कार सुरु केले. भारताच्या ज्ञान परंपरा जगाचा उद्धार करेल. त्यामुळे अधिकाधिक लोकांनी वेदांशी जोडले जाणे आवश्यक आहे. निसर्गासोबत जगण्याचे ज्ञान भारतीयांकडे आहे. भारतीय ज्ञान परंपरेला पुढे नेण्यातच जगाचे कल्याण आहे, असेही त्यांनी सांगितले.

डॉ. रवींद्र मुळे यांनी प्रास्ताविक केले. श्रीकांत जोशी यांनी संस्थेची माहिती दिली. वेदमूर्ती कुणाल शिंगणे यांनी सूत्रसंचालन केले.

पुणे : सामाजिक क्षेत्रात बहुमोल योगदान देणाऱ्या रोटरी डिस्ट्रिक्टतर्फे डिसेंबरमध्ये आयोजित करण्यात आलेल्या दुसऱ्या रोटरी डिस्ट्रिक्ट मराठी साहित्य संमेलनात ज्येष्ठ अभिनेते, व्याख्याते शरद पोंक्षे यांचा व्होकेशनल अवॉर्डने सन्मान केला जाणार आहे.  

संमेलन शनिवार, दि. 20 आणि रविवार, दि. 21 डिसेंबर 2025 रोजी कोथरूडमधील यशवंतराव चव्हाण नाट्यगृहात प्रसिद्ध कवी, गीतकार प्रा. प्रवीण दवणे यांच्या अध्यक्षतेखाली आयोजित करण्यात आले आहे. व्होकेशनल अवॉर्डचे वितरण श्री शिव प्रतिष्ठान हिंदुस्तानचे संस्थापक, व्याख्याते संभाजी भिडे गुरुजी यांच्या हस्ते होणार असल्याची माहिती रोटरी डिस्ट्रिक्ट 3131चे प्रांतपाल संतोष मराठे आणि संमेलन प्रमुख मधुमिता बर्वे यांनी निवेदनाद्वारे कळविली आहे.

वाचन संस्कृतीची निकोप वाढ व्हावी, रोटेरियन्समध्ये साहित्याची अभिरुची वाढावी आणि रसिकांना साहित्याच्या माध्यमातून निखळ आनंद घेता यावा या उद्देशाने संमेलनाचे आयोजन करण्यात आले आहे. उद्घाटन सत्रासह बारा सत्रांमध्ये आयोजित करण्यात आलेल्या यंदाच्या संमेलनात नामवंत साहित्यिक, कलावंत, अभ्यासक , विचारवंत, कवी यांचा सहभाग असणार आहे.

पुणे :
महाराष्ट्र शासनाने राज्यासाठी सुधारित युवा धोरण तयार करण्यासाठी स्थापन केलेल्या उच्चस्तरीय समितीत विशेष निमंत्रित सदस्य म्हणून पुण्यातील युवक कार्यकर्ते सनी विनायक निम्हण यांची निवड करण्यात आली आहे.

शालेय शिक्षण व क्रीडा विभागाने जारी केलेल्या शासन निर्णयानुसार ही नियुक्ती करण्यात आली आहे. आमदार संग्राम जगताप पत्रकार विनोद राऊत आणि पत्रकार भगवान परब यांचाही या समितीत समावेश आहे.

सनी निम्हण हे पुणे महानगरपालिकेतील माजी नगरसेवक असून, सोमेश्वर फाउंडेशनच्या माध्यमातून विविध प्रकारचे सामाजिक उपक्रम राबवितात. राज्यातील युवकांसाठी सामाजिक, शैक्षणिक, सांस्कृतिक, क्रीडा, उद्योग आणि स्वयंरोजगार या विविध क्षेत्रांत सातत्याने केलेल्या उल्लेखनीय कामगिरीमुळे निम्हण यांची या समितीत विशेष निमंत्रित म्हणून निवड करण्यात आली. युवा विकासासंबंधी धोरणात्मक स्तरावर काम करणाऱ्या या समितीत निम्हण यांचा सहभाग महत्त्वपूर्ण ठरणार आहे.

या नियुक्तीबद्दल प्रतिक्रिया देताना सनी विनायक निम्हण म्हणाले,
“मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार तसेच राज्याचे क्रीडामंत्री मधुकर कोकाटे यांनी दाखविलेला विश्वास मी सार्थ ठरवेन. युवक धोरण म्हणजे राज्याच्या भविष्यासाठी दिशा देणारे दस्तऐवज असून त्यात काम करण्याची संधी मिळणे ही माझ्यासाठी मोठी जबाबदारी आहे. मुख्यमंत्री देवेंद्र फडणवीस यांचे मी यासाठी विशेष आभार मानतो.”

सनी विनायक निम्हण यांच्या समावेशामुळे युवकांच्या विविध गरजा, रोजगार संधी, कौशल्यविकास, सामाजिक सहभाग आणि क्रीडा प्रोत्साहन या क्षेत्रांवर समिती अधिक प्रभावीपणे काम करेल, अशी अपेक्षा व्यक्त होत आहे.